1 Faauta, o lenei sa oo ina ua uma ona tautala atu e Nifae o nei upu, sa i ai ni tagata o e sa i totonu ia te i latou sa taufetuli atu i le nofoa-faamasino; ioe, e toalima i latou o e na o atu, ma sa latou fai ifo i totonu ia te i latou lava, a’o latou o atu:

2 Faauta, o le a tatou iloa moni nei pe o lenei tagata o se perofeta ma pe na poloaiina o ia e le Atua e vavalo mai ni mea ofoofogia faapea ia te i tatou. Faauta, tatou te le talitonu na ia poloaiina o ia; ioe, tatou te le talitonu o ia o se perofeta; ae ui i lea, afai e moni lenei mea na ia fai mai ai e uiga i le faamasino sili, e faapea ua oti o ia, ona tatou talitonu ai lea ua moni isi upu na ia fai mai ai.

3 Ma sa oo ai ina latou taufetuli atu ma lo latou malosi, ma ua oo atu ai i le nofoa-faamasino; ma faauta, ua pa’ū ifo le faamasino i le eleele, ma sa ^ataoto i lona toto.

4 Ma o lenei faauta, ina ua latou vaai i lenei mea, sa latou ofo tele, sa oo ina latou pa’u’ū ifo i le eleele; ona sa latou le talitonu i upu na tautala i ai Nifae e uiga i le faamasino sili.

5 Ae o lenei, ina ua latou vaai, ua latou talitonu, ma sa oo mai le matatau i luga o i latou nei oo mai i luga o le nuu faamasinoga uma na tautala i ai Nifae; o lea na latou gatete ai, ma pa’u’ū ifo i le eleele.

6 O lenei, i le taimi lava ina ua uma ona fasiotia o le faamasino—ona sa tui o ia e lona uso sa ofu faalilolilo, ma sa sola o ia, ma sa taufetuli atu auauna ma ta’u atu i tagata, ma alalaga atu ua i ai se fasioti tagata i totonu ia te i latou;

7 Ma faauta sa faapotopoto ane faatasi e tagata i latou lava i le mea na i ai le nofoa-faamasino—ma faauta, i lo latou ofo tele, sa latou vaai atu i tagata na e toalima o e ua pa’u’ū ifo i le eleele.

8 Ma o lenei faauta, sa le iloa e tagata se mea e uiga i le motu o tagata o e sa faapotopoto faatasi i le ^afaatoaga a Nifae; o lea na latou fai ane ai i totonu ia te i latou lava: O tagata nei o i latou ia o e na fasiotia le faamasino, ma ua taia i latou e le Atua ina ia le mafai ona latou sosola ese mai ia te i tatou.

9 Ma sa oo ina latou tapue i latou, ma saisai i latou ma lafo i latou i le falepuipui. Ma sa i ai se folafolaga sa auina atu faalauaitele e faapea ua fasiotia le faamasino, ma ua aveina ē na fasiotia o ia ma lafo i le falepuipui.

10 Ma sa oo i le aso na sosoo ai sa faapotopoto faatasi e le nuu i latou lava e faanoanoa ma ^aanapopogi, i le falelauasiga o le faamasino sili maualuga o le ua fasiotia.

11 Ma sa faapea foi ona faapotopoto ane faatasi faamasino o e sa i ai i le faatoaga a Nifae, ma faalogo i ana upu, i le falelauasiga.

12 Ma sa oo ina latou fesilisili i tagata, e faapea: O fea o i ai le toalima o e na auina atu e fesili e uiga i le faamasino sili pe ua oti o ia? Ma sa latou tali mai ma faapea mai: E uiga i lenei toalima o e na outou fai mai na outou auina mai, matou te le iloa; ae e i ai se toalima o e na fasiotia o ia, ua matou lafoina i le falepuipui.

13 Ma sa oo ina mananao faamasino ia aumai i latou; ma sa aumai i latou, ma faauta o i latou ia o le toalima o e na auina atu; ma faauta sa fesiligia i latou e faamasino ina ia latou iloa e uiga i le mataupu, ma sa latou faamatala mai ia te i latou mea uma na latou faia, e faapea:

14 Sa matou taufetuli ma o atu i le mea o i ai le nofoa-faamasino, ma ina ua matou vaai atu i mea uma e pei ona sa molimau mai ai Nifae, sa matou ofo tele sa oo ai ina matou pa’u’ū ifo i le eleele; ma ina ua matou malamalama mai lo matou ofo, faauta, ua latou lafo i matou i le falepuipui.

15 O lenei, e uiga i le fasiotiga o lenei tagata, matou te le iloa po o ai na faia; ma ua na’o le pau lenei o le mea ua matou iloa, sa matou taufetuli ma o mai e tusa ma lo outou manao, ma faauta, ua oti o ia, e tusa ma upu a Nifae.

16 Ma o lenei sa oo ina faamalamalama atu le mataupu e faamasino i tagata, ma alalaga e faasaga ia Nifae, ua faapea mai: Faauta, ua matou iloa atonu sa faia e lenei Nifae se ioega faatasi ma se tasi e fasioti le faamasino, ma a uma ona ia ta’u mai lea ia te i tatou, ina ia mafai e ia ona faaliliu atu i tatou i lona faatuatuaga, ina ia mafai ona ia faatu a’e o ia lava o se tagata maoae, ua filifilia e le Atua, ma o se perofeta.

17 Ma o lenei, faauta, o le a matou faaalia lenei tagata, ma o le a ia ta’u mai lona sese ma faailoa mai ia te i tatou le tagata moni na fasiotia lenei faamasino.

