Mataupu 55

Moronae 8–9

Folasaga

O loo i ai i lenei poloka mau ni tusi se lua na tusia e Mamona i lona atalii o Moronae. I le tusi muamua, na taulai atu ai Mamona i le alofa mutimutivale o le Atua ma le auala e faaolaina ai tamaiti i le Togiola a Iesu Keriso. Fesoasoani i tamaiti ia malamalama ona o le Togiola, “ua malolo ai tamaiti” ma e le manaomia ona papatisoina (tagai i le Moronae 8:8–12). A o e oo mai i le faaiuga o le tusi, e mafai ona e fesoasoani i tamaiti ia malamalama pe a latou ola e tusa ma uluai mataupu faavae ma sauniga o le talalelei, o le a taula i latou i le amiotonu i o latou olaga atoa ma saunia ai e toe foi atu i le afioaga o le Atua.

I le tusi lona lua, na auē ai Mamona i le tulaga eleelea o sa Nifae ma sa Lamana i ona aso ma faaopoopo atu ai apoapoaiga ma faamafanafanaga mo i latou o e tumau i le amiotonu i taimi o tofotofoga. Na tumau le faamaoni o Mamona ma Moronae a o siomia i agasala matuia. O tusitusiga a Mamona ua aumaia ai se avanoa sili ona lelei e faamamafa atu ai le taua o tautinoga patino i le ola amiotonu, e tusa lava pe o le a le amioleaga o loo siomia ai i tatou.

O Nisi o Aoaoga Faavae ma Mataupu Faavae

E le manaomia ona papatisoina tamaiti laiti ona ua latou “ola ia Keriso” (tagai i le Moronae 8:4–24).
Faatuatua ia Keriso, salamo, papatisoga, ma le mauaina o le Agaga Paia e taitai atu ai i tatou i le Atua (tagai i le Moronae 8:25–26).
E vavaeeseina e le ita i tatou mai le Agaga o le Alii (tagai i le Moronae 9:1–21).
E tusa ai ma lo tatou faatuatua, o le a faaeaina i tatou e Iesu Keriso e tusa lava pe o siomia i tatou e le amioleaga tele (tagai i le Moronae 9:22–26).

Fautuaga mo le Aoaoga

Moronae 8:4–24. E Le Manaomia ona Papatisoina Tamaiti Laiti Ona ua Latou “Ola ia Keriso”

Fai atu i tamaiti e mafaufau i se taimi mulimuli na latou siiina ai se pepe faatoa fanau mai. Valaaulia i latou e faasoa mai ni upu o le a latou faaaogaina e faamatala ai le aafiaga po o upu o le a latou faaaogaina e faamatala ai le pepe faatoa fanau mai.

Valaaulia se tamaitiiti e faitau le Mataupu Faavae ma Feagaiga 29:46–47. Valaaulia tamaiti e faamatala mai nei fuaiupu i a latou lava upu.

Tau atu i tamaiti a o faasolo lava ona pa’ū atu le malo o sa Nifae i le amioleaga, na tusia e Mamona se tusi i lona atalii o Moronae e faatatau i fefinauaiga i le Ekalesia e uiga i le papatisoga o tamaiti.

Faatonu tamaiti e faitau taitoatasi le Moronae 8:4–24, faailogaina ai faatonuga na latou mauaina e uiga i tamaiti laiti ma le Togiola a Iesu Keriso. Ona tuu atu lea ia i latou e galulue taitoatasi pe taitoalua po o ni vaega foi, ma tusia le tele o ni faamatalaga e mafai ona latou tusiaina e uiga i tamaiti laiti e le manaomia ona papatisoina. Ina ia latou amata, e mafai ona e faitauina le Moronae 8:8 ma tusi i luga o le laupapa le Ua malolo tamaiti.

Pe a maea le taimi na tuu atu i tamaiti e suesue ai fuaiupu 8–24, valaaulia i latou e faasoa mai a latou faamatalaga o le tasi i le isi.

