Mataupu 27

Alema 17–22

Folasaga

Sa faamanatu mai ia i tatou e Elder David A. Bednar o le Korama a Aposetolo e Toasefululua e faapea: “O i tatou o faifeautalai i aso uma i o tatou aiga, i a tatou aoga, i mea tatou te faigaluega ai ma o tatou nuu. E tusa lava po o le a lo tatou matutua, aafiaga, po o tulaga i le olaga, o i tatou uma lava o faifeautalai” (i le Lipoti o le Konafesi, Oke. 2005, 47; po o le Liahona, Nov. 2005, 44). O le tala ia Amona ma ona uso i le Alema 17–22 ua faaalia ai le tele o mataupu faavae ia e mafai ai ona fesoasoani e faaleleia i tatou o ni faifeautalai, e pei o le mulimuli i le taitaiga a le Agaga Paia, faia o faataitaiga lelei, ma le onosai i a tatou taumafaiga. A o e aoao atu mai nei tala, e mafai ona e fesoasoani i tamaiti ia malamalama i nei mataupu faavae ma faaaoga i o latou olaga.

O Nisi o Aoaoga Faavae ma Mataupu Faavae

• O faifeautalai mataalia e aoao atu i le mana ma le pule mai le Atua (tagai i le Alema 17; 18:1–23).

• E aoao atu e faifeautalai le ata o le faaolataga (tagai i le Alema 18:36–39; 22:7–14).

• O le malamalama i lo tatou faalagolago ia Keriso e taitai atu ai i le liua (tagai i le Alema 18:40–43; 22:15–18).

Fautuaga mo le Aoaoga

Alema 17–22. O Le Taua o le Galuega Faafaifeautalai

Fai i tamaiti e faalogo ma le totoa i saunoaga nei a perofeta o aso e gata ai:

Na tautino mai le Perofeta o Iosefa Samita, “I mea uma lava ua uma ona talanoaina, o le tiute e silisili ona taua o le talai o le Talalelei” (i le History of the Church, 2:478).

Na saunoa mai Peresitene Gordon B. Hinckley (1910–2008) e faapea, “Uso e ma tuafafine, … ua ou valaaulia outou ina ia avea o se vaegaau tele faatasi ai ma le sagisagi atu mo lenei galuega, ma se naunautaiga lofituina e fesoasoani i faifeautalai i la latou matafaioi ogaoga i le tauaveina atu lea o le talalelei i atunuu uma, ituaiga uma, o gagana, ma nuu” (“Saili Tamai Mamoe, Fafaga Mamoe,” Liahona, Iul. 1999, 124).

• E faapefea ona e aotelea nei upusii e lua i se faamatalaga otooto se tasi?

A o lei amataina le vasega, tofi se tamaitiiti po o ni nai tamaiti e saunia e toe faamatala mea tetele na tutupu i le Alema 17–22. Fai atu ia i latou e sauni ni faatinoga pupuu ma le tuusa’o, e taulai tonu lava i mea na tutupu. Fautua atu latou te faaaogaina ia ulutala mataupu e avea ma taiala. Faamalamalama atu pe a maea a latou faatinoga, o le a galulue faatasi le vasega e sue ia mataupu faavae e mafai ona latou aoaoina mai mea na tutupu ma ia faatupuina i o latou malamalamaaga na mataupu faavae.

Alema 17; 18:1–23. O faifeautalai Mataalia e Aoao Atu i le Mana ma le Pule mai le Atua

Tusi le faamatalaga lenei i luga o le laupapa:

Mataupu Faavae o Galuega Faafaifeautalai

Vaevae le vasega i ni vaega se fa. Tuu atu le Alema 17:1–8 i le vaega muamua, Alema 17:9–25 i le vaega lona lua, Alema 17:26–39 ma le 18:1–9 i le vaega lona tolu, ma le Alema 18:10–23 i le vaega lona fa. Valaaulia tamaiti e faitau le leoa a latou mau atofaina, ma saili mo mataupu faavae e fesootai i le manuia o galuega faafaifeautalai. Faamalamalama atu pe a maea ona faia e tamaiti lea mea, o le a e talosagaina i latou e faasoa mai ia mataupu faavae na latou maua.

