Mataupu 20

Mosaea 9–17

Folasaga

E ui o lenei poloka mau o loo i ai ni tala aoga ma le faafiafiaina, o le aoaoga faavae totonugalemu o loo maua i le tala o le galuega a Apinati. Atonu ua masani tamaiti i le tala o le maliu fasia o Apinati; e mafai ona e fesoasoani ia sili atu lo latou malamalama e uiga i lana galuega ma lana savali. E mafai ona e fesoasoani ia i latou ia malamalama i le matafaioi o se perofeta, le taua o le faalogo i perofeta, ma le paia o Iesu Keriso. E mafai ona e fesoasoani ia i latou ia malamalama i le naunautaiga o Apinati e oti mo lana molimau i le Faaola, o se taunuuga o lona naunautaiga e ola mo lena molimau. O le aoao mai le faataitaiga a Apinati, e mafai ona latou faateleina la latou tautinoga ia usiusitai, faamaoni, ma lototoa.

O Nisi o Aoaoga Faavae ma Mataupu Faavae

Na valaau atu perofeta i e amioleaga ia salamo (tagai i le Mosaea 11–12).
E faia e le Atua lava Ia se Togiola ma togiola ai Lona nuu (tagai i le Mosaea 13–16).
O nisi taimi e puapuagatia e amiotonu ona o a latou molimau ia Iesu Keriso (tagai i le Mosaea 17).

Fautuaga mo le Aoaoga

Mosaea 9–17. Aotelega Faasolopito

Ina ia maua e tamaiti se aotelega faasolopito o le Mosaea 9–17, mafaufau e faaaoga se tasi o auala nei:

A o lei taitai oo i le lesona, tuu atu i se tamaitiiti se kopi o le pepa e tufa atu o loo i le faaiuga o lenei mataupu. Fai i ai e suesue le Mosaea 9–10 ma saunia se faatinoga e tolu i le lima minute i le tala ia Senifa e amata ai le lesona.
Afai e te filifili e aveese le faatinoga a le tamaitiiti, amata la le lesona i le fai i tamaiti e vaai i aso o loo i le pito i lalo o le itulau (po o le ulutala o le mataupu) i le amataga o leMosaea 9 ma le aso i le pito i lalo o le itulau (po o le ulutala o le mataupu) i le amataga o le Mosaea 8. Faasino atu o le va o le Mosaea 8 ma le Mosaea 9, na tupu le tala lea e tusa ma le 80 tausaga i ona tua atu. O le tala o loo i le Mosaea 9 na amata pe tusa o le 200 T.L.M., lea na toe faamatalaina e Senifa mea na tutupu ia na faamaumauina muamua i le Ominae 1:27–30. O loo toe faamatala i le Mosaea mataupu e 9–24 mea na tutupu i taimi o nofoaiga a tupu e toatolu: Senifa, Noa, ma Limae. O nei faamaumauga ua tusia ai le manuia o tagata pe a liliu atu i le Atua. Pe a filifili tagata e le liliu atu i le Atua, latou te tauivi—i fafo atu e tetee ia sa Lamana faapea ma i latou lava ia e tetee atu i le faamaualuga.

Mosaea 9–17. Aotelega o Aoaoga Faavae: Tiutetauave o Perofeta

Faasoa atu le faamatalaga lenei mai le Faamaoni i le Faatuatua. A o lei e faitauina, fai i tamaiti e faalogo mo tiutetauave autu e fa o perofeta.

“O perofeta o aso nei ua faapei lava o perofeta anamua e molimau ia Iesu Keriso ma aoao mai Lana talalelei. Latou te faailoa mai le finagalo ma uiga moni o le Atua. Latou te saunoa mai ma le le fefe ma le manino, e tautino mai le leaga o le agasala ma lapatai mai i ona taunuuga. E i ai foi taimi e musuia ai i latou e perofeta ane i mea o le a tutupu i le lumanai mo lo tatou manuia” (Faamaoni i le Faatuatua: O Se Tusitaiala o le Talalelei [2004], 141).

