Mataupu 17
Enosa–Upu a Mamona
Folasaga
Atonu ua masani au tamaiti ma le tala ia Enosa lea sa tatalo i le ao atoa ma le po atoa. E mafai ona e fesoasoani e faaloloto lo latou malamalama i lenei tala. A o latou faitauina ma talanoaina, e mafai ona latou aoao ai e uiga i taumafaiga ma amioga ia e mafai ona anoa ai a latou tatalo. E mafai ai foi ona latou iloa auala e aafia ai o latou olaga i faamanuiaga o le Togiola.
O tusi o Iaroma, Ominae, ma Upu a Mamona ua faamaumau ai auala na tauivi ai sa Nifae ona sa latou le filifili e mulimuli i aoaoga a perofeta. A o e aoao atu, e mafai ona e fesoasoani i tamaiti e iloa auala e maua ai le filemu ona o le faatuatuaina o le Alii ma Ana perofeta e oo lava i taimi o tofotofoga ma faigata.
O Nisi o Aoaoga Faavae ma Mataupu Faavae
-
A o tatou mauaina le faamagaloga mo a tatou agasala e ala i le faatuatua ia Keriso ma le mana faamalolo o Lana Togiola, o le a tatou mananao e fesoasoani i isi ia maua le faaolataga (tagai i le Enosa 1:5–27).
-
O nisi taimi e tatau ai i taitai ona lapatai atu ma le manino ina ia uunaia ai tagata e salamo (tagai i le Enosa 1:22–23; Iaroma 1:10–12; Upu a Mamona 1:15–18).
-
O le a lagolagoina tagata o le Au Paia faamaoni ma taitaia i latou i taimi o tofotofoga ma faigata a o latou faalogo atu i perofeta (tagai i le Ominae 1:12–19).
-
Ua silafia e le Alii mea uma o le a oo mai (tagai i le Upu a Mamona 1:1–9).
Fautuaga mo le Aoaoga
Enosa 1:2–15. Tatalo o le Fesootaiga Faaleagaga lea ma le Atua
Fai i le vasega e tau mai mea uma latou te iloa e uiga ia Enosa. E mafai ona aofia ai tali nei:
-
O ia o le atalii o Iakopo, o le atalii o le atalii o Liae, ma o le tei o Nifae.
-
O ia o se tagata amiotonu.
-
Sa tatalo o ia i le ao ma le po atoa.
-
Sa faamautinoa atu ia te ia e le siufofoga o le Alii ua faamagaloina ana agasala.
-
Na tatalo o ia mo le soifua manuia o isi.
Vaevae le vasega taitoalua. Tuu atu e faitau taitoalua le Enosa 1:1–5 ma galulue faatasi e sue faatinoga ma uiga e anoa ai tatalo. A maea ni nai minute, Fai i tamaiti e faasoa mai mea ua latou maua.
Tusi tali a tamaiti i luga o le laupapa. Valaaulia tamaiti e tusi faalilolilo mataupu faavae mai lenei talanoaga o le a fesoasoani ia i latou e faaleleia ai a latou tatalo patino. Mo malamalamaaga atili, e mafai ona e tagai i saunoaga a Elder Robert D. Hales ma Elder Neal A. Maxwell o loo i itulau 135–36 i le tusi lesona a le vasega.
Enosa 1:5–27. A Tatou Mauaina le Faamagaloga mo a Tatou Agasala e ala i le Faatuatua ia Keriso ma le Mana Faamalolo o Lana Togiola, o le a Tatou Mananao e Fesoasoani i Isi ia Maua le Faaolataga
Tusi le ata lenei i luga o le laupapa:
Naunau mo le faaolataga o isi |
→ |
Faamagaloga o a tatou agasala e ala i le Togiola |
Valaaulia se tamaitiiti e faitau le Enosa 1:5–8.
-
O a lagona na ala ai ona iloa e Enosa ua ia maua le mana faamama o le Togiola?
-
E mafai faapefea ona tatou lagonaina lea mana e tasi i o tatou olaga?
Tuu atu i se tamaitiiti e faitau le Enosa 1:9–12.
-
I le taimi lava na lagona ai e Enosa le faamagaloga e ala i le togiola, o ai isi na ia mafaufau i ai?
-
Aisea e te manatu ai o le a ia amata ona mafaufau i isi?
-
E faapefea ona fesoasoani lenei mamanu ia i tatou?
Faamalamalama atu pe a faamamaina i tatou ma suia e ala i le Togiola, o le a saunia lelei i tatou e auauna atu i isi.
