Inisitituti
Mataupu 31: Alema 36–39

Mataupu 31

Alema 36–39

Folasaga

I nei mataupu, na tuu atu ai e Alema ana apoapoaiga mulimuli i ona atalii, o Helamana, Sepulona, ma Korianetona. O apoapoaiga a Alema e aofia ai aoaoga faamomoiloto e faatatau i le faamagaloga o agasala, o le mana o tusitusiga paia e liua ai, tumau, ma le matuia o le solitulafono o feusuaiga. E pei foi e Helamana, Sepulona, ma Korianetona, o le a mafai foi e tamaiti ona tauaveina sili atu le galuega a le Alii a o latou malamalama ma faaaoga nei aoaoga faavae. A o latou suesue ma talanoaina lenei apoapoaiga, e faatatau patino lava i le tulafono o le legavia, ia faaeteete e aua nei faatagaina i latou e talanoa e uiga i a latou solitulafono patino.

O Nisi o Aoaoga Faavae ma Mataupu Faavae

  • Pe a tatou salamo, e aveesea e le Togiola le tiga ma le oona ma aumai ai le olioli sili (tagai i le Alema 36:12–21).

  • O afioga a Keriso e taitai atu ai i le ola e faavavau (tagai i le Alema 37).

  • Tumau ma le faamaoni e aumai ai faamanuiaga sili (tagai i le Alema 38).

  • O agasala o feusuaiga o se mea inosia lea i fofoga o le Alii (tagai i le Alema 39:1–11).

Fautuaga mo le Aoaoga

Alema 36–18. Vaaiga Lautele

Valaaulia tamaiti e tomanatu i se taimi i le lumanai o le a latou mananao ai e tuu atu la latou fautuaga mulimuli ma molimau i a latou fanau.

  • O le a se fautuaga o le a e faasoa atu?

  • O a ni lapataiga o le a e tuuina atu?

Tusi tali a tamaiti i luga o le laupapa. Faamalamalama atu o le aso o le a suesue ai e tamaiti ma talanoaina upu mulimuli a Alema ma le molimau mo ona atalii taitoatasi e toatolu.

Fai i tamaiti e faitau nisi o uluai upu o le apoapoaiga a Alema i ona atalii: Alema 36:1–3; 38:1, 5; 39:1.

  • Aisea na faamamafa atu ai e Alema le taua o le tausia o poloaiga ma le faalagolago i le Atua mo le tausiga?

  • E faapefea ona faatatau le apoapoaiga a Alema i nei fuaiupu ia i tatou i nei aso?

  • I nai tausaga talu ona maua lenei apoapoaiga, na taitaia ai e Helamana ia atalii o Aneti-Nifae-Liae i le taua (tagai i le Alema 53:14–19). Na faapefea ona fesoasoani le apoapoaiga a lona tama ia te ia i lenei tiutetauave?

Faamalamalama atu e tasi le isi mafuaaga na faasoa atu ai e Alema lana molimau o le fesoasoani atu lea i ona atalii ia malamalama e na te le o fautuaina i latou mai lona lava atamai ae mai musumusuga ma faaaliga mai le Atua (tagai i le Alema 36:4–5; 38:6). O se vaega o le apoapoaiga a Alema i ona atalii, na ia tau atu ai lona liua ma faasoa atu lana molimau ia Iesu Keriso (tagai i le Alema 36:3–22; 38:6–9; 39:15). O le mea na liliu ai le olaga o Alema ona sa ia manatuaina mea na aoao atu e lona tama e uiga ia Iesu Keriso ma le taimi na ia liliu atu ai i le Faaola mo se fesoasoani. E lei maua e Alema se fiafia vagana ina ua ia liliu atu i le Faaola.

  • Aisea e taua ai mo tamaiti le faalogo atu i o latou matua o tuu mai a latou molimau?

Faamalamalama ina ua ta’u atu e Alema le tala o lona liua, na ia faasoa atu aoaoga faavae faamomoiloto ma le loloto na faamanuia ai olaga o ona atalii. E mafai foi ona faamanuiaina o tatou olaga i nei aoaoga— e mafai ona latou faateleina lo tatou malamalama i le Togiola. Mo lenei mafuaaga, o le tele o lenei lesona o le a taulai atu ai i mea tatou te aoaoina e uiga i le Togiola mai aafiaga o Alema.