O a tiutetauave e fa o se perofeta na e matauina? (Tusi tali a tamaiti i luga o le laupapa e pei ona faaalia i lalo ifo.)

Tiutetauave o se Perofeta

E molimau atu ia Iesu Keriso ma aoao atu Lana talalelei.
E faailoa atu le finagalo ma uiga o le Atua.
Latou te tauleagaina le agasala ma lapatai mai i ona taunuuga.
E valoia mea e tutupu i le lumanai.

Vaevae le vasega i ni vaega se fa. Valaaulia le tasi vaega e faitau le leoa le Mosaea 11:20–25, o le isi vaega e faitau le leoa le Mosaea 16:5–9, o le isi vaega e faitau le leoa le Mosaea 16:10–15, ma le vaega mulimuli e faitau le leoa le Mosaea 17:15–18.

Valaaulia tamaiti e manatua nei tiutetauave i le taimi atoa o le lesona ma saili mo auala na faataunuuina ai e Apinati lona valaauga o se perofeta.

Mosaea 11–12. E Valaau atu Perofeta i E Amioleaga ia Salamo

Faaali atu se ata o Apinati i le maota o le Tupu o Noa, e pei o le ata 75 i le Tusi o Ata o le Talalelei (lea foi o loo faaalia i lalo ifo).

Ata

O Apinati i luma o le Tupu o Noa

O se tasi o auala na faataunuuina ai e Apinati lana matafaioi o se perofeta o le valaauina lea o tagata ina ia salamo. Valaaulia tamaiti e faatusatusa upu a Apinati i le taimi muamua o lana asiasiga (tagai i le Mosaea 11:20–25) ma ana upu i lana asiasiga lona lua (tagai i le Mosaea 12:1–8). E lua tausaga na va ai asiasiga nei e lua a Apinati (tagai i le Mosaea 12:1).

Na faapefea ona sui le savali a Apinati i lana asiasiga lona lua?
E tusa lava pe na filifili tagata e salamo ina ua maea le asiasiga lona lua a Apinati, o a ni taunuuga o le a latou mafatia ai ona o le le usitai i ana lapataiga i le taimi muamua?

Fesoasoani i tamaiti ia malamalama e tusa lava pe mafai ona salamo tagata i a latou agasala, e le mafai ona latou sosola ese mai taunuuga o le le amanaiaina o lapataiga muamua a se perofeta. Faasoa atu ou lagona e uiga i le manaomia o le salamo vave ma le taua o le mulimuli i fautuaga a perofeta soifua.

Mosaea 13–16. E Faia e le Atua Lava Ia se Togiola ma Togiola ai Lona Nuu

Na faaauau pea ona faataunuuina e Apinati lana matafaioi o se perofeta e ala i le molimau atu i le misiona paia a Iesu Keriso. O se vaega o lana molimau, na ia sii mai ai se tasi o valoaga a Isaia e uiga i le taulaga togiola a le Faaola. Faatonu tamaiti e faitau le leoa le Mosaea 14. (Mafaufau e tata lemu se viiga o le faamanatuga i tua a o latou faitauina. E mafai ona e taina se viiga ua uma ona pueina pe fai i se tasi e ta le piano.) Pe a maea ona latou faitauina, valaaulia i latou e faasoa mai o latou lagona e uiga i mea ua latou faitau i ai.

A maea ona faasoa mai e tamaiti o latou lagona e uiga i le Faaola, fesoasoani i ai ia faailoa mai nisi o upumoni taua o loo aoaoina i le Mosaea 14. Faamalamalama atu o loo i ai i le mataupu lea se valoaga ua maea ona faataunuuina. Ona fai atu lea o fesili nei. Valaaulia tamaiti e tusi a latou tali i fesili.

I le fuaiupu 2, o le a le mea o fautua mai e le fuaitau “e pei o le pogai i le eleele pa’a’ā” e uiga i le tulaga lautele faaleagaga o tagata i le taimi o le galuega a le Faaola i la le tino? (E toatele na le taliaina Lana savali.)
E tusa ai ma le fuaiupu 3, na faapefea ona taulimaina e nisi tagata le Faaola?
E tusa ai ma fuaiupu 4–6, o a avega na tauaveina e le Faaola?
E tusa ai ma fuaiupu 7–9, na faapefea ona faaalia e Iesu Keriso Lona naunautaiga e togiola a tatou agasala?