Pe a maea le sailiiliga a tamaiti, fai atu ia i latou e faasoa mai ni mataupu faavae na latou maua. Lisi mea na latou maua i luga o le laupapa. O nisi o tali e mafai ona maua o loo faaalia i lalo ifo:

Mataupu Faavae o Galuega Faafaifeautalai

• Sailiili i Tusitusiga Paia

• Anapogi ma Tatalo

• Maua le Agaga

• Faatu Lana upu

• Ia onosai

• Faia se faataitaiga lelei

• Faalagolago i le Alii

• Auauna atu ma le faamaoni i isi

• E faapefea e nei mataupu faavae taitasi ona fesoasoani i se tagata e faasoa atu ma le mataalia le talalelei?

• E mafai faapefea ona tatou saunia e aoao atu i le mana ma le pule e pei o Amona ma ona uso?

Afai e i ai ni tamaiti na liliu mai i le talalelei ina ua maea ona aoaoina e faifeautalai faamisiona, atonu e te manao e fai atu ia i latou e faasoa mai o latou lagona a o latou aoaoina le talalelei?

Alema 18:24–29. Fausiaina i luga o Talitonuga Tutusa

Fai atu i se tamaitiiti e faitau le Alema 18:24–29.

• A o amata ona aoao atu e Amona le talalelei ia Lamonae, o a fesili na fesili atu ai Lamonae?

• E faapefea ona e manatu na fesoasoani nei fesili ia Amona e faasoa atu lana savali?

Mo malamalamaaga faaopoopo, e mafai ona e faasino atu tamaiti i le vaega ua faaulutalaina “Fausia i luga o Talitonuga Tutusa” o loo i le itulau 211 i le tusi lesona a tagata o le vasega.

• Afai e i ai se lua talanoaga e uiga i le Atua ma se uo o se isi faatuatuaga, e faapefea ona e fausia i luga o talitonuga tutusa? E faapefea e lenei taumafaiga ona fesoasoani i lau uo?

• O a nisi mea tou te talanoa ai ma au uo o isi faatuatuaga e tatala ai avanoa e faasoa atu ai le talalelei ia i latou?

A o talanoaina e tamaiti nei fesili, atonu e te manao e valaaulia i latou e faitau le saunoaga a Elder M. Russell Ballard o loo i itulau 209–11 i le tusi lesona a tagata o le vasega. O loo maua foi lenei saunoaga i le companion DVD A.

Alema 18:36–39; 22:7–14. E Aoao Atu e Faifeautalai le Ata o le Faaolataga

Valaaulia le vasega e faalogologo a o faitauina e ni tamaiti se toalua mea na aoao atu e Amona ma Arona ia Lamonae ma lona tama. A o lei faitau tamaiti e toalua, faatonu isi e mulimuli i le faitauga i a latou lava tusitusiga paia, ma saili mo aoaoga faavae ia na aoao atu e Amona ma Arona. Fai atu i se tasi tamaitiiti e faitau le Alema 18:36–39. O le mea lea na aoao atu e Amona ia Lamonae. Fai atu i le isi tamaitiiti e faitau le Alema 22:12–14. O le mea lea na aoao atu e Arona i le tamā o Lamonae.

• O a aoaoga faavae na aoao atu e Amona ma Arona?

E mafai ona e lisiina tali a tamaiti i luga o le laupapa. Talia uma a latou tali, ona faailogaese lea o ni aoaoga faavae se tolu ia na aoao uma atu e Amona ma Arona: o le Foafoaga, o le Pa’ū, ma le Togiola a Iesu Keriso.

Faamatala e faapea ua aoteleina i se fuaitau mea na aoao atu e Amona ma Arona: “o le ala o le togiola” (Alema 22:13).

• Aisea e te manatu ai na amata aoaoga a Amona ma Arona i nei upumoni e tasi?

I le avea ai ma se vaega o lenei talanoaga, e mafai ona e valaaulia se tamaitiiti e faitau le saunoaga a Elder Bruce R. McConkie o loo i le itulau 212 i le tusi lesona a tagata o le vasega.