Alema 36:12–21. Pe a Tatou Salamo, e Aveesea e le Togiola le Tiga ma le Oona ma Aumai ai le Olioli Sili

Faamalamalama atu ina ua ta’u atu e Alema lona liua, na ia faamatalaina le tiga na ia oo i ai ina ua fetalai atu le agelu ia te ia. Tuu atu se taimi i tamaiti e faitau le leoa ai le Alema 36:12–21.

  • O a upu ma fuaiupu na faaaoga e Alema e faamatala ai lona tiga?

  • O a mea e mafai ona tatou aoaoina mai nei fuaiupu e uiga i aafiaga o le agasala?

Ina ia fesoasoani i tamaiti o le vasega ia iloa sa i ai se taunuuga lelei o puapuaga o Alema—ma ia fesoasoani ia i latou ia iloa o o latou lagona o le tausalaina e mafai ona taitai atu ai i taunuuga lelei—fai atu fesili nei:

  • O le a le faamoemoega o tiga faaletino i o tatou olaga? (Lisi otooto tali a tamaiti i luga o le laupapa.)

  • E faapefea ona i ai se faamoemoega tutusa faapea o le tiga faaleagaga?

  • O le a le taunuuga o le tiga faaleagaga o Alema? Pe a tatou lagonaina lea tiga faaleagaga, o le a se mea e mafai ona tatou aoaoina mai le faataitaiga a Alema?

Ina ia toe faamalosia le talanoaga na muamua atu, tuu i se tamaitiiti e faitau le saunoaga lenei a Peresitene Boyd K. Packer o le Korama a Aposetolo e Toasefululua:

“E i ai se polokalama fafagu i totonu o lou tino ma lou agaga. E i ai i lou tino se tiga; e i ai i lou agaga se lagona tausalaina—po o se tiga faaleagaga. E ui ina lē mālie le tiga po o le lagona tausalaina, ma e mafai foi ona faataumaoia ai pe a ogaoga tele, ae o se puipuiga, aua e faatatagi ai le fafagu ‘Aua e te toe faia lena mea!’

“Ia e faafetai mo na mea uma e lua. … Ia e aoao e te faalogo i lena leo faaleagaga o le lapataiga o i totonu ia te oe” (i le Lipoti o le Konafesi, Ape. 1989, 72; po o le Liahona, Iul. 1989, 72).

Valaaulia tamaiti e faitau le saunoaga a Peresitene Spencer W. Kimball o loo i le itulau 246 i le tusi lesona a tagata o le vasega. Fai atu ia i latou e saili mo matafaioi a Iesu Keriso i lo tatou salamo.

  • E tusa ai ma le saunoaga a Peresitene Kimball, e faapefea ona maua e tagata solitulafono uma se toomaga?

  • E faapefea ona e faamalamalamaina le fesootaiga i le va o le Togiola a Iesu Keriso ma le toomaga na maua e Alema?

  • O a ni auala e aumai ai e le salamo le olioli?

Ina ia fesoasoani i tamaiti ia malamalama atili i le matafaioi a Iesu Keriso i lo tatou salamo, valaaulia se tamaitiiti e faitau le saunoaga a Peresitene Ezra Taft Benson o loo i le itulau 246 i le tusi lesona a tagata o le vasega.

  • E tusa ai ma le saunoaga a Peresitene Benson, o le a le eseesega i le va o le suiga ma le salamo?

