Inisitituti
Mataupu 30: Alema 32–35

Mataupu 30

Alema 32–35

Folasaga

Na aofia i le misiona a Alema ma Amoleka i sa Sorama ia aoaoga loloto e uiga i le faatuatua, tatalo, tapuaiga, ma le Togiola. I le iloiloina o lenei poloka mau, o nisi taimi e tuu atu ai e faiaoga se lesona ua fausia mai i le na o se mataupu e tasi o nei autu. Pe latou te aoao atu foi na o nisi vaega o nei autu ae le faaalia le auala e fesootai atu ai le tasi autu i le isi i le anotusi o aoaoga a Alema ma Amoleka. O le a sili atu ona mamana lau aoaoga o le Alema 32–35 a o e fesoasoani i tamaiti e iloa le fesootaiga o autu taitasi nei i le isi: A o tatou tofotofoina le upu, tatou te atiina ae le faatuatua. E taitai atu e lo tatou faatuatua i tatou i le tatalo ma i le faalagolago i le taulaga e le mafuatia ma le faavavau a Iesu Keriso. I lenei faasologa o le a taitai atu ai e lenei faalagolagoga i tatou i le salamo ma saunia mo le aso o le a tatou toe foi atu ai i le afioaga o le Tama Faalelagi ma Iesu Keriso. O le i ai o lenei ata lautele i le mafaufau, o le a mafai ai e tamaiti ona malamalama i le mea e mafai ona taitai atu ai i latou e lo latou faatuatua.

O nisi o vaega o lenei lesona ua fautuaina ai ni manatu aoaoina se tele. Ia manatua tomai ma mea e fiafia i ai au tamaiti, ma filifili ai na o manatu aoaoina o le a sili ona aoga mo i latou.

O Nisi o Aoaoga Faavae ma Mataupu Faavae

  • E sili atu ona lelei le filifili ina ia lotomaualalo nai lo le lotomaualalo toa’i (tagai i le Alema 32:1–16, 25).

  • Tofotofoina o le upu e taitai atu ai i le faatuatua ia Keriso (tagai i le Alema 32:17–43; 33:12–23; manatua o le Alema 32:21 o se mau tauloto ).

  • E tatau ona tosina atu o tatou loto i le tatalo e le aunoa (tagai i le Alema 33:1–11; 34:17–27, 39).

  • O le fuafuaga sili a le Atua Faavavau e manaomia ai se togiola—se taulaga e le mafuatia ma le faavavau (tagai i le Alema 33; 34:1–17).

  • Ua poloai mai le Alii e le tatau ona tatou faatuai i le aso o lo tatou salamo (tagai i le Alema 34:32–41; manatua o le Alema 34:32–34 o se mau tauloto ).

Fautuaga mo le Aoaoga

Alema 32:1–16, 25. E Sili atu ona Lelei le Filifili ina Ia Lotomaualalo Nai lo le Lotomaualalo Toa’i

Fai i tamaiti e faamalamalama mai le taua o le lotomaualalo i le faagasologa o le liua.

Fai i se tamaitiiti e faitau le Alema 32:1–3.

  • O le a le tulaga o mea tau tupe ma agafesootai o i latou na mauaina le savali a Alema ma ana soa?

  • O le a se mea taua ua e iloa i le mea moni e faapea o nei tagata sa Sorama na “lotomaualalo” faapea foi ma le “matitiva i mea faalelalolagi”?

Tuu atu i se isi tamaitiiti e faitau le Alema 32:4–6.

  • O le a sou manatu i le uiga o le fuaitau “ua saunia ai foi … e faalogologo i le upu”?

Faitau le Alema 32:13–16 i tamaiti. Valaaulia i latou e mulimuli i le faitauga, saili ma faailoga ia upumoni e uiga i le lotomaualalo ma le faagasologa ina ia lotomaualalo. Valaaulia i latou e faasoa mai mea na latou maua.

  • Aisea e sili ai ona lelei atu le filifili ina ia lotomaualalo nai lo le lotomaualalo toa’i?

Tuu atu i tamaiti e galulue taitoatasi pe taitoalua e fai se lisi o faatinoga a se tagata e mafai ona fai e atiina ae ai se lotomaualalo tele. Valaaulia ni nai tamaiti po o ni vaega taitoalua e lipoti mai o latou manatu i le vasega. Fai atu ia i latou e faamatala mai pe o le a faapefea e faatinoga na latou maua ona taunuu i se lotomaualalo tele.