18 Ma sa oo ina faasaoloto le toalima i le aso o le falelauasiga. Ae ui i lea, sa latou tauseseina faamasino i upu na latou tautatala i ai e faasaga ia Nifae, ma latou finau ma i latou taitoatasi, sa oo ai lava ina fefinauai i latou.

19 Ae ui i lea, sa latou faatonu atu ia pu’e Nifae ma saisai ma aumai i luma o le motu o tagata, ma sa amata ona latou fesiligia o ia i ala eseese ina ia mafai ona latou faasese o ia, ina ia mafai ona latou tausalaina o ia i le oti—

20 Ua fai mai ia te ia: O oe o se taupulepule; o ai lenei tagata na fasiotia o ia? O lenei ia ta’u mai ia te i matou, ma tautino mai lou sese; faapea mai: Faauta o tupe nei; ma o le a matou tuu atu foi ia te oe lou ola pe afai e te ta’u mai ia te i matou, ma tautino mai le maliega lea na e faia faatasi ma ia.

21 Peitai sa fai atu Nifae ia te i latou: E, outou ^avale e, outou e ua le peritomeina i le loto, outou o tauaso, ma outou tagata ^eua maaa, tou te iloa ea o le a le umi o le a faamafatiaina ai outou e le Alii lo outou Atua ia outou ui ai pea i lenei ala o lo outou agasala?

22 E, ua tatau lava ia te outou ona amata ona outou uio ma ^afaavauvau, ona o le faafanoga tele lea ua faatalitali mai i le taimi nei ia te outou, vagana ai ua outou salamo.

23 Faauta ua outou fai mai na ou ioe faatasi ma se tagata ia fasioti e ia Sesorama, lo tatou faamasino sili. Ae faauta, ou te fai atu ia te outou, ua outou fai mai faapea ona sa ou molimau atu ia te outou ina ia mafai ona outou iloa e uiga i lenei mea; ioe, sa ou ta’u atu lava lenei mea o se molimau ia te outou, ua ou iloa e uiga i le amioleaga ma mea inosia ia ua i ai i totonu ia te outou.

24 Ma ona ua ou faailoa atu lenei mea, ua outou fai mai sa ou ioe faatasi ma se tagata ia ona faia lenei mea; ioe, ona sa ou faaali atu ia te outou lenei faailoga ua outou feitai mai ai ia te au, ma saili e faaumatia lo’u ola.

25 Ma o lenei faauta, o le a ou faaali atu ia te outou se isi faailoga, ma vaai pe o le a outou saili ai e faaumatia au i lenei mea.

26 Faauta ou te fai atu ia te outou: O i le fale o Seanetuma, o le ^auso lea o Sesorama, ma fai atu ia te ia—

27 Pe na ioe ea Nifae, le faatagā perofeta, o le ua ia vavalo mai se leaga e tele i lenei nuu, faatasi ma oe, i se ioega na e fasiotia ai Sesorama, o lou uso?

28 Ma faauta, o le a fai mai o ia ia te outou, E leai.

29 Ma ia outou fai atu ia te ia: Na e fasiotia lou uso?

30 Ma o le a tu o ia ma le fefe, ma le iloa se upu e fai mai. Ma faauta, o le a faafiti mai o ia ia te outou; ma o le a faia e ia e peiseai ua te’i; ae ui i lea, o le a ia fai mai ia te outou ua mama o ia.

31 Ae faauta, ia outou suesue o ia, ma o le a outou maua le toto i le vaega i lalo o lona ofu pulupulu.

32 Ma a uma ona outou vaai i lenei mea, ia outou fai atu: E mai fea lenei toto? Matou te le iloa ea o le toto lenei o lou uso?

33 Ma a uma o le a gatete ai o ia, ma foliga mai ua sesega, e pei lava ua oo mai le oti i ona luga.

34 Ma a uma ona outou fai atu lea ia te ia: Ona o lenei fefe ma lenei sesega lea ua oo mai i ou mata, faauta, ua matou iloa ua e sala.

35 Ma a uma o le a oo mai se mata’u tele atu i ona luga; ma ona ia tautino mai ai lea ia te outou, ma ia le toe faafitia o ia lava na faia lenei fasioti tagata.

36 Ma a uma o le a fai mai o ia ia te outou, o a’u, o Nifae, ua ou le iloa se mea e uiga i le mataupu vagana ai ua tuuina mai ia te a’u e le mana o le Atua. Ma o le a outou iloa ai o a’u o se tagata faamaoni, ma ua auina mai a’u ia te outou mai le Atua.

37 Ma sa oo ina latou o atu ma faia, e tusa lava e pei ona fai atu ai Nifae ia te i latou. Ma faauta, sa moni upu na ia fai mai ai; ona e tusa ma upu sa faafitia e ia; ma e tusa foi ma upu sa tautino mai e ia.

38 Ma sa aumai o ia e faamaonia o ia lava o le fasioti tagata lea, sa oo ina tatala faasaoloto le toalima, faapea foi ma Nifae.

39 Ma sa i ai ni isi o sa Nifaē o e na talitonu i upu a Nifae; ma sa i ai foi ni isi, o e na talitonu ona o le molimau a le toalima, ona sa faaliliuina i latou a’o latou i ai i le falepuipui.

40 Ma o lenei sa i ai ni isi i totonu o le nuu, o e na fai mai o Nifae o se perofeta.

41 Ma sa i ai ni isi o e na fai mai: Faauta, o ia o se atua, ona vagana ai o ia o se atua po ua le mafai ona ia iloaina mea uma. Auā faauta, na ia ta’u mai ia te i tatou mafaufauga o o tatou loto, ma sa ia ta’u mai foi mea ia te i tatou; ma sa ia faailoa mai lava ia i tatou le tagata moni na fasiotia lo tatou faamasino sili.