Inisitituti
Mataupu 29

Mataupu 29

Alema 30–31

Folasaga

O lenei poloka mau o le a fesoasoani i tamaiti e faamalolosia ai a latou molimau. A o latou suesueina ia metotia a le aneti-Keriso o Korioa, o le a latou aoao ai e iloa metotia ma filosofia a aneti-Keriso o ona po nei. A o latou suesueina le tali a Alema ia Korioa, o le a latou saunia e puipuia i latou lava ma isi mai ia i latou o loo saili e faaumatia lo latou faatuatua.

O Nisi o Aoaoga Faavae ma Mataupu Faavae

  • E taumafai aneti-Keriso e taitaiese tagata mai le Atua ma Ana perofeta (tagai i le Alema 30:12–18, 23–28).

  • O se molimau maumaututu o Iesu Keriso ma Ana perofeta e fesoasoani e puipuia i tatou mai le liliuese faaletagata (tagai i le Alema 30:19–22, 29–44).

  • O le le usiusitai e taitai atu ai i mea sese ma le liliuese (tagai i le Alema 31:8–25).

  • O soo o Iesu Keriso e alolofa ma auauna atu i isi (tagai i le Alema 31:12–38).

Fautuaga mo le Aoaoga

Alema 30:12–18, 23–28. E Taumafai Aneti-Keriso e Taitaiese Tagata mai le Atua ma Ana Perofeta

Fai i tamaiti e faasoa mai nisi o finauga masani e faaaoga e tagata e luiina ai le faatuatua ia Iesu Keriso. (Aua le soona auiliilia. O le a talanoaina atili e tagata o le vasega lenei vaega pe a e talosagaina i latou e tagai i aoaoga maoti a Korioa.) A o faasoa mai e tamaiti o latou manatu, tau atu ia i latou o nisi tagata i taimi o Alema na taumafai e luiina i latou o ē talitonu ia Iesu Keriso. Ina ia fesoasoani ia i latou ia malamalama o le Tusi a Mamona o se punaoa mamana e faamalosia ai i latou e tetee atu i nei luitau, fai atu i ai e faitau le saunoaga a Peresitene Ezra Taft Benson o loo i le itulau 223 i le tusi lesona a tagata o le vasega.

  • E mafai faapefea e le suesueina o le Tusi a Mamona ona puipuia i tatou “e tetee atu i le tiapolo, taupulepulega leaga, ma mataupu a le tiapolo i o tatou aso”?

I le taimi o le lesona, uunaia tamaiti e saili mo mafuaaga na ala ai ona tumau le faamaoni o nisi o le nuu o Alema ae le faamaoni isi. Fai atu ia i latou e mafaufau pe faapefea ona faatatau ia lava mataupu faavae e tasi ia i tatou i nei aso?

Valaaulia tamaiti e faitau le faauigaga o le upu anetikerisoo loo i le Bible Dictionary. Atonu foi e te manao e faasino atu i latou i le faamatalaga o loo i le itulau 223 i le tusi lesona a tagata o le vasega. Talanoaina otooto ia uiga o se tagata po o se manatu lea e mafai ona mafaufauina o se aneti-keriso, e faamamafaina ai le faauigaga lautele mai le Bible Dictionary: “soo se isi po o soo se mea lava e faaseseina le talalelei moni po o le ata o le faaolataga ma ua faalauaitele pe faalilolilo foi, ua faatuina lava e tetee atu ai ia Keriso.”

  • O a aafiaga e mafai ona oo i ai le malo po o tagata taitoatasi ona o tupe taufaasese?

  • O le a le uiga o le faaseseina o le talalelei moni?

  • O a nisi o mea taufaasese i ona po nei ua faafoliga e ofoina maia le faaolataga? (A o e valaauliaina tamaiti e tali mai i lenei fesili, aua lava nei faatagaina se talanoaga e faitioina ai isi tapuaiga? Ae, ia faamautinoa e fesoasoani le talanoaga i tamaiti ia iloa le matautia o filosofia sese ma uiga e pei o filosofia ma uiga o Korioa.)

Faamalamalama atu o le a latou suesue i le aso i se tala o le Tusi a Mamona i se aneti-Keriso. Valaaulia i latou e sue i le Alema 30:12–18, 23–28. Faaaoga le siata lenei (a le saunia ai se pepa e tufa atu mo tamaiti ona tusi lea o le siata i luga o le laupapa) pe tuu i tamaiti e fai a latou lava lisi e faailoa ai aoaoga sese a Korioa. Fesoasoani i tamaiti e faatusatusa metotia a Korioa ma metotia ia ua faaaogaina i o tatou aso.