Faitau le saunoaga lenei a Elder Dallin H. Oaks o le Korama a Aposetolo e Toasefululua (o loo maua foi i le companion DVD A):

“O le olioli e maua mai le faamagaloga o agasala e sau mai le Agaga o le Alii (tagai i le Mosaea 4:3, 20). O se faataunuuga lea o le folafolaga a le Alii e faapea ‘Ou te tuuina atu ia te oe se vaega o lou Agaga, … e faatumuina foi lou agaga i le olioli’ (MFF 11:13). E pei ona aoao mai le Aposetolo o Paulo, ‘O fua o le Agaga o le alofa, o le olioli, o le filemu’ (Kalatia 5:22). E maua e tagata uma i le ala e tasi—i e mauoa ma e matitiva, i e maualuluga ma e maulalo. O lona tuuina mai o lana meaalofa silisili o le alofa mutimutivale, e ala i le Togiola, ua iloa ai e lē faailoga tagata le Atua” (i le Lipoti o le Konafesi, Oke. 1991, 103–4; po o le Liahona, Ian. 1992, 88).

Fesoasoani i tamaiti ia malamalama o le meaalofa silisili ua mafai ona tuu mai e le Tama ia i tatou o le taulaga togiola a Lona Alo, lea ua mafai ona maua ai lena olioli. E mafai ona e tuu atu lau molimau i le olioli e aumai e le Togiola pe a tatou salamo.

Alma 37. O Afioga a Keriso e Taitai atu ai i le Ola e Faavavau

Tusi le mau faasino lenei i luga o le laupapa (e aunoa ma fuaitau o loo i totonu o puipui):

Alema 37:5–9 (O mea iti ma le faatauvaa ua tutupu mai ai mea tetele; e tatau ona faasaoina tusitusiga paia ona latou te aumaia tagata i se malamalama o le Atua le Tama ma Iesu Keriso ma taitai atu ai i le faaolataga. Manatua o fuaiupu 6–7 o ni mau tauloto .)

Alema 37:34–37 (Aua le faapalapala i galuega lelei; aoao i le poto ina o e taulealea aoao e tausi i poloaiga a le Atua; filifili ma le Atua i au mea uma e te faia, na te faatonu foi ia te oe i mea lelei. Manatua o le fuaiupu 35 o se mau tauloto .)

Alema 37:38–47 (E pei foi ona maua e le aiga o Liae le taitaiga a le Alii e ala i le Liahona pe a latou faamaoni ma filiga, e mafai foi ona tatou maua le taitaiga a le Alii e ala i tusitusiga paia pe a tatou faamaoni ma filiga.)

Vaevae le vasega i ni vaega se tolu. Tuu atu i vaega taitasi e suesue se tasi o poloka mau nei e saili ai mo malamalamaaga e uiga i auala e mafai ai ona tatou maua le afioga a Keriso.

Pe a lava le taimi na tuu atu i tamaiti e suesue ai a latou vaega, tuu atu i vaega taitasi e filifili se tagata e faasoa maia mea na latou maua i le vasega.

Alema 38. Tumau ma le Faamaoni e Aumai ai Faamanuiaga Sili

Faamalamalama atu e mafai ona tatou aoaoina ni mataupu faavae taua a o tatou faatusatusaina Sepulona ia Korianetona.

Tuu atu i tamaiti e faitau le Alema 38:2–3 ma vase lalo o upu ma fuaiupu ia e faamatala ai amioga a Sepulona. Ona tuu atu lea i tamaiti e faitau le Alema 39:1–5 ma vase lalo o upu ma fuaiupu ia e faamatala ai amioga a Korianetona.

Fesoasoani i tamaiti ia malamalama e faapea ona sa tumau ma le faamaoni ia Sepulona, na ia saunia ai e maua faamanuiaga silisili a le Alii. E ui lava sa itiiti se mea na tusia e uiga ia Sepulona, ae o ia o se faataitaiga o le faatuatua.

  • O a ni tofotofoga na mafai ona onosaia e Sepulona ona o lona faatuatua?

Fai i tamaiti e faitau le Alema 63:1–2.

  • O a mea o faaalia mai i nei fuaiupu e uiga i le tumau o Sepulona i lona olaga atoa?

Fai i tamaiti e faamatala mai nisi tagata latou te iloaina e pei o Sepulona—o nisi o le Au Paia faamaoni e le o tele se mea na tusia pe faamatalaina e uiga ia i latou. Valaaulia tamaiti e faasoa mai mea latou te faamemelo ai i nei tagata.

