4 Nifae

Folasaga

O Nisi o Aoaoga Faavae ma Mataupu Faavae

Fautuaga mo le Aoaoga

4 Nifae 1:1–19. Pe a Liua Moni Tagata i le Talalelei a Iesu Keriso, Latou te Galulue Faatasi i le Lotogatasi ma le Filemu

4 Nifae 1:20–49. O Le Faamaualuga e Taitai atu ai i Fevaevaeaiga, Fouvalega ma le Liliuese

4 Nifae 1:48–49. O Le Amioleaga e Taitai atu ai i le Le Mauaina o Faamanuiaga Taua

Mataupu 47

I le talafaasolopito atoa lava, na saili ai e tagata le fiafia, filemu, ma le manuia. Ua tau mai e tusitusiga paia ni nuu se lua na ausia lenei tulaga: o tagata o le nuu o Enoka o Siona (tagai i le Mose 7) ma tagata o le Tusi a Mamona lea na asia ma aoaoina e le Faaola toetu (tagai i le 4 Nifae 1). I le 4 Nifae, tatou te faitau ai i tagata o e na matua amiotonu lava, mo le latalata i le 200 tausaga ina ua mavae le asiasiga a le Faaola e faapea “e le mafai ona sili i ai le fiafia o se tasi nuu o nuu uma lava ua faia e le aao o le Atua” (4 Nifae 1:16). Ae o le mea e faanoanoa ai, na mulimuli ane pa’ū lena nuu i le liliuese. O le a faamanuiaina tamaiti e ala i le faatusatusaina o filifiliga na taitai atu ai i le latalata i le 200 tausaga o le fiafia ma filifiliga na taitai atu ai i le faanoanoa.

Pe a liua moni tagata i le talalelei a Iesu Keriso, latou te galulue faatasi i le lotogatasi ma le filemu (tagai 4 Nifae 1:1–19).
O le faamaualuga e taitai atu ai i fevaevaeaiga, fouvalega, ma le liliuese (tagai i le 4 Nifae 1:20–49).

Tusi i luga o le laupapa “Na faaliliuina … le nuu atoa” (4 Nifae 1:2).

O le a le uiga o le liua?

Faasoa atu le saunoaga lenei a Elder Dallin H. Oaks o le Korama a Aposetolo e Toasefululua (o loo maua foi i le companion DVD A):

“Tatou te agavaa mo le ola faavavau e ala i se faagasologa o le liua. E pei ona faaaogaina i i, o lenei upu uiga lasi o loo faailoa mai ai se suiga faamalie loto ma le o’oo’o o le natura. … O le lu’i a Iesu [ina ia liua] ua faaalia ai o le liua lea o loo Ia finagalo ai mo i latou e ulufale atu i le malo o le lagi, e sili atu i le na ona liua e molimauina le moni aiai o le talalelei. O le molimau atu o le iloa lea ma le tautino atu. Ua lu’iina i tatou e le talalelei ina ia ‘liua,’ lea e manaomia ai i tatou ina ia faia ma ia avea ai” (i le Lipoti o le Konafesi, Oke. 2000, 41–42; po o le Liahona, Ian. 2001, 40–41; uluai faatusilima).

Faitau le 4 Nifae 1:1–2 faatasi ma tamaiti.

O a ni faamaoniga i nei fuaiupu ua faailoa ai na liua moni lava le nuu? (O tali faigofie e mafai ona aofia ai le: salamo, papatisoga, taliaina o le Agaga Paia, leai ni finauga, ma le faamaoni o le tasi i le isi.)
Aisea e te manatu ai o nei faatinoga ua fautua mai ai ua liua se tasi?

Tofi tamaiti e galulue faatasi taitoalua po o ni vaega laiti. Tofi vaega taitoalua taitasi po o vaega e faitau le 4 Nifae 1:3–18 ma lisi mai ni faamaoniga faaopoopo ua faailoa ai na liua le nuu. E mafai ona aofia i a latou lisi na i ai i tagata mea uma e tutusa ai, faatino vavega i le suafa o Iesu Keriso, na i ai i o latou loto le alofa o le Atua, e lei faia soo se agasala matuia, ma na lotogatasi. Pe a maea le tolu i le fa minute, tuu faatasi mea na maua e tamaiti i luga o le laupapa.