O Aoaoga ma Metotia a Korioa

Mau Faasino

Aoaoga a Korioa

O a Aoaoga Faavae Moni Na Osofaia e Korioa?

Alema 30:12

Alema 30:13

Alema 30:14

Alema 30:15

Alema 30:16

Alema 30:17

Alema 30:18.

Alema 30:23

Alema 30:24

Alema 30:25

Alema 30:26

Alema 30:27

Alema 30:28

Ia talanoaina nei fuaiupu i le fai atu o fesili e pei o fesili nei:

  • E faapefea ona pei aoaoga a Korioa o aoaoga sese i o tatou aso?

  • O a ni puna faigofie (e pei o tagata, faalapotopotoga, po o filosofia) o ia aoaoga sese i o tatou aso?

Faamalamalama atu o le laasaga muamua i le puipuia o i tatou lava mai nei aoaoga o le iloaina lea o na aoaoga. E ala i le faailoaina o aoaoga ma metotia a Korioa, e mafai ona tatou iloa lelei atili ai aoaoga faapena faaonapo nei. O isi vaega o lenei mataupu o loo taulai atu i auala e tumau faamaoni ai i le talalelei toefuataiina e tusa lava pe tatou te feagai ma tulaga e tofotofoina ai lo tatou faatuatua.

Alema 30:19–22, 29–44. O Se Molimau Maumaututu ia Iesu Keriso ma Ana Perofeta e Fesoasoani e Puipuia i Tatou mai le Liliuese Faaletagata

Fai atu le fesili lenei:

  • Aisea e faigata ai ona tali atu i tauaiupuga e pei o tauaiupuga a Korioa?

Faamalamalama atu e mafai ona tatou aoao mai tali a tagata na taumafai Korioa e faasese. Tusi Nuu o Amona i luga o le laupapa. Valaaulia tamaiti e faitau le leoa le Alema 30:19–21.

  • Mai mea ua e iloaina e uiga i tagata sa Amona, aisea e te manatu ai na le mafai ai e Korioa ona taitaiseseina i latou? (Tusi tali a tamaiti i luga o le laupapa i talaane o le Nuu o Amona.)

Tusi Kiteona i luga o le laupapa. Fai i tamaiti e faitau le Alema 30:21–23, 29.

  • Na faapefea ona tali atu Kiteona i tauaiupuga a Korioa? (Tusi tali a tamaiti i luga o le laupapa i talaane o Kiteona.)

I le fesootaiga ma le Alema 30:29, valaaulia tamaiti e faitau le saunoaga a le Perofeta o Iosefa Samita o loo i le itulau 227 i le tusi lesona a tagata o le vasega.

  • E mafai faapefea ona tatou iloaina pe o saili faamaoni se tagata i le upumoni pe ua na ona finauvale?

  • O a ni auala e mafai ai ona tatou tali atu i se tasi o loo fesili mai i ni fesili faigata ae o loo saili faamoni i le upumoni? O a la ni auala e mafai ona tatou tali atu ai i se tasi o loo finauvale?

Tusi Alema i luga o le laupapa. Valaaulia tamaiti e faitau le Alema 30:30–44.

  • Na faapefea ona tali atu Alema i tauaiupuga a Korioa? (Tusi tali a tamaiti i luga o le laupapa i talaane o Alema.)

Na tuu atu e Alema se molimau malosi o le Atua le Tama ma Iesu Keriso. Ina ia faamamafaina le mana o le molimau patino, fai atu i se tamaitiiti e faitau le saunoaga a Elder Jeffrey R. Holland o loo i le itulau 227 i le tusi lesona a tagata o le vasega.

  • O a ni auala e avea ai se molimau patino ma se “auupega silisili ona le faafitia ma le le i’u”?

Na mafai ona faasoa atu ma le malosi tele e Alema lana molimau ona sa ia galue ia maua lena molimau ma faamalosia. Ina ia fesoasoani i tamaiti ia malamalama i le auala na maua ai lana molimau, vaevae i latou i ni vaega se fa.

Tusi fesili nei i luga o le laupapa: O a aafiaga na saunia ai Alema e taulima ai Korioa ma ana aoaoga? Tuu atu se tasi o poloka mau nei i vaega taitasi: Mosaea 27–29; Alema 1–3; Alema 4–7; Alema 8–16. Fai atu i vaega e sailiili i ulutala o mataupu i a latou poloka mau atofaina e fesoasoani ai ia i latou e tomanatu ai i aafiaga o Alema.

