Mataupu 22

Mosaea 25–29

Folasaga

I le vaitaimi lenei o le talafaasolopito o le Tusi a Mamona, na feagai le perofeta o Alema ma ni luitau iloga i le Ekalesia. O le toatele o le tupulaga faiae e lei liua i le talalelei ma ua le talitonu i upu a perofeta. O Alema le Itiiti ma atalii e toafa o le Tupu o Mosaea sa i ai i le vaega lena e lei talitonu, ma na latou feoai solo e faaumatia le Ekalesia a le Atua. E ala i le tatalo faatauanau, na maua ai e Alema le taitaiga mai le Alii i le auala e faagasolo ai e faatatau ia i latou ua vavaeese mai le Ekalesia. I le lesona atoa lenei, e mafai ona e fesoasoani i tamaiti e iloa le suiga e oo mai e ala i le salamo ma le liua. O le a iloa e tamaiti o tagata ua liua, latou te tuuina atu auaunaga faamaoni i o latou olaga atoa.

O Nisi o Aoaoga Faavae ma Mataupu Faavae

• O aoaiga faaleEkalesia e mafai ona fesoasoani i e agasala ia salamo ma toe foi mai i le faaaumeaina atoatoa i le Ekalesia (tagai i le Mosaea 26).

• E ala i le Togiola e mafai ai ona tatou toe fanaufouina (tagai i le Mosaea 27).

• O le liuaina e faateleina ai lo tatou manao e faasoa atu le talalelei (tagai i le Mosaea 27:32–37; 28:1–8).

• E i ai i tagatanuu se tiute e lagolagoina tulafono amiotonu ma taitai (tagai i le Mosaea 29).

Fautuaga mo le Aoaoga

Mosaea 26:1–4. O Le Tupulaga Faiae

Faamatala o talitonuga na faasoa atu e tagata na faalogo i le lauga a le Tupu o Peniamina na teenaina e le toatele o a latou fanau. Tuu atu i tamaiti e faitau le leoa le Mosaea 5:1–5 ma le Mosaea 26:1–4, ma faatusatusa lagona o tagata i taimi o le Tupu o Peniamina ma lagona o le toatele o le tupulaga faiae i le taimi o le nofoaiga a le atalii o le Tupu o Peniamina o Mosaea.

• E tusa ai ma le Mosaea 26:3, aisea na faamaaaina ai loto o le toatele o le tupulaga faiae?

• O a auala e mafai ai ona e fesoasoani i le tupulaga o sosoo ai e atiina ae se molimau o le talalelei e pei ona e faia?

Mosaea 26. O Aoaiga FaaleEkalesia e Mafai ona Fesoasoani i E Agasala ia Salamo ma Toe Foi Mai i le Faaaumeaina Atoatoa i le Ekalesia

O lenei manatu aoaoina ua taulai atu i fono aoai faale-Ekalesia, o se autu e mafai ona tata’i atu i ni fesili faigata. Ia faia ma le faaeteete le talanoaga i totonu o tuaoi o mea ua faatagaina i lenei tusi lesona ma le tusi lesona a tagata o le vasega. E mafai foi ona e faasino atu i le ulutala otooto ua faaautuina “Fono Aoao Faale-Ekalesia” o loo i le itulau 74 i le Faamaoni i le Faatuatua: O Se Tusitaiala o le Talalelei. Afai e i ai ni fesili a tamaiti o le a manaomia ai ona e laa i talaatu o anomea ua faatagaina, ia faamalamalama atu ma le faaaloalo o se autu paia ma maaleale lenei o le a le talafeagai ai le talanoaina i le loloto i le potuaoga. Fautua atu ina ia latou talanoa i o latou taitai perisitua.

Tusi le faamatalaga lenei i luga o le laupapa:

fai agasala—fuaiupu 6	faamasinoina—fuaiupu 12, 29
aoaiina—fuaiupu 6	salamo—fuaiupu 35
molimau ua molia ai—fuaiupu 9	faitauina faatasi ma tagata—fuaiupu 35
maua i amioletonu uiga eseese—fuaiupu 11	ua le faitauina faatasi ma tagata—fuaiupu 36

Valaaulia tamaiti e faitau faavave le Mosaea mataupu 26 ma sue ia maua upu o loo lisi i luga o le laupapa. Fesili i tamaiti pe o le a so latou manatu i le uiga o lenei mataupu. A o latou faasoa mai o latou manatu, faamautinoa o loo latou malamalama na i ai ia Alema le pule i le Ekalesia ma o Mosaea, a o avea ai ma tupu, na pule i le malo. Na faamalamalama mai e le Tupu o Mosaea o le a ia taulimaina solitulafono faalemalo ae e nafa ia Alema ma le taulimaina o solitulafono matuia a tagata o le Ekalesia.

Tusi le Aoaiga Faale-Ekalesia i luga o le laupapa.

