Inisitituti
Mataupu 50: Eteru 1–5

Mataupu 50

Eteru 1–5

Folasaga

Na saunoa mai Elder Jeffrey R. Holland o le Korama a Aposetolo e Toasefululua o le mea na oo i le uso o Iareto ma le Faaola ua “faatulagaina faatasi ma ni taimi aupito silisili i le talafaasolopito ua faamaumauina, e mautinoa lava ua i ai faatasi ma taimi aupito silisili i le faatuatua ua faamaumauina. Na faatuina ai le uso o Iareto faatasi ma perofeta faavavau silisili a le Atua” (Christ and the New Covenant: The Messianic Message of the Book of Mormon [1997], 17). Ua auiliili mai i nei mataupu ia faamanuiaga na oo atu i le nuu o sa Iareto anamua o se taunuuga o le faatuatua ma tatalo a le uso o Iareto. A o suesueina ma talanoaina e tamaiti le Eteru 1–5, e mafai ona latou iloiloina a latou lava tatalo ma tulimata’i atu i faamanuiaga e oo mai e ala i le faaatinoina o le faatuatua i le Alii. Ua faamaea ai lenei poloka mau i se malamalamaaga i le oo mai o le Tusi a Mamona ma molimau na filifilia e molimau ai.

O Nisi o Aoaoga Faavae ma Mataupu Faavae

  • O tatalo a e faatuatua e mafai ona aumai ai le taitaiga faalelagi ma le laveaiga (tagai i le Eteru 1:34–43; 2:5–25).

  • Ua manaomia e le Alii i tatou ia faia mea uma tatou te mafaia e foia ai o tatou faafitauli (tagai i le Eteru 2:16–25; 3:1–5).

  • O le faatuatua maoae e mafai ona taitai atu ai i tatou i le afioaga o le Alii (tagai i le Eteru 3–4).

  • Na tofia e le Alii ni molimau se toatolu e molimau atu i le Tusi a Mamona (tagai i le Eteru 5).

Fautuaga mo le Aoaoga

Eteru 1:34–43; 2:5–25. O Tatalo a Ē Faatuatua e Mafai ona Aumai ai le Taitaiga Faalelagi ma le Laveaiga

A o lei amataina le vasega, tusi le faamatalaga lenei i luga o le laupapa:

Aisea na tali ai e le Alii tatalo a le uso o Iareto?

O le a le uiga o le “alofagia tele e le Atua?

I se tali atu i le talosaga a Iareto, na “valaau atu le uso o Iareto i le Atua.” O a nisi o eseesega i le va o le valaau atu i le Alii ma le faia o tatalo?

Valaaulia tamaiti e ta’u mai ni taimi na latou feagai ai ma ni tulaga luitauina ma maua ai le fesoasoani e ala i tatalo faamaoni. Faafetai atu ia i latou mo le faasoa mai, ma faamalamalama atu o le a latou suesueina i le asō se tala talitutusa i le olaga o le uso o Iareto.

Fai atu i se tamaitiiti e faitau le Eteru 1:33. Ona fai atu lea i se isi tamaitiiti e faamatala otooto mai mea na tutupu i le Olo o Papelu.

  • Ana faapea na e i ai iina, o le a sou popolega sili e uiga i le faataapeapeina o tagata ma le faafenumiaia o le gagana?

Tusi le Eteru 1:34–43 i luga o le laupapa.Tuu atu i tamaiti e faitau le leoa fuaiupu, saili mo tali i fesili e tolu o loo i luga o le laupapa. A maea, fai atu ia i latou e faasoa mai a latou tali.

Ina ia fesoasoani i tamaiti e faaaoga nei mataupu faavae i o latou olaga, valaaulia i latou e faamaea le “Galuega Fuafuaina” lona lua o loo i le itulau 389 i le tusi lesona a tagata o le vasega. O se vaega o lenei galuega faatino, mafaufau e fai atu fesili nei:

  • E mafai faapefea ona faaleleia a tatou tatalo?

