1 Ma sa oo ina ua faaiuina le lona onosefulu ma le lua o tausaga o le nofoaiga a faamasino, sa tutupu mai nei mea uma, ma ua avea sa Lamanā, o se vaega tele o i latou, o ni tagata amiotonu, sa oo ina sili atu lo latou ^aamiotonu nai lo sa Nifaē, ona o lo latou mausalī ma lo latou mautū i le faatuatua.

2 Auā faauta, sa i ai le toatele o sa Nifaē o e sa ^afaamaaa ma lē mananao e salamo ma amioleaga tele, sa oo ina latou teena le afioga a le Atua ma talaiga ma perofetaga uma na oo mai i totonu ia te i latou.

3 Ae ui i lea, sa maua e tagata o le ekalesia le olioli tele ona o le liua mai o sa Lamanā, ioe, ona o le ekalesia a le Atua, lea sa faatuina i totonu ia te i latou. Ma sa latou ^afaaaumea le tasi i le isi, ma olioli le tasi ma le isi, ma sa latou maua le olioli tele.

4 Ma sa oo ina o ifo le toatele o sa Lamanā i le laueleele o Sara’emila, ma talai atu i sa Nifaē le tala o lo latou ^aliua mai, ma faamalosi atu ia te i latou ia faatuatua ma salamo.

5 Ioe, ma e toatele i latou sa tala’i atu ma le mana tele ma le pule, sa oo ina ave ifo ai le toatele o i latou i le loloto o le lotomaualalo, ia avea o ni soo lotomaualalalo o le Atua ma le Tamai Mamoe.

6 Ma sa oo ina o atu le toatele o sa Lamanā i le laueleele i matu; ma sa o atu foi Nifae ma Liae i le ^alaueleele i matu, e tala’i atu i tagata. Ma sa faapea ona i’u o le lona onosefulu ma le tolu o tausaga.

7 Ma faauta, sa i ai le filemu i le laueleele atoa, sa oo ina mafai ona o atu o sa Nifaē i soo se vaega o le laueleele sa latou loto i ai, pe i totonu o sa Nifaē po o sa Lamanā.

8 Ma sa oo ina mafai foi e sa Lamanā ona o atu i soo se mea sa latou loto i ai, pe i totonu o sa Lamanā po o sa Nifaē; ma sa faapea ona latou mafuta saoloto ai o le tasi i le isi, e fefaatauai, ma saili oloa, e tusa ma o latou manao.

9 Ma sa oo ina latou matua mauoa tele lava, o sa Lamanā uma ma sa Nifaē; ma sa latou maua se mau tele lava o auro, ma ario, ma uamea taua eseese uma, i le laueleele i saute faapea ma le laueleele i matu.

10 O lenei o le laueleele i saute sa taua o Liae, ma o le laueleele i matu sa taua o ^aMoleka, lea sa faaigoa i le atalii o Setekaia; ona sa aumai Moleka e le Alii i le laueleele i matu, ma Liae i le laueleele i saute.

11 Ma faauta, sa i ai ituaiga auro eseese uma i nei laueleele e lua, ma ario, ma ituaiga uma o ’oa taua eseese; ma sa i ai foi tagata faigaluega tomai eseese, o e sa galueaiina ma faamamaina ituaiga uma o oa; ma sa faapea ona avea ai i latou ma mauoa.

12 Sa latou totoina saito e tele, i matu uma ma saute; ma sa latou uluuluola tele lava, i matu faapea ma saute. Ma sa latou fanafanau ma faasolo malolosi tele lava i le laueleele. Ma sa latou atiae lafu ma fagaga e tele, ioe, o manu pepeti e tele.

13 Faauta o o latou fafine sa galulue ma milo, ma sa latou faia ie uiga eseese uma, o ie lino-miloa lelei ma ie o ituaiga eseese uma, e faaoofu ai o latou le lavalava. Ma sa faapea ona mavae atu o le lona onosefulu ma le fa o tausaga i le filemu.

14 Ma i le tausaga e onosefulu ma le lima sa latou maua ai foi le olioli tele ma le filemu, ioe, ma talaiga e tele ma valoaga e tele e faatatau i mea o le a oo mai. Ma sa faapea ona mavae atu o le tausaga e onosefulu ma le lima.

