Mataupu 19

Mosaea 4–8

Folasaga

Ina ua maea ona ta’u atu e le Tupu o Peniamina le savali a le agelu e faatatau i le natura o lo tatou pa’ū ma lo tatou manaomiaina o se Faaola, na faapauu tagata i le eleele ma tatalo mo le togiola e ala i le Togiola a Iesu Keriso. Ina ua i ai le motu o tagata i se tulaga o le faamaualaloina, na faaiuina e le Tupu o Peniamina lana lauga i le aoaoina o tagata i le auala e maua ai ma faatumauina se faamagaloga o agasala ma ola ai pea o ni “fanau a Keriso” (Mosaea 5:7). Ua tuuina mai i le lauga a le Tupu o Peniamina se avanoa silisili e fesoasoani ai i tamaiti ia malamalama i le auala e faaaoga ai le togiola. E pei foi o sa Nifae, e mafai ona tatou iloaina o tatou vaivaiga faaletagata, salamo, ma tauaveina le suafa o Iesu Keriso i o tatou luga e ala i le osiaina ma le tausiaina o feagaiga.

O Nisi o Aoaoga Faavae ma Mataupu Faavae

Faaaogaina o le toto togiola o Keriso e aumai ai le faamagaloina o agasala (tagai i le Mosaea 4:1–8).
Faaaogaina o le toto togiola o Keriso e taitai atu ai i se soifuaga faa-Keriso (tagai i le Mosaea 4:9–30).
E ala i le faatuatua tatou te iloa ai se suiga o le loto ma le tauaveina i o tatou luga o le suafa o Iesu Keriso (tagai i le Mosaea 5).
O se tagatavaai o se faamanuiaga tele lea i ona uso a tagata (tagai i le Mosaea 8:13–18).

Fautuaga mo le Aoaoga

Mosaea 4:1–8. Faaaogaina o le Toto Togiola o Keriso e Aumai ai le Faamagaloga o Agasala

Valaaulia se tamaitiiti e faitau le Mosaea 4:1. Ona fai atu lea i tamaiti e tomanatu i se aafiaga na matuai ootia ai i latou ma taitai atu ai i latou ia lagonaina le mana o le Agaga.

O le a se mea na e aoaoina mai lena aafiaga?
Na faapefea ona uunaia oe e lena aafiaga?

Fai atu i se tamaitiiti e faitau le Mosaea 4:2. Fai i tamaiti e faamatala mai i a latou lava upu le aafiaga na maua e le nuu o le Tupu o Peniamina.

O le a le mea na tatalo ai le nuu?

Valaaulia tamaiti e faitau le leoa le Mosaea 4:3 ma faailoa mai mea na tutupu ia sa Nifae ona o a latou tatalo o le faatuatua. Ona fai atu lea i tamaiti e faasoa mai mea na latou maua.

Valaaulia tamaiti e otooto mai ia mafuaaga-ma-aafiaga o sootaga i le va o le Mosaea 4:2 ma le Mosaea 4:3. Ina ia taialaina a latou talanoaga, fesoasoani i ai e faamaea le ata lenei o loo i luga o le laupapa. Amata i le tusiina o mau faasino ma aū. Ona valaaulia lea o se tamaitiiti e tusi mea na faia e tagata (i le Mosaea 4:2) ma faamanuiaga na latou maua o se taunuuga (i le Mosaea 4:3). O faamatalaga o loo i puipui i lalo ifo o ni faataitaiga o mea e ono tusi e tamaiti.

Mosaea 4:2		Mosaea 4:3
(Pe a tatou vaai ia i tatou lava i o tatou tulaga faaletino, tatalo mo le faamagaloga, ma faatino le faatuatua ia Keriso …)	→	(E afio mai le Agaga o le Alii, e aumaia le olioli, faamagaloga o agasla, ma le filemu o le mafaufau ma lagona.)

Mosaea 4:9–30. Faaaogaina o le Toto Faaola o Keriso e Taitai atu ai i se Olaga Faa-Keriso

Vaevae le vasega taitoalua po o ni vaega laiti. Tuu atu i vaega e iloiloina faatasi le Mosaea 4:12–30. Faatonu i latou e faailoga pe lisi amioga ma uiga lelei na faailoa mai e Peniamina e iloagofie ai soo moni o Iesu Keriso.

