Mataupu 49

Mamona 7–9

Folasaga

Na taulai atu le savali mulimuli a Mamona i e tupuga mai ia Liae i aso e gata ai (tagai i le Mamona 7:1). Na taulai atu foi e Moronae ana upu i tagata o aso e gata ai, e faapea: “Ou te tautala atu ia te outou e peiseai ua tatou faatasi, a e leai. Faauta foi, ua faaalia mai outou ia te au e Iesu Keriso, ou te iloa foi a outou amio” (Mamona 8:35). Na ia tautino mai o le a ofoofogia le oo mai o le Tusi a Mamona i se taimi o le amioleaga, i le taimi e toatele ai tagata o le a faapea mai “ua mavae vavega” (Mamona 8:26). A o e taitaia ni talanoaga e uiga i aoaoga a Mamona ma Moronae, o le a mafai ona e fesoasoani i tamaiti ia iloa o le Tusi a Mamona na tusia mo i latou. O le a faateleina le faatuatua o tamaiti a o latou latalata atu i le “Atua o vavega” Lē na molimau mai ai Mamona ma Moronae (tagai i le Mamona 9:10–15).

O Nisi o Aoaoga Faavae ma Mataupu Faavae

Ua ofo mai e le Alii le faaolataga i tagata uma e talitonu ia te Ia ma talia Lana talalelei (tagai i le Mamona 7).
O le Tusi a Mamona na tusia mo o tatou aso (tagai i le Mamona 8:26–41).
O vavega, faailoga, ma faaaliga ua sasaa atu i e faatuatua (tagai i le Mamona 9:7–27).
O le Atua o Lē le liliu ma e silafia mea uma lava (tagai i le Mamona 9:9–11, 19).

Fautuaga mo le Aoaoga

Mamona 7. Ua Ofo mai e le Alii le Faaolataga i Tagata Uma e Talitonu ia te Ia ma Talia Lana Talalelei

Fai atu i tamaiti e mafaufau faapea ua lata ona oti, ae o loo i ai so latou avanoa e tuua ai se savali tusitusia mulimuli. Tuu atu ia i latou taitasi se fasi pepa, ma valaaulia i latou e lisi nisi o mea latou te ono tusia. A maea ni nai minute, valaaulia i latou e fefaasoaai a latou lisi, o le tasi i le isi.

Faamalamalama atu o loo i ai i le Mamona 7 le savali mulimuli na tusia e Mamona i luga o papatusi. (Atonu e manaomia ona e faasino atu na tusia e Mamona upu o loo i le Mamona 8–9. O nisi o aoaoga a Mamona na faaalia mulimulil ane, i le mataupu 7–9 o le Moronae, ae o Moronae, e le o Mamona, na faamaumauina na aoaoga i luga o papatusi auro.)

Faatonu tamaiti e faitau le leoa le Mamona 7 ma faailoa mai aoaoga taua na faaaofia ai e Mamona.

A maea ona faitau e tamaiti, fesoasoani ia i latou ia iloa le auala e fitoitonu ai le savali a Mamona i o latou olaga e ala i le fai atu o nisi o fesili po o fesili uma nei:

O fea o aoaoga a Mamona e te lagona e anoa patino pe faamomoiloto?
E mafai faapefea e le oo mai “i le iloa lelei o o [tatou] tamā” (fuaiupu 5) ona faatosinaina lo tatou manao e salamo ma ola ai i le talalelei?
E mafai faapefea e le iloa o le a tatou toetutu e “tu i luma o le nofoa faamasino [o Keriso]” (fuaiupu 6) ona faatosinaina lo tatou manao e salamo ma ola ai i le talalelei?
Na faapea mai Mamona e tatau ona tatou “taofi mau le talalelei ia Keriso” (fuaiupu 8). O le a le uiga o lenei mea ia te oe?

Mamona 7:8–9. O Le Tusi Paia ma le Tusi a Mamona o Molimau ia Iesu Keriso

O le Tusi a Mamona ma le Tusi Paia e lagolago e le tasi le isi ma fefaasoaai se faamoemoega tutusa: ia faamalosia ai lo tatou faatuatua ia Iesu Keriso. Fai atu i se tamaitiiti e faitau le saunoaga a Peresitene Polika Iaga o loo i itulau 374–75 i le tusi lesona a tagata o le vasega. Ona valaaulia lea o se isi tamaitiiti e faitau le Mamona 7:8–9. Faamalamalama atu i le fuaiupu 8, o loo faasino le fuaitau “lenei tusi” i le Tusi a Mamona, ma le fuaitau “o le tusi foi e oo atu i nuu ese nai tagata Iutaia” o loo faasino i le Tusi Paia. I le fuaiupu 9, o loo faasino le upu lenei i le Tusi a Mamona, ma le upu lena o loo faasino i le Tusi Paia.