Atonu e aoga le faamanatu i tamaiti na matuai salamo lava Korianetona ma toe foi atu ma auauna i le Alii (tagai i le Alema 49:30; 63:1–2). E manaomia ona malamalama tamaiti e oo lava ia i latou o e agasala matuia e mafai ma e tatau lava ona salamo. E manaomia foi ona faamanatu atu ia i latou na matuai tele le tau o le agasala a Korianetona, ia Korianetona ma i latou uma na aafia i ana faataitaiga lē lelei.

Alema 39:1–11. O Le Agasala o Feusuaiga O se Mea Inosia i Fofoga o le Alii

Faitau le Alema 39:1–4 i tamaiti, ma tuu atu ia i latou e mulimuli i le faitauga, faailoa mai mea sese a Korianetona na taitai atu ai o ia e faia agasala o feusuaiga. Lisi tali a tamaiti i luga o le laupapa. O tali e mafai ona aofia ai e faapea o Korianetona:

  1. E lei mulimuli i faataitaiga a lona uso (fuaiupu 1).

  2. E lei faalogo i upu a lona tama (fuaiupu 2).

  3. Faamaualuga i lona lava malosi ma le poto (fuaiupu 2).

  4. Lafoaia le galuega—tuua se nofoaga o le saogalemu (fuaiupu 3).

  5. Na alu i Sairona, o se nofoaga o faaosoosoga (fuaiupu 3).

  6. Mulimuli atu i isi i le agasala (fuaiupu 4).

Fai i tamaiti pe na faapefea e nei mea sese taitasi ona taitai atu Korianetona e fai le agasala o feusuaiga. Talanoaina ma tamaiti ni auala e mafai ai e nei lava mea sese e tasi ona taitai atu i le agasala i aso nei.

Tuu atu i tamaiti e faitau le Alema 39:5–8.

  • O le a le faamoemoe o Alema na aoao atu ai nei mea ia Korianetona?

Tofi ni tamaiti taitoalua e suesue le Alema 39:9–14. Tuu atu i tamaiti e fai se lisi o mataupu faavae na aoao atu e Alema ia Korianetona e fesoasoani ai ia te ia e salamo i ana agasala. Tuu atu i ni tamaiti taitoalua e lipoti mai i le vasega mea na latou maua.

Fai i tamaiti e faamalamalama mai i a latou lava upu ia uiga o faamatalaga nei mai le fuaiupu 9:

  • “Aua nei toe usiusitai i tuinanau o ou mata.”

  • “Ia e faafiti ia te oe i nei mea uma.” (Tagai i le 3 Nifae 12:29–30 ma le Mataio 16:24 mo fesoasoaniga faaopoopo i lenei faamatalaga.)

O lenei lesona ua maua ai se avanoa lelei e talanoaina ai le faafitauli ua salalau solo o ponokalafi. Ina ia famamafaina le taua o le aloese mai ponokalafi, faitau ma talanoaina upusii o loo i le itulau 251–52 i le tusi lesona a tagata o le vasega. Atonu foi e te manao e faasoa atu le saunoaga lenei a Elder Dallin H. Oaks o le Korama a Aposetolo e Toasefululua (o loo maua foi i le companion DVD B):

“Ia e faia mea uma e te mafaia e aloese ai mai ponokarafi. … Aua lava nei faatagaina soo se tulaga o le faaosoosoga. Ia teena le agasala ma aloese i le taulimaina o ona faatafunaga ua iloaina. O lea, ia tape loa! Pupula ese! Aloese mai ai tusa lava po o le a le tau. Ia taulai atu ou mafaufauga i ala lelei. … Aua e te tagofia ia ponokarafi. Aua e te faaaogaina le mana e faatau ai, e lagolago ai le faaleagaina o uiga mama. Tamaitai talavou, faamolemole ia malamalama afai e le talafeagai lelei ou laei, o loo e faalauteleina lenei faafitauli e ala lea i le avea ma se vaaiga faatosina i nisi o alii e vaai atu ia te oe” (i le Lipoti o le Konafesi, Ape. 2005, 95; po o le Liahona, Me 2005, 90).

