Mataupu 15

Iakopo 1–4

Folasaga

“Ina ua muamua ona maua [lana] feau mai le Alii” (Iakopo 1:17), na lapataiina e Iakopo sa Nifae e faatatau i le amioleaga tele ua salalau ia i latou: faamaualuga, o le faaaogaina le talafeagai o le tamaoaiga, ma le solia o le tulafono o le legavia. Ina ua maea ona lapataia i nei agasala, na ola atu Iakopo i lona nuu ina ia “faalelei ma [le Tama] i le togiola a Keriso, o lona Alo e Toatasi” (Iakopo 4:11).

I le lalolagi i le aso, e toatele tagata ua pauu i faaosoosoga lava e tasi ia na augani atu ai Iakopo ia sa Nifae e aloese mai ai. A malamalama tamaiti ma faaaoga aoaoga a Iakopo, o le a latou mauaina le malosi e tetee atu ai i faaosoosoga. A latou lagonaina le molimau mai o le Agaga i nei aoaoga, o le a sili atu ona latou saunia e ola e tusa ma faatulagaga a le Alii.

O Nisi o Aoaoga Faavae ma Mataupu Faavae

• E i ai i taitai o le Ekalesia se tiutetauave paia e lapatai atu ai e aloese mai i le agasala (tagai i le Iakopo 1:17–19; 2:1–11).

• E tatau ona tatou sailia le malo o le Atua ae tatou te lei sailia oa (tagai i le Iakopo 2:12–21).

• E fiafia le Alii i le ola mama (tagai i le Iakopo 2:22–35; 3:1–14).

• “Se a le mea e le talatala ai i le togiola a Keriso?” (Iakopo 4:1–15).

Fautuaga mo le Aoaoga

Iakopo 1:17–19; 2:1–11. E I ai i Taitai o le Ekalesia se Tiutetauave Paia e Lapatai Atu ai e Aloese mai i le Agasala

Faasoa atu le saunoaga lenei a Peresitene Harold B. Lee (1899–1973), o le Peresitene lona 11 o le Ekalesia (o loo maua foi i le companion DVD A):

“Ou te manatua se saunoaga a [Elder] Charles A. Callis [o le Korama a le Toasefululua] na fai mai ia te au i se tasi aso. … Sa ia fai mai, ‘E te silafia, ou te manatu e masalo o le mea silisili ona taua e ao ona talai atu e i tatou o le Pulega Aoao e le gata o le salamo mai agasala, ae e sili atu le taua nai lo lena, ia patino lava le aoaoina o tagata talavou, ma le Ekalesia aoao atoa, i le matuia tele o le agasala ma le matautia e mulimuli atu i lē na te faia’” (i le Conference Report, Apr. 1956, 108).

Faamatala atu o le asō o le a outou talanoaina ai vaega o se lauga lea na valaau atu ai Iakopo ia sa Nifae ina ia salamo. Faitau le Iakopo 2:3–9 faatasi ma tamaiti. Tuu atu ia i latou e vaavaai mo upu po o fuaitau ia e faamatala ai po o a lagona o Iakopo i lona tiutetauave i lena aso.

• O le a le mea na faanoanoa ai le agaga o Iakopo?

• Aisea na lagona ai e Iakopo e taua mo ia le tautala atu ia sa Nifae e tusa ma a latou agasala?

Tuu atu i tamaiti e faitau le leoa le Iakopo 1:17–19; 2:2–3, 9–11. Atonu foi e te manao e valaaulia i latou e faitau upu a Iakopo i le 2 Nifae 9:48. A o latou faitauina, uunaia i latou e vaavaai mo mafuaaga na aoao atu ai e Iakopo le salamo i lona nuu, e ui lava i le mamafa o lenei tiute na oo mai ia te ia. Faatonu tamaiti e faailoga mea na latou maua, ma vaevae ia taitoalua ma fefaasoaai mea na latou maua. Pe a maua e tagata uma le avanoa e fefaasoaai ai ma le isi tagata, valaaulia ni nai tamaiti e faasoa mai i le vasega atoa. E mafai ona aofia ai tali nei:

1. Na poloaiina o ia e le Alii ia faia (tagai i le Iakopo 1:17; 2:10–11).

2. O se vaega o le faalauteleina o lona tofiga (tagai i le Iakopo 1:18–19; 2:2).

3. E le i manao o ia e tausalaina ona o agasala a le nuu (tagai i le Iakopo 1:19; 2:2).

4. Sa popole tele o ia mo le soifua manuia o agaga o tagata (tagai i le Iakopo 2:3).

• O le a le mea e te fiafia ai i mafuaaga a Iakopo mo le talaiina o le salamo? Aisea?