Valaaulia tamaiti e faasoa mai faataitaiga o tagata taitoatasi ua faaalia i o latou olaga se manao mo le manuia faaleagaga o isi. Lu’i tamaiti e saili faamanuiaga patino e ala i le mana o le Togiola ona fesoasoani atu lea i isi ia maua foi na faamanuiaga.
Enosa 1:22–23; Iaroma 1:10–12; Upu a Mamona 1:15–18. O Nisi Taimi e Tatau i Taitai ona Lapatai atu ma le Manino ina ia Uunaia ai Tagata e Salamo
Faaali atu ni nai ata tusi e faaalia ai lapataiga po o faaeteetega. (E mafai ona aofia ai i nei mea ia faailoga o le alatele, lapataiga o mea oona, ma isi.)
-
Aisea tatou te maua ai nei lapataiga?
-
O a ni taunuuga o le le usitai i se lapataiga?
Fai i tamaiti e faitau le Enosa 1:22–23.
-
O le a sou manatu i le uiga o le “ua malō”? Afai tatou te vaaia lea uiga ia i tatou lava, o le a se mea tatou te faia e suia ai?
Fai i tamaiti e faitau le Iaroma 1:10–12.
-
Aisea e te manatu ai ua mafai e nisi taitai ma faiaoga ona tumau i le filiga ma le faapalepale, e ui lava e teena e tagata a latou savali?
Fai i tamaiti e faitau le Upu a Mamona 1:15–18.
-
O le a le uiga o le tautala atu i afioga a le Atua i le mana ma le pule? Aisea e talafeagai ai i nisi taimi ona tautala atu ma le manino?
-
O a nisi o lapataiga manino ua tuuina mai e o tatou taitai?
-
E mafai faapefea ona tatou vaai i lapataiga manino o ni faailoaga o le alofa?
Uunaia tamaiti e usitai i lapataiga e aumai i perofeta, taitai perisitua i le lotoifale, ma matua, o loo mananao ia latou manuia.
Ominae 1:12–19. O Le A Lagolagoina Tagata o le Au Paia Faamaoni ma Taitaia i Taimi o Tofotofoga ma Faigata pe a Latou Faalogo atu i Perofeta
A o lei amataina le vasega, saunia le gaoioiga lenei i luga o le laupapa po o luga o se pepa e tufa atu mo tamaiti taitasi:
|
|
Fai i tamaiti e faitau le leoa le Ominae 1:12–19. Valaaulia i latou e faamaea le gaoioiga o loo i luga o le laupapa po o a latou pepa e tufa atu a o latou faitauina, ma faafetauia fesili ma mataitusi fetaliai. Pe a maea le taimi na tuuina atu, ia iloilo faapuupuu tali sao. (1–U, 2–O, 3–E, 4–A, 5–I.)
-
Na faapefea ona tausia ma taitaieseina mai le malaia ia le Au Paia faamaoni o e na mulimuli ia Mosaea i le vao?
-
Na faapefea e le taunuu atu o le nuu o Mosaea ona laveaiina le nuu o Saraemila mai le faatauasoina faaleagaga?
-
O loo i ai i le 1 Nifae 4:13 le faamalamalamaga a le Alii i le mafuaaga na manaomia ai ona fasiotia e Nifae ia Lapana ma maua mai ai papatusi apamemea. E faapefea ona fesootai lenei fuaiupu ma le Ominae 1:14–17? (Ona e lei avea e le nuu o Saraemila ni faamaumauga ma i latou, na amata ai ona faaleagaina la latou gagana ma latou le maua ai so latou talitonuga i le Atua. O i latou o se malo ua faaitiitia ma pau atu i le le talitonu. Na latou olioli ina ua latou vaaia ua i ai i le nuu o Mosaea se faamaumauga o tagata Iutaia i luga o papatusi apamemea.)
Faamalamalama atu o le usitai i fautuaga a perofeta e le faapea o le a saoloto ai mai faigata uma o le olaga. Peitai, e ala i le mulimuli i le perofeta, o le a mafai ai ona tatou maua le faamautinoaga o loo tatou i ai i le ala e sili ona saogalemu ma o le a lagolagoina ai i tatou i o tatou tofotofoga.
Faitau faatasi ma le vasega le Mataupu Faavae ma Feagaiga 21:4–6.
-
Aisea e mafai ai ona tatou maua le faatuatua i le fautuaga a le perofeta?
-
O a ni auala ua fesoasoani ai fautuaga a le perofeta ia te oe i taimi faigata?