Valaaulia ni nai tamaiti e faasoa mai tali na latou tusiaina. Uunaia tamaiti uma e mafaufau atili i upu a Isaia e ala i le toe faitauina o le Mosaea 14 i fafo atu o le vasega ma faasoa atu mea ua latou aoaoina i se tagata o le aiga po o se uo.

E mafai ona e faaiuina lenei vaega o le lesona i le tuu atu lea i tamaiti e faitau mai upu o le viiga “Ou te Tu ma Ofo” (Viiga, nu. 107).

E faapefea ona fesootai lenei viiga ma le Mosaea 14?
E faapefea e lenei viiga ona faalolotoina lou agaga faafetai mo le Faaola?
O a ni ou lagona a o e iloaina na afio mai le Faaola “mai lona nofoalii paia” e laveai oe?

Valaaulia se tamaitiiti e faitau le Mosaea 13:33–35 ma le 15:1

A o faitauina e tagata o le vasega ma talanoaina nei fuaiupu, atonu e manaomia ona e faamalamalama atu le faaaogaina e Apinati o le upu Atua. Pe a faaaogaina e le Au Paia o Aso e Gata Ai le upu Atua, e masani lava ona latou faasino i le Tama Faalelagi. Peitai, na faaaoga e Apinati le upu lea e faasino ia Iesu Keriso. Ina ia fesoasoani i tamaiti ia malamalama i lenei mea, valaaulia i latou e faitau le faamatalaga o loo i le itulau 159 i le tusi lesona a tagata o le vasega.

Ina ia faamanino le taua o le aoaoga faavae e faapea o Iesu Keriso sa avea ma Atua ma o se Atua, ia fai atu fesili nei:

Pe o Iesu Keriso o se fagogo?
P e o Ia ea o se faiaoga atamai ma le mama, ae ua na o se tagata lava?
Pe o Ia ea o se Alo moni o le Atua?
E mafai faapefea e tali a tagata i nei fesili ona uunaia ai o latou olaga?

Fai i tamaiti pe o latou nofouta i soo se taumafaiga ua faia i le lalolagi e faaitiitia ai le tulaga o Iesu Keriso o le Alo moni o le Atua?

Aisea e taua ai le iloa o Iesu Keriso sa avea ma Atua ma o se Atua?

Fesoasoani i tamaiti ia malamalama o lo tatou faatuatua ia Iesu Keriso ma Lana Togiola e faateleina pe a tatou malamalama i Lona natura faavavau ma Lona paia o le Alo o le Atua.

I le Mosaea 15:1–9, na molimau atu ai Apinati i le natura paia ma le misiona a le Faaola ma aoao atu e uiga i le matafaioi a Iesu Keriso o se Tama ma le Alo.

Tuu atu i se tamaitiiti e faitau le Mosaea 15:1–5. Ona fai atu lea i se tamaitiiti e faitau le faamatalaga a Elder M. Russell Ballard o loo i le itulau 158 i le tusi lesona a tagata o le vasega.

E faapefea ona avea Iesu Keriso ma Tama ma le Alo?

Afai e te lagonaina e manaomia ona e faalautele atili lenei autu, ia talanoaina ia faamatalaga o totoe o le tusi lesona a tagata o le vasega e uiga i le Mosaea 15:1–7 (itulau 153), lea o loo i ai fuaitau mai le folafolaga o le 1916 ua faaautuina “O Le Tama ma Le Alo: O Se Faamaninoga Faaleaoaoga Faavae a le Au Peresitene Sili ma le Toasefululua.”

Manatua o le Mosaea 15:1–8 e le o se felafolafoaiga e uiga i tagata eseese o le Aiga Atua. O se felafolafoaiga e uiga ia Iesu Keriso ma Ana matafaioi eseese o le Tama ma le Alo.

