Inisitituti
Mataupu 35: Helamana 1–4

Mataupu 35

Helamana 1–4

Folasaga

Ua tatou ola i se taimi ua sili ona faateleina ai le amioleaga. Ma o lo tatou latalata atu lava i le Afio Mai Faalua o le Faaola, o le faateleina foi lena o le amioleaga. A o suesueina e tamaiti mea na tutupu i Amerika a o lumanai le afio muamua mai o le Faaola, e mafai ona faateleina lo latou malamalama i eseesega o le amioleaga ma le amiotonu. E mafai ona e fesoasoani ia i latou ia iloa ma mananao i le filemu ma le manuia lea e oo mai ia i latou o e tumau ma le mausali i le faatuatua i taimi o tofotofoga.

O Nisi o Aoaoga Faavae ma Mataupu Faavae

  • O Finauga e Faataumaoi (tagai i le Helamana 1:1–9, 14–24).

  • O pulega faalilolilo e mafai ona taitai atu i le faatafunaga o malo (tagai i le Helamana 1:11–12; 2).

  • O e lotomaualalo ma amiotonu e faapaiaina ma maua le malosi mai le Alii, ae o e faamaualuluga ma agasala ua tuulafoaiina ai i latou i lo latou lava malosi (tagai i le Helamana 3:27–37; 4).

Fautuaga mo le Aoaoga

Helamana 1:1–9, 14–24. O Finauga e Faataumaoi

Faitau le Helamana1:1 faatasi ma tamaiti. Ona fai atu lea ia i latou e tagai i fuaiupu 2–4 e faailoa mai ai le “mea faigata tele” o loo ta’ua i le fuaiupu 1. (E mafai ona latou fautua mai o le mea faigata tele o le manaomia lea ona suia o le faamasino sili. Afai latou te fautua maia, fai atu ia i latou e saili mo se upu —po o ni uiga eseese o se upu—ta’ua soo i fuaiupu 2–4. Tau atu ia i latou o loo faailoa mai e le upu lea le mafuaaga na avea ai le suia o le faamasino sili ma se mea faigata tele. O le upu o le finauga po o le finau.)

Fai atu i se tamaitiiti e faitau le saunoaga a Elder Joseph B. Wirthlin o loo i le itulau 276 i le tusi lesona a tagata o le vasega.

  • O a ni auala e mafai ona tatou manuia ai mai le manatuaina o finauga o se meafaigaluega a Satani?

Fai atu i se tamaitiiti e faitau le saunoaga a Peresitene James E. Faust o loo i le itulau 276 i le tusi lesona a tagata o le vasega.

  • E tusa ai ma le saunoaga a Peresitene Faust, o le a le mea e tupu pe a tatou fefinauai?

Valaaulia tamaiti e faitau le Helamana 1:5–7.

  • Na faapefea ona taumafai tagata e foia ia finauga po o ai o le a avea ma faamasino sili?

  • Aisea na le aveesea ai e le palota ia le finauga?

Faamalamalama atu a o tauivi sa Nifae ma finauga mai totonu, o le taimi lena ua latalata mai ai se mea matautia mai fafo. Faitau fuaiupu 14–15 i tamaiti. Tuu atu i tamaiti e vaai faavavevave i fuaiupu 18–22 iloa ai le taunuuga o le osofaiga a sa Lamana.

  • O le a le aai na faia’ina i le osofaiga?

  • O le a le mea na vaivai ai sa Nifae i lenei osofaiga?

Ina ia fesoasoani i tamaiti e faaaoga ia mataupu faavae o i ai i nei fuaiupu, valaaulia i latou e fautua mai ni vaega i olaga o tagata e mafai ona faalavefauina e finauga. Lisi a latou tali i luga o le laupapa. O tali e mafai ona aofia ai faigauo, aiga, faaipoipoga, galuega, ma isi.

Filifili se tali e tasi pe lua a tamaiti. Valaaulia tamaiti e fautua mai ni auala e aloese ai mai le faigata o finauga (pe faasa’o). Mo se faataitaiga, o a ni gaoioiga e mafai ona faamalosia ai le lotogatasi o le aiga ma aloese ai mai finauga? Po o le, afai o mafatia se aiga mai finauga, o le a se mea e mafai ona latou faia e faaitiitia ai pe aveesea ai foi ia finauga?

