Mataupu 32

Alema 40–42

Folasaga

I lenei poloka mau, na aoao atu ai e Alema lona atalii o Korianetona e uiga i le faitalia o le tagata ma le taui ma taunuuga e faavavau. A o talanoaina e tamaiti nei aoaoga, o le a toe faamanatu atu ai ia i latou o le “agasala e le o le fiafia lea” (Alema 41:10 ) ma e le aumaia lava e le amiotonu se faanoanoa. O le a latou iloa o filifiliga latou te faia i le lalolagi o le a iloa ai lo latou tulaga o le fiafia pe a oti. E mafai ona e fesoasoani i tamaiti ia malamalama i le matafaioi e mafai ona faia e Iesu Keriso i le faafetaiaia o manaoga o le faamasinoga tonu. A o tatou filifili ma mulimuli ia te Ia, tatou te manuia mai le fuafuaga o le alofa mutimutivale ma le alualu i luma e agai atu i le fiafia e faavavau.

O Nisi o aoaoga Faavae ma Mataupu Faavae

O le toetu o le toefuataiga lea o le agaga ma le tino i lona tulaga tatau ai ma le atoatoa (tagai i le Alema 40:1–5, 8–10, 16–25).
Pe a oti, e ulu atu tagata uma i le lalolagi o agaga (tagai i le Alema 40:6–15, 21).
“O le agasala e le o le fiafia lea” (tagai i le Alema 41; manatua o le fuaiupu 10 o se mau tauloto ).
Ua mafai ona maua le Faaolataga e ala i le Togiola a Iesu Keriso (tagai i le Alema 42).

Fautuaga mo le Aoaoga

Alema 40–42. Folasaga

A o amata ona e aoao atu, atonu e te manao e faasino atu o loo i ai i le Alema 40, 41, ma le 42 upu a Alema i lona atalii o Korianetona, lea na faia le agasala matuia a o ia faamisiona ai i sa Sorama. Ua faamatalaina e mataupu taitasi se fesili o aoaoga faavae e ese mai ai. Valaaulia tamaiti e faitau le Alema 40:1, 41:1, ma le 42:1, saili mo le autu o mataupu taitasi.

E faapefea e se malamalamaga o nei autu ona fesoasoani ia Korianetona ina ia salamo?

Alema 40:1–5, 8–10, 16–25. O Le Toetu O Le Toefuataiga lea o le Agaga ma le Tino i Lona Tulaga Tatau ai ma le Atoatoa

Fai i tamaiti e toe iloilo le leoa le Alema 40:1.

O le a le vaega o le fuafuaga o le fiafia na popole i ai Korianetona?

Fai i tamaiti e faitau le leoa le Alema 40:2–5.

E tusa ai ma le saunoaga a Alema i le fuaiupu 5, o le a le mea e sili atu ona taua nai lo le iloaina pe fia ni toetutu o le a i ai?

Valaaulia tamaiti e sailiili le Alema 40:16–23 taitoatasi, saili mo aoaoga faaopoopo e uiga i le toetutu. Tusi a latou tali i luga o le laupapa. Atonu latou te fautuaina mai manatu nei:

O le toetu muamua e amata i tagata na soifua ma maliliu “e afua i ona po o Atamu e oo i le toetu o Keriso” (fuaiupu 18).
Pe a uma le toetutu, o le a aumaia uma tagata i luma o le Atua mo le faamasinoga (tagai i le fuaiupu 21).
O le toetu o le toefuataiga lea o le agaga ma le tino i lona tulaga e tatau ai ma le atoatoa (tagai i le fuaiupu 23).

Fai atu i se tamaitiiti e faitau leotele le Alema 40:23. Ona faasoa mai lea o saunoaga a Elder Dallin H. Oaks ma Peresitene Iosefa F. Samita o loo i le itulau 257 i le tusi lesona a tagata o le vasega. O loo maua foi le saunoaga a Elder Oaks i le companion DVD A.