  • Na tau atu e Alema ia Korianetona ia “filifili ma [ona] uso matutua i [ana] mea e fai” (Alema 39:10). Aisea o le a fesoasoani ai lenei mea ia Korianetona? I o tatou aso, o ai nisi tagata e mafai ona fesoasoani i se tagata o le Ekalesia o manaomia ona salamo i agasala o feusuaiga?

  • O le a le uiga o le “liliu mai i le Atua ma lou manatu atoa, ma lou loto atoa, ma lou malosi atoa”? (Alema 39:13). E faapefea ona fesoasoani ia i tatou e faatoilalo ia faaosoosoga? O le a se mea e tupu pe ana liliu atu Korianetona ma le le loto i ai i le Alii?

  • E faapefea ona fesoasoani le ta’uta’u atu ma le faailoa o agasala i le salamo? (Tagai Alema 39:5.)

Faamamafa atu le faataumaoi ma le matuia o le agasala o feusuaiga. Molimau atu i le moni aiai o apoapoaiga a Alema i le auala e aloese ai ma salamo i agasala.

Ua mamanuina lenei manatu aoaoina e fesoasoani ai ia te oe e aoao atu e uiga i le matafaioi o tulaga o le alofa molitino o feusuaiga i le ata o le faaolataga.

Tusi le mea lenei i luga o le laupapa: Ua poloaiina e le Alii e faapea o tulaga o le alofa molitino o feusuaiga ua na o le va lava o se tane ma se ava i totonu o noataga o le faaipoipoga. Valaaulia tamaiti e sue i le faamalamalamaga o le tulafono o le ola mama o loo i le itulau 250 i le tusi lesona a tagata o le vasega. Fai atu i se tamaitiiti e faitau mai.

Fai atu i se tamaitiiti e faitau le Alema 39:3–6, ma valaaulia tamaiti e lisi mai agasala matuia e tolu o loo faailoa mai i nei fuaiupu. (Afai e fesili tamaiti pe o le a le uiga o le faafitia o le Agaga Paia, ia faasino atu i latou i le saunoaga a le Perofeta o Iosefa Samita i itulau 251 i le tusi lesona a tagata o le vasega.)

Ina ia fesoasoani i tamaiti ia malamalama i le mafuaaga e matuai matuia ai le agasala o feusuaiga, valaaulia i latou e sue i le itulau 250 i le tusi lesona a tagata o le vasega ma faitau le saunoaga muamua a Elder Jeffrey R. Holland o le Korama a Aposetolo e Toasefululua (o loo maua foi i le companion DVD C). Atonu foi e te manao e faitau le saunoaga lenei a Elder Holland:

“O le tuuina atu o se tulaga matuia i se tuinanau faaletino i se tulaga lautele, o le a le mea o loo taumafai le Atua e tau mai ia i tatou e uiga i lona tulaga i Lana fuafuaga mo alii ma tamaitai uma? Ou te tauina atu ia te outou o loo sa’o lelei le mea o loo Ia faia—o le faufautua mai lea i le fuafuaga lava ia o le ola. Ua manino mai o se tasi o Ona popolega silisili e faatatau i le olaga faaletino o le faapefea lea ona oo mai o se tasi i lenei lalolagi ma le auala e toe alu ese atu ai. Ua Ia faataatiaina ni faatapulaa maoti i nei mataupu” (i le Lipoti o le Konafesi, Oke. 1998, 99; po o le Liahona, Ian. 1999, 90).

  • Aisea e matua taua ai i le Alii le fanau mai i lenei olaga?

Toe faamamafa atu le mea na saunoa ai Elder Holland e uiga i le “auala e oo mai ai se tasi i lenei lalolagi” (fanau mai) ma le “auala e alu ese atu ai se tasi” (oti). Faamalamalama atu o le faalavefau ma le loto i ai i le fanau mai po o le oti o se agasala matuia i fofoga o le Atua. Faasoa atu le saunoaga lenei a Elder Holland:

“O se tasi na te faaaogaina le tino o soo se tasi na tuuina mai i le Atua e aunoa ma se faatagaga paia, ua ia faasaunoa pe faia faatautala le agaga o lena lava tagata, ua faasaunoa pe faia faatautala le faamoemoega autu ma faatulagaga o le olaga” (i le Lipoti o le Konafesi, Oke. 1998, 99; po o le Liahona, Ian. 1999, 90–91).