I le Mosaea 15:10–13, na faamalamalama atili atu ai e Apinati le sootaga faaletama ma le atalii i le va o Iesu Keriso ma i latou ua taliaina Lana talalelei. Na ia saunoa e uiga i “fanau” a le Faaola, po o atalii ma afafine. Valaaulia tamaiti e faitau ia fuaiupu 10–13. Ona fai atu lea o fesili nei:

E tusa ai ma fuaiupu 11–12, o le a le uiga o le avea ma atalii ma afafine o le Faaola? (Tagai foi MFF 25:1.)
O a faamanuiaga e oo mai ia i latou o e avea ma “fanau” a Keriso?

A o faaauau pea ona aoao atu e Apinati ia Noa ma ana ositaulaga, na ia taliina ai se fesili na muai fesiligia ai o ia e se tasi o ositaulaga. Valaaulia tamaiti e tagai i lenei fesili i le Mosaea 12:20–24. I le taliina o lenei fesili, na faaauau pea ona molimau atu Apinati i le paia o Iesu Keriso. Ina ia fesoasoani i tamaiti e talanoaina lana tali, fai atu i le afa o le vasega e faitau le Mosaea 15:13–18 ma le isi afa e faitau le Mosaea 15:19–25. A o latou faitauina, tusi le fesili lenei i luga o le laupapa.

O ai avefeau na faasoaina atu le tala i mea lelei? (Tagai i le Mosaea 15:13–18.)

O a tala i mea lelei? (Tagai i le Mosaea 15:19–25).

Valaaulia se tamaitiiti se toatasi mai afa taitasi o le vasega e faasoa mai tali i nei fesili.

Faasoa atu le saunoaga a Elder Carlos E. Asay o le Fitugafulu o loo i le itulau 159 i le tusi lesona a tagata o le vasega.

E mafai faapefea ona tatou fesoasoani e aumai nei tala i mea lelei i isi?

Mosaea 17. O Nisi Taimi e Puapuagatia ai E Amiotonu ona o a Latou Molimau ia Iesu Keriso

Toe faasino atu i le ata o Apinati i luma o le Tupu o Noa. Fai atu i se tamaitiiti e ta’u atu i le vasega le taunuuga o Apinati. Ona fai lea i se tamaitiiti e faitau le Mosaea 17:1–13, 20.

Fesoasoani i tamaiti ia malamalama o le naunautaiga o Apinati ina ia oti mo le mea moni na oo mai o se taunuuga masani o lona usitai i le Atua. Ae peitai, e toaitiiti lava tagata e talosagaina ina ia oti i le puipuia o a latou molimau. Ina ia fesoasoani i tamaiti ia iloa mea ua talosagaina i tatou e fai nai lo le oti mo le mea moni, faasoa atu saunoaga nei:

Na saunoa mai Peresitene Polika Iaga (1801–77), o le Peresitene lona lua o le Ekalesia e faapea, “O le auala e sili ona aoga e faatu ai le tapuaiga o le Lagi o le ola ai lea, nai lo le oti ai: Ou te manatu ua ou saogalemu i le faapea atu e toatele tagata o le Au Paia o Aso e Gata Ai ua sili atu ona naunau e oti mo la latou tapuaiga nai lo le ola ai ma le faamaoni” (Discourses of Brigham Young, sel. John A. Widtsoe [1954], 221).

Na aoao mai Peresitene Ezra Taft Benson (1899–1994), o le Peresitene lona 13 o le Ekalesia e faapea:

“E suia e Keriso tagata, ma o tagata ua suia e mafai ona suia le lalolagi.

“O tagata ua sui mo Keriso o le a taitaia e Keriso. …

“… O tagata ua taitaia e Keriso o le a faamumuina ia Keriso. …

“O o latou loto e tusa lea ma Lona finagalo. (Tagai i le Ioane 5:30.)

“Latou te faia pea lava o mea e lelei i le Alii. (Tagai i le Ioane 8:29.)