Ominae 1:25–26. “Tuu Mai o Outou Agaga Atoa e fai ma Taulaga ia te Ia”
Tuu atu i tamaiti e tagai i le ulutala o le mataupu o le Ominae 1 e iloa ai pe toafia tusitala na i ai se sao i lenei tusi. Faasino atu o Amaleki, o le tusitala lona lima, o le tagata mulimuli lea na saofaga i papatusi laiti a Nifae ma tusia le sili atu ma le afa o le tusi a Ominae (tagai i le Ominae 1:12–30).
Valaaulia tamaiti e faitau le leoa le Ominae 1:25–26. Faatonu i latou e vase lalo o aitema patino o apoapoaiga ma fautuaga na tuuina atu e Amaleki (pe lisi i se isi fasi pepa). Pe a maea le taimi na tuuina atu, valaaulia tamaiti e faasoa mai mea na latou maua.
-
O le a se mea taua ua e maua i le valaaulia soo e “o mai”?
-
O le a sou lagona i le fesootaiga i le va o le o mai ia Keriso ma le tuuina o o tatou “agaga atoatoa e fai ma taulaga ia te ia”?
Faasoa atu le saunoaga lenei a Peresitene Ezra Taft Benson (1899–1994), o le Peresitene lona 13 o le Ekalesia:
“E alofa le Atua ia i tatou. O loo Ia leoleo ia I tatou. Na te finagalo ina ia tatou manuia. O le a tatou iloa lava i se aso Na te lei tuua lava se mea e le faia mo le soifua manuia e faavavau o i tatou taitoatasi. … O lo tatou taimi lenei e faaali atu ai mea e mafai ona tatou faia—po o le a foi se ola ma se taulaga e mafai ona tatou faia mo le Atua i aso taitasi, itula taitasi, ma le taimi nei. Afai tatou te tuuina atu a tatou mea uma, o le a tatou maua Ana mea uma mai mea silisili o mea uma” (“Jesus Christ—Gifts and Expectations,” Ensign, Dec. 1988, 6).
Aisea e tatau ai ona tatou tuuina atu o tatou “agaga atoatoa” ia maua ai faamanuiaga o le faaolataga?
Fai i tamaiti e mafaufau le leoa po o a mea e mafai ona latou taulagaina i lenei vaiaso e o mai atoatoa atili ai i le Atua. Molimau atu i faamanuiaga ia e oo mai ona o le taliaina o le valaaulia a le Alii e o mai ia te Ia.
Upu a Mamona 1:1–9. E Silafia e le Alii Mea Uma o le a Oo Mai
Valaaulia tamaiti e sue aso e fesootai ai le tusi a Ominae ma Upu a Mamona ma matau le eseesega i le taimi na tusia ai le tusi o Ominae ma le taimi na tusia ai Upu a Mamona. Faamalamalama atu o Upu a Mamona o loo i ai nisi o faamatalaga a Mamona e uiga i lona tuufaatasiga o faamaumauga paia o lona nuu.
Fai i nai tamaiti e faitau le Upu a Mamona 1:1–9, tasi pe lua ni fuaiupu a le tamaitiiti.
-
O le a le mea na lagonaina e Mamona ma faaosofia ai e fai i papatusi laiti na ia maua? Aisea?
-
O le a se mea na tupu i le talafaasolopito o le Ekalesia ua faaalia ai le mafuaaga na musuia ai e le Alii Mamona e faaopoopo lenei faamaumauga i lenei vaega?
Fai i se tamaitiiti e faitau le folasaga i le Mataupu Faavae ma Feagaiga 10.
-
Na faapefea ona puipuia Iosefa Samita ma le Tusi a Mamona e le faaaofiaina e Mamona o papatusi laiti a Nifae? O faapefea ona faamanuiaina i tatou ona o le faaaofiaina e Mamona o nei papatusi?
Uunaia tamaiti e faailoga le fuaitau “e silafia e le Atua mea uma e oo mai” i Upu a Mamona 1:7.
-
E faapefea ona fesoasoani ia te oe lou iloa e silafia e le Atua mea uma? E mafai faapefea e lenei malamalama ona faatosinaina lo tatou faatuatua i le Alii ma Lana ala mo i tatou taitoatasi?
Faasino atu tamaiti i le saunoaga a Elder Neal A. Maxwell o loo i le itulau 140 i le tusi lesona a tagata o le vasega.
Valaaulia tamaiti e faasoa mai ni aafiaga na fesoasoani ia i latou e iloa ai le nofouta o le Tama Faalelagi i o latou manaoga o le lumanai. E mafai foi ona e faasoa atu ou lava lagona e uiga i le auala ua e vaaia ai le muai silafia e le Atua o lou olaga.