15 Ma sa oo i le tausaga e onosefulu ma le ono o le nofoaiga a faamasino, faauta, sa fasiotia ^aSesorama e se lima e le ma iloa ao nofo o ia i le nofoa-faamasino. Ma sa oo ina o lena lava foi tausaga, na fasiotia ai foi lona atalii, o le na tofia e le nuu e suitulaga ia te ia. Ma sa faapea ona iu o le tausaga e onosefulu ma le ono.

16 Ma o le amataga o le tausaga e onosefulu ma le fitu sa toe amata ai ona tuputupu ae le amioleaga tele lava o tagata.

17 Aua faauta, sa umi ona faamanuiaina i latou e le Alii i oa o le lalolagi sa le faaosoina i latou i le ita, i taua, po o i le faamasaa toto; o lea sa amata ai ona latou mafuli atu o latou loto ia latou oa; ioe, sa amata ona latou saili ia maua le oa ina ia mafai ona latou sili ae i luga o le isi; o lea na amata ai ona latou faia o fasiotiga tagata ^afaalilolilo, ma faomea ma vete, ina ia latou maua ai oa.

18 Ma o lenei faauta, o ia tagata fasioti tagata ma tagata na faia vetega, o se vaega o tagata o e na faavae e Kisakumena ma ^aKatianetona. Ma o lenei sa oo ina toatele tagata o le vaega a Katianetona, i totonu lava o sa Nifaē. Peitai faauta, sa sili atu lo latou toatele i le vaega aupito sili atu ona amioleaga o sa Lamanā. Ma sa taua i latou o le au faomea ma le au fasioti tagata a Katianetona.

19 Ma o i latou ia na fasiotia le faamasino sili o Sesorama, ma lona atalii, ao i ai i le nofoa-faamasino; ma faauta, sa le maua i latou.

20 Ma o lenei sa oo ina ua iloa e sa Lamanā ua i ai ni tagata faomea i totonu ia te i latou, sa latou faanoanoa tele lava; ma sa latou faaaoga ala uma i lo latou malosi e faaumatia ai i latou mai le fogaeleele.

21 Ae faauta, sa faaosoina e Satani loto o le vaega toatele atu o sa Nifaē, sa oo ina latou aufaatasi ma ia vaega o tagata faomea, ma latou ulu atu ia latou feagaiga ma a latou tautoga, o le a latou puipuia ma faasaoina i latou taitasi i soo se tulaga faigata e oo i ai i latou, ina ia latou le mafatia ona o lo latou fasioti tagata, ma a latou vetega, ma lo latou gaoi.

22 Ma sa oo ina sa i ai ni a latou faailoga, ioe, ni a latou faailoga ^afaalilolilo, ma a latou upu faalilolilo; ma sa latou faia nei mea ina ia latou iloa ai se uso o le ua uma ona ulu atu i le feagaiga, po o le a lava le amioleaga e faia e lona uso e le tatau lava ona faamanualia o ia e lona uso, po o i latou o e ua auai i lana vaega, o e ua osia lenei feagaiga.

23 Ma sa faapea ona latou faia ina ia mafai ona latou fasioti tagata, ma vete, ma gaoi, ma fai le faitaaga ma amioleaga eseese uma, sa le tusa ai ma tulafono a lo latou atunuu ma tulafono foi a lo latou Atua.

24 Ma o soo se tasi o i latou o e na auai i la latou vaega na te faaali atu i le lalolagi a latou ^aamioleaga ma a latou mea inosia, e faamasinoina, e le tusa ai ma tulafono a lo latou atunuu, ae tusa ai ma tulafono a lo latou amioleaga, ia na tuuina mai e Katianetona ma Kisakumena.

25 Ma o lenei faauta, o ^atautoga ma feagaiga faalilolilo ia na poloai atu ai Alema i lona atalii ia aua nei oo atu i le lalolagi, nei avea ma ala e ave ifo ai tagata i le faafanoga.

26 O lenei faauta, o ia ^atautoga ma feagaiga faalilolilo sa lei oo mai ia Katianetona mai talafaamaumau ia na tuu atu ia Helamana; ae faauta, o ia mea na tuu i le loto o Katianetona e lena ^etagata e tasi o le na ia faatosina o tatou uluai matua ina ia aai i le fua o le laau na faasaina—

27 Ioe, o le tagata lava lena o le na taupulepule ma ^aKaino, e faapea afai na te fasiotia lona uso o Apelu o le a le iloa lava e le lalolagi. Ma sa taupulepule o ia faatasi ma Kaino ma e na mulimuli ia te ia, mai lena taimi ma agai atu i le lumanai.