O a ni auala o loo faaalia ai i nei faamatalaga le alofa mutimutivale o le Atua?
O le a se mea e mafai ona tatou aoaoina mai i upu a Mamona e uiga ia i latou o e “e aunoa ma le tulafono”? (Tagai i le Moronae 8:22.)

Ina ia fesoasoani i tamaiti ia malamalama atili i le uiga o nei fuaiupu, mafaufau e faasoa atu nisi o faamalamalamaga nei:

“[O] tamaiti … ua le mafai ona latou faia agasala” (Moronae 8:8). Aisea? E lei tatau ona sueina a latou amio i luma o le Alii (tagai i le MFF 29:47). Afai latou te faia se mea sese, o a latou faatinoga e le o se agasala. Ua aofia i le Togiola a Iesu Keriso mea sese a tagata e le mafai ona tali atu.

“O [Keriso] ua aveeseina ai le faasala a Atamu ia te i latou” (Moronae 8:8). O le solitulafono a Atamu na oo mai ai le oti faaletino (le tuueseeseina o le tino ma le agaga) ma le oti faaleagaga (vavaeeseina mai le Atua) i tagata uma. E ala mai i le Togiola, ua faatoilaloina ai e Iesu Keriso nei oti ma o le a toetutu tagata uma, ma o le a toe foi atu uma i le Atua ina ia faamasinoina. (Tagai i le Helamana 14:15–19; Mamona 9:12–13.) Ua aafia tamaiti i le Pa’ū, ae ua togiolaina i latou e le Togiola—faapea ma tagata uma—mai le Pa’ū. E le faasalaina tamaiti ona o le solitulafono a Atamu (tagai i le Mataupu Faavae o le Faatuatua 1:2).

“Ua fai mea paia ma ulaga i luma o le Atua [le] papatisoina o tamaiti” (Moronae 8:9). Aisea? Talu ai ua aofia i le Togiola mea sese a tamaiti e le mafai ona tali atu, o le papatisoina o i latou ua faaalia ai le leai o se faatuatua i le mana o le Togiola. Na ta’ua e Mamona e tatau ona tatou papatisoina na o i latou “ua mafai ona fai agasala” (Moronae 8:10).

“E le mafai tamaiti ona salamo” (Moronae 8:19). O le salamo e mo tagata e mafai ona sueina a latou amio. O tamaiti e i lalo ifo o le valu tausaga ma tagata e le atoatoa le malosi o le mafaufau faatasi ai ma i latou e faaletonu le mafaufau e lei atoa le valu tausaga, e le manaomia ona salamo.

Molimau atu i le alofa ma le alofa mutimutivale o le Tama Faalelagi ma Iesu Keriso i le tuuina mai o se auala mo le togiolaina o tamaiti ma mo i latou uma e le mafai ona tali atoatoa atu mo a latou faatinoga i le olaga nei.

Moronae 8:25–26. Faatuatua ia Keriso, Salamo, Papatisoga, ma le Mauaina o le Agaga Paia e Taitai atu ai i Tatou i le Atua

Aumai i le vasega se fasi laau po o se pou ua faaigoaina le isi pito o faatinoga ma le isi pito ua faaigoaina o taunuuga. Ina ia folasia atu le Moronae 8:25–26, piki i luga le fasi laau mai le pito ua faaigoaina o faatinoga. Ia mautinoa e mafai ona iloa mai e tamaiti o le taimi na e pikiina ai i luga le tasi pito o le fasi laau, ua e pikiina foi ma le isi pito i luga. Fai atu i tamaiti e ta’u mai le mataupu faavae ua faaalia mai e lenei lesona faatino. (E aumaia pea e faatinoga ia taunuuga.)

Valaaulia tamaiti e fautua mai ni faataitaiga o filifiliga lelei ma filifiliga le lelei atonu e faia e tagata ma faataitaiga o ni auala e mafai ai e na filifiliga ona aafia ai o latou lumanai.

O le a se taunuuga sili e mafai ona oo i ai au faatinoga uma i le lalolagi?