O le a se aafiaga e te manatu na faia e le Au Paia na liua moni i o latou aiga ma tuaoi?

Uunaia tamaiti e mafaufau loloto ma le le leoa i fesili nei:

O a ni vaega o lou olaga e te lagonaina ua uunaia oe e faaleleia ina ia liua atili ai i le Alii?
O a ni aafiaga o nei suiga o le a i ai i lou aiga ma uo?

Faamamafa atu o le liua moni e o faatasi ma le alofa ua faateleina ma le popole mo isi. A o faasolo pea ina liua moni i tatou, o le a tafiesea le faamaualuga ma finauga mai o tatou olaga ma suitulaga i ai le filemu ma le fiafia sili atu.

Valaaulia se tamaitiiti e faitau le 4 Nifae 1:17.

O le a sou manatu i le uiga o le ua leai se “tasi ituaiga”?

Faamalamalama atu ina ua mavae le asiasiga a le Faaola, na ola tagata i le lotogatasi ma le filemu, ma faatoilaloina soo se eseesega faaleituaiga po o aganuu lea na i ai muamua ia i latou. Latou te lei toe faailogaeseina i latou mai isi i faalaniga faaleaganuu e pei o “sa Nifae” po o “sa Lamana.”

Faitau le saunoaga a Peresitene James E. Faust ma Elder Richard G. Scott o loo i itulau 363–64 i le tusi lesona a tagata o le vasega. O loo maua foi nei saunoaga i le companion DVD B C.

E mafai faapefea ona tuufaatasia i tatou ma tagata o aganuu eseese? E mafai faapefea ona tuufaatasia i tatou ma tagata e ese mea latou te fiafia i ai ma tomai mai ia i tatou?
Aisea e te manatu ai o tagata ua liua i le Alii e foliga mai latou te saili atu i le lotogatasi ma le filemu o le tasi i le isi?
O a ni auala e mafai ai e lagona o le lotogatasi ona faatosinaina se aiga? se uarota po o se paranesi?
O le a se mea ua e iloa e mafai ona faamalosia ai le lotogatasi i tagata o le aiga ma isi e pele?

Faamalamalama atu toeitiiti atoa le 200 tausaga o lelei tulaga o lenei malo. Ona faasolosolo lava lea ona suia le malo i totonu i le isi 100 tausaga, a o amata ona faia e tagata ni filifiliga ia na taitai atu ai i latou e “tauau ina le talitonu ma amioleaga … i lea tausaga ma lea tausaga” (4 Nifae 1:34). Tuu atu i tamaiti e faitau le 4 Nifae 1:45–48 ia iloa ai le taunuuga o nei filifiliga: na amioleaga uma tagata sei vagana ai soo o Iesu, na faatagaina e tagata ia au faomea a Katianetona e faasalalau solo i le nuu, ma na aveesea tusitusiga paia mai le nuu. Ona tusi lea o le siata lenei i luga o le laupapa pe faaali atu i se masini manino e fana i le puipui, ae aua le tuua ai faamatalaga o loo i totonu o puipui.

O Se Nuu ua Pa’ū

Faamalamalama atu o loo faaalia i lenei siata na tupu faasolosolo lemu le pa’ū’ū o tagata, e ala i se soloaiga umi o filifiliga amioleaga. Faitau faatasi ma tamaiti fuaiupu o loo i laasaga taitasi o le siata. A maea ona faitauina seti o fuaiupu, fai atu i tamaiti e lisi mai (1) faatinoga ma amioga le tonu a tagata ma le (2) mataupu faavae o le talalelei na lafoaia e tagata (o faataitaiga o loo i puipui i le siata o loo i luga). Fai atu i se tamaitiiti e fai ma tusiupu ma faamaumau ia malamalamaaga o tamaiti.

O a ni auala o loo fesootai ai le faamaualuga i faatinoga taitasi o loo lisiina i luga o le siata?

Fai atu i se tamaitiiti e faitau le Mataupu Faavae ma Feagaiga 38:24–27.

