Inisitituti
Mataupu 48: Mamona 1–6

Mataupu 48

Mamona 1–6

Folasaga

E ui lava o uluai mataupu e ono o le Mamona o loo i ai tala matautia o taua i le va o sa Lamana ma sa Nifae ma le amioleaga tele i tagata, ae o loo aofia ai foi se savali o le faamoemoe. A o suesue, mafaufau loloto, ma talanoaina e tamaiti le olaga ma aoaoga a Mamona, e mafai ona musuia i latou e tumau i le faamaoni e tusa lava pe faateleina pea le leaga o le lalolagi o siomia ai i latou.

O Nisi o Aoaoga Faavae ma Mataupu Faavae

  • E mafai ona amiotonu i le lotolotoi o le amioleaga tele (tagai i le Mamona 1–2).

  • O le Tusi a Mamona o se molimau mo Keriso (tagai i le Mamona 3:17–22; 5:12–14).

  • “E oo atu faamasinoga a le Atua i e amioleaga” (tagai i le Mamona 4; 5).

Fautuaga mo le Aoaoga

Mamona 1:1. O Le Upu Mamona

Faamanatu i tamaiti na ta’u atu e le Faaola i Ona soo sa Nifae e tatau ona faaigoa Lana Ekalesia i Lona suafa (tagai i le 3 Nifae 27:1–12; tagai foi i le mataupu 46 i lenei tusi lesona). Peitai, o le taimi nei ua toatele tagata o loo faaaogaina le faaupuga “Ekalesia Mamona” nai lo le igoa aloa’ia o le Ekalesia ma faasino i le Au Paia o Aso e Gata Ai, o Mamona.

  • E ui lava tatou te mananao e faaaoga le igoa aloaia o le Ekalesia, ae o a nisi o mea lelei e uiga i le upu Mamona?

O se vaega o lenei talanoaga, fai atu i tamaiti e sue i le itulau 356 i le tusi lesona a tagata o le vasega. Valaaulia se tamaitiiti e faitau le saunoaga a le Perofeta o Iosefa Samita, ma valaaulia ni nai tamaiti e faitau feauauai ia parakalafa i le saunoaga a Peresitene Gordon B. Hinckley.

  • O a ni auala e faatatau ai nei saunoaga ia i tatou o ni tagata o le Ekalesia a Iesu Keriso o le Au Paia o Aso e Gata Ai?

Mamona 1–2. E Mafai ona Amiotonu i le Lotolotoi o le Amioleaga Tele

Afai o maua se nusipepa o le asō, faaali atu. Faasino atu o ulutala o loo faailoa ai le amioleaga i le lalolagi, ia faaeteete ina nei tatai atu le gauai o tamaiti i soo se mea e mafai ona faalavelaveina ai i uunaiga a le Agaga. Talanoaina puupuu nisi o luitau o loo feagai ma le autalavou matutua i aso nei.

Tusi ia mau faasino nei i luga o le laupapa:

Fai atu i tamaitiiti taitasi e fatu se ulutala o talafou e faavae i mau taitasi. Pe a maea le taimi na tuu atu, valaaulia tamaiti e faasoa mai a latou ulutala.

Faamalamalama atu i le lolotoi o lenei amioleaga, sa tumau ai se alii talavou e suafa ia Mamona i le mama aiai ma le malosi. Valaaulia tamaiti e faitau le Mamona 1:1–2, 15; 2:1–2.

  • O a ni uiga lelei patino na i ai ia Mamona? O le a sou manatu na faapefea e nei uiga lelei ona fesoasoani ia te ia e faatumauina lona faamaoni i le Atua?

  • O le a le uiga ia te oe o le “[tofotofoina] foi ma [iloa] le agalelei o Iesu”? (Mamona 1:15).

Faasoa atu le saunoaga lenei a Peresitene Gordon B. Hinckley (1910–2008), le Peresitene lona 15 o le Ekalesia:

“Ia outou ola e tusa ma mataupu faavae o le talalelei. Ua outou ola i se vaitausaga lea ua matuai tele ai mea eleelea. E le tatau ona outou ola maualalo ai i na mea. E tatau ona outou ō a’e maualuga atu i na mea. E tatau ona outou maua le malosi e fai atu ai e leai ma tutu maualuga ai. Ou te folafola atu ia te outou afai o le a outou faia lena mea, o i latou i se isi itu na latou valaaulia outou i o latou ituaiga o olaga, o le a momoo maimau pe ana latou ola ai foi i luga atu o na mea” (Teachings of Gordon B. Hinckley [1997], 716).