  • E faapefea e lo tatou usiusitai i le Atua ona aafia ai a tatou tatalo? E faapefea e le le usiusitai ona aafia ai a tatou tatalo?

Fai atu i se tamaitiiti e faitau le Eteru 2:14 ma le laina muamua o le fuaiupu 15.

  • O le a le mea leaga na faia e le uso o Iareto?

  • O a mea e mafai ona tatou aoaoina mai nei fuaiupu?

  • Aisea e finagalo ai le Atua tatou te o mai soo ia te Ia i le tatalo?

Tusi le aoaiina i luga o le laupapa. Faitau le Mataupu Faavae ma Feagaiga 95:1, fai atu i tamaiti e saili mo mafuaaga e aoai ai e le Alii i tatou. Fesoasoani i tamaiti ia malamalama e aoaiina e le Alii i tatou ona e alofa o Ia ia i tatou. E mafai foi ona e valaauliaina tamaiti e faitau le saunoaga a Elder Jeffrey R. Holland ma Elder Neal A. Maxwell o le Korama a Aposetolo e Toasefululua o loo i itulau 384–85 i le tusi lesona a tagata o le vasega. Faasoa atu lau molimau o le mana o le tatalo ma faamanuiaga e mafai ona tatou maua e ala i le tatalo.

Eteru 2:16–25; 3:1–5. E Manaomia i Tatou e le Alii ia Faia Mea Uma Tatou te Mafaia e Foia ai o Tatou Faafitauli

Fai atu i tamaiti e faitau le leoa le Eteru 2:18–19. Valaaulia i latou e saili mo faafitauli e tolu na aumai e le uso o Iareto i le Alii.

  • O a ia faafitauli e tolu? (O le a le mafai ona i ai se malamalama i vaa, o le a le iloa e tagata pe o fea e uli i ai vaa, ma o le a leai se ea e manava e tagata i totonu o vaa.)

Faamalamalama atu e tali e lo tatou Tama Faalelagi tatalo i auala eseese. Ona valaaulia lea o se tamaitiiti e faitau le Eteru 2:20.

  • Na faapefea ona tali mai le Alii i le fesili e uiga i le leai o se ea i totonu o vaa?

Fai atu i se isi tamaitiiti e faitau le Eteru 2:20.

  • O le a le mea na aoaoina e le uso o Iareto e uiga i le auala o le a uli ai ia vaa? (O le a le manaomia ona popole tagata i le uliina o vaa. O le a taitaia i latou e le Alii i luga o le vasa e ala i le aumaia o matagi ma “peau e pei o mauga.” Tagai foi i le Eteru 6:4–8.)

  • O le a le fetalaiga a le Alii e uiga i le auala e maua ai le malamalama i totonu o vaa?

  • O le a le mea e mafai ona tatou aoaoina mai le finagalo o le Alii i le uso o Iareto e sue se vaifofo i lenei faafitauli? (E mafai ona aofia i tali ua faamoemoeina i tatou e le Alii ia faatinoina lo tatou faitalia, atamai, ma le faatuatua; ua Ia tuua nisi tiutetauave i luga o tatou tauau; ma o nisi taimi e finagalo o Ia e faia lava e tatou a tatou fuafuaga, o lea e mafai ai ona tatou tuputupu ae.)

Valaaulia se tamaitiiti e faitau le Eteru 3:1–5 i le vasega.

  • O le a le mea na faia e le uso o Iareto e aumai ai le malamalama i totonu o vaa?

A o talanoaina e tamaiti lenei fesili, e mafai ona latou fautuaina mai tali nei: Na suesueina e le uso o Iareto le faafitauli. Na ia maua le tali. Na ia saunia ni maa, ae na le mafai ona ia faasusuluina—ma o lea na ia manaomia ai le fesoasoani a le Alii. Ona ia toe foi atu lea i le Alii mo se faamautinoaga o lana fuafuaga.