Faamanatu atu i tamaiti e suitulaga taitai perisitua i le Faaola pe a latou valaau atu i tagata ina ia salamo. Valaaulia tamaiti ia mafaufau e uiga i auala latou te tali atu ai pe a latou faalogo i se tasi o o latou taitai aoao o le Ekalesia po o le lotoifale, o lapatai mai i le agasala ma ona taunuuga.

Iakopo 2:12–21. E Tatau Ona Tatou Sailia le Malo o le Atua Ae Tatou Te Lei Sailia le Oa

Tusi se aofaiga tele o se tupe i luga o le laupapa.

• O le a sau mea e fai pe afai ua ia te oe lenei tupe tele e faaalu i le aso e tasi?

Valaaulia nisi tamaiti e tusi a latou tali.

Faamalamalama atu o loo lapatai mai pea perofeta e uiga i le matautia o le saili o le oa i le tau o le amiotonu. Na tuu atu e Iakopo se lapataiga faapea i lana lauga ia sa Nifae. Tuu atu i tamaiti e faitau le Iakopo 2:12–16.

• O a nisi o mea matautia faaleagaga ua faamatauina ai i tatou pe a tatou sailia le oa e sili atu nai lo le tatou sailia o le amiotonu?

• Aisea e te manatu ai e mafai e le faamaualuga ma le faaaogaina sese o le oa ona taitai atu ai i tatou e agaleaga i isi tagata? E mafai faapefea e le faamaualuga ona faatamaia agaga o tagata?

O se vaega o lenei talanoaga, atonu e te manao ai e faitau le saunoaga a Peresitene Tavita O. MaKei o loo i le itulau 121 i le tusi lesona a tagata o le vasega.

Tuu atu i tamaiti e faitau le Iakopo 2:17–20 ma tuufaatasi se lisi o taiala e pulea ai o tatou uiga faaalia i le oa (manatua o le Iakopo 2:18–19 o se mau tauloto ). Pe a uma ona faia e tamaiti le mea lenei, fai atu i ai e faasoa mai a latou lisi. Atonu e te manao e tusi a latou tali i luga o le laupapa. E mafai ona aofia i a latou lisi faamatalaga nei:

• E tatau ona tatou mafaufau i isi e tutusa i tatou (tagai i le fuaiupu 17).

• E tatau ona tatou foai atu ma le lotoalofa a tatou faamanuiaga faaletino (tagai i le fuaiupu 17).

• E tatau ona tatou saili le malo o le Atua ae tatou te lei saili le oa (tagai i le fuaiupu 18).

• E tatau ona tatou maua se faamoemoe ia Keriso ae tatou te lei saili le oa (tagai i le fuaiupu 19).

• E tatau ona tatou faia ai mea lelei i a tatou oa (tagai i le fuaiupu 19).

• E le tatau ona tatou tausalaina isi pe a laiti a latou mea nai lo i tatou (tagai i le fuaiupu 20; tagai foi i le fuaiupu 13).

Faamanatu atu i tamaiti le fesili lea na e fesili ai i le amataga o lenei fautuaga mo le aoaoga: O le a sau mea e fai pe afai ua ia te oe se aofaiga tele o se tupe e faaalu i le aso e tasi? Tuu atu i tamaiti e faasino atu i tali na latou tusia ma mafaufau pe o le a latou suia ia tali e faatatau i aoaoga a Iakopo. Valaaulia tamaiti taitasi e tusi se parakalafa puupuu e otooto mai ona lava uiga faaalia e faatatau i oa faaletino.

