Mataupu 1

O le Maaauau o la Tatou Tapuaiga

Folasaga

O lenei lesona e te maua ai se avanoa e faataoto ai le agaga mo le kosi atoa lava. O lau molimau patino ma le naunautaiga e taua i au talanoaga ma tamaiti e uiga i le taua o le Tusi a Mamona i o latou olaga. Ia faamalosiau atu i tamaiti ia fia feinu i upumoni faaleagaga i lenei voluma paia o tusitusiga paia. Na folafola mai e Elder Jeffrey R. Holland o le Korama a Aposetolo e Toasefululua e faapea: “E leai ma se mea i la tatou talafaasolopito ma a tatou savali e sili atu ona tuu sa’o nai lo la tatou folafolaga maumaututu o le Tusi a Mamona o le afioga a le Atua. I lenei mataupu tatou te vaseina ai se laina i le oneone” (“Sa’o po o le Sese,” Liahona, Iuni 1996, 48).

O Nisi o Aoaoga Faavae ma Mataupu Faavae

O Le Tusi a Mamona o se tasi molimau ia Iesu Keriso.
O le Tusi a Mamona o le maaauau o la tatou tapuaiga.
E toatele molimau ua molimau mai i le moni aiai o le Tusi a Mamona.
Tatou te latalata atu i le Alii a o tatou suesueina ma le agaga tatalo le Tusi a Mamona.

Fautuaga mo le Aoaoga

O Le Tusi a Mamona O Se Tasi Molimau ia Iesu Keriso.

Ia valaaulia tamaiti o le vasega e tagai i a latou kopi o le Tusi a Mamona i soāulutala: “O Se Tasi o Molimau ia Iesu Keriso.” Po o le uu foi i luga o se kopi e faailoa atu ai le soāulutala.

Aisea e taua ai se isi molimau ia Iesu Keriso? (Tagai i le MFF 6:28; Mataio 18:16.)

Ina ia fesoasoani i tamaiti o le vasega e malamalama i le uiga o le upu molimau, mafaufau e valaaulia i latou e faitau ia faamatalaga a Peresitene Boyd K. Packer ma Peresitene Ezra Taft Benson i le itulau 6 i le tusi lesona a tamaiti o le vasega. O loo maua foi le faamatalaga a Peresitene Benson i le companion DVD A.

Itulau Autu

Fai i tamaiti o le vasega e susue i le itulau autu o le Tusi a Mamona. O le itulau lea e amata i upu “O le Tusi a Mamona, o le tala na tusia i le lima o Mamona i papatusi ua siitia mai ai papatusi a Nifae.” Faamalamalama atu na faaliliuina e Iosefa Samita lenei itulau mai papatusi auro (tagai i le itulau 4 i le tusi lesona a tamaiti o le vasega). Valaaulia tamaiti o le vasega e faitau le leoa le parakalafa muamua, ma vaavaai mo faamatalaga o loo faamatalaina ai le natura ofoofogia o le Tusi a Mamona. Fai i ai e faasoa mai mea ua latou iloa.

O a ni mea se lua pe tolu ua e aoaoina mai le parakalafa muamua o le itulau autu?

Tusi le upu faatalitonuina i luga o le laupapa. Valaaulia tamaiti o le vasega e faitau le leoa le parakalafa lona lua i le itulau autu, e sue ai le tali o le fesili lenei:

O le a le mea na mananao le au tusitala o le Tusi a Mamona e faatalitonuina ai le lalolagi?

A maea ona tali e se tamaitiiti lenei fesili, e manaomia ona e faamalamalama atu e faapea o le upu Keriso o lona uiga “o lē ua faauuina” i le gagana Eleni. I le gagana Eperu, o le Mesia o lona uiga “o lē ua faauuina.” I se tasi taimi na faasino ai le perofeta o Liae ia Iesu Keriso o “se Mesia, po o, i se isi faaupuga, o se Faaola o le lalolagi” (1 Nifae 10:4). O le mea lea, pe a tatou ta’u atu o Iesu o le Keriso, ua tatou molimau atu o Ia o Lē na faauuina e faaola i tatou.

E faapefea ona faatalitonuina oe e le Tusi a Mamona o Iesu o le Keriso?

