1 Ma sa oo i le lona limasefulu ma le fa o tausaga, sa i ai faatuiesega e tele i le ekalesia, ma sa i ai foi se ^afinauga i totonu o tagata, sa oo ina i ai le faamasaa toto tele.

2 Ma sa fasia ma tutuli ese mai le laueleele le vaega faatuiese, ma sa latou o atu i le tupu o sa Lamanā.

3 Ma sa oo ina latou taumafai e faaoso sa Lamanā ia o atu e tau faasaga ia sa Nifaē; ae faauta, sa matuā fefefe lava sa Lamanā, sa oo ina latou lē faalogo i upu a na tagata faatuiese.

4 Ae sa oo i le lona limasefulu ma le ono o tausaga o le nofoaiga a faamasino, sa i ai ni ^atagata faatuiese o e na o ese atu mai sa Nifaē i sa Lamanā; ma sa latou manumalo faatasi ma isi i le faaosoina o i latou e feita faasaga ia sa Nifaē; ma sa latou sauni i le tausaga atoa lena mo le taua.

5 Ma o le lona limasefulu ma le fitu o tausaga na latou o ifo ai e faasagatau ia sa Nifaē, ma sa latou amatalia le gaoioiga e oo mai ai le oti; ioe, sa oo i le lona limasefulu ma le valu o tausaga o le nofoaiga a faamasino sa manuia ai i latou i le mauaina o le laueleele o Sara’emila; ioe, ma faapea foi laueleele uma lava, e oo lava i le laueleele lea sa latalata ane i le laueleele o Nuumau.

6 Ma sa tutulia sa Nifaē ma autau a Moronaea seia oo mai lava i le laueleele o Nuumau;

7 Ma o iina na latou fauolo ai e tetee ia sa Lamanā, mai le sami i sisifo, e oo atu i sasae; o lona mamao e tusa ma se malaga a se tagata sa Nifaē i le aso atoa, i luga o le laina o le tuaoi na latou fauoloina, ma tuu ai a latou autau e puipui i lo latou laueleele i matu.

8 Ma sa faapea ona maua e na tagata faatuiese o sa Nifaē, i le fesoasoani a se autau toatele a sa Lamanā, mea uma a sa Nifaē ia sa i le laueleele i saute. Ma o nei mea uma sa faia i le lona limasefulu ma le valu ma le lona limasefulu ma le iva o tausaga o le nofoaiga a faamasino.

9 Ma sa oo i le tausaga e onosefulu o le nofoaiga a faamasino, sa manumalo ai Moronaea ma ana autau i le mauaina mai o vaega e tele o le laueleele; ioe, sa latou toe maua mai aai e tele ia sa pa’u’ū atu i lima o sa Lamanā.

10 Ma sa oo i le tausaga e onosefulu ma le tasi o le nofoaiga a faamasino na latou manumalo ai i le toe maua mai e oo i le afa o o latou laueleele uma.

11 O lenei o lea toilalo tele o sa Nifaē, ma le fasiga tele lea na i ai i totonu ia te i latou, semanu e le tupu pe a na leai a latou amioleaga ma a latou mea inosia ia sa i ai i totonu ia te i latou; ioe, ma sa i ai foi ia mea i totonu o i latou o e na fai mai ua latou auai i le ekalesia a le Atua.

12 Ma sa oo mai ia mea ona o le ^afaamaualuluga o o latou loto, ona o a latou ^eoa e tele naua, ioe, na oo mai ona o lo latou faasaua i e ⁱmatitiva, i le taofi o a latou meaai mai i e fia aai, i le taofi o o latou ofu mai i e ua le lavalavā, ma le fepōina o alafau o o latou uso lotomaualalalo, faatauemu i mea ua paia, ma faafitia le agaga o le valoaga ma faaaliga, ma fasioti tagata, ma fai le vete, ma pepelo, gaoi, mulilulua, ma tutulai ae i finauga tetele, ma sosola ese atu i le laueleele o Nifae, i tagata sa Lamanā—

13 Ma ona o lenei a latou amioleaga tele, ma lo latou ^amitamitavale i lo latou lava malosi, na tuua ai i latou e faalagolago i lo latou lava malosi; o lea na latou le manuia ai, ae ua faapuapuagatia ai ma taia, ma tutulia i luma o sa Lamanā, seia oo ina toetoe lava a aveesea o latou laueleele uma.