O le a le uiga o le “tuuina atu o mea uma i lo latou tino e tatau ai ma le atoatoa”?
E mafai faapefea e lenei aoaoga faavae ona aumai ia i tatou le mafanafana ma le faamoemoe?

Molimau atu ona o le Togiola ma le Toetu o Iesu Keriso, o le a toetutu ai tagata uma, ma o le a saoloto o latou tino mai tulaga le atoatoa faaletino.

Alema 40:6–15, 21. Pe a Oti, e Ulu atu Tagata Uma i le Lalolagi o Agaga

Tusi le siata lenei i luga o le laupapa:

Parataiso o Agaga	Falepuipui o Agaga
Alema 40:11–12	Alema 40:13–14

Vaelua le vasega. Fai atu i le afa o tamaiti e suesue le Alema 40:11–12, saili mo upumoni e uiga i le parataiso o agaga. Fai i le isi afa e suesue le Alema 40:13–14, saili mo upumoni e uiga i le falepuipui o agaga, lea e ta’ua o le “pouliuli i fafo” i le fuaiupu 13. (Matau mai o nisi tagata o le Ekalesia i aso nei latou te tagai i le fuaitau “pouliuli i fafo” o se faamatalaga o le taunuuga mulimuli o e amioleaga ua tuliesea i le malaia faatasi ma Satani. Peitai, i le Alema 40, o loo faasino le fuaitau lea i le falepuipui o agaga.) Pe a lava le taimi na tuu atu e suesue ai e tamaiti a latou fuaiupu atofaina, fai i tamaiti mai vaega e lua o le vasega e faasoa mai mea ua latou aoaoina. Tusi a latou malamalamaaga i luga o le siata. Ona fai atu lea i tamaiti ia na faitau i le parataiso o agaga e suesue le Mataupu Faavae ma Feagaiga 138:12–14, 30–34, 57 mo upumoni faaopoopo mai faaaliga o aso e gata ai. Fai i tamaiti na faitau e uiga i le falepuipui o agaga e suesue le Mataupu Faavae ma Feagaiga 138:31–34, 57–59. Valaaulia i latou e faasoa mai mea na latou maua. A o latou faia lena mea, ia faaopoopo atu i luga o le laupapa.

O le a le mea e iloa ai pe o le a fiafia pe faanoanoa se agaga i le lalolagi o agaga? (Tagai i le Alema 40:12–13.)
E tusa ai ma le Mataupu Faavae ma Feagaiga 138, e mafai faapefea ona oo atu le saolotoga i “e ua noatia, o i latou [o loo] saisaitia” (fuaiupu 31) i le lalolagi o agaga?
A o tatou mafaufau loloto i nei upumoni e uiga i le lalolagi o agaga, o a ni mea e mafai ona tatou aoaoina mai uiga o le Atua? (fesoasoani i tamaiti ia iloa le faamasinoga tonu a le Atua, alofa muitmuitvale, ma taumafaiga faifai pea e “faataunuu le faaofuina o le tagata i le tino ola pea ma le ola e faavavau” [Mose 1:39].)

O le Alema 40:11, faatasi ai ma lana tautinoga e faapea “pe a tetea agaga o tagata ma lenei tino e oti, ioe, o agaga o tagata uma, pe lelei i latou pe leaga, ua aveina atu i latou e nonofo i le maota o le Atua, o Le na foai mai le ola ia te i latou,” e mafai ona fenumiai ai tamaiti. Ua tatou iloa pe a feoti tagata, e o atu o latou agaga i le lalolagi o agaga, e le foi sa’o atu i le afioaga o le Atua (tagai i le MFF 138). Ina ia fesoasoani i tamaiti ia malamalama i le Alema 40:11, atonu e te manao ia i latou e faitau le saunoaga a Peresitene Iosefa Filitia Samita ma Peresitene George Q. Cannon o loo i le itulau 255 i le tusi lesona a tagata o le vasega.

Alema 41. “O Le Amioleaga E Le o le Fiafia Lea”

Tagai vave i le Alema 41:1 faatasi ma tamaiti ma faailoa aoaoga faavae ua talanoaina i lenei mataupu.