Pe a lava le taimi na tuu atu i tamaiti e suesue ai i a latou mau atofaina, fai atu i vaega taitasi e lipoti mai a latou tali.

  • O a ni aafiaga na e maua ua faamalosia ai lau molimau ma saunia ai oe e puipuia lou faatuatua?

  • O le a se mea e mafai ona tatou faia e saunia ai e pei o Alema?

Valaaulia tamaiti e faitau le leoa le Alema 30:39, 44, ma faailogaina ia faamaoniga na tuu atu e Alema o loo i ai le Atua: (1) o le molimau a isi, (2) o tusitusiga paia, ma le (3) o foafoaga a le Atua. Ona talanoaina lea o faamaoniga taitasi nei, e faaaoga ai nisi o manatu po o manatu uma nei:

Molimau a Isi

Fai atu i se tamaitiiti e faitau le Mataupu Faavae ma Feagaiga 46:13–14. Faamalamalama atu o le tomai e talitonu ai i molimau a isi o le upumoni o se meaalofa a le Agaga.

Atonu e te manao e faasoa atu le saunoaga lenei a Peresitene Harold B. Lee (1899–1973), le Peresitene lona 11 o le Ekalesia:

“O nisi o outou atonu e le o i ai ni molimau, ma o lea na ou fai atu i isi veaga e pei o outou, afai e le o i ai sau molimau i le aso, aisea la e te le pipii mai ai i la’u molimau mo sina taimi itiiti lava? Pipii mai i a matou molimau, o molimau a o outou epikopo, a o outou peresitene o siteki, seia oo lava ina mafai ona outou atiina ae ai. Afai e te le fai atua lava se isi tala i le aso nai lo lo’u talitonu ona o la’u peresitene, po o la’u epikopo, e talitonu, ou te faatuatuaina o ia, ia faia lenei mea seia oo ina mafai ona outou maua se molimau mo outou lava ia; ae ou te lapataia outou o le a le tumau ai lava ia te outou seiloga tou te faaauau pea ona tausia ma ola ai i aoaoga” (The Teachings of Harold B. Lee, ed. Clyde J. Williams [1996], 136).

  • E faapefea ona faamalosia e molimau a isi tagata lau molimau?

Tusitusiga Paia

Tuu atu i se tamaitiiti e faitau le saunoaga lenei a Elder Donald L. Staheli o le Fitugafulu:

“O le aafia ma le faamaoni o le tagata lava ia i tusitusiga paia e maua mai ai le faatuatua, faamoemoe, ma tali i o tatou luitai i aso taitasi. O le faitau soo, mafaufau loloto i ai, ma le faaaogaina o lesona o tusitusiga paia, a tuufaatasi ma le tatalo, o le a avea ma se vaega e le mafai ona suia i le mauaina ma le lagolagoina o se molimau malosi ma le ola (i le Lipoti o le Konafesi, Ole. 2004, 40; po o le Liahona, Nov. 2004, 39).

  • O a ni auala ua faamalosia ai e tusitusiga paia ma upu a perofeta o aso e gata ai lau molimau?

Foafoaga a le Atua

Fai atu i se tamaitiiti e faitau le saunoaga a Peresitene Gordon B. Hinckley o loo i le itulau 228 i le tusi lesona a tagata o le vasega.

  • O a ni auala o loo molimau mai ai le lalolagi ma le lagi i le Atua?

Alema 30:52–53. “Na A’u Iloa foi E I ai le Atua”

Valaaulia se tamaitiiti e faitau le Alema 30:52–53. Ona faitau lea o le saunoaga lenei a Sister Janette C. Hales, o le sa auauna o se peresitene aoao o Tamaitai Talavou. Fai i tamaiti e faalogo ma le totoa i le saunoaga, o loo ta’ua ai mea sese a Korioa.