• O le a le uiga o le upu a’oa’i?

Faasoa atu le saunoaga lenei a Elder Theodore M. Burton (1907–89), sa avea o se tasi o Fitugafulu:

“O se mea ou te faanoanoa ai i le faalogo atu i uiga o nisi o uso o le Ekalesia po o taitai foi i alaalafaga i ala o loo latou aoaia ai tagata solitulafono. Ua ou iloa o loo taumafai e faatutusa le uiga o le upu a’oa’i ma le upu faasala, ae o loo i ai se eseesega i le va o nei upu. I le gagana Peretania … o le upu discipline e sau ma i le aa e tasi lea e i ai le upu disciple (soo). O se soo o se tagata a’oga, e tatau ona aoaoina. I le taulimaina o tagata solitulafono e tatau ona tatou manatua e matua manaomia ona aoaoina i latou” (i le Lipoti o le Konafesi, Oke. 1985, 81–82; po o le Liahona, Ian. 1986, 51).

• E tusa ai ma le saunoaga a Elder Burton, o le a le faamoemoega o aoaiga faale-Ekalesia?

Valaaulia tamaiti e faitau le Mosaea 26:6, 9–13.

• Aisea na “atuatuvale ai le loto” o Alema?

• O le a le mea na fai e Alema e iloa ai le auala e faamasino ai le nuu?

Valaaulia se tamaitiiti e faitau le Mosaea 26:28–32.

• O a mea e lua na tutupu o le ta’uta’u atu o agasala ma le faamagaloga o loo ta’ua e le Alii i le fuaiupu 29?

• O a mea o loo aoao mai e nei fuaiupu e uiga i le faamoemoega o le Alii mo aoaiga faale-Ekalesia?

• O a faamanuiaga e oo mai ia i latou o e salamo atoatoa?

• O a auala e mafai ona tatou mafaufauina ai aoaiga faale-Ekalesia o se faatinoga o le alofa?

Faamatala o le fuaiupu 32, o loo faamalamalama mai ai e le Alii o i latou o e le salamo o le a le faitauina faatasi ma i latou o le Ekalesia. Peitai, e le faapea o le a taofia ai le alolofa ma le auauna atu pea o taitai o le Ekalesia ma tagata o le ekalesia ia i latou.

Ina ia fesoasoani i tamaiti ia faateleina lo latou malamalama e uiga i aoaiga faale-Ekalesia, atonu e te manao e valaaulia i latou e faitau le saunoaga a Elder Theodore M. Burton o loo i le itulau 172 i le tusi lesona a tagata o le vasega.

Molimau atu i le naunautaiga o le Faaola e faamagalo mai pe a tatou salamo ma lo tatou manao ia agavaa e olioli i faamanuiaga o le avea ai ma tagata o Lana Ekalesia.

Mosaea 27. O Le Togiola e Mafai ai ona Tatou Toe Fanauina

O lenei fautuaga faaleaoaoga ua faaalia ai le auala e faagaoioia ai e lo tatou faatuatua ia Iesu Keriso le mana faamalolo o le Togiola i o tatou olaga. O loo taulai atu i le suia o le loto lea na oo i ai Alema le Itiiti ma atalii o Mosaea. E le o taulai atu i mea uma na tutupu ma aafiaga ia na taitai atu ai i lo latou liua. Afai e le o masani nisi tamaiti i lena vaega o le tala, e mafai ona e fai atu i se isi tamaitiiti e otooto faapuupuu mai le tala.

I luga o le laupapa, tusi ai le tou faailoga faaleaganuu o le fatu. Tusi le upu sui i le ogatotonu o le fatu. Fesili i tamaiti pe o le a le uiga o le suia o le loto.

Tuu atu i tamaiti e faitau le Mosaea 27:8–10, 32–37. Fai atu ia i latou e faatusatusa ia amioga a Alema le Itiiti ma atalii e toafa o Mosaea a o lei suia o latou loto ma le taimi foi ua suia ai o latou loto.

• O a auala na suia ai nei alii e toalima?

• O a faamaoniga ua tatou maua i fuaiupu 32–37 e faapea na faamaoni lava ma tumau lo latou suiga?

Faitau le Mosaea 27:24–29 faatasi ma tamaiti.

• I nei fuaiupu, o a upu ua faamatalaina ai le “toe fanauina”?

• E faapefea e le ola ai i le talalelei ona suia lo tatou natura?

• O le a se faailoilo na tuuina mai e Alema e faapea e le faigofie le salamo?

Fesoasoani i tamaiti ia malamalama e ui lava na foliga mai na faafuasei ona suia Alema ma atalii o Mosaea, ae o le faagasologa o le toe fanauina e le oo mai uma i le taimi e tasi mo le toatele o i tatou.

Fai i se tamaitiiti e faitau le Alema 5:46.

• O le a le isi mea na folafola atu e Alema o se vaega o lona liua?