Pe a maea se taimi talafeagai, valaaulia tamaiti e faasoa atu mea na latou maua i a latou suesuega. Ona o lenei gaoioiga o le a tele ni nai minute e faamaea ai, e tatau ona e faatapulaaina le aofaiga o tali e te filifili e talanoaina.

Ina ia fesoasoani i tamaiti e faaaoga mea ua latou aoaoina, e mafai ona e fesili atu se tasi o fesili nei a o ta’ua amioga po o uiga lelei taitasi:

O le a se eseesega e mafai ona faia e lenei amio (po o se uiga lelei) i lou olaga?
O anafea na e vaaia ai ni faataitaiga o lenei amio (po o uiga lelei)? Na faapefea ona aafia ai oe po o se isi tagata?

Fautuaina tamaiti e mafaufau i auala e mafai ai ona latou atiina ae amioga taitasi po o uiga lelei i o latou olaga?

Valaaulia se tamaitiiti e faitau le Mosaea 4:30 . Ona fai lea i tamaiti e otooto mai lenei vaega o le lesona e ala i le iloiloina o le lapataiga o loo i le fuaiupu 30.

Mosaea 5. E Ala i le Faatuatua Tatou te Iloa ai se Suiga o le Loto ma Tauave ai i o Tatou luga le Suafa o Iesu Keriso

Fai i tamaiti e faamatala mai ni tagata latou te iloaina ua faaliliuina i le talalelei. Na faapefea e le talalelei ona suia lena tagata?

Faamalamalama atu na tupu se liua ofoofogia i le nuu o le Tupu o Peniamina. Tuu atu i se tamaitiiti e faitau le Mosaea 5:1–2.

O a faamanuiaga na oo atu i le nuu o le Tupu o Peniamina e ala i le Agaga o le Alii? (Na latou iloaina le moni o upu a Peniamina, na latou iloa se suiga o le loto, ma na “le toe i ai so [latou] manatu e fai amio leaga.”)

Faitau le saunoaga lenei a Peresitene Ezra Taft Benson (1899–1994), o le Peresitene lona 13 o le Ekalesia. Valaaulia tamaiti e faalogo mo malamalamaaga faaopoopo e uiga i le iloaina o se suiga o le loto.

“O le avea e faapei o Keriso o se sailiga o le olaga atoa ma e masani lava ona aofia ai le tuputupu ae ma le suia lea e telegese, e toetoe lava a le iloaina. …

“… O le salamo moni e aofia ai se suiga o le loto ma e le na o se suiga o le amio. … O le tele o le salamo e le aofia ai ni suiga vave ma maoae, ae o se gaoioiga mai lea laasaga i lea laasaga, e tumau ma faifai pea e agai atu i le amioatua” (“O Se Suiga Tele o le Loto,” Liahona, Oke. 1989, 5).

Aisea tatou te manaomia ai se suiga o le loto ae le na o se suiga o le amio?
E faapefea ona e vaaia lena liua o se faagasologa o le agai i luma tumau ma le faifai pea?

Otooto lenei suiga tele i le tuu atu lea i se tamaitiiti e faitau le Mosaea 5:2–5.

E tusa ai ma nei fuaiupu, o a nisi o taunuuga o lenei suiga tele?
O a ni auala ua saunia ai i tatou e le liua e osia ma tausia feagaiga ma le Atua?

A o lei amataina le vasega, tusi mau faasino nei ma fesili i luga o le laupapa, i luga o se pepa lautele, po o se pepa e tufa atu. Valaaulia tamaiti e faitau le leoa le mau lenei ma tusi tali i fesili i luga o se fasi pepa.

Mosaea 5:7–12

O le a le igoa na tuuina atu i tagata?
E faapefea ona tatou tauaveina lenei igoa i o tatou luga?
O fea e tatau ona tusia ai le igoa?
O le a le mafuaaga o le a leiloa ai i le tagata le igoa?
E faaopoopo atu i le igoa, o le a se isi mea e tatau ona tatou iloa?

Pe a maea ona tusi e tamaiti a latou tali, iloilo ia tali ma le vasega.

Valaaulia tamaiti e faitau le saunoaga a Elder Dallin H. Oaks o loo i le itulau 150 i le tusi lesona a tagata o le vasega (o loo maua foi i le companion DVD A).