  • O le a se mea o fesoasoani ia te oe e tumau ai i le amiotonu i le lotolotoi o le amioleaga i o tatou aso?

  • O le a se mea e mafai ona tatou aoaoina ma faaaogaina mai le faataitaiga a Mamona?

Mamona 2:10–14. “O Lo Latou Faanoanoa Ua Le I’u i le Salamo”

Tuu atu i se tamaitiiti e faitau le Mamona 2:10–14.

  • O a ni auala e ese ai le faanoanoa lea na faamoemoeina e Mamona mai le faanoanoa lea na ia molimautinoina?

Fesoasoani i tamaiti ia malamalama e faapea e lei faanoanoa tagata ona na latou lagonaina le salamo ma mea na latou faia; ae na latou faanoanoa ona sa latou le fiafia i taunuuga o a latou agasala. Atonu e te manao e faasino atu tamaiti i saunoaga a Elder Neal A. Maxwell ma Peresitene Ezra Taft Benson o loo i le itulau 368 i le tusi lesona a tagata o le vasega.

Mamona 2:14–15. “Ua Mavae le Aso Alofa”

Faamatala atu le faataoto lea faaonapo nei: A o galue ai i le faatoaga, na lavea le vae o se alii talavou. Na ia setusetu mai i le fale, fusi le manua, ma taoto loa i lalo e malolo. Na faamalosiau atu lona tama ia te ia e o e vaai se fomai. Peitai, na manatu le alii talavou e mafai lava ona toe malosi o ia ia te ia lava. A o alu pea aso, sa faateleina le leaga o lona vae ma faateleina ai le tiga, ae na te le o sailia lava se fesoasoani faafomai. I se tasi o aoauli sa amata ona logo uma lona tino i le ma’i. Na ia matauina ua ese le lanu o lona vae. I lena afiafi sa maualuga lona fiva ma ua oso faama’i malosi. E malama ane le taeao ua maliu o ia.

Fai atu i tamaiti ia faatatau le faataoto i le Mamona 2:14–15. Mafaufau e fai atu fesili nei o le talanoaga:

  • O ai o loo suitulaga ai le alii talavou? (O sa Nifae.)

  • O ai o loo suitulaga ai le tamā? (Mamona.)

  • O ai o loo suitulaga ai le fomai? (O le Alii.)

  • O le a le taimi na tuai tele ai mo le alii talavou? (Atonu o le taimi na maualuga ai lona fiva ma oso faama’i malosi ai.) E faapefea ona faatatau lenei mea ia sa Nifae?

  • Na ta’ua e Mamona e faapea “ua mavae le aso alofa ia [sa Nifae]” (Mamona 2:15). O le a le mea ua faailoa mai i le fuaiupu 14 o le mafuaaga lea na latou taunuu ai i lea tulaga?

Faasino atu tamaiti i le saunoaga a Peresitene Spencer W. Kimball o loo i le itulau 369 i le tusi lesona a tagata o le vasega. Fesoasoani i tamaiti ia iloa e alofa mutimutivale le Alii ma finagalo ina ia tatou salamo ae e tatau ona tatou liliu atu ia te Ia ma se loto momomo ma le agaga salamo. E lei salamo sa Nifae, o lea na le mafai ai ona faamagaloina i latou. Molimau atu e mafai ona tatou maua faamanuiaga o le faamagaloga pe afai tatou te faamaulalo i tatou lava i luma o le Alii.

Mamona 3:17–22; 5:12–14. O Le Tusi a Mamona O se Molimau mo Keriso

Fai atu i tamaiti e galulue taitoalua e faitau ma talanoaina le Mamona 3:17–22. Pe a maea le taimi na tuu atu ia i latou, fai atu le fesili lenei ma valaaulia tamaiti e tali mai e faavae i a latou talanoaga:

  • O ai lea e saunoa i ai Mamona i nei fuaiupu?