Ina ia uunaia tamaiti o le vasega e faasoa mai a latou molimau e tali ai lenei fesili, fai atu i ai e mafaufau i ni tusiga mai le Tusi a Mamona ua faamalosia ai a latou molimau o le Faaola. Valaaulia i latou e faasoa mai o latou manatu taitoalua po o ni vaega laiti foi, ma faitau e le tasi lana fuaitau i le isi ma faamalamalama mai pe aisea ua latou filifilia ai ia fuaitau.

I se vaega o lenei talanoaga, atonu e te manao e faasoa atu se fuaitau se tasi pe lua foi o le Tusi a Mamona ua faamalosia ai lau molimau o Iesu o le Keriso. Faasoa atu lau molimau o le Tusi a Mamona. Tau atu i le vasega e faapea i le gasologa o lenei mataupu, o loo e faamoemoe e fesoasoani ia i latou e faamalolosia a latou molimau i le Tusi a Mamona ma Iesu Keriso.

Valaaulia tamaiti e tau mai upu o loo misi a o e faitauina ia fasifuaitau o loo mulimuli mai:

O le sefulu o loo leiloloa (ituaiga)

O le laau a ma le laau a (Iuta, Iosefa)

Aperaamo, Isaako, ma (Iakopo)

ma le ofutele felanulanuai (Iosefa)

O le folafolaina (nuu)

Fai i tamaiti e faailoa mai po o a mea e tutusa ai fasifuaitau nei. Fesoasoani ia i latou ia iloa e fesootai ia fasifuaitau ma le aiga o Isaraelu, le nuu o le feagaiga a le Alii.

O a nisi o uiga o le fuaitau “aiga o Isaraelu”?

Ina ia mautinoa ua i ai i tagata o le vasega se malamalama faavae o lenei autu, mafaufau e faaaoga ia aitema autu e lua o loo i lalo “O Le Tusi a Mamona e Faamautu ai le Feagaiga a le Atua ma Isaraelu” i itulau 5–6 i le tusi lesona a tamaiti o le vasega. Ia mautinoa ua latou malamalama i le avea ai ma tagata o le Ekalesia a le Alii, o i latou o se vaega o le aiga o Isaraelu.

Fai i le vasega e iloilo le parakalafa lona lua o le itulau autu, ma saili mea e lua o loo aoao mai e le Tusi a Mamona i tagata o le aiga o Isaraelu. (“Ina ia faaalia i ē o totoe o le Aiga o Isaraelu mea tetele ua faia e le Alii mo o latou tama; ma ia latou iloa ai feagaiga a le Alii, e le tuliesea lava i latou e faavavau.”)

E faapefea ona fesoasoani lenei mea ia i tatou e iloa ai mea tetele ua tuanai na faia e le Alii mo Lona nuu o le feagaiga?

E faapefea ona fesoasoani le Mataupu Faavae ma Feagaiga 132:29–31 ia tatou malamalama i la tatou fesootaiga ma le nuu o le feagaiga ua tuanai?

Ina ia fesoasoani ia malamalama tamaiti i le auala e faamautu ai e le Tusi a Mamona le feagaiga a le Alii ma Lona nuu, atonu e te manao e fai atu ia i latou e sue la latou tusi lesona i le itulau 6. Fai i se tasi e faitau le faamalataga a Elder Bruce R. McConkie. Valaaulia tamaiti e faamatala mai i a latou lava upu le mea na aoao mai e Elder McConkie e uiga i le matafaioi a le Tusi a Mamona i le faapotopotoina o Isaraelu.

Fautua atu i le avea ai ma tamaiti o le vasega ia suesue i le Tusi a Mamona i le gasologa o lenei mataupu, ia latou tagai mo aoaoga e uiga i feagaiga na osia e le Alii ma le aiga o Isaraelu. Ia valaaulia foi i latou e mafaufau loloto i le taua tele o nei feagaiga i o latou olaga patino.

Fai i ai e faitau ia laina e tolu mulimuli o le itulau autu, tagai mo lapataiga a le Alii.

O le a le mea o loo fautua mai e lenei lapataiga e uiga ia i latou e teena le Tusi a Mamona?

O Le Tusi a Mamona o Le Maaauau o la Tatou Tapuaiga

Tusi se ata faigofie o se faitotoa faaofuofu i luga o le laupapa, e pei o le ata lea e i lalo. Ia faailoa ai le maaauau, lea e valivali i le ata. Tofi tamaiti e faamatala mai le taua o se maaauau.