Faamalamalama atu i le Moronae 8:25–26, na lisiina ai e Mamona ni filifiliga amiotonu ma o latou taunuuga. Fai atu i se tamaitiiti e faitau ia fuaiupu. Tuu atu i le vasega atoa e saili mo ni faataitaiga o faatinoga ma taunuuga i nei fuaiupu. Lisi nei mea i luga o le laupapa, tusi ia aū i o latou va e pei ona faaalia i le siata lenei. (Atonu e te manao e faaali atu se faataitaiga pe lua foi a o lei faitauina e tamaiti ia fuaiupu.)

Salamo ma le faatuatua →	Papatisoga ma le faataunuuina o poloaiga
Faataunuuina o poloaiga →	Faamagaloga o agasala
Faamagaloga o agasala →	Agamalu ma le maulalo o le loto
Agamalu ma le maulalo o le loto →	Asiasiga a le Agaga Paia
Asiasiga a le Agaga Paia →	Faamoemoe ma le alofa atoa, lea e tumau ona o le filiga i le tatalo seia oo i le iuga pe a tatou toe mafuta ma le Atua

O a ni auala e taitai atu ai nei faatinoga i faamanuiaga na faailoa mai e Mamona?
O a ni auala e faataamilo ai nisi o mataupu faavae ua lisiina nai lo le na o se mea e tupu i se taimi e tasi?

Faamanatu atu i le vasega o le Moronae 8:22 o loo ta’ua ai “tamaiti” ma i latou “e aunoa ma le tulafono” ua “ola ia Keriso” e ala i le mana o Lana togiola.

O le a le uiga ia te oe ina ia “ola ia Keriso”?
E faapefea ona fesoasoani mataupu faavae o loo i luga o le laupapa ia i tatou ina ia “ola [uma] ia Keriso”?

Moronae 9:1–21. E Vavaeeseina e le Ita i Tatou mai le Agaga o le Alii

Valaaulia tamaiti e mafaufau i auala o loo faatosinaina ai i tatou pe a tatou lagonaina le ita. Mo se faataitaiga, fai atu ia i latou e faamatala mai pe faapefea ona aafia i latou i le ita:

Tapuni se faitotoa.
Tali le telefoni.
Savalivali i le ala tele.
Talanoa ma isi.
Tatalo.
Faitau tusitusiga paia.
Lagona e uiga i isi tagata.
Lagona e uiga ia i latou lava.
Lagona le Agaga.

Valaaulia tamaiti e faitau le Moronae 9:3, saili mo mea na matau e Mamona e uiga i tagata sa Nifae.

O a ni auala e te manatu ai o le teenaina e sa Nifae o le salamo atonu na fesootai i o latou lagona o le ita o le tasi i le isi?

Valaaulia se tamaitiiti e faitau le Moronae 9:4.

Aisea e te manatu ai o nisi taimi e tali atu ai e amioletonu ma le ita i le afioga a le Atua?
O a nisi o auala e mafai ai ona oo mai ma le atamai le ita i o tatou olaga?

Fai atu i tamaiti e faasoa mai ni auala na latou maua e puleaina ai pe aloese ai foi mai le ita.

Faasino atu o le ita e mafai ona taitai atu ai i taunuuga faataumaoia. Valaaulia tamaiti e faitau le leoa le Moronae 9:5, 9–11, 18–20, ia matauina faatinoga po o uiga ia atonu o ni taunuuga na o le ita o sa Nifae. Pe a maea le taimi na tuu atu i tamaiti e faitau ai ma mafaufau, valaaulia i latou e faasoa mai mea na latou maua. O tali e mafai ona aofia ai mea nei:

Fuaiupu 5— le fefefe i le oti, leai se alofa o le tasi i le isi, naunau pea i le toto ma le taui ma sui

Fuaiupu 9—leai se manatu mo le legavia ma le mama

Fuaiupu 11—aunoa ma le malamalama

Fuaiupu 18—aunoa ma le gaoia ma le alofa

Fuaiupu 19—mimilo, faatau feau, fiafia i mea uma lava sei vagana ai mea e lelei

Fuaiupu 20—aunoa ma manatu lelei, ma ua le toe lagona

O fesili nei e mafai ona faaaogaina e malamalama atili ai i lenei faafitauli:

O le a sou manatu i le uiga o le “le toe lagona”? (Tagai i le saunoaga a Elder Neal A. Maxwell ma Peresitene Boyd K. Packer o loo i itulau 421–22 i le tusi lesona a tagata o le vasega.)
O a ni faamaoniga ua e vaaia i le lalolagi e faapea o nisi tagata ua oo i le le toe lagona?
O le a se mea e mafai ona tatou faia e aloese ai mai le le toe lagona?