“Ua faamatalaina Korioa … o se anetikeriso, ae ou te le o mautinoa pe na ia amata i lena ala. Pe na e manatu ea na amata Korioa … i le tele o ni fesili? E ui lava atonu na amatalia ana fesili i le faamaoni, ae e lua ni mea sese leaga na ia faia. Muamua, na ia faafitia lona faatuatua. Na ia faafitia le Malamalama o Keriso lea na tuuina atu ia te ia. Lona lua, na amata ona ia aoao atu aoaoga faavae sese i isi. O lona taitai, o Alema, na tuu atu lana molimau ia Korioa, ma na toe faia ai foi e Korioa le isi mea sese. Nai lo le faalogo atu i lona taitai ma faalogo atu ma le faalagolago i le Agaga, na ia puipuia lona tulaga i le atamai ma amata aiona finauvale tele. Na ia manao e tuu atu ia te ia se faailoga. Na tuu atu ia Korioa se faailoga. Na taia o ia ma gugu ai. Atonu sa leai sona faamoemoe mo se faailoga e faapea sona aafiaga patino ia te ia, ae e masani lava o taunuuga o a tatou mea sese e aafia patino ai i tatou lava.

O “fuaiupu 52 ma le 53 o le mataupu 30 ou te talitonu e sili ona taua. Na faailoa mai e Korioa, ‘Na a’u iloa foi e i ai le Atua. A e peitai, faauta, na faaseseina au e le tiapolo’ (Alema 30:52–53). Pe le o se mea faafiafiaina ea lena? ‘Na au iloa foi.’ Na i ai le Malamalama o Keriso i totonu ia te ia, ae na faaseseina o ia e Satani” (“Lessons That Have Helped Me,” in Brigham Young University 1992–93 Devotional and Fireside Speeches [1993], 89).

  • E tusa ai ma le saunoaga a Sister Hales, o a mea sese a Korioa?

  • Aisea e ono masalosalovale ai ma finauvale se tagata e i le tulaga o Kori’oa ae le mulimuli i se fautuaga a se taitai?

  • Aisea e le atamai ai le masalosalovale ma le finauvale pe a i ai ni a tatou fesili po o ni faaletonu?

Alema 31:5. O Le Upu a le Atua e I ai le Mana e Fesoasoani ai ia i Tatou ia Lelei Atili

Tuu atu i tamaiti e faitau le saunoaga a Peresitene Boyd K. Packer o loo i le itulau 230 i le tusi lesona a tagata o le vasega.

  • Aisea e taua ai le aoaoina o aoaoga faavae o le talalelei? (Tagai i le MFF 84:85.)

  • Aisea e taua ai le suesue e i tatou lava o aoaoga faavae ae le na ona faalogo i ai o tautalagia i le lotu?

Fai i se tamaitiiti e faitau le Alema 31:5.

  • O le a le mea e tuu atua le mana i le upu a le Atua e suia ai o tatou olaga? (Ia mautinoa ua malamalama tamaiti o le tasi mafuaaga e mamana tele ai le upu ona e na te valaaulia le Agaga Paia i o tatou olaga.)

Valaaulia se tamaitiiti e faitau le saunoaga a Peresitene Ezra Taft Benson o loo i itulau 230 i le tusi lesona a tagata o le vasega. Fai i tamaiti e lisi ia faamanuiaga ia na faamatalaina e Peresitene Benson e oo mai i le suesueina o tusitusiga paia.

Alema 31:8–25. O Le Le Usiusitai e Taitai atu ai i Mea Sese ma le Liliuese

Na avea sa Sorama ma tagata o le Ekalesia ae na “pa’ū’ū i latou ma fai mea sese e tele” (Alema 31:9). Tuu atu i tamaiti e faatusatusa le au sa Nifae o loo faamatalaina mai i le Alema 30:3 ma le au sa Sorama o loo faamatalaina mai i le Alema 31:9–10.

  • O a ni auala e uunaia ai e le le usiusitai a tatou molimau?

Tuu atu i tamaiti e faatusatusa le Alema 31:9 ma le Ioane 7:17 .

  • E faapefea ona uunaia e le usiusitai a tatou molimau?

Valaaulia tamaiti e iloilo faavave le Alema 31:1–25 ma lisi ia uiga o sa Sorama ma a latou mausa tapuai. (E mafai ona aofia i le lisi a tamaiti e faapea na fai soo e sa Sorama ia tatalo lava e tasi, e tasi lava se nofoaga faapitoa e tatalo ai, e faatasi ona tapuai i le vaiaso, talitonu na filifilia na o i latou e le Atua ina ia laveaiina, na matele i mea faalelalolagi, ma vaai maualalo i e matitiva.) Valaaulia ni nai tamaiti e faasoa mai a latou lisi i le vasega. (E mafai ona e mafaufau e tusi se faatusatusaga i le va o faatinoga a sa Sorama ma nisi o a tatou faiga faaonapo nei, e pei o le faia o tatalo lava e tasi, tapuaiga e na o le faatasi i le vaiaso, lagonaina ua filifilia i tatou ma ua sili atu nai lo isi, ma matele ai i le faalelalolagi.)