O a ni auala o loo faamalosia ai e le Tusi a Mamona lou faatuatua i aoaoga o loo i le Tusi Paia? O a ni auala o loo faamalosia ai e le Tusi Paia lou faatuatua i aoaoga o loo i le Tusi a Mamona?
Aisea ua e loto faafetai ai i le mauaina o faamaumauga e lua?

Mamona 8:12–25. O Le Taliaina o le Tusi a Mamona e Aumai ai Faamanuiaga

Valaaulia se tamaitiiti e faitau le Mamona 8:12, 17. Ona fai atu lea i tamaiti e sue i le itulau o le folasaga o le Tusi a Mamona ma faitau le parakalafa lona ono, lea o loo i ai le molimau a le Perofeta o Iosefa Samita i le Tusi a Mamona.

E ui lava sa faailoa mai e Moronae lona popolega e uiga i le “le atoatoa” ma “pona” i le Tusi a Mamona, ae o le a se iloiloga a Iosefa Samita o le tusi?
O le a le faamanuiaga na folafola mai e le Perofeta o Iosefa Samita ia i latou e taliaina le Tusi a Mamona ma ola ai i ona mataupu faavae?
O le a le tala a Moronae i le mea o le a oo mai ia i latou e taliaina le faamaumauga ma lē tauleagaina?

Faitau le Mamona 8:14 faatasi ma tamaiti. Gauai atu i le tautinoga a Moronae e faapea o le faamaumauga e “taua tele”

Valaauulia tamaiti e faitau le leoa le Mamona 8:15, 21–25, saili mo ni mafuaaga e taua tele ai le Tusi a Mamona. A maea ona faitauina e tamaiti, valaaulia i latou e faasoa mai mea ua latou maua. E mafai ona aofia i tali mea nei:

E mo “le manuia o le nuu o le feagaiga a le Atua, o le nuu anamua ua leva ona faataapeapeina” (fuaiupu 15).
Ua faaalia ai e manatuaina e le Alii Ana feagaiga ma le aiga o Isaraelu (fuaiupu 21).
Ua faaalia ai “le finagalo faavavau o le Atua, seia faataunuuina ana folafolaga uma lava” (fuaiupu 22).
Ua faailoa ai o loo faataunuuina e le Alii folafolaga na Ia faia i tusitala i totonu o le tusi o e na tatalo mo le soifua manuia o o latou uso (fuaiupu 23–25).

Fesoasoani i tamaiti ia iloa o le suesue ma le agaga tatalo i le Tusi a Mamona o le a fesoasoani ia i latou ia tuputupu ae i le molimau i lona “taua tele” ma o le a fesoasoani ia i latou e malupuipuia faamanuiaga na folafola mai e Moronae ma Iosefa Samita.

Mamona 8:26–41. O Le Tusi a Mamona Na Tusia mo o Tatou Aso

Valaaulia tamaiti e faamatala mai i se tulaga lautele, le amioleaga i le lalolagi i aso nei. Atonu e te fautuaina latou te faatusatusa Poloaiga e Sefulu po o tulaga faatonuina o loo i le Mo Le Malosi o le Autalavou ma mea faalelalolagi o loo siomia ai i latou. A maea ona latou faasoa maia ni nai faamatalaga, fai atu i ai e faitau feauaua’i ia fuaiupu o le Mamona 8:26–30. A maea ona faitau fuaiupu taitasi, ia talanoaina o se vasega auala ua manino mai ai i aso nei tulaga o loo faamatalaina i lena fuaiupu.

Faitau le Mamona 8:31. Fautua atu ia faailoga pe makaina le valoaga e faapea o le Tusi a Mamona “e oo mai i le aso e i ai mea leaga e tele.” Fai atu ia i latou e faailoa mai mea leaga o loo lisiina i le fuaiupu. Ona faasoa atu lea o le saunoaga a Elder Joe J. Christensen o loo i itulau 376–77 i le tusi lesona a tagata o le vasega.

E faaopoopo atu i mea leaga faaletino, o a ituaiga o mea leaga faaleagaga ua i ai i o tatou aso? (Tagai i le itulau 377 i le tusi lesona a tagata o le vasega.)