Valaaulia se tamaitiiti e faitau le saunoaga a Peresitene Ezra Taft Benson o loo i le itulau 234 i le tusi lesona a tagata o le vasega. Fai atu i isi tamaiti e faalogo mo ni manatu faaopoopo i auala e maua ai le lotomaualalo.

Uunaia tamaiti e filifili ina ia lotomaualalo e ala i le mulimuli i le fautuaga a Peresitene Benson ma e ala i le faatinoina o se tasi o faatinoga na latou faailoa maia i tusitusiga paia. Fesoasoani ia i latou ia iloa o le mulimuli i faataitaiga a le Faaola o le a fesoasoani pea ia i latou ia lotomaualalo atili.

Alema 32:17–43; 33:12–23. Tofotofoina o le Upu e Taitai Atu ai i le Faatuatua ia Keriso

Fai i tamaiti pe aisea e fai ai e tagata ni suesuega. (Ina ia sue ai pe moni se manatu.) Fai i tamaiti e faamatala mai ni suesuega na latou faatinoina i vasega faasaienisi po o isi faatulagaga. Fai atu ia i latou pe o a laasaga latou te faia e faamaea ai a latou suesuega. I le avea ai ma se vaega o lenei talanoaga, fesoasoani atu i tamaiti ia iloa o suesuega e manaomia ai ia faatinoga, ae le na o ni taumatematega, i le vaega a le tagata suesue.

Tuu atu i se tamaitiiti e faitau le Alema 32:26–27.

  • O le a sou manatu i le uiga o le tala a Alema ina ua ia apoapoai atu ia sa Sorama ina ia “tofotofo i [ana] upu”?

  • O le a se mea e mafai ona tatou faia taitoatasi e tofotofo foi i ai?

Ina ia fesoasoani i tamaiti e talanoaina lenei fesili, valaaulia i latou e faitau le leoa ia fuaiupu 27–42 ma faailoa mai laasaga e tofotofo ai, lea na fautua mai e Alema. Faamalamalama atu i lenei mau, o loo faatusaina le fatu i le afioga a le Atua. Pe a lava le taimi na tuu atu i tamaiti e faitau ai, fai atu ia i latou e faasoa mai mea na latou maua. Lisi a latou tali i luga o le laupapa. E mafai ona aofia i le lisi ia laasaga nei:

  1. Manao ia talitonu—fuaiupu 27

  2. Tuu atu se mea mo le upu ina ia totoina ai i lou loto—fuaiupu 27–28

  3. Aua le tia’ia i fafo le fatu ona o le le talitonu—fuaiupu 28

  4. Iloaina le tuputupu ae o le fatu—fuaiupu 28

  5. Tausi le fatu a o tuputupu ae—fuaiupu 37

  6. Aua le tuu tia’ia le laau—fuaiupu 38

  7. Faatalitali i fua o le laau—fuaiupu 40

  8. Seleseleina o fua—fuaiupu 42

  • O le a sou manatu i le uiga o le “tuuina mai se mea ina ia totoina ai le [upu a le Atua i o outou loto”? (fuaiupu 28). O le a sou manatu i le uiga o le lagonaina o le upu a le Atua ua “tupu” i totonu ia te oe? (fuaiupu 28). O le a sou manatu i le uiga o le “tausia le upu”? (fuaiupu 41). I fuaiupu 28 ma le 34, e faapefea e upu nei faatelēina, faamalamalamaina, ma le faateleina ona faamatalaina le aafiaga o le upu a le Atua ia i tatou.

Fai i tamaiti e toe iloilo ia fuaiupu 41–42 ma lisi ia upu o loo faamatala ai fua o le laau. Mo se faataitaiga, atonu latou te matauina le fuaitau “e tupu ae i le ola faavavau”; o upu taua, suamalie, paepae, ma le mama; ma le folafolaga e faapea o i latou e aai i le fua seia maoona ma le toe fia aai ai pe fia inu. Fesoasoani i tamaiti ia iloa o loo faatusaina le fua i faamanuiaga e mafai ona tatou maua e ala i le Togiola, e aofia ai faamanuiaga o le ola faavavau (tagai i le mataupu 3 i lenei tusi lesona).

Valaaulia tamaiti e faasoa mai ni aafiaga na latou maua a o latou tofotofoina le upu a le Atua. Pe a talafeagai ai, ta’u atu se taimi na tuputupu ae malosi ai lou faatuatua ona na e tofotofo i le upu. Uunaia tamaiti e faaauau ona tofotofo i le upu.