E ala atu i nei fesili ma le talanoaga, fesoasoani i tamaiti ia malamalama o le aofia ai ma le mataalia i le talalelei, e pei o galuega faalemalumalusa, afiafi faaleaiga, galuega auauna atu, ma gaoioiga e ala i a tatou paranesi ma uarota, e fesoasoani ia i tatou e latalata atu ai i le Alii. O gaoioiga faapea e fesoasoani ia i tatou e valaaulia le Agaga Paia i o tatou olaga i le vaiaso atoa, ae le na o le Sapati. A o avea le Agaga ma se vaega o lo tatou olaga i aso taitasi, e mafai ona tatou teenaina aneti-Keriso i o tatou aso ma tumau i le faamaoni ia Iesu Keriso.

  • O loo tau mai i le Alema 31:10 e faapea na teenaina e sa Sorama le tausia o “sauniga a le ekalesia.” O a nisi o “sauniga a le ekalesia” i nei aso? (E mafai ona aofia i tali ia sauniga o le perisitua, avanoa e auauna ai i le Ekalesia, tiutetauave o le aiga e pei o afiafi faaleaiga, tatalo patino, suesueina o tusitusiga paia, ma galuega faalemalumalusa ma talafaasolopito o aiga.)

  • E faapefea e nei sauniga ona fesoasoani ia i tatou e aloese mai le pa’ū atu i faaosoosoga?

  • E faapefea e nei sauniga ona valaauliaina le Agaga i o tatou olaga?

  • Aisea e taūa ai le upu aso fai soo i le fuaiupu 10 i a tatou taumafaiga e faatumauina le Agaga i o tatou olaga? (Tagai i le 2 Korinito 4:16; Helamana 3:36. Manatua, ona e talu ai o le faamaualuga e mafai ona “tupu ia te i [tatou] i lea aso ma lea aso,” e manaomia ona “faafouina i [tatou] i lea aso ma lea aso.”)

Alema 31:12–38. O Soo o Iesu Keriso e Alolofa ma Auauna Atu i Isi

O loo i ai i le Alema 31 ia tatalo e lua ia e matua eseese lava le tasi mai le isi. A o faatusatusa e tamaiti le tatalo a sa Sorama ma le tatalo a Alema, e mafai ona latou faailoa mai ni manatu ma ni talitonuga faigofie na taitai atu ai i tatalo. Tuu atu i tamaiti e faitau faavave le Alema 31:15–18 (o le tatalo a sa Sorama) ma le Alema 31:26–35 (tatalo a Alema). Fai atu ia i latou e faasoa mai mea ua latou aoaoina e uiga ia sa Sorama ma Alema mai upu o nei tatalo. Valaaulia ni tamaiti se toalua e lisi nei malamalamaaga i luga o le laupapa, o le tasi tamaitiiti e lisiina malamalamaaga e uiga ia sa Sorama ma le isi e lisiina malamalamaaga e uiga ia Alema.

  • O le a le mea na uunaia Alema e auauna atu? (E mafai ona aofia i tali lana molimau, lona alofa i le Atua, ma lona alofa mo isi tagata.)

Fesoasoani i tamaiti ia malamalama o se molimau ia Iesu Keriso e taitai atu ai i tatou e alolofa ma auauna atu i isi. Faitau le saunoaga lenei a Elder Marvin J. Ashton o le Korama a Aposetolo e Toasefululua (1915–1994):

“Pe a liua moni i tatou ia Iesu Keriso, ma tuuina atu i tatou ia te Ia, o le a tupu mai se mea mataina: o le a liliu atu o tatou mafaufau i le manuia o o tatou uso a tagata, ma o le ala o le a tatou taulimaina ai isi o le a faatumuina atili i le onosai, agalelei, talia faalelei, ma se faanaunauga e faia se mea lelei i o latou olaga. O le amataga lea o le liua moni” (i le Lipoti o le Konafesi, Ape. 1992, 26; po o le Liahona, Iul. 1992, 23).

  • O le a le mea na ole atu ai Alema ona e alofa i tagata? (Tagai i le Alema 31:34–35.)

  • O a ni auala e mafai ona faaaoga ai faataitaiga a Alema i o tatou olaga?