I le fesootaiga ma le Mamona 8:35, faasoa atu le saunoga a Peresitene Ezra Taft Benson o loo i le itulau 377 i le tusi lesona a tagata o le vasega. O loo maua foi lenei saunoaga i le companion DVD A.

E tusa ai ma le saunoaga a Peresitene Benson, na faapefea ona iloa e tusitala o le Tusi a Mamona pe o a tala, aoaoga, ma mea na tutupu o le a sili ona aoga ia i tatou?
O a ni auala e mafai ai e lenei malamalama ona aafia ai le ala e te suesueina ai le Tusi a Mamona?

Mamona 9:7–27. O Vavega, Faailoga, ma Faaaliga Ua Sasaa Atu i e Faatuatua

Mafaufau e faasoa atu nisi o aafiaga ua faaalia ai o le Alii o se Atua o vavega. Pe a talafeagai ai, uunaia tamaiti e faasoa mai ni vavega na latou molimauina. Ina ia fesoasoani i tamaiti ia iloa tatou te talitonu i se Atua o vavega i aso nei, faasoa atu le saunoaga a Elder Dallin H. Oaks ma Elder Bruce R. McConkie o loo i le itulau 379 i le tusi lesona a tagata o le vasega.

Tusi le Mamona 9:7–8, 19–21, 24–25 i luga o le laupapa:

Fai atu i tamaiti e faitau le leoa fuaiupu nei ma mafaufau pe o a mea latou te aoaoina atu e faatatau i vavega. Valaaulia i latou e faasoa mai o latou manatu.

Aisea e tatau ai ona tatou faamoemoe ia i ai ni faaaliga, faailoga, ma vavega i le Ekalesia i aso nei?
O a mea e taofia vavega mai le tutupu?

Uunaia tamaiti e tusi i a latou api talaaga ni vavega na latou oo i ai. Fautua atu ia latou iloiloina faavaitaimi nei mea na tusi i api talaaga.

Mamona 9:9–11, 19. O Le Atua o Le le Liliu ma e Silafia Mea Uma Lava

Tuu atu i tamaiti e faitau le leoa le Mamona 9:9–10 ma le 2 Nifae 9:20.

Aisea e taua ai mo oe le iloa e lē liliu le Atua ma e silafia mea uma lava?

Faamatala atu i tamaiti ina ia mafai ona “faatino le faatuatua i le Atua i le ola ma le faaolataga,” e tatau ona tatou maua “se manatu sa’o i lona tulaga faaletagata, atoatoaga, ma uiga” (Lectures on Faith [1985], 38; uluai faatusilima). Taulai atu le gauai o tamaiti i le lapataiga a Moronae e faapea o nisi tagata ua “manatu ifo … e i ai se atua faaletumau” (Mamona 9:10).

E faapefea ona fesoasoani ia te oe o le Atua e le liliu?

Faasoa atu le saunoaga a Elder Neal A. Maxwell o loo i itulau 379 i le tusi lesona a tagata o le vasega.

E tusa ai ma le saunoaga a Elder Maxwell, aisea e taua ai le iloa e silafia e le Atua mea uma?
E mafai faapefea ona tatou faamalosia lo tatou faatuatua i le le liliu o le Atua ma le natura atoatoa?

Lisi mau faasino nei i luga o le laupapa:

Valaaulia tamaiti e suesue se tasi pe sili atu foi o nei mau, saili mo mataupu faavae e uiga i le le liliu o le tulaga faaletagata o le Atua. Atonu e te manao e uunaia i latou e fatu se filifili o mau o nei fuaiupu (mo faamatlaga e uiga i filifili o mau, tagai i le itulau 380 i le tusi lesona a tagata o le vasega).

E faapefea ona fesoasoani nei mau ia te oe e faateleina lou faatuatuaina o le Tama Faalelagi?

Faamatala atu o se faaopoopoga i le silafia o mea uma ma le le liliu, ua faafiafiaina le Atua e faamanuia i tatou ma tauia lo tatou faamaoni.

Afai na le liliu lava le Atua ma faaee atu ni vaaiga mamao, faamanuiaga, ma faaaliga i luga o Ana fanau anamua, o le a la le uiga o lenei mea mo i tatou i aso nei?

Faasoa atu lau molimau i le talitonuga e oo mai le malamalama i uiga lē masuia o le Atua. Uunaia tamaiti e faasoa mai a latou molimau e faatatau i uiga o le Atua faatasi ai ma tagata o le aiga po o uo atonu o loo tauivi ina ia maua se manatu sa’o i uiga o le Atua.