Mataupu 24

Alema 5–7

Folasaga

A o lauga atu Alema i tagata i Saraemila, na ia faamanatu atu ia i latou o le a taitasi i latou ma tu atu i luma o le Atua ina ia faamasinoina. A o e aoao atu lenei lesona, e mafai ona e faagauai atu i fesili ma fautuaga mai ia Alema e fesoasoani ai ia tatou saunia ma le naunautai atili e ulufale atu i le afioaga o le Alii. Ae patino lava, e mafai ona e fesoasoani i tamaiti ia iloa tatou te oo i se suiga o le loto pe a tatou liliuese mai agasala i le amiotonu. E mafai ona e uunaia i latou e “tuu ese agasala uma ua faigofie ona faaseseina ai i [latou], … ma faaali i lo [latou] Atua ua [latou] fia salamo” (Alema 7:15).

O Nisi o Aoaoga Faavae ma Mataupu Faavae

• E ala i le iloaina ua suia le loto, tatou te saunia ai i tatou lava e ulufale atu i le afioaga o le Alii (tagai i le Alema 5).

• Na puapuagatia Iesu Keriso i “puapuaga ma tofotofoga uiga eseese” ina ia laveai i tatou mai le agasala ma le oti ma ia fesoasoani ia i tatou e ala i luitau o le olaga nei (tagai i le Alema 7:7–13).

• O le salamo faamaoni e taitai atu ai i tatou e atiina ae uiga faa-Keriso (tagai i le Alema 7:14–24).

Fautuaga mo le Aoaoga

Alema 5. E Ala i le Iloaina ua Suia le Loto, Tatou te Saunia ai i Tatou Lava e Ulufale atu i le Afioaga o le Alii

Amata i le Fai i tamaiti o fesili nei:

• O a ni taufaamatau o i ai i nisi tagata e uiga i le oti?

• O a ni taufaamatau o i ai i tagata e uiga i le tutu ai i luma o le Alii i le faamasinoga?

• O le a le mea e te manatu e taitaia se tagata ia lagona ua saunia e fetaiai ma le Atua?

Atonu e te manao e tusi tali a tamaiti i luga o le laupapa. A maea le talanoaga faalevasega, tuu atu i tamaiti e suesue le Alema 5:6–13 e i latou lava. Uunaia i latou e saili mo mea na oo i ai le tamā o Alema ma e na mulimuli ia te ia.

• Na faapefea ona faamatalaina e Alema lo latou aafiaga o le liua?

• E tusa ai ma le Alema 5:11–13, o le a le mea na taitai atu ai i lenei “liua tele” o le loto? O le a le mea na faatumauina lenei liua tele?

Tusi le faamatalaga lenei i luga o le laupapa:

Alema 5:14–19, 26–31

O se tagata ua i ai se loto ua suia …

Tuu atu i tamaiti e suesue fuaiupu ua lisi i luga o le laupapa. Fai atu i ai e faauma le fuaiupu i luga o le fasi pepa e tusa ma fuaiupu ua e lisiina. O faataitaiga nei e mafai ona fesoasoani ia te oe e taialaina tamaiti i lenei gaoioiga.

O se tagata ua i ai se loto ua suia …

Ua ia mauaina foliga o le Atua i ona mata (tagai i le fuaiupu 14).

Faatinoina le “faatuatua i le togiola mai Le na faia i [tatou]” (fuaiupu 15).

Iloaina o ana galuega i le lalolagi sa amiotonu (tagai i le fuaiupu 16).

Pe a maea le taimi na tuuina atu, fai i tamaiti e faasoa mai auala eseese na faauma ai fuaiupu.

Faitau faatasi o se vasega le Alema 5:33–35, 48, 50–51, 57, i le suesueina o le aoaoga a Alema e uiga i le mea e tatau ona tatou faia e “tepa ae [ai] i le Atua … ma loto mama ma lima mama” (fuaiupu 19)

• O le a se mea o faafiafiaina ai oe e uiga i aoaoga a Alema i nei fuaiupu?

Faamaea i le molimau atu ua sauni le Atua e tuu mai Lona alofa muitmutivale ia i tatou uma ma o le a fesoasoani le salamo ia i tatou ia faapaiaina ina ia mafai ai ona tatou mau i Lona afioaga.

Alema 7:7–13. Na Puapuagatia Iesu Keriso i “Puapuaga ma Tofotofoga Eseese Uma” ina ia Laveai i Tatou mai le Agasala ma le Oti ma ia Fesoasoani ia i Tatou e ala i Luitau o le Olaga Nei.

Valaaulia tamaiti e mafaufau o i latou o faifeautalai ma ua fesili se tasi faato’ā latou feiloai, “O le a se mea na faia e Iesu Keriso mo a’u?”

Faataga tamaiti e faasoa puupuu mai pe o le a faapefea ona latou tali atu. Ona valaaulia lea o i latou e faitau ma mafaufau le tagata lava ia i le Alema 7:7–13, saili mo tali ia e faamautu ai pe faalautele ai foi a latou uluai tali. Pe a maea le taimi na tuu atu, valaaulia i latou e faasoa mai ni malamalamaaga ua latou mauaina. (O nisi o mea ua latou maua e mafai ona aofia ai e faapea e i ai i le Alii le mana e faia ai mea uma; na Ia puapuaga i tiga, mafatiaga, ma’i, ma tofotofoga uiga eseese uma ina ia mafai ai ona i ai ia te Ia le agaalofa atoa mo o tatou vaivaiga; na Ia oo i le oti ina ia mafai ai ona motusia noataga o le oti; ma ua ia te Ia le mana e laveai ai i tatou mai a tatou agasala.)