Faasino atu atonu o le a tatou le maua lava se aofaiga tele o se tupe e faaalu i se aso se tasi. Ae, ua poloaiina i tatou e le Alii ina ia agalelei atu i mea ua tatou maua, e tusa lava pe tele pe itiiti. Fautua atu i tamaiti e mafaufau pe mafai faapefea ona latou mulimuli i le fautuaga a Iakopo e tusa lava pe le o faamanuiaina i latou e le Alii i ni oa se tele.

Fai i tamaiti e suesue le Iakopo 2:20–21.

• E faapefea e lenei aoaoga faavae ona faatosinaina lo tatou faaaogaina o tupe ma isi mea totino? E faapefea e lenei aoaoga faavae ona faatosinaina le ala tatou te taulimaina ai isi tagata?

Iakopo 2:22–35; 3:1–14. E Fiafia le Alii i le Ola Mama

I luga o le laupapa, tusi ai le Ua amata ona galulue i le agasala ma le Ua amata ona amioletonu.

Valaaulia se tamaitiiti e faitau le Iakopo 2:5 ma le 2:23. Ina ia fesoasoani i tamaiti ia malamalama i le uiga o le tala a Iakopo ina ua ia fai mai o nisi tagata ua amata ona “galulue i le agasala” ma ua “tauau ina amioletonu,” faasoa atu le saunoaga lenei a Elder Dallin H. Oaks o le Korama a Aposetolo e Toasefululua. Fesoasoani i tamaiti ia malamalama i le mea na aoao mai e Elder Oaks e uiga i le natura faatupulaia o le agasala o le ola le mama.

“I le mataupu lona lua o le tusi lea e tauaveina lona igoa, na tausalaina ai alii e Iakopo ona o lo latou ‘faitaaga’ (fuaiupu 23, 28). … O a nei ‘faitaaga’ inosia? E leai se masalomia o nisi tagata ua uma ona faatinoina ni uiga leaga. Ae o le taulaiga autu lava o le lauga maoae a Iakopo e le o uiga leaga ua faataunuuina, ae o uiga leaga o loo mafaufauina.

“Na amata e Iakopo lana lauga i le ta’uina atu i alii e faapea ‘e oo i nei ona po, [ua latou] usiusitai i le afioga a le Atua’ (Iakopo 2:4). Ae peitai, na ia ta’u atu ia i latou ua ia iloa o latou manatu, lea ua latou ‘amata ona galulue i le agasala, o le agasala lea ua inoino tele i ai … le Atua’ (f. 5). ‘[E tatau ona ou] molimau atu ia te outou e uiga i le agasala a o outou loto’ (f. 6), na ia faaopoopo ai. Na saunoa atu Iakopo e pei lava o Iesu ina ua Ia fetalai mai, ‘Ai se vaai atu i le fafine ina ia manao i ai, ua uma ona mulilua ma ia i lona loto’ (Mataio 5:28; tagai foi i le 3 Nifae 12:28; MFF 59:6; 63:16)” (i le Lipoti o le Konafesi, Ape. 2005, 92; po o le Liahona, Me 2005, 88; uluai faatusilima).

Fesoasoani i tagata o le vasega ina ia malamalama o mafaufauga amioletonu e amata ai faatinoga amioletonu. O agasala o le le ola mama e seasea tupu vagana ai ua faatagaina i latou lava e faatupulaia le faateleina i le amioletonu.

Valaaulia tamaiti e faitau le Iakopo 2:23–27.

• Na faapefea ona taumafai sa Nifae e tauamiotonuina a latou agasala?

• Aisea e te manatu ai tatou te taumafai i nisi taimi e tauamiotonuina le agasala?

Valaaulia se tagata o le vasega e faamalamalama otooto mai le tulafono o le ola le mama.