Tusi le toefuataiga i luga o le laupapa.

Faitau le Alema 41:2–6 faatasi ma tamaiti.

I nei fuaiupu, o le a le uiga o le upu toefuataiga?

Lisi mai elemene eseese o o tatou tagata o le a toefuataiina. (“Mea uma” [fuaiupu 2]; “vaega uma” o le tino [fuaiupu 2]; o a tatou “galuega” [fuaiupu 3–4]; ma “manaoga o o [tatou] loto” [fuaiupu 3].)

I le fesootaiga ma lenei talanoaga, atonu e te manao e faasoa atu le saunoaga lenei a Peresitene Harold B. Lee (1899–1973), le Peresitene lona 11 o le Ekalesia:

“E leai se isi upumoni e sili atu ona manino le aoaoina i le Talalelei nai lo lo tatou tulaga i le isi lalolagi lea o le a faalagolago i le ituaiga o olaga tatou te ola ai iinei” (Decisions for Successful Living [1973], 164).

E faapefea ona fesootai atu le toetu i le fuafuaga o le toefuataiga?

Fai i tamaiti e faitau le leoa le Alema 41:7–15. Valaaulia i latou e saili ma faailoga upu ma fuaiupu ia e faaalia ai mea o le a toefuataiina ia i latou e mananao ma filifili le amiotonu i lenei olaga. Valaaulia foi i latou e saili ma faailoga upu ma fuaiupu ia e faaalia ai mea o le a toefuataiina ia i latou e mananao ma filifili le amioleaga.

O a faamanuiaga o le a oo mai ia i latou o ē filifili e salamo i a latou agasala?
Aisea na apoapoai atu ai Alema ia Korianetona ina ia loto alofa, ia tonu, ma amiotonu i isi?
Aisea e faigata ai mo le amioleaga ona oo atu i le fiafia?

Faasoa atu le saunoaga lenei a Elder Glenn L. Pace o le Au Fitugafulu (o loo maua foi i le companion DVD B):

“E i ai upu moni le masuia e faavavau. E le suia pe a o ese mai ai tagata. E le sui foi upu moni e faavavau i se palota. E le mamā foi se mea eleelea i le faatagaina i le tulafono. Aua nei faavaleaina outou e upu e faapea, ‘Ua fai e tagata uma.’ E tatau ona e lagona ua ulagia lou agaga ma lou poto i upu faapena.

“A oo ina faamaonia mea uma, o le a manino ona faamaonia e i latou o e ua le usitai i le mea na aoaoina i lo outou talavou mai a outou aoaoga faaleagaga e faapea, ‘O le amioleaga e le o le fiafia lea’ (Alema 41:10)” (i le Lipoti o le Konafesi, Oke. 1987, 50; po o le Liahona, Ian. 1998, 40).

E fai ma faaiuga o lenei talanoaga, atonu e te manao ai e faamanatu atu i tamaiti, talu ai o le amioleaga e le oo atu lava i le fiafia, o le amiotonu o le a taitai atu ai pea i le fiafia silisili. Ina ia faamamafaina lenei manatu, e mafai ona e tuu atu i tamaiti e faitau le Mosaea 2:41.

Alema 42. Ua Mafai ona Maua le Faaolataga e ala i le Togiola a Iesu Keriso

A o e saunia e aoao atu lenei vaega, atonu e te manao e muai silasila i le “O Le Puluvaga,” faatinoga 15 o loo i le DVD o Aoaoga o le Tusi a Mamona (numera o le aitema 54011).

Fai i tamaiti e faitau le Alema 42:1.

O le a le mea na le maua ai e Korianetona le malamalama o aoaoga faavae?