Valaaulia tamaiti e iloilo le saunoaga a Peresitene Harold B. Lee o loo i le itulau 385 i le tusi lesona a tagata o le vasega.

  • O a ni auala e mafai ai ona e faaaogaina lenei fautuaga i lou olaga?

Eteru 3–4. O Le Faatuatua Maoae e Mafai Ona Taitai atu ai i Tatou i le Afioaga o le Alii

Faitau le Eteru 3:6–14 o se vasega, tuu atu i tamaiti e faitau feauauai se tasi pe lua fuaiupu.

  • O le faatuatua o le uso o Iareto na aumai ai o ia i le afioaga o le Alii. O le a se avanoa tali tutusa ua folafola mai ia te i tatou i le Eteru 4:7?

Tuu le siata lenei i luga o le laupapa:

O le a le mea na faia e le uso o Iareto?

O le a se mea e tatau ona tatou faia?

Tofi le afa o le vasega e faitau le Eteru 3:4–26, saili mo mea na faia e le uso o Iareto lea na mafai ai ona ia vaai i le Faaola. Fai atu ia i latou ia mafaufau foi i ana faatinoga e pei ona faamaumauina i le Eteru 1–2. Tofi le isi afa o le vasega e faitau le Eteru 4:4–19, saili mo mea na fautua mai ai Moronae ia i tatou e fai e “saeluaina … [le] ufimata o le le faatuatua” (fuaiupu 15). Atonu e manaomia ona e faamalamalama atu o le upu saelua o lona uiga o le sasae ma o se ufimata o se ufiufi ua faaogaina e nana ai se mea. O le fuaitau “ufimata o le le faatuatua” ua faamatalaina ai le auala e mafai ai e le le faatuatua ona vavaeeseina i tatou mai le Atua.

A maea le taimi na tuu atu, fesili pe o a mea na latou maua. Lisi a latou tali i luga o le laupapa.

  • O a ni mea tutusa ua e matauina i le va o lisi e lua?

Fai atu i se tamaitiiti e faitau le Alema 19:6.

  • Na faapefea ona aveesea le “ufimata o le le faatuatua” mai le mafaufau o Lamonae? (Faaopoopo atu tali a tamaiti i le itu taumatau o le siata i luga o le laupapa.)

Fai atu i se tamaitiiti e faitau le Mataupu Faavae ma Feagaiga 67:10.

  • O le a se fautuaga faaopoopo na tuu mai e le Alii e fesoasoani ia i tatou e saeluaina le ufimata o le le faatuatua? (Faaopoopo atu tali a tamaiti i le itu taumatau o le siata i luga o le laupapa.)

Valaaulia tamaiti e mafaufau loloto i le auala e mafai ai e le fautuaga o loo i luga o le laupapa ona fesoasoani ia i latou e latalata atu ai i le Alii. Atonu e te manao e fai atu ia i latou e tusi i lalo o latou manatu.

Faasoa atu lau molimau e uiga i le auala tatou te vaai atili ai ma le mausali i le fuafuaga a le Alii mo o tatou olaga a o tatou faatinoina le faatuatua ia te Ia. Na folafola mai e le Alii afai tatou te ola amiotonu, faatino le faatuatua ia te Ia, ma tausia a tatou feagaiga, o le a oo mai le aso o le a mafai ai ona tatou vaai ia te Ia ma mau i Lona afioaga.

Tuu atu i tamaiti e suesue le Eteru 3:6–15, a lē taitoatasi pe taitoalua. Fai i ai e lisi mai upumoni o le talalelei na aoaoina pe na faamautuina e le uso o Iareto i le taimi o lona i ai faatasi ma le Alii. Atonu latou te mananao e faailoga nei upumoni i a latou tusitusiga paia. Pe a maea le taimi na tuu atu, valaaulia tamaiti e faasoa mai mea na latou maua. Atonu e te manao e faamaumau a latou faamatalaga i luga o le laupapa.

E mafai ona aofia ai tali nei:

  • O le a tauaveina e le Alii i Ona lava luga le tino ma le toto (fuaiupu 6).