Faamalamalama atu e ui lava atonu o le a le faaosoosoina i tatou e faia le agasala lava e tasi na faaosoosoina alii sa Nifae e fai, ae e taumafai lava Satani e faaosoosoina i tatou i auala lava e tasi, ma taumafai e faatalitonu i tatou ia faamaonia ai mafaufauga ma amioga agasala. Ina ia fesoasoani i tamaiti ia malamalama i le tulafono o le ola le mama ma le faatatauga i o tatou olaga, ia faasoa atu upusii nei. (E mafai ona e muai tuua i luga o se pepa faailoa, se ata manino, po o se pepa e tufa atu. O loo maua foi le saunoaga a Elder Richard G. Scott i le companion DVD B.)

“Ua poloai mai le Atua, o mana paia o le foafoaina o fanau, ua na o le va lava o le alii ma le tamaitai ua faaipoipoina faaletulafono, o se tane ma le ava, e tatau ona faaaogaina ai” (“O Le Aiga: O Se Folafolaga i le Lalolagi,” Ensign, Nov. 1995, 102).

“A o lei faaipoipoina, ia aua lava nei faia se mea e faaosofia ai lagona malolosi ia e na o totonu o le faaipoipoga e tatau ona faaalia ai. Aua lava nei e auai i le faatinoina o ni feakisiga e faaosofia ai lagona malolosi, aua nei e taoto i luga o se isi tagata, pe tago i vaega lilo, po o itutino sa o se isi tagata, pe o fai ni ofu pe leai foi. Ia aua lava nei faatagaina se tasi e faia na mea ia te oe. Aua nei e faaosofiaina na lagona i lou tino” (Mo Le Malosi o le Autalavou [2001], 27).

E faaosoosoina e Satani tagata ina ia talitonu e i ai se vaega e faatagaina o fesootaiga faaletino pe a mananao ai ni tagata se toalua ua sailia faalogoga malolosi faaosofia, ma afai e faia ma le faaeteete o le a le afaina. I le avea ai ma se molimau a Iesu Keriso, ou te molimau atu ua matua pepelo lena mea.

E sailia faapitoa lava e Satani ia faaosooso le o loo ola mama atoatoa e faataitai e ala i mekasini, kaseti vitio, po o ata tifaga o loo i ai ata malolosi o se tino [o se tagata]. E manao o ia e faaosofia lagona ina ia faia ai faataitaiga e vave ai ona tau i uiga feusuai ma le toilalo” (Richard G. Scott, i le Lipoti o le Konafesi, Oke. 1994, 51; po o le Liahona, Ian. 1995, 45–46).

Pe a uma ona faitauina e tamaiti le saunoaga a Elder Scott, atonu e te manao e tuu atu ia i latou e faitau le saunoaga a Elder Scott o loo i le itulau 123 i le tusi lesona a tagata o le vasega. O loo maua foi lenei saunoaga i le companion DVD C.

• E tusa ai ma le aoaoga a Elder Richard G. Scott, o faapefea ona faaosoosoina i tatou e Satani ina ia le ola mama i le asō?

• O a ni auala o taufaamatau ai ponokalafi i le ola mama faaletagata lava ia?

Valaaulia se tamaitiiti e faitau le Iakopo 2:28.

• Aisea e te manatu ai e fiafia le Alii i le ola mama?

Faitau le Iakopo 2:31–35 ma le 3:10. A o e faitau, tuu atu i tamaiti e vaavaai ma faailoga nisi o taunuuga o le solia o le tulafono o le ola mama. Valaaulia tamaiti e faasoa mai mea ua latou faailogaina. Fesoasoani i tamaiti ia malamalama e faapea i le faaopoopo atu i le aafia ai o le tagata ua faia ia agasala, e masani lava ona i ai aafiaga faataumaoi o feusuaiga le mama i tagata o le aiga.

• O a ni auala e ono aafia ai le aiga ona o uiga le mama o se tagata? (Faalagolago i tulaga o aiga o tamaiti, atonu e te manao e fesili maoti pe mafai faapefea e se ola le mama o se tagata mai feusuaiga ona aafia ai lona toalua, fanau, matua, uso ma tuafafine ma tuagane, po o toalua ma fanau i le lumanai.)