Helamana 1:11–12; 2. Pulega Faalilolilo e Mafai ona Taitai atu ai i le Faatafunaga o Malo

Valaaulia se tamaitiiti e uu se fasi laau i luma o le vasega. Faamalamalama atu ua faatusa le fasi laau i se tagata se toatasi. Faaali atu le faigofie ona gagau o le fasi laau. Ona tuu faatasi lea o se vaega o fasi laau. Faamalamalama atu o le fusi o fasi laau nei ua faatusa lea i tagata taitoatasi ua tuufaatasia uma. Faaali atu le faigata ona gagau e oo lava i se fasi laau se tasi pe a fusi faatasi uma.

  • O le a se mea e mafai ona tatou aoaoina mai lenei lesona faitino?

  • E mafai faapefea ona faaaoga le malosi i se aofaiga tele mo faamoemoega amiotonu?

  • E mafai faapefea ona faaaoga mo faamoemoega leaga?

Faamatala na faaaoga e Satani le malosi i se aofaiga toatele e fafau ai le amioleaga i sa Nifae e ala i pulega faalilolilo. Fai atu i se tamaitiiti e faitau le Helamana 1:11–12, lea e faamalamalama mai ai le amataga o le au faomea a Katianetona e ala i faatinoga a Kisakumena.

Fai i tamaiti e toe iloilo le ulutala mataupu i le Helamana 2. Valaaulia i latou e faitau le Helamana 2:4–5, 8 ma fautua mai i nei fuaiupu pe o le a le mea na naunau ia Katianetona e fai ia maua ai le mamalu ma le pule i tagata.

Faasino atu e faapea o se malo e fausia i tagata taitoatasi. Ina ia mafai ona pā’u se malo, e toatele tagata e ao ona faatoilaloina e le malosiaga o le tiapolo.

Fai i tamaiti e faailoa mai faataitaiga o ona po nei o ni vaega faataumaoi po o ni faatosinaga. (Mo nisi faataitaiga, atonu e te manao e faasino atu i latou i le saunoaga a Elder M. Russell Ballard o loo i itulau 276–77 i le tusi lesona a tagata o le vasega. O loo maua foi lenei saunoaga i le companion DVD A.)

Fesoasoani i tamaiti ia malamalama o Satani lava o loo faaosoosoina pea ia pulega faalilolilo. Faamanatu atu i tamaiti o loo i ai ia Satani se poto masani aoao i le faaseseina o tagata, ae e mafai e le Agaga o le Alii ona fesoasoani ia i tatou e aloese mai le faapologaina i ana pepelo. Atonu e te manao e valaaulia tamaiti e faitau le Mataupu Faavae ma Feagaiga 10:5 , lea e aoao mai ai e faamalosia i tatou e le tatalo e tetee atu ia Satani.

Atonu foi e te manao e faagauai atu i le mea moni e faapea o fuafuaga a Katianetona ina ia aveesea le faigamalo i lena taimi na taofiofia i le faalavefau mai o le auauna a Helamana (tagai i le Helamana 2:6–10). E ui lava e i ai taimi atonu o loo siomia i tatou i le malosi o le tuputupu ae o le amioleaga, ae e mafai ona tatou tutu ma le mausali i lo tatou amiotonu ma tetee atu i le leaga.

Helamana 3:20. E Tatau Ona Tatou Tauivi Pea e Fai le Mea e Tonu

Fai atu i se tamaitiiti e faitau le Helamana 3:20.

  • O le a le upu i le Helamana 3:20 o loo faaalia ai na tumau pea Helamana i le faia o le mea tonu? (E le aunoa.)

  • I lou lava olaga, o a taunuuga ua e vaaia pe a faaauau pea ona e galue ia usiusitai i poloaiga?

  • Pe a maea ona faasoa mai e tamaiti o latou manatu e uiga i lenei fesili, valaaulia i latou e fai se otootoga e mafai ona latou faaaogaina e tuu atu ai se tautalaga e uiga i le usiusitai e le aunoa i poloaiga a le Alii.