E mafai faapefea e le mulimuli i nei mataupu faavae ona taofia nei laasaga toilalo?

fuaiupu 20

(O se vaega o le nuu na fouvale, pe liliuese, mai le Ekalesia. Ua lafoaia nisi mataupu faavae o le talalelei: lotogatasi, ma le tuuto i le Ekalesia a le Alii.)

fuaiupu 24–26

(O nisi tagata na oofu i ofu taugata, lē fia faasoa atu ni meaai ma ni meatotino, faavasegaina ituaiga tagata, ma faatuina lotu e maua ai ni mea. O nisi o mataupu faavae o le talalelei ua lafoaia: lotomaualalo, ma le alofa moni.)

fuaiupu 27–29

(Ua faafitia e nisi tagata vaega taua o le talalelei, tuu atu sauniga paia ia i latou e le agavaa, faasalaina tagata o le Ekalesia, ma faafitia le Keriso. O nisi o mataupu faavae o le talalelei ua lafoaia: o le migao, faatuatua, lotomaualalo, agalelei.)

fuaiupu 30–34

(Na taumafai nisi tagata e fasioti soo e toatolu sa Nifae, faamaaaina o latou loto, mulimuli i faitaulaga ma perofeta pepelo, ma saua faaletino i e na mulimuli ia Iesu. O nisi o mataupu faavae na lafoaia: migao mo le ola, alofa moni.)

fuaiupu 35–39

(Na tupu fevaevaeaiga i tagata. O e na sili ona amioleaga o i latou na teenaina le talalelei ma aoao a latou fanau e tetee ia Iesu Keriso ma ia inoino i e talitonu. O nisi o mataupu faavae o le talalelei na lafoaia: lotogatasi, alofa moni, faatuatua.)

fuaiupu 40–43

(Ua toatele atu e amioleaga i e amiotonu, faaauau pea ona saili i mea faalelalolagi, ma atiae tautoga ma pulega faalilolilo. O nisi o mataupu faavae na lafoaia: lotomaualalo, alofa moni, faamaoni.)

Faitau le 4 Nifae 1:48–49 faatasi ma tamaiti. Tuu atu ia i latou e saili mo mea na leiloloa pe na aveesea mai tagata.

Aisea o le a avea ai le aveesea o tusitusiga paia ma se mea matautia na tupu?
O a ni auala o le a mafai ona “nana” ai tusitusiga paia mai ia i tatou? (Atonu e te manao e valaaulia tamaiti e faitau ma faatusatusa le Alema 12:10–11 ma le 4 Nifae 1:48–49 ma talanoaina auala e mafai ai e tagata ona lē maua faamanuiaga paia.)
O a ni auala e faateleina ai e le mauaina o upumoni paia e pei o tusitusiga paia ma isi faaaliga lo tatou malosi e alualu ai i luma faaleagaga?

Faasoa atu le saunoaga lenei a Peresitene Spencer W. Kimball (1895–1985), le Peresitene lona 12 o le Ekalesia:

“Ua ou iloa pe a ou faasamasamanoa i la’u sootaga ma le lagi ma foliga mai ua leai se taliga faalelagi o faafofoga mai ma leai se siufofoga faalelagi o fetalai mai, ua ou mamao ese lava. Pe a ou faatofu au lava ia i tusitusiga paia, e faaitiitia ai le mamao ma toe foi mai ai le faaleagaga. Ua ou iloa ua sili atu ona loloto lou alofa i ē tatau ona ou alofa i ai ma lo’u loto atoa ma le manatu ma le malosi, ma o le tele o le alofa ia i latou, ua faigofie ai ia te au ona usitai i a latou fautuaga” (What I Hope You Will Teach My Grandchildren [address to seminary and institute teachers, July 11 1966], 4).

E faapefea e le faatofuina patino i tusitusiga paia ona uunaia le vavalalata ma le Tama Faalelagi ma Iesu Keriso?

Faatusatusa tagata i se tulaga o le liua, e pei ona faaalia i le amataga o le 4 Nifae, ma tagata i se tulaga o le amioleaga, e pei ona faaalia i le faaiuga o le 4 Nifae. Faasoa atu lau molimau e uiga i taunuuga o le le usiusitai ma le loto i ai ma taunuuga o le liua faifai pea.