Tuu atu i tamaiti ni nai minute e tusi ai a latou mafuaaga o le ola ai i le tulafono o le ola mama. Valaaulia tamaiti e toe tautino atu i le Alii o le a latou faaauau pea ona ola agavaa mo faamanuiaga e oo mai i lenei poloaiga. Molimau atu i le paia o le natura o le tulafono o le ola mama ma le olioli lea e oo mai i le ola ai i lea tulafono.

Iakopo 4:1–15. “Se a Le Mea e le Talatala ai i le Togiola a Keriso?”

Tusi le ata lenei i luga o le laupapa:

Ituaiga o le Iloa

lelei ona iloa

taua ona iloa

tatau ona iloa

Fai i tamaiti e lisi faataitaiga o faamatalaga ia e “lelei ona iloa.” (O tali e mafai ona aofia ai mea e pei o ‘ai o taaloga, tala malie, po o ni mea moni e manaia ae o ni mea iti.) Ona fai atu lea ia i latou e lisi ni faataitaiga o faamatalaga lea e “taua ona iloa.” (E mafai ona aofia i tali mea e pei o tulafono faamatematika, mea moni autu o talafaasolopito, po o mea o loo tutupu e uunaia ai.)

Faasino atu e faapea a o tatou tauivi mo le faaeaga i le malo selesitila, o nisi o faamatalaga e “tatau ona iloa.” Valaaulia tamaiti e faitau le leoa le Iakopo 4:4–12. A o latou faitau, tuu atu ia i latou e faailoga aoaoga faavae ia e “tatau ona iloa.” Pe a maea le taimi na tuuina atu, valaaulia i latou e faasoa mai nisi o aoaoga faavae na latou faailogaina. Fesili i ai pe aisea ua tatau ai na aoaoga faavae.

• O a mea o loo aoao mai e fuaiupu 8 ma le 10 e uiga i auala e mafai ona tatou aoao ai i mea e tatau mo i tatou ona iloa?

Pe a talafeagai ai, fesoasoani i tamaiti ia iloa pe faapefea ona fesootai faamatalaga na latou faasoa maia ma le Togiola a Iesu Keriso. Faasino atu i le ata i luga o le laupapa a o outou talanoaina fesili nei:

• Aisea e te manatu ai e tatau le iloaina o le Togiola?

• O a nisi o taunuuga o le le mafai ona malamalama, e tatau ona iloa le soifuaga ma le misiona a Iesu Keriso?

Na tau mai e Iakopo e uiga i tagata o ē le tuua le iloa o Iesu Keriso i le totonugalemu o o latou olaga. Faitau le Iakopo 4:14.

• O le a sou manatu i le uiga o le vaavaai i “tala atu o le faailoga”?

Ina ia faaopoopo atili se malamalamaaga e uiga i lenei fuaitau, atonu e te manao e valaaulia se tamaitiiti e faitau le saunoaga a Elder Neal A. Maxwell o le Korama a Aposetolo e Toasefululua o loo i le itulau 125 i le tusi lesona a tagata o le vasega.

• O a ni auala e tauaso ai tagata pe a latou vaavaai i tala atu o le faailoga?

• E tusa ai ma Iakopo, o le a le “faailoga” na le mafai ona vaaia e tagata Iutaia? (Tagai i le Iakopo 4:15.)

Faapipii se ata o Iesu Keriso e sosoo ma le ata i luga o le laupapa. Faamautu atu o le Faaola ma Lana taulaga togiola o loo i ai i le fatu o le fuafuaga sili o le fiafia a le Tama Faalelagi. Fai i tamaiti e faitau le Iakopo 4:15–16 ma vaavaai mo taunuuga o le le vaavaai ia Iesu Keriso ma aoaoga faavae tutotonu o Lana talalelei.

Faamaea le lesona i le faitauina o le Iakopo 4:12.

• O a nisi o auala e mafai ona tatou “talatala ai i le togiola a Keriso”? O le a sou manatu i le uiga o le “maua o le malamalama atoatoa o [Keriso]”?

• Na faapefea ona faamanuiaina oe a o e taulai atu i le Faaola ma le mana o Lana Togiola?

Afai e lei tuu atua lau molimau, faasoa atu loa e uiga i le Togiola a Iesu Keriso.