Vaevae le vasega taitoalua. Faatonu vaega taitoalua e vailiili le Alema 32:28–43, saili mo mataupu faavae e aoga ia i latou. Tuu atu ia i latou e faailoga o latou malamalamaaga i a latou tusitusiga paia ma talanoaina ma o latou matua mea na latou maua. Pe a maea le taimi na tuu atu e talanoaina ai o latou malamalamaaga, valaaulia i latou e fai se lisi o fesili e mafai ona taliina i aoaoga faavae ma mataupu faavae na latou maua. Atonu e te manao e tusi a latou tali i luga o le laupapa. Fesoasoani i tamaiti ia malamalama e mafai ona latou maua tali i fesili taua e ala i le suesueina o tusitusiga paia.

Valaaulia tamaiti e toe iloilo le tatalo a le au sa Sorama i le Alema 31:15–18.

  • O le a le talitonuga o sa Sorama e uiga i lo latou manaomiaina o se Faaola?

Fai i tamaiti e faitau le leoa le Alema 33:12–22, lea e i ai nisi o upu a Alema i le au sa Sorama e uiga ia Iesu Keriso. Tuu atu i tamaiti e faitau le aofai o taimi na faasino atu ai Alema i le Faaola i nei fuaiupu.

  • O a mea e mafai ona tatou aoaoina e uiga ia Iesu Keriso mai nei fuaiupu?

  • Na toe faamatalaina e Alema le tala i tagata Isaraelu o e na mumusu e vaai i se faatusa o Keriso lea na faia e Mose (tagai i le Alema 33:19–22; tagai foi i le Numera 21:5–9; 1 Nifae 17:41). E mafai faapefea ona fesoasoani lenei faataitaiga ia sa Sorama? E faapefea ona fesoasoani ia te oe?

Atonu e te manao e faasino atu na o le pau le mea na tatau ona faia e Isaraelu o le vaai. E mafai ona faatusatusa lenei mea i le talosaga a Alema i tagata “ia faaaoga sina faatuatua itiiti lava” (Alema 32:27).

Tuu atu i se tamaitiiti e faitau le Alema 33:22–23.

  • O le a le mea o loo aoao mai e nei fuaiupu e uiga i le fatu, o le laau, ma le fua i le Alema 32? (Atonu e te manao e faasino atu i le fuaiupu 23, ina ua faapea mai Alema ia “toto lenei upu i o outou loto,” o loo ia faasino i le molimau ia Iesu Keriso, lea o loo otootoina i le fuaiupu 22.)

Alema 33:1–11; 34:17–27, 39. E tatau ona Faalatalata atu o Tatou Loto i le Tatalo e le Aunoa

Fai i tamaiti e faitau le leoa le Alema 33:1 ma vase lalo o le fesili na fesiligia ai Alema e sa Sorama ina ua maua lana lauga. Faatasi ai ma le fesoasoaniga a tamaiti, fai se lisi o fesili i luga o le laupapa. Fai atu pe aisea e taua ai nei fesili taitasi.

Valaaulia tamaiti e faitau le leoa le Alema 33:2–11, saili mo le auala na amata ai ona tali e Alema ia fesili i le fuaiupu 1.

  • E mafai faapefea e le tatalo ona fesoasoani e tali ia fesili i le fuaiupu 1?

  • I le fuaiupu 3, na faaaoga ai e Alema le upu talosaga ma le tapuaiga i ni uiga tutusa. O a ni auala e tutusa ai le talosaga ma le tapuaiga?

  • O le a se taimi na sili ai ona mamana au tatalo?

Valaaulia tamaiti e tau mai e uiga i ni taimi na latou iloaina ai le mana o le tatalo. Tuu atu se taimi ia lava latou te mafaufau ai i o latou aafiaga a o lei tali mai.

  • Aisea e avea ai se faatinoga o le alofa mutimutivale mo le Atua e faafofogaina ai a tatou tatalo? I le fuaiupu 11, o le a le uiga ia te oe o le fuaitau “ona o lou Alo”?

Valaaulia tamaiti e faitau aoaoga a Amoleka i le Alema 34:17–26. Ona fai atu lea ia i latou e faitau le leoa ia fuaiupu 27 ma le 39, saili mo se upu masani e faamatala ai le faasologa o a tatou tatalo. Pe a maea le taimi na tuu atu e suesue ai ia upu, fautua atu ia latou faailogaina le upu e le aunoa.