• O a fuaitau i nei fuaiupu o loo faamamafa soo ai le malamalama o le Faaola i o tatou luitau?

Tuu atu i tamaiti e sue ma faailoga le fuaitau “ave i ona luga” ma le “i le tino.” Faamalamalama atu i nei fuaiupu, o le upu tino o loo faasino i le tino faaletino o le Faaola ma e faapena foi i le olaga faaletino ma lo tatou natura o le pa’ū. Fesoasoani i tamaiti ia malamalama na afio mai le Faaola i se auala maualalo o mea uma ina ia mafai ai ona Ia silafia le auala e fesoasoani ai ia i tatou e ala i ona luitau. Valaaulia se tamaitiiti e faitau le saunoaga a Elder Neal A. Maxwell o le Korama a Aposetolo e Toasefululua o loo i itulau 190 i le tusi lesona a tagata o le vasega.

• E mafai faapefea e lenei malamalama ona fesoasoani ia i tatou e fetaiai ma luitau o le olaga faaletino?

Faamalamalama atu i tamaiti o le upu tausi, o loo maua i le fuaiupu 12, o lona uiga “o le faananati atu, po o le faananati atu e lagolago; o lea, ia fesoasoani atu po o le faamāmā atu i taimi o faigata, manaoga, po o faanoanoaga; ia fesoasoani atu ma laveai mai puapuaga” (Noah Webster, An American Dictionary of the English Language, published in 1828). Atonu foi e te manao e tuu atu i tamaiti e faitau le saunoaga a Elder Jeffrey R. Holland o loo i le itulau 190 i le tusi lesona a tagata o le vasega (o loo maua foi i le companion DVD A). A o mafaufau tamaiti i le uiga o le tausia e le Faaola, valaaulia i latou e mafaufau i le fesili lenei:

• Sa i ai se taimi na tausia ai oe e le Faaola i taimi o tofotofoga ma faaosoosoga?

Fautua atu i tamaiti e tusi i a latou api talaaga le alofa agalelei o le Faaola ma le finagalo e fesoasoani ia i latou. A o latou mafaufau i aafiaga ia na latou maua ai le fesoasoaniga faalelagi, o le a faamalosia i latou e fetaiai ma luitau o loo latou feagai ai i le taimi nei ma luitau o le a latou feagai ai i le lumanai.

Alema 7:14–24. O Le Salamo Faamaoni e Taitai atu ai i Tatou e Atiina Ae Uiga Faa-Keriso

A o lei amataina le vasega, saunia se pepa e tufa atu o loo aofia ai ma fesili e uiga i le Alema 7:14–24 o loo i lalo ifo. Ia lava se taimi i le va o fesili mo tamaiti e tusi ai a latou tali.

• O le a le mea na uunaia e Alema ia tagata e “tuu ese”?

• O a tuutuuga na folafola atu ai e Alema le ola e faavavau i tagata i Kiteona?

• O le a le “faaaliga a le Agaga” na aoaoina ai Alema e faatatau i nei tagata?

• O le a le mea na vaaia e Alema e uiga i tagata o Kiteona?

• O le a faapefea ona e faamatalaina se tagata ua fagua i se lagona o le tiute i le Atua?

• O a uiga tatou te maua pe afai tatou te “savavali ma le le pona i luma o le [Atua]”?

• O le a faapefea ona e aotelea mea ua e aoaoina mai le Alema 7:14–24?

• O a laasaga e manaomia ona e faia e atiina ae ai uiga faa-Keriso?

Faitau le saunoaga lenei a Peresitene Dieter F. Uchtdorf o le Au Peresitene Sili:

“O le mulimuli ia Keriso o le avea atili lea faapei o Ia. O le aoao mai lea i Lona tagata. I le avea ai ma fanau agaga a lo tatou Tama Faalelagi, ua ia te i tatou le malosi e tuuina ai i totonu o o tatou olaga ma tagata ia uiga faaKeriso. Ua valaaulia i tatou e le Faaola ina ia aoao i Lana talalelei e ala i le ola ai i Ana aoaoga. … A o tatou atiina ae uiga faa-Keriso i o tatou lava olaga, mai lea laasaga i lea laasaga, o le a latou ‘lagolagoina [i tatou] e pei o i luga o apaau o aeto’ (MFF 124:18)” (i le Lipoti o le Konafesi, Oke. 2005, 107–8; po o le Liahona, Nov. 2005, 102–3).

• Aisea e te manatu ai o uiga faa-Keriso e atiina ae mai lea laasaga i lea laasaga?

Faamalamalama atu e mafai e le fautuaga a Alema i tagata i Kiteona ona fesoasoani ia i tatou e atiina ae uiga faa-Keriso.

Tuu atu i tamaiti taitasi se kopi o le pepa e tufa atu ua e sauniaina. Valaaulia tamaiti e sailiili le tagata lava ia i le Alema 7:14–24 pe taitoalua foi e tali ai fesili o loo i luga o pepa na tufa atu. Fesoasoani ia i latou ia iloa le auala e mafai ai ona fesoasoani le fautuaga a Alema ia i tatou ia avea atili e faapei o Keriso.

Pe a maea le galuega lea a tamaiti, valaaulia nisi o i latou e faasoa mai ni a latou aotelega i le vasega. Ona valaaulia lea o tagata uma e mafaufau le leoa i lenei fesili:

• O le fea o fautuaga a Alema e manaomia ona e taulai i ai a o e tauivi e avea atili e faapei o Keriso?

Faasoa atu lau molimau o upumoni ua outou talanoaina ma tamaiti. Uunaia tamaiti e mulimuli i aoaoga a Alema, salamo i a latou agasala ma atiina ae uiga faa-Keriso ina ia latou mafai ai ona maua le faaeaga i se aso.