  • Ua togiolaina i tatou e le Alii mai le Pa’ū (fuaiupu 13).

  • Na saunia Iesu Keriso mai le faavaeina o le lalolagi (fuaiupu 14).

  • O le ola e faavavau e oo mai e ala i le Faaola (fuaiupu 14).

  • O Iesu o le Tama ma le Alo (fuaiupu 14).

  • O e faamaoni e avea ma atalii ma afafine o Keriso (fuaiupu 14).

  • E lei vaai lava se tasi i le Alii i le tulaga na vaai ai le uso o Iareto ia te Ia (fuaiupu 15).

  • Na foafoa e le Atua le tagata i Ona lava foliga (fuaiupu 15).

Afai e i ai ni fesili a tamaiti e uiga i le fuaiupu 14, e mafai ona e mafaufau e faasino atu i latou i le faamatalaga e uiga i le Mosaea 15:1–7 i le itulau 158 i le tusi lesona a tagata o le vasega. Afai e i ai ni fesili e uiga i le fuaiupu 15, e mafai ona e mafaufau e faasino atu i latou i le saunoaga a Elder Jeffrey R. Holland o loo i le itulau 386 i le tusi lesona a tagata o le vasega.

  • E mafai faapefea e le tala i le uso o Iareto ona fesoasoani ia i tatou e tuputupu ae ai i a tatou molimau?

Eteru 5. Na Tofia e le Alii ni Molimau se Toatolu e Molimau atu i le Tusi a Mamona

Fai atu i tamaiti e faitau le Eteru 5:2–4, Mataupu Faavae ma Feagaiga 5:11–15, ma le Mataupu Faavae ma Feagaiga 17:1–6 ma faatusatusa le tasi mau ma le isi.

  • O ai igoa o Molimau e Toatolu o le Tusi a Mamona?

Valaaulia tamaiti e sue i itulau o folasaga i le Tusi a Mamona. Fai atu i se tamaitiiti e faitau le Molimau a Molimau e Toatolu.

Faasoa atu le saunoaga lenei a le Perofeta o Iosefa Samita, lea na ia faia i lona tama ma lona tina ae lei leva ona mavae atu lona aafiaga ma Molimau e Toatolu:

“Tama! Tina! … e te lua le iloaina lo’u fiafia tele ua i ai. Ua faia e le Alii ia papatusi ina ia faaalia i ni tagata se toatolu e ese mai ia te au, o ē foi na vaai i se agelu ma o le a molimau atu i le moni o le mea ua ou fai atu ai, aua ua latou iloa mo i latou lava ou te le fealuai e faasese i tagata. Ma ua ou lagonaina e pei lava ua matuu atu se avega matautia lea na toetoe lava a le mafai ona ou onosaia. Ae o le a latou tauaveina nei se vaega, ma ua olioli ai lo’u agaga aua ua le o toe tuua toatasi atoa lava au i le lalolagi” (quoted in Teachings of Presidents of the Church: Joseph Smith [2007], 127).

  • Aisea e te manatu ai o le aafiaga o Molimau e Toatolu na mafua ai ona fiafia tele le Perofeta Iosefa?

Valaaulia tamaiti e faitau le Eteru 5:2–4 ma faailoga molimau eseese e toafa o le Tusi a Mamona. (Mo ni malamalamaaga i nei molimau, tagai i le itulau 367 i le tusi lesona a le vasega.)

Tuu atu i tamaiti e faitau le saunoaga a Elder Dallin H. Oaks o loo i le itulau 388 i le tusi lesona a tagata o le vasega. O loo maua foi lenei saunoaga i le companion DVD A.

  • O a ni auala e mafai ona avea ai oe ma se molimau o le Tusi a Mamona?

  • O a ni auala e mafai ai e lau molimau o le Tusi a Mamona ona faatosinaina isi tagata?

Faamaea i le tuu atu o lau molimau o le Tusi a Mamona.