  • O le a sou manatu i le uiga o le tuu atu o lou loto ia “tosina atu … i le tatalo e le aunoa”?

A o talanoaina e tamaiti lenei fesili, valaaulia i latou e faitau le saunoaga a Peresitene Henry B. Eyring o loo i le itulau 239 i le tusi lesona a tagata o le vasega. Talanoaina ma tamaiti pe faapefea e lenei saunoaga ona faalauteleina lo latou malamalama i le uiga o le tuu atu o latou loto ia “tosina atu … i le tatalo e le aunoa.” Ona fai atu lea i tamaiti e mafaufau loloto leleoa i a latou tali patino i fesili nei:

  • O le a se mea e mafai ona e faia e faaaoga ai nei aoaoga i lou olaga? O le a se mea e mafai ona e faia e tatalo atili ai ma vave tali atu ai i faaaliga patino?

Tuu atu lau molimau i le fesootaiga ma le aoaoga a Amoleka e uiga i le tatalo.

Alema 33; 34:1–17. O Le Fuafuaga Sili a le Atua Faavavau e Manaomia ai se Togiola—se Taulaga Le Mafuatia ma le Faavavau

A o saunoa atu Alema i tagata sa Sorama, na ia faasino i aoaoga a perofeta e toatolu o loo i ai a latou tusitusiga i papatusi apamemea: O Senosa, Senoka, ma Mose. Tuu atu i tamaiti e toe iloilo le Alema 33:3–23 ma faailoa mai aoaoga a nei perofeta e uiga i le Faaola. Fautua atu ia latou faailogaina mea uma na faatatau i ai Alema po o se tasi o nei perofeta ia Iesu Keriso o le Alo o le Atua.

  • Aisea e taua ai le iloa o Iesu Keriso o le Alo o le Atua? E faapefea ona faatosinaina e lenei malamalama lou faatuatua ia Iesu Keriso?

  • O a uiga o le Atua na faamamafa mai e Alema i le Alema 33:4–11?

  • O a ni vaaiga o le misiona e faavavau a Keriso o loo faailoaina i le Alema 33:22? Aisea e mama ai a tatou avega pe a tatou totoina lenei malamalama i o tatou loto ma tausia? (Tagai i le Alema 33:23.)

Tusi le upu le mafuatia ma le faavavau i luga o le laupapa. Valaaulia tamaiti e talanoaina le uiga o nei upu.

Valaaulia tamaiti e faailoga ia faataitaiga e tolu o le upu uma i le Alema 34:9. Talanoaina mea na aoaoina e Amoleka i lenei fuaiupu e uiga i lo tatou tulaga pa’ū ma le Togiola. E mafai ona fesoasoani fesili nei ia te oe i lau talanoaga:

  • E faapefea ona manaomia e le Pa’ū o Atamu ma Eva le Togiola? (Tagai i le Mosaea 16:3–4; Alema 12:22; 22:14.)

  • E tusa ai ma le Alema 34:10, aisea ua na o le Faaola ai le tagata e mafai ona ofoina atu se taulaga e laveai ai tagata uma?

Faasino atu tamaiti i le upu le mafuatia ma le faavavau i luga o le laupapa. Tuu atu i se tamaitiiti e faitau le Alema 34:10–14 a o saili e le isi vaega atoa o le vasega pe o le a le uiga o le le mafuatia ma le faavavau i nei fuaiupu. (Fesoasoani ia i latou ia iloa o le Togiola e le i’u ma faavavau, ma e faapena foi le Alo o le Atua.)

  • O a ni auala e le i’u ai ma faavavau leTogiola?

  • E faapefea ona le i’u ma faavavau le Faaola?

Ina ia fesoasoani i tamaiti e talanoaina nei fesili, valaaulia i latou e faitau le saunoaga a Elder Bruce R. McConkie ma Elder Russell M. Nelson o loo i itulau 240 i le tusi lesona a tagata o le vasega. O loo maua foi le saunoaga a Elder Nelson i le companion DVD A.

Mafaufau e faitau ma talanoaina le saunoaga lenei a Peresitene Ezra Taft Benson (1899–1994), le Peresitene lona 13 o le Ekalesia:

“Sa mafai e Ia ona faataunuu Lana misiona aua o Ia o le Alo o le Atua ma sa ia te Ia le mana o le Atua.

“Sa naunau o Ia e faataunuu Lana misiona ona e alofa o Ia ia i tatou.