E mafai ona e faaalu sina taimi e faatusatusa ai le faamatalaga a Mamona o le malo o sa Nifae i nei fuaiupu ma lana faamatalaga o soo o Iesu Keriso o loo i le Moronae 7:3–4.

Moronae 9:22–26. E Tusa ai ma lo Tatou Faatuatua, O Le a Faaeaina i Tatou e Iesu Keriso e Tusa lava pe o Siomia i Tatou e le Amioleaga Tele

Aumai se ofu faaola. (Pe faaali atu foi se ata o se ofu faaola pe faamatala atu.)

Ata

ofu faaola

Fai atu i le vasega pe aisea e manaomia ai e se tagata ona faaaoga se ofu faaola i se ogasami tele e oo lava i le tagata e iloa aau. (I le ala o le tou talanoaga, faasino atu pe a faaaoga tatau se ofu faaola, e mafai ona ia taofia se tagata mai le malemo, e tusa lava pe o le a le loloto o le vai pe o le a foi le vaivai o le tagata aau e oo i ai.)

Valaaulia ni nai tamaiti e faitau le Moronae 9:22, 25–26. Ae latou te lei faitaua, fai atu i le vasega atoa e saili mo “ofu faaola” faaleagaga ia na faalagolago i ai Mamona ma Moronae.

Ia mautinoa e iloa e tamaiti o le faatuatua o Mamona ma Moronae i le Tama Faalelagi ma Iesu Keriso na faasaoina ai i laua faaleagaga. Valaaulia tamaiti e faasoa mai ni fuaitau mai fuaiupu 22 ma le 25–26 o loo faaalia ai lenei faatuatua tele. E mafai ona aofia i tali a tamaiti tali nei:

Fuaiupu 22—“Ou te tauleleia oe i le Atua. … Ou te faalagolago ia Keriso e faaolaina oe; ou te tatalo foi i le Atua, na te faasaoina lou ola.”

Fuaiupu 25—“Ia faamaoni ia Keriso. … Ia faaeaina oe e Keriso, ma ia tumau e faavavau i lou loto o ona puapuaga, ma lona maliu, ma le faaalia o lona tino i o tatou tama, ma lona alofa, ma onosai, ma le faamoemoe o lona mamalu, ma le ola faavavau.”

Fuaiupu 26—“Ia ia te oe ma mafuta ma oe e faavavau le alofa tunoa o le Atua le Tama … ma lo tatou Alii o Iesu Keriso.”

O a ni auala e tali tutusa ai o tatou luitau ma luitau na feagai ma Mamona ma Moronae?
E mafai faapefea ona fesoasoani ia i tatou le tali atu o Mamona i luitau?

Valaaulia se tamaitiiti e faitau le Moroni 9:6.

E faapefea ona atagia mai i lenei fuaiupu le faatuatua o Mamona?

A o tali mai tamaiti, fesoasoani ia i latou ia iloa pe a malosi lo tatou faatuatua i le Atua, o faatinoga a isi o le a le taofia ai i tatou mai le faia o le mea sao.

Tuu atu i tamaiti ni nai minute e mafaufau loloto ai i auala e mafai ona latou faaauau ai ona atiina ae le faatuatua lea o le a latou mafai ai ona tutu maualuga atu i le lalolagi ma faataunuuina ai a latou misiona patino i le lalolagi. Atonu e te manao e uunaia i latou e faamaumauina o latou manatu i le tusiaina i lalo.

Valaaulia tamaiti e faasoa mai a latou molimau e uiga i le auala e tuu atu ai ia i latou e le faatuatua i le Atua le Tama ma Iesu Keriso le malosi e faatoilaloina ai le amioleaga o le lalolagi.