28 O lenei foi o le tagata lava lena e tasi na ia tuu i loto o tagata ia latou ^afausia se olo ia lava le maualuga ina ia mafai ona latou o ae ai i le lagi. Ma o le tagata lava lena e tasi o le na ia taitaiseseina tagata o e na o mai mai lena olo i le laueleele lenei; o le na ia faasalalauina galuega o le pouliuli ma mea inosia i luga o le fogaeleele atoa, seia oo lava ina ia toso ifo tagata i se faafanoga ^eatoa, ma se seoli tumau e faavavau.

29 Ioe, o le tagata lava lena e tasi o le na tuuina i le loto o ^aKatianetona e fai pea le galuega o le pouliuli, ma le fasioti tagata faalilolilo; ma ua ia aumaia i luma mai i le amataga o le tagata seia oo mai lava i lenei taimi.

30 Ma faauta, o ia lea o le o le ^atupuga o agasala uma. Ma faauta, o loo faia pea e ia ana galuega o le pouliuli ma le fasioti tagata faalilolilo, ma ia tuulima faasolo ifo a latou taupulepulega, ma a latou tautoga, ma a latou feagaiga, ma a latou fuafuaga o le amioleaga matautia, mai lea tupulaga i lea tupulaga, e tusa ai ma le mafai ona ia umia o loto o le fanauga a tagata.

31 Ma o lenei faauta, sa ia umia loto o tagata sa Nifaē; ioe, sa oo ina avea i latou ma tagata amioleaga tele lava; ioe, o le vaega tele o i latou sa liliu ese mai le ala o le amiotonu, ma sa latou ^asoli i lalo o o latou vae poloaiga a le Atua, ma ua liliu atu i o latou lava ala, ma sa latou fausia tupua mo i latou lava mai ia latou auro ma a latou ario.

32 Ma sa oo ina o nei amioletonu uma sa oo mai ia te i latou i le va o ni ^atausaga e le tele naua, o le vaega tele o ia mea na oo mai ia te i latou i le lona onosefulu ma le fitu o tausaga o le nofoaiga a faamasino i le nuu o Nifae.

33 Ma sa latou tuputupu ae pea i la latou amioletonu i le lona onosefulu ma le valu foi o tausaga, i le faanoanoa tele ma le lotomomomo o e na amiotonu.

34 Ma ua faapea ona tatou vaai ai sa amata ona faaitiitia sa Nifaē i le le talitonu, ma tutupu i le amioleaga ma mea inosia, ao sa Lamanā sa amata ona tutupu tele lava i le malamalama o lo latou Atua; ioe, sa amata ona latou tausia ana tulafono ma poloaiga, ma savavali i le upumoni ma le amiosao i ona luma.

35 Ma ua faapea ona tatou vaai ai ua amata ona ^aalu ese o le Agaga o le Alii mai sa Nifaē, ona o le amioleaga ma le maaa o o latou loto.

36 Ma ua faapea ona tatou vaai ai ua amata ona liligi ifo e le Alii lona Agaga i luga o sa Lamanā, ona o lo latou augofie ma lo latou fia talitonu i ana fetalaiga.

37 Ma sa oo ina sailia e sa Lamanā le vaega a le au faomea a Katianetona; ma sa latou talai atu le afioga a le Atua i le vaega sili ona amioleaga o i latou, sa oo ina matua faaumatia lava lenei vaega o le au faomea mai totonu o sa Lamanā.

38 Ma sa oo i le tasi itu, sa atiae ma lagolagoina i latou e sa Nifaē, e amata mai i le vaega sili ona amioleaga o i latou, seia oo ina latou ufitia le laueleele atoa o sa Nifaē, ma latou faaseseina le vaega tele o e amiotonu seia oo ina latou o ifo e talitonu ia latou galuega ma aai ia latou vete, ma aufaatasi ma i latou i lo latou fasioti tagata ma pulega faalilolilo.

39 Ma sa faapea ona latou maua o le pulega atoa o le malo, sa oo ina latou solia i lalo o o latou vae ma taia ma faasaua ma fuli o latou tua i e ua ^amatitiva ma e agamalu, ma soo lotomaualalalo o le Atua.

40 Ma ua faapea ona tatou vaai ua latou i ai i se tulaga leaga mata’utia, ma ua ^amatua mo se faaumatiaga tumau e faavavau.

41 Ma sa oo ina faapea ona ’u o le tausaga e onosefulu ma le valu o le nofoaiga a faamasino i le nuu o Nifae.