E leai se tagata ola na i ai le mana po o le malosi e togiola ai isi tagata mai lo latou tulaga pa’ū ma le se ese, pe mafai foi ona ofo fua atu lona lava ola ma faapea e faataunuu ai le toetutu atoa mo isi tagata uma.

“Sa na o Iesu Keriso lava na mafai ma naunau e faataunuu lea galuega togiola alofa” (i le Lipoti o le Konafesi, Oke. 1983, 6; po o le Liahona, Nov. 1983, 6–7; uluai faatusilima).

Ina ia fesoasoani i tamaiti ia iloa le auala e maua ai faamanuiaga o le Togiola e “le i’u ma faavavau,” tuu atu ia i latou e sailiili le Alema 34:15–17 ma faailoa mai se fuaitau na faafa ona faaalia. (“Faatuatua e oo i le salamo.”)

  • O le a le uiga o le fuaitau “faatuatua e oo i le salamo”?

  • E faapefea ona tata’i atu le faatuatua i le salamo?

  • E tusa ai ma le Alema 34:16, o a faamanuiaga tatou te maua a o tatou faatinoina le faatuatua e oo atu i le salamo? O le a le mea e tupu pe a tatou le faatinoina le faatuatua e oo atu i le salamo?

Alema 34:1–8. O Le Fesili Maoae a sa Sorama

Fai atu i ni nai tamaiti e o mai i le laupapa ma lisi nisi o fesili maoae na fesiligia e tagata. Atonu e mafai ona latou taua fesili e pei o “O fea na tatou o mai ai?” “O le a le faamoemoega o le olaga?” po o le “E i ai se Atua?” Faatusatusa le lisi a tamaiti i le “fesili ua sili” i mafaufau o le au sa Sorama i le Alema 34:5. Fesoasoani i tamaiti ia iloa o le fesili ua sili a sa Sorama—“pe ua i ai le upu i le Alo o le Atua, pe leai se Keriso”—e tali tutusa ma fesili e fesiligia e le tele o tagata i aso nei a o latou tuufesilisili pe moni ea o le faaolataga ua ia Keriso ma pe moni ea o le a toe afio mai le Faaola. Fai i tamaiti e toe iloilo le Alema 34:6–8 ma faasoa mai i a latou lava upu le auala na tali atu ai Amoleka i lenei fesili ua sili. Talanoaina pe o le a faapefea ona suia le lalolagi pe afai e iloa e tagata uma ma talitonu i le tali sa’o i lenei fesili. O la tatou tali i lenei fesili o le a faatosinaina ai filifiliga tatou te faia i o tatou olaga atoa.

Alema 34:32–41. Ua Poloai mai le Alii Ina ia Aua Nei o Tatou Faatuai i le Aso o lo Tatou Salamo

Na aoao mai Peresitene Iosefa Filitia Samita (1876–1972), le Peresitene lona10 o le Ekalesia, e faapea, “O lenei olaga o se vaitaimi e sili ona taua i lo tatou olaga e faavavau” (Doctrines of Salvation, comp. Bruce R. McConkie, 3 vols. [1954–56], 1:69). Faitau i le Alema 34:32–34. Saili faatasi mo mataupu faavae lea e lagolago ai le saunoaga a Peresitene Samita. Ina ia faamamafaina le manaomia ina ia salamo i lenei olaga, faitau le saunoaga a Elder Melvin J. Ballard o loo i itulau 242 i le tusi lesona a tagata o le vasega.

  • O le a se mea e mafai ona tatou faia e saunia ai e fetaiai ma le Atua?

  • Mafaufau ua ta’u atu e se uo ia te oe, “O le a ou olioli i le tofotofoina o le agasala mo sina taimi, ae o lou faanaunauga ia salamo ma ia agavaa i le taimi mulimuli.” O le a sau tala e fai atu i se tagata e i ai lea uiga?

Fai atu fesili nei:

  • O ai e nafa mo lou faaolataga?

Tuu atu i tamaiti e faitau le Alema 34:37–41 e maua ai le tali a Amoleka i lenei fesili.

  • Na apoapoai atu Amoleka i tagata ina ia “galulue … ina ia [latou] ola ai” (Alema 34:37). Na la aoao atu uma ma Alema ia tagata inalatou faalagolago i le Faaola mo le faaolataga. E faapefea ona galulue faatasi nei mataupu faavae e lua?

Faasoa atu lau molimau e uiga i le tatau ona faia o mea uma tatou te mafaia a o faalagolago atu i le Faaola (tagai i le 2 Nifae 25:23–26).