14 Ae faauta, sa tala’i atu e Moronaea mea e tele i tagata ona o lo latou amioletonu, ma sa faapea foi ona tala’i atu e ^aNifae ma Liae, o e o atalii o Helamana, mea e tele i tagata, ioe, ma sa laua vavalo atu mea e tele ia te i latou e uiga ia latou amioletonu, ma mea o le a oo mai ia te i latou pe afai latou te le salamo ia latou agasala.

15 Ma sa oo ina latou salamo, ma e tusa ai ma lo latou salamo sa faapea foi ona amata ona latou manuia ai.

16 Ona ua vaai atu Moronaea ua latou salamo sa ia taumafai e taitai atu i latou mai lea nofoaga i lea nofoaga, ma mai lea aai i lea aai, seia oo ina latou toe maua mai le afa o a latou meatotino ma le afa o o latou laueleele uma.

17 Ma sa faapea ona faaiuina o le lona onosefulu ma le tasi o tausaga o le nofoaiga a faamasino.

18 Ma sa oo i le lona onosefulu ma le lua o tausaga o le nofoaiga a faamasino, sa le mafai e Moronaea ona toe maua ni isi laueleele i luga o sa Lamanā.

19 O lea na latou tuu ai la latou fuafuaga ia maua mai le vaega na totoe o o latou laueleele, ona sa matuā toatele tele sa Lamanā sa le mafai ai e sa Nifaē ona toe maua se malosi i luga o i latou; o lea na faaaoga ai e Moronaea ana autau uma i le taofiga o vaega ia na ia aveaina.

20 Ma sa oo ina sa matata’u tele sa Nifaē ona o le toatele o le aofai o sa Lamanā, nei faatoilaloina i latou, ma solia i lalo, ma fasiotia, ma faaumatiaina.

21 Ioe, sa amata ona latou manatua valoaga a Alema, ma upu foi a Mosaea; ma sa latou vaai sa avea i latou ma ni tagata ua maaa, ma sa latou tuu faameanoa poloaiga a le Atua;

22 Ma sa latou suia ma solia i lalo i o latou vae ^atulafono a Mosaea, po o mea ia na poloaiina ai o ia e le Alii e tuu atu i tagata; ma sa latou vaai ua faaleagaina a latou tulafono, ma ua avea i latou ma tagata amioleaga, ua oo ina latou amioleaga e pei lava o sa Lamanā.

23 Ma ona o lo latou amioletonu sa amata ai ona ^afaaitiitia le ekalesia; ma ua amata ona latou le talitonu i le agaga o valoaga ma le agaga o faaaliga; ma ua sisila totoa mai faafeagai ma o latou mata faamasinoga a le Atua.

24 Ma sa latou vaai ua latou ^avaivai, e pei o o latou uso, o sa Lamanā, ma ua le toe faasaoina i latou e le Agaga o le Alii; ioe, ua alu ese mai ia te i latou, aua e le afio le ^eAgaga o le Alii i malumalu e ⁱlē paia—

25 O lea na le toe faasaoina ai i latou e le Atua i lona mana faavavega ma le mafaatusalia, ona ua latou pa’u’ū atu i se tulaga o le ^alē talitonu ma le amioleaga tele; ma sa latou vaai ua sili atu ona toatele o sa Lamanā nai lo i latou, ma e vagana ua latou ^epipii atu i le Alii lo latou Atua, o le a le maalofia lo latou fano.

26 Aua faauta, ua latou vaai ua tutusa lava le malolosi o sa Lamanā ma lo latou malolosi, e oo lava i le tasi tagata i le isi tagata. Ma sa faapea ona latou pa’u’ū atu i lenei solitulafono tele; ioe, ua faapea ona latou vaivai, ona o a latou soligatulafono, i se va e ^alē tele ni tausaga.