Tau atu i tamaiti e faapea o i tatou, e pei o Helamana, e tatau ona tauivi ina ia “faia foi mea e tatau ai e le aunoa i luma o le Atua” (Helamana 3:20). Mafaufau e fai atu i le vasega e usu le “Fai Mea Tonu” (Viiga, nu. 148). Pe atonu foi e te manao e fai atu i se tasi e lelei lona siufofoga e usu ia fuaiupu o le viiga, ae usu faatasi e le vasega le tali.

Helamana 3:20–30. Pe a Tatou Tausia Poloaiga a le Alii, Tatou te Manuia i Lana Galuega

Fesili atu i tamaiti pe o le a so latou manatu i le faauigaga e le tele o tagata o le upu manuia.

Ia taitoalua tamaiti ma suesueina le manatu faavae o le manuia o loo maua i le Helamana 3:20–30. A o latou suesueina ma talanoaina faatasi nei fuaiupu, fai atu ia i latou e faailoga upu autu ma fuaitau e fesootai ma tulaga manuia o sa Nifae. Fai atu foi ia i latou e saili mo tali i fesili nei:

  • O faapefea ona tautalagia le manuia ii e faatusatusa i le faauigaga o le manuia e le lalolagi?

  • O a ni auala o fesootai ai mataupu faavae i fuaiupu 29–30 i le manuia?

I le faaiuga o talanoaga taitoalua, fai atu i ni nai tamaiti e ofo mai e faasoa ni malamalamaaga ma le toatele o le vasega.

Helamana 3:27–37; 4. O E Lotomaualalo ma Amiotonu Ua Faapaiaina ma Maua le Malosi mai le Alii, A o E Faamaualuga ma Agasala Ua Tuulafoaiina i Lo Latou Lava Malosi

Faaali atu se fasi ieie palapala. Fautua atu ua faatusa le fasi ieie i se tagata o le lalolagi. Ona faaali atu lea o se fasi ieie paepae mama (e pei o se solosolo).

  • O le a le mea o loo fesoasoani i se tagata e avea ai e faapei o lenei ieie mama? (Lisi tali a tamaiti i luga o le laupapa.)

Fai atu i se tamaitiiti e faitau le Helamana 3:35.

  • O le a sou manatu i le uiga o le tuuina atu o o tatou loto i le Atua?

Fai atu i se tamaitiiti e faitau le faauigaga o le faapaiaina mai le Taiala i Tusitusiga Paia lea o loo ta’ua i le itulau 278 i le tusi lesona a tagata o le vasega.

  • Pe o le faapaiaina o se mea e tupu pe o se faagasologa? Aisea?

Valaaulia tamaiti e faitau le Helamana 3:27–30. Pe a maea ona faitauina fuaiupu taitasi, taofi ma fai i tamaiti e fautua mai ni mataupu faavae i le fuaiupu e uiga i le faapaiaina. Ia faataga foi i latou e fai mai se faamatalaga i isi fuaitau ia e taua ia i latou.

I se faaiuga o lenei talanoaga e uiga i le faapaiaina e oo mai pe a tuu atu o tatou loto i le Atua, atonu e te manao ai e valaaulia tamaiti e faaalu ni nai minute e tusi ai ni auala e mafai ona latou faaaogaina ai nei mataupu faavae i o latou olaga.

Fai i tamaiti e faitau le leoa le Helamana 3:29–30 ma faailoga i a latou tusitusiga paia mea uma e mafai ona latou maua lea e faamatala ai mea e mafai e le afioga a le Atua ona fai. Ona fai atu lea o fesili nei:

  • E faapefea ona “telelise ma mamana” le afioga a le Atua?

  • E mafai faapefea e le upu ona “vavaeeseina,” pe tipitipi lili’i, “le atamai uma ma mailei ma togafiti uma a le tiapolo”?

  • O fea o le a iu ina taitai i ai i tatou e le upu?