“E le gata ina latou oti mo le Alii, ae o le mea e sili ona taua latou te fia ola foi mo Ia” (i le Lipoti o le Konafesi, Oke. 1985, 5–6; po o le Liahona, Nov. 1985, 3).

O a ni auala na ola ai Apinati mo le Alii?
O a ni auala na faatosinaina ai e le soifuaga ma aoaoga a Apinati ia Alema? (Tagai i le Mosaea 17:1–4. Afai e te manao e faalauteleina lenei talanoaga, atonu e te manao e faaaoga le saunoaga a Elder Robert D. Hales i le itulau 160 i le tusi lesona a le vasega.)
O a ni auala e mafai ona tatou ola ai mo le Alii?

Pepa e tufa atu

Aotelega Faasolopito o le Mosaea 9–10

O lenei faatinoga e tatau ona alu ai le tolu i le lima minute. Ina ia saunia e tuu atu le talaaga faasolopito mo lenei lesona, faitau faatele le Mosaea 9–10 e tatau ai ina ia masani ai i le tala. Atonu foi e te manao e iloilo le siata o i lalo ifo ma itulau 154–55 o loo i le tusi lesona a tagata o le vasega.

I le vasega, valaaulia isi tamaiti e sue a latou tusitusiga paia i le Mosaea 9–10 ma mulimulitai i ai a o e faasoa atu se aotelega otooto o le tala ia Senifa. I luga o le laupapa, atonu e te manao e tusi le siata lenei e fai ma faamanatu o nofoaga ma tagata iloga i le tusi o Mosaea:

Nuu o Liae-Nifae	Nuu o Saraemila
Tupu o Senifa (Mosaea 9–10) pe tusa o le 200 T.L.M.	Tupu o Mosaea I
Tupu o Noa (Mosaea 11–19) pe t usa o le 160 T.L.M.	Tupu o Peniamina
Tupu o Limae (Mosaea 7–8; 19–22) pe tusa o le 121 T.L.M.	Tupu o Mosaea II

O Senifa o se tagata sa Nifae lea na taitaia se vaega o isi sa Nifae e taumafai e toe maua mai le laueleele o Liae-Nifae lea na nonofo ai o latou tuaa. Na tuua e Senifa ma lana vaega Saraemila i se vaitaimi ina ua amata le nofoaiga a le Tupu o Mosaea I. Manatua i le va o le Mosaea 8 ma le Mosaea 9, o le tala na tupu pe tusa o le 80 tausaga i ona tua atu. O le tala i le Mosaea 9 na amata pe tusa o le 200 T.L.M., lea na toe faamatalaina e Senifa mea na tutupu ia na muai faaamaumauina i le Ominae 1:27–30. Otooto atu i au lava upu nisi o mea iloga o le tala ia Senifa i le Mosaea 9–10. E mafai ona e faaaofia ai:

O taunuuga o le malaga muamua a Senifa (Mosaea 9:1–5; Ominae 1:27–30).
O taunuuga o le maelega anoanoai. Mo se faataitaiga, o le maelega anoanoai na oo ai i faamasinoga le lelei e pei o le “telegese e manatua le … Atua” (Mosaea 9:3)” ma le faatauasoina e le “poto ma le pepelo o le tupu o Lamana” (Mosaea 9:10).
O le faatosinaga mo le lelei a Senifa i tagata. Mo se faataitaiga, na ia faamalosia i latou e (a) toe faaleleia le aai (tagai i le Mosaea 9:8); (e) tausi lafu ma laau aina (tagai i le Mosaea 10:2, 4); (i) gaosi lavalava (tagai i le Mosaea 10:5); ma (o) puipuia i latou “i le malosi lava mai le Atua” (tagai i le Mosaea 9:17).

O le nofoaiga a Senifa ua faailoa ai le auala na ia galue ai i lona olaga atoa ia toe maua ai le laueleele o Liae-Nifae ma ola ai iina i le filemu. O lona maelega anoanoai na oo atu ai i nisi o faatinoga na fesiligia, ae o lona manao ina ia faatuina se malo tutoatasi o sa Nifae mai ia sa Lamana na mulimuli ane faamanuiaina.