Faamalamalama atu na le mafai e Korianetona ona iloa pe na mafai faapefea e le Atua ona faamasinotonu, ae na te auina atu se tagata agasala i le faanoanoa. Na amata ona tali atu Alema i le le malamalama o Korianetona e ala i le toe faamatalaina o le Pa’ū o Atamu ma aoaoga e uiga i ona taunuuga. I le Alema 42, na faamalamalama atu ai e Alema le auala e tuu atu ai e le fuafuaga o le fiafia i tagata uma se avanoa tutusa e maua ai le fiafia e faavavau.

Faitau le saunoaga lenei a Peresitene Ezra Taft Benson (1899–1994), le Peresitene lona 13 o le Ekalesia:

“E leai se tasi na te iloa lelei pe aisea na te manaomia ai Keriso sei vagana ua ia malamalama ma talia le aoaoga faavae o le Pa’ū ma ona aafiaga i tagata uma” (i le Lipoti o le Konafesi, Ape. 1987, 106; po o le Liahona, Me 1987, 85).

Tofi le afa o le vasega e faitau le Alema 42:2–7 ma le isi afa o le vasega e faitau le Alema 42:8–14. A o faitauina e tamaiti, fai atu ia i latou e faailoa mai taunuuga o le Pa’u o Atamu. Pe a maea le taimi na tuu atu, valaaulia tamaiti e faasoa mai mea na latou aoaoina. Atonu e te manao e tusi a latou tali i luga o le laupapa.

O a ni auala e te manatu e mafai ona fesoasoani ai lenei faamalamalamaga o le Pa’ū ia Korianetona e foia ai ona popolega?
E tusa ai ma le Alema 42:4, o le a se tasi o mafuaaga na tuu mai ai e lo tatou Tama Faalelagi ia i tatou se olaga faataitai?

Tofi tamaiti e galulue taitoalua. Tofi le tagata e toatasi o vaega taitoalua e suesue le Alema 42:15–22 ma saili mo le uiga o le “iuga o le faamasinoga.” Tofi le isi tagata o vaega taitoalua nei e suesue le Alema 42:22–26 ma saili mo le uiga o le “ua pule foi le alofa i ana lava mea uma.” Pe a maea le taimi na tuu atu, tuu atu i nei vaega taitoalua e aoao e le tasi le isi i mea na la aoaoina. Ona taitaia lea o se talanoaga ma le vasega atoa, e faaaoga ai nisi o manatu po o manatu uma nei:

E mafai faapefea e le Atua ona faamasinotonu ma alofa mutimutivale ona o le fuafuaga o le togiola?
Aisea e manaomia uma ai e i tatou taitoatasi le Togiola ina ia mafai ai ona maua le alofa mutimutivale?
O le a le mea e mafai ona tatou faamoemoeina pe afai tatou te filifili e le salamo?

Fai i tamaiti e faitau le 2 Nifae 2:7 ma le Mataupu Faavae ma Feagaiga 19:16–20.

E faapefea ona fesoasoani nei fuaiupu e faamalamalama le fesootaiga i le va o le faamasinoga tonu ma le alofa mutimutivale e pei ona faamatala mai i le Alema 42:23–24?

Faitau le Alema 42:27–31 faatasi ma tamaiti.

O le a se aafiaga o Korianetona na faamoemoe Alema e maua mai i ana aoaoga?
O le a le mea ua aoao mai e le Alema 42:29–30 ia i tatou?

E mafai ona e mafaufau e valaaulia tamaiti e faitau le Alema 48:18, 49:30, ma le 63:2. (Manatua, e pei ona ta’ua i le Alema 62:52, na maliu Helamana. O lea, o le mau faasino i le uso o Sepulona i le Alema 63:2 e foliga mai o se mau faasino ia Korianetona.)

O a mea o fautua mai e nei fuaiupu e uiga i le auala na tali atu ai Korianetona i aoaoga a lona tama?

Uunaia tamaiti e mafaufau i o latou olaga ma agasala o loo fai ma faafitauli ia i latou i le taimi nei. Molimau atu i le naunautaiga o le Faaola e faamagalo mai, ma le faateleina o le filemu ma le fiafia e oo mai ia i tatou pe a tatou salamo.