Ata

maaauau

Fai i tamaiti e sue i le faatomuaga o le Tusi a Mamona. Valaaulia se tasi o i latou e faitau le parakalafa lona ono.

Aisea e te manatu ai na faatusatusa e Iosefa Samita le Tusi a Mamona i se maaauau?
Aisea e taua tele ai le Tusi a Mamona i le talalelei toefuataiina?
E faapefea e a tatou molimau o le Tusi a Mamona ona faatosinaina a tatou molimau o isi vaega o le talalelei?

O se vaega o lenei talanoaga, atonu e te manao ai e faitau e tamaiti ia parakalafa mulimuli e lua i le faatomuaga. E mafai foi ona latou faitaua leMataupu Faavae ma Feagaiga 20:8–12.

E faapefea i le mauaina o se molimau o le Tusi a Mamona ona fesoasoani i tagata e iloa o Iosefa Samita o se perofeta moni ma O Le Ekalesia a Iesu Keriso o le Au Paia o Aso e Gata Ai o le Ekalesia moni?

Faasoa atu ou lagona pe faapefea ona avea se molimau o le Tusi a Mamona ma maaauau o se molimau ia Iesu Keriso ma le talalelei toefuataiina.

E Toatele Molimau ua Tautino Maia le Moni Aiai o le Tusi a Mamona

Tusi le 2 Nifae 27:12–14; Eteru 5:2–4 i le laupapa. Valaaulia le vasega e faitau le leoa ia fuaiupu nei, tagai mo mafuaaga na tuuina mai ai e le Alii ia molimau o papatusi auro. Fai i tamaiti e faasoa mai mea na latou maua.

Valaaulia le afa o le vasega e faitau le leoa le Mau a Molimau e Toatolu, ma valaaulia le isi afa e faitau le leoa le Mau a Molimau e Toavalu. Fai i ai e sue tali i fesili o loo mulimuli mai:

O le a le mea na vaai i ai lenei vaega o molimau?
Na faapefea ona faaali atu ia i latou ia papatusi?

Pe a uma ona faasoa mai tali a vaega taitasi i nei fesili, fai i le vasega atoa e talanoaina le fesili lea:

O le a le taua na faaaofia ai nei molimau i le pito i luma o le Tusi a Mamona?

Atonu e te manao e faasoa atu le molimau lea a Tavita Uitimera, o se tasi o Molimau e Toatolu:

O Iuni, 1829—i le faaiuiuga o le masina. … E le gata ina matou vaai i papatusi o le Tusi a Mamona ae faapena foi papatusi apamemea, o papatusi o le Tusi a Eteru, o papatusi ia o loo i ai talafaamaumau o le amioleaga ma pulega faalilolilo a tagata o le lalolagi e oo atu i le taimi na vaneina ai ia papatusi, ma le tele o isi papatusi. … E pei lava ona faaalia mai, o se laulau faatasi ai ma le tele o faamaumauga po o papatusi o loo i ai i luga, e ese mai ai i papatusi o le Tusi a Mamona, faapea foi ma le pelu a Lapana, o le faasinoala—o lona uiga, o le polo lea na ia Liae, ma mea faaliliu [Urima ma le Tumema]. Na ou vaai i na mea … , ma na ou faalogo i le siufofoga o le Alii, e tulaga ese lava mai soo se mea na ou faalogo i ai i lo’u olaga, o tautino mai o faamaumauga o papatusi o le Tusi a Mamona na faaliliuina i meaalofa ma le mana o le Atua” (i le George Reynolds, “History of the Book of Mormon,” Contributor, Aug. 1884, 403).

Tau atu i tamaiti e faapea na tuuina mai e le Alii lava Ia le molimau o le moni aiai o le Tusi a Mamona. Fai i se tamaitiiti e faitau le Mataupu Faavae ma Feagaiga 17:6. Valaaulia tamaiti e faasoa mai o latou manatu po o ni mea ua uunaia ai i latou e uiga i lenei fuaiupu.

Faamalamalama atu e faapea e talu mai le amataga o le Toefuataiga, e faitau miliona tagata ua mauaina se molimau o le Tusi a Mamona e ala mai i le mana o le Agaga Paia.

O a nisi o auala e faasoa atu ai lau molimau o le Tusi a Mamona?

Vaevae le vasega i ni paga taitoalua. Fai i tamaiti e iloilo le faatomuaga o le Tusi a Mamona ma ni nai fuaitau latou te fiafia i ai mai le tusi