Faatasi ai ma tamaiti, faitau le faamalamalamaga a Peresitene Ezra Taft Benson o loo i le itulau 172 i le tusi lesona a tagata o le vasega.

• O le a le mea na fai mai ai Peresitene Benson e uiga i le faagasologa o le liua?

Fesoasoani i tamaiti ia iloa o le suiga e oo mai i se tagata e ala i le toe fanauina o se taunuuga tonu lea o le faaaogaina o le Togiola a Iesu Keriso. Valaaulia tamaiti e faasoa mai o latou lagona e uiga i le iloaina o se suiga o le loto.

Mosaea 27:32–37; 28:1–8. E Faateleina e le Liua lo Tatou Manao e Faasoa atu le Talalelei

Valaaulia tamaiti e mafaufau i se taimi na latou mananao ai e ta’u atu i se tasi se tala lelei, o se vaaiga matagofie, po o se aafiaga ofoofogia.

• Aisea tatou te mananao ai e faasoa atu ni mea lelei i isi?

Tuu le siata lenei i luga o le laupapa. Fai i tamaiti e kopi le siata i luga o se fasi pepa ma faamaea e ala i le galulue taitoatasi pe taitoalua foi.

	O le a le aafiaga?	O ai na oo i ai?	O le a le mea na latou mananao i ai ina ua uma le aafiaga?
1 Nifae 8:2–12
Enosa 1:1–9, 19
Mosaea 28:1–4

• E faapefea ona tutusa nei tala e tolu?

Tusi le MFF 88:81 i luga o le laupapa i lalo ifo o le siata. Tuu atu i se tamaitiiti e faitau le fuaiupu lena.

• I le Mosaea 28:3–4, tatou te faitau ai i faanaunauga o atalii o Mosaea mo le faasoaina atu o le talalelei. E mafai faapefea e nei faanaunauga ona fesoasoani ia i tatou e tausia le poloaiga o loo i le Mataupu Faavae ma Feagaiga 88:81?

• O le a se eseesega e faia i le auauna atu faatasi ma nei faanaunauga?

Uunaia tamaiti e mafaufau i auala e mafai ai ona latou faasoa atu le talalelei.

Mosaea 29. E I ai i Tagatanuu se Tiute e Lagolagoina Tulafono ma Taitai Amiotonu

Vaevae le vasega i ni vaega se tolu. O le a suesue e vaega uma le Mosaea 29:1–36, ae e eseese ni mea o le a saili e vaega taitasi. Fai atu i le vaega muamua e saili mo faamatalaga e uiga i tupu amiotonu, o le vaega lona lua e saili mo faamatalaga e uiga i tupu amioletonu, ma le vaega mulimuli e saili mo faamatalaga e uiga i faamasino. Pe a maea le taimi na tuu atu i vaega taitasi, valaaulia se tamaitiiti mai vaega taitasi e lipoti mai i le vasega atoa. Atonu e te manao e aotele le lipoti a vaega i luga o le laupapa, e faaaoga ai se faatulagaga e pei o lenei:

Ituaiga e Tolu o Taitai
O Tupu Amiotonu	O Tupu Amioletonu	Faamasino
(Tali a Tamaiti)	(Tali a Tamaiti)	(Tali a Tamaiti)

Aotele lenei gaoioiga a tamaiti i le fesili atu o fesili nei:

• O a mea e mafai ona faamoemoeina mai tupu amiotonu?

• O le a le mea e tupu i tagata pe a pulea e tupu amioletonu?

• O a tulafono e fesootai ma nofoaiga a faamasino ua fesoasoani e faamautinoa le puipuiga o aia tatau o tagata?

Tuu atu i tamaiti e faitau le Mosaea 29:27.

• O le a le taimi e mafai ai ona toilalo se faigamalo na filifilia i le filifiliga a le nuu?

• E tusa ai ma lenei fuaiupu, o le a le taunuuga matuia o lea toilalo?

Faamalamalama atu i se faigamalo e pei o le faigamalo lea o loo faamatala mai i le Mosaea 29, o le avega o le filifilia o tulafono lelei ma taitai amiotonu e taoto i luga o tagatanuu o le malo (tagai i le MFF 98:10). Atonu e te manao e tuu atu i tamaiti e faitau le saunoaga a Elder Neal A. Maxwell ma Peresitene Boyd K. Packer o loo i le itulau 175 i le tusi lesona a tagata o le vasega. O le saunoaga a Elder Maxwell o loo maua foi i le companion DVD A.

Faaiu atu le lesona i le faitauina o le Faataoto 29:2.

Tuu atu le molimau i lenei upumoni, ma mafaufau e faasoa atu ia faataitaiga o lenei upumoni na e vaaia pe na e faalogo foi i ai. Uunaia tamaiti ina ia mataalia i faagasologa faaupufai e pei ona faatagaina ai i totonu o tulafono a o latou malo ma nuu.