O le a le uiga ia te oe o le tauaveina i ou lava luga o le suafa o Keriso?
O le a se mea e mafai ona tatou faia i aso taitasi e fesoasoani ai ia i tatou ia tusia pea le suafa o Keriso i o tatou loto?

Fautuaina tamaiti e ola i se auala lea o le a vaaia e tagata e ala i a latou faatinoga ma o latou foliga, ua latou tauaveina i o latou luga le suafa o Keriso ma ua avea ai i latou ma Ona atalii ma afafine.

Mosaea 8:13–18. O Se Tagatavaai o se Faamanuiaga Sili lea i Ona Uso a Tagata

Ina ia fesoasoani i tamaiti ia malamalama i faatulagaga faasolopito o le Mosaea 8, amata i le iloiloina o mea na tutupu o loo faamatalaina i le Ominae 1:27–30. Faamalamalama atu o vaega o tagata o loo faamatalaina i nei fuaiupu na mulimuli ane nofoia le laueleele o Liae-Nifae, “o le nuu o lo latou tofi,” ae na ave faatagataotauaina i latou e sa Lamana. Ona faamalamalama atu lea pe tusa ma le 80 tausaga mulimuli ane, na faatagaina ai e le Tupu o Mosaea ni alii e16, na taitaia e le tagata e igoa ia Amona, e tuua le nuu o Saraemila e saili i nei tagata. Na mafai ona maua e Amona ma lana vaega ia tagata, ia na taitaia e se tupu e igoa ia Limae. Tuu atu i tamaiti e faitau le ulutala o le mataupu mo le Mosaea 7–8. Faamalamalama atu i se talanoaga ma le Tupu o Limae, na fai atu ai Amona, o le Tupu o Mosaea o se tagatavaai.

Faamatala e le itiiti ifo ma le faafa i tausaga taitasi—i taimi o konafesi aoao e lua, o se konafesi faalesiteki, ma se konafesi faaleuarota—tatou te siilima ai e tautino atu o le a tatou lagolagoina le Peresitene o le Ekalesia o se perofeta, tagatavaai, ma talifaaaliga. Tusi ia upu perofeta ma le tagatavaai i luga o le laupapa. Tuu atu i tamaiti e faitau le Mosaea 8:13–18, itulau 153 i le tusi lesona a tagata o le vasega, ma faamatalaga e uiga i le “Prophet” ma le “Seer” i le Bible Dictionary e sue ai faamatalaga e uiga i se perofeta ma se tagatavaai. Atonu e te manao i tamaiti e tusi mea ua latou aoaoina.

O le a le valaauga o se tagatavaai?
O a nisi o faamanuiaga e mafai ona tatou maua pe a tatou mulimuli i se tagatavaai?

Faamalamalama atu e faamalosia la tatou molimau i se tagatavaai pe a tutupu ni mea po o ni tulaga e faailoa ai mea na te vaaia i le lumanai. Valaaulia tamaiti e sue i le Mataupu Faavae ma Feagaiga 89.

O le a le mea o faatatau i ai le vaega lenei?
I taimi o Iosefa Samita, o le a se mea na iloa e le lalolagi e uiga i aafiaga leaga o le tapaa ma le ava malosi?
E faapefea e le poto faaonapo nei e uiga i nei aafiaga leaga ona faateleina lou talitonu o Iosefa Samita o se tagatavaai?

Valaaulia tamaiti e mafaufau i lapataiga nei ua tuuina mai e tagatavaai o nei aso:

“Aua e te auai i ni faafiafiaga e faaalia ai i soo se itu faapea e talia ai amioga e le mama po o amioga faatupu vevesi” (Mo Le Malosi o le Autalavou [tamai tusi, 2001], 17).

Atonu foi e te manao e faasoa atu isi lapataiga mai perofeta soifua.

O le a se fautuaga mai se tagatavaai na aumai ai ia te oe se fiafia faateleina?

Faamalamalama atu o tagatavaai taitasi o se “leoleo i le olo” o loo lapataia i tatou ona ua ia “vaaia…le fili a o mamao atu o ia” (tagai i le MFF 101:54). Tatou te faailoa atu lo tatou faatuatua pe a tatou usitai i ia lapataiga. Faasoa atu lau molimau e uiga i faamanuiaga o le taitaia e se tagatavaai.