  • I le fuaiupu 21, na faailoa ai e Mamona le faamoemoe “ina ia talitonu [le au faitau i le lumanai] i le talalelei a Iesu Keriso.” O le a le sootaga i le va o le talalelei, le Tusi a Mamona, ma Iesu Keriso?

Fai atu i tamaiti e iloilo le Mamona 3:20–22 ma faitau foi le Mamona 5:12–14.

  • Aisea na tusitusi ai Mamona ma isi perofeta?

  • Na faapefea ona fesoasoani le Tusi a Mamona ia te oe e “talitonu i le talalelei a Iesu Keriso’?

  • Na faapefea ona faamalosia e le Tusi a Mamona lau molimau ia Iesu Keriso?

  • O a ni auala ua e vaaia ai le faamanuiaina o olaga o isi tagata e le Tusi a Mamona?

Mamona 4: 5. “E Oo atu Faamasinoga a le Atua i Ē Amioleaga”

Tuu atu i tamaiti e faitau le Mamona 4:5, 10–12.

  • O a ni mea e mafai ona tatou aoaoina mai nei fuaiupu?

Tau atu i tamaiti o lea o le a latou faitau nei e uiga i taunuuga o le taua mulimuli a sa Nifae—o se faataitaiga o le oo atu o faamasinoga a le Atua i e amioleaga. Tuu atu i tamaiti e faitau feauauai ia fuaiupu o le Mamona 6:11–15, ma tulitatao ai le toatele o sa Nifae na fasiotia i lenei taua. (Pe tusa e 230,000 fitafita sa Nifae na fasiotia. Faasino atu e toatele foi isi na maliliu—e le o aofia ai fitafita sa Lamana i nei fuaiupu, e le o ta’ua foi ni fafine ma tamaiti i itu uma e lua na maliliu ona o se taunuuga o le taua.)

Valaaulia se tamaitiiti e faitau le Mamona 6:16–22. Po o le faitau o nei fesili ia te oe lava ia, valaaulia tamaiti e mulimuli ma le le leoa i le faitauga i a latou tusitusiga paia.

Fai atu i tamaiti e mafaufau le leoa i mea na ono taitai atu ai le malo atoa o sa Nifae i le pa’ū. Ona fai atu lea ia i latou e faitau le Moronae 8:27 ma le Mataupu Faavae ma Feagaiga 38:39.

  • O le a se mea e mafai ona tatou aoaoina mai le tala o le pa’ū o sa Nifae?

E fai ma faaiuga o lenei vaega, atonu e te manao e faaali atu le faatinoga 19 “O Ye Fair Ones,” o loo i le Book of Mormon DVD Presentations (numera o le aitema 54011).

Mamona 5:22–24. O loo i ai i Tatou i Aao o le Atua

Tuu atu i tamaiti e sue i le saunoaga a Elder W. Craig Zwick o loo i itulau 371–72 i le tusi lesona a tagata o le vasega (o loo maua foi i le companion DVD A). Faamalamalama atu a o lei faia e Elder Zwick lenei faamatalaga, sa ia sii maia upu nei mai le Mamona 5:23: “Tou te le iloa ea o loo i ai outou i aao o le Atua? Tou te le iloa ea o loo ia te ia le mana uma?”

Fai atu i tamaiti e tagai i o latou lima, faau i luga alofilima, a o e faitaua le saunoaga a Elder Zwick (pe faitau foi e se tamaitiiti ua tofia).

I le faaiuga o le faitauga, fai atu i tamaiti e ta’u mai ki e fa na saunoa i ai Elder Zwick tatou te manaomiaina ina ia mafai ai ona “tuu o tatou lima i [aao o le Atua]” ma “lagonaina Lona mana fesoasoani e mafai ai ona tatou ausia mea e le mafai ona tatou ausia na o i tatou.” Tusi ki e fa i luga o le laupapa:

  • Aoao

  • Faalogo

  • Saili mo le Agaga

  • Tatalo e le aunoa

Fai atu i tamaiti e tusi i lalo ki nei e fa. Uunaia i latou e faaalu se taimi a o lei oo i le isi vasega e iloiloina ai o latou olaga i vaega taitasi uma nei.

Faamaea atu e ala i le faailoaina o lou faamoemoe o le a mulimuli tamaiti i faataitaiga a Mamona—o le a latou gauai atu i le aao o le Atua ma saili atu e faia Lona finagalo.