Ua mamanuina lenei manatu aoaoina e fesoasoani ai ia te oe e aoao atu e uiga i le sootaga i le va o le Togiola a Iesu Keriso ma tulaga o le alofa molitino o feusuaiga.

Faamalamalama atu o le sootaga i le va o le Togiola a Iesu Keriso ma lo tatou faaaogaina o le mana foafoa o se tasi lea o mafuaaga e sili ona paia mo le ola ai i le tulafono o le legavia. Fai atu i se tamaitiiti e faitau le saunoaga lona lua lenei a Elder Holland o loo i le itulau 250 i le tusi lesona a tagata o le vasega (o loo maua foi i le companion DVD D). A o lei faitaua maia, fai i tamaiti e faalogo mo tali i fesili nei (atonu e te manao e tusi ia fesili i luga o le laupapa):

  • O le a le fesootaiga i le va o le taua o agaga ma le Togiola?

  • O a nisi o upu na faaaoga e Elder Holland e faamatala ai le matuia tele o le le ola mama?

  • I lenei saunoaga, o le a sou manatu i le uiga o le “ua toe faasatauroina Keriso”?

Pe a maea ona faitau e le tamaitiiti le saunoaga, fesili atu i tamaiti uma mo ni tali latou te maua i fesili.

Valaaulia tamaiti e faitau le 1 Korinito 6:19–20.

  • O le a le tau na totogi e Iesu Keriso mo oe?

  • O le a le mea o ta’u mai e lenei tau e uiga i lou taua?

Faasoa atu manatu nei i au oe lava upu: O tatou e ā le Atua ia, ua le na ona faapea o tatou o Ana fanau ae ona sa togiolaina i tatou e Lona Alo e Toatasi na Fanaua—“ua faatauina i tatou i se tau.” E finagalo le Atua e faafoi atu i tatou ia te Ia. O tagata ua aafia i agasala o feusuaiga ua faatautala i o latou tino ma tino o isi. Ua latou tuu i latou i se tulaga ua matuai lamatia ai lo latou avanoa e toe foi atu ai ia te Ia i le aiga.

Alema 39:13. “Liliu mai i le Atua … ma Tautau atu Ou Sese”

Afai ua e filifili e aoao mai lenei vaega o le lesona, ia nofouta o le isi lesona e sosoo ai o loo taulai sili atu i le salamo ma le faamagaloga.

Valaaulia tamaiti e faitau le saunoaga a Elder Richard G. Scott o loo i le itulau 253 i le tusi lesona a tagata o le vasega. O loo maua foi i le companion DVD E.

  • O a laasaga o le salamo na faasino i ai Elder Scott i lenei saunoaga?

  • E tusa ai ma le saunoaga a Elder Scott, aisea e tatau ai ona aofia ai se epikopo pe a salamo i solitulafono o feusuaiga?

Valaaulia tamaiti e faitau le saunoaga a Elder Jeffrey R. Holland o loo i le itulau 253 i le tusi lesona a tagata o le vasega.

  • O le a le matafaioi a le Faaola i le faagasologa o le salamo?

  • O le a le matafaioi a le tagata solitulafono?

Faamautinoa atu i tamaiti e ui lava e faigata le ala i le faamagaloga mai solitulafono o feusuaiga, ae e le mafai ona sili atu i le mana faamalolo o le Togiola a Iesu Keriso. Faasoa atu ou lagona ma le molimau e uiga i le mana o le Togiola. Ina ia fesoasoani i tamaiti e saunia mo suesuega ma le talanoaga o le Alema 40–42, faamalamalama atu na faaauau ona aoao atu e Alema aoaoga faavae taua ia Korianetona e fesoasoani ai ia te ia e salamo i ana solitulafono ma tumau ai i le faamaoni.