Ina ia faamamafaina e faapea ua fesoasoani tusitusiga paia ia i tatou e faasagatau i mailei a le fili, faitau le saunoaga lenei a Peresitene Ezra Taft Benson (1899–1994), le Peresitene lona 13 o le Ekalesia:

“O le faamanuiaina i le amiotonu, o le mana e aloese ai mai le faaseseina ma teena ai faaosoosoga, taiala i o tatou olaga i aso uma, faamaloloina o le agaga—o nisi nei o folafolaga ua tuuina mai e le Alii ia i latou o e o atu i Lana afioga. Pe folafola mai ea la e le Alii ae le faataunuuina? E mautinoa lava afai Na te ta’u mai ia i tatou o le a oo mai nei mea ia i tatou pe afai tatou te uumau i Lana afioga, ona maua lea e i tatou o faamanuiaga. Ae afai tatou te le faia, ona le maua ai lea o faamanuiaga. Peitai, e tusa lava pe o le a lo tatou filiga i nisi itu, ua na o tusitusiga paia lava e maua ai nisi o faamanuiaga mautinoa, ua na o le o mai i le afioga a le Alii ma uumau i ai a o tatou malaga atu i le lotolotoi o le pogisa i le laau o le ola” (“O Le Mana o le Afioga,” Liahona, Iul. 1986, 71).

Valaaulia tamaiti e sailiili le Helamana 3:33–34, 36 ma saili mo fuaitau o loo faaalia ai le auala e tuputupu ae ai le faamaualuga i totonu ia i tatou. (Mo se faataitaiga, o loo faapea mai le fuaiupu 33 o le faamaualuga “ua amata ona tupu … i loto o tagata.” Fuaiupu 34 o loo faapea mai ua “faafefeteina [tagata] i le faamaualuga.” Fuaiupu 36 o loo faapea mai o le “faamaualuga tele ua tupu i loto o le nuu.”)

  • Aisea e masani ai ona amata mai le faamaualuga i se mea itiiti e oo atu i se mea tele?

  • Aisea e faigata ai ona aveese le faamaualuga pe a maua lona avanoa e tupu ae ai?

  • E mafai faapefea e le tatalo ma le suesueina o tusitusiga paia i aso taitasi ona tuputupu ae i se ala tutusa ae lelei?

Tuu atu i tamaiti e sue nisi o taunuuga o le faamaualuga o loo lisiina i le Helamana 4:12–13. Atonu e te manao e faatusatusa tagata o loo faamatalaina i nei fuaiupu, o e faamaualuluga i o latou lava malosi ma “ua tuulafoaiina i lo latou lava malosi,” i tagata ua faamatalaina i le Helamana 3:35, o e ua oo ina “faamaulalo atili.” Fesoasoani i tamaiti ia malamalama e mafai ona amata le faamaualuga mai mea iti ae e mafai ona tuputupu ae ma oo ai i taunuuga tetele.

Faasoa atu le saunoaga lenei a Elder Jeffrey R. Holland o le Korama a Aposetolo e Toasefululua:

“Aua le fefe i ma’ila’ila e oo mai ona o le puipuia o le upumoni po o le tau mo le mea tonu, ae ia nofouta mo ma’ila’ila e taufaasese faaleagaga, lea e oo mai ia te outou i gaoioiga e le tatau ona outou faia, lea e taitaiina atu ai outou i nofoaga e le tatau ona outou o i ai” (i le Lipoti o le Konafesi, Oke. 1998, 101; po o le Liahona, Ian. 1999, 92).

  • O le a sou manatu i le uiga o le saunoaga a Elder Holland ina ua ia faasino atu i “ma’ila’ila … lea e taitaiina atu ai outou i nofoaga e le tatau ona outou o i ai”?

Tuu atu i tamaiti e faitau le Helamana 4:23–26.

  • O le a le mea e tupu i tagata pe a amata ona latou mulimuli i se ala o le agasala?

  • O le a se vaifofo ua ta’u mai i le fuaiupu 25 mo i latou ua i ai i le ala o le agasala?

  • O a ni auala e taitai atu ai le amiotonu i le malosi?

Faamaea atu le lesona i le faitauina o le Helamana 4:15. Uunaia tamaiti e suesue o latou olaga ma faatulaga se ala mo le malosi ma le fiafia.