• O a ni mea ua tatou aoaoina e uiga i le Atua mai nei muai aoaoga faavae?

• O le a se mea ua tatou aoaoina e uiga ia i tatou lava?

Atonu e manaomia e tamaiti sina taimi e mafaufau ai i nei fesili ae latou te lei taliina. Aua le fefe i le leai o se pisa, atonu o le mea tonu lea o loo manaomia e tamaiti ae latou te lei talanoaina nei upumoni.

Tuu atu i tamaiti nai minute e mafaufau ai pe faapefea e lo latou malamalama i le ala o le togiola ona fesoasoani ia i latou e latalata atili ai i le Tama Faalelagi. Faailoa atu ia i latou pe a uma ona latou mafaufau i lenei manatu, o le a e talosagaina nisi o i latou e faasoa mai o latou manatu.

Pe a maea le taimi na tuu atu, valaaulia ni nai tamaiti e o mai i luma o le vasega ma faasoa atu o latou manatu. Ona tuu atu lea o lau molimau i le ala o le togiola ma le taua o le faailoa atu i tagata uma.

Alema 18:40–43; 22:15–18. O Le Malamalama i lo Tatou Faalagolago ia Keriso e Taitai atu ai i le Liua

Valaaulia tamaiti e faitau le leoa le Alema 18:41 ma le 22:15.

• O le a le mea na iloa e Lamonae ma lona tama na taitai atu ai i laua e augani atu mo se fesoasoani? (Na la iloaina lo la natura pa’ū ma iloa ai la te manaomiaina le alofa mutimutivale o Keriso.)

Tusi le Faamagaloga o a Outou Agasala i luga o le laupapa.

• Na faapefea ona iloa e Lamonae ma lona tama la te manaomiaina le faamagaloga o a la agasala?

Faamalamalama atu na pai atu le Agaga ia Lamonae ma lona tama e ala i aoaoga a faifeautalai. O se taunuuga, na la mananao ai i faamanuiaga o le talalelei.

Pe a maea ona talanoaina upu a Amona i le Tupu o Lamonae, faasino atu o le ala a Amona ua faaalia ai se mamanu mo le aoaoina atu o le talalelei i se faatulagaga faafaifeautalai:

Na ia aoao atu ma le faigofie (tagai i le Alema 18:24–30).

Na ia molimau atu (tagai i le Alema 18:32–35).

Na ia aoao atu mai tusitusiga paia (tagai i le Alema 18:36–39).

Na ia faaosofia se manao i le tagata sailiili e tatalo (tagai i le Alema 18:40–43).

Fai atu i se tamaitiiti e faitau le Alema 22:15.

• O le a le mea na naunau le tama o Lamonae e lafoai ina ia maua ai le ola e faavavau?

Fai atu i se tamaitiiti e faitau le Alema 22:16.

• O le a le mea na fai mai ai Arona e tatau ona faia e le tupu e maua ai le faamoemoe o loo ia manao i ai?

Fai atu i se tamaitiiti e faitau le Alema 22:17–18.

• O le a le mea na naunau le tupu e lafoai ina ia iloa ai le Atua ma ia “faaolaina ai i le aso gataaga”?

Ia matau le eseesega i le va o le (1) mea na naunau le tama o Lamonae e lafoai ina ia iloa ai le Atua ma maua ai le faaolataga ma le (2) mea na ia naunau e lafoai muamua ina ua ia lagonaina ua lamatia lona soifua (tagai i le Alema 20:23).

• E faapefea ona avea le faatinoga a le Tupu o Lamonae ma se faailoga o le liua faamaoni?

Valaaulia tamaiti e mafaufau le leoa i fesili nei:

• O a ni mea e manaomia ona e lafoaia ina ia mafai ai ona e toe foi atu e mau faatasi ma lou Tama i le Lagi?

• O a mea e mafai ona e faia i le asō e te latalata atili atu ai i lou Tama i le Lagi?

Valaaulia ni nai tamaiti e faasoa mai ni mataupu faavae taua e faatatau i le galuega faafaifeautalai i le tala na latou talanoaina. Tuu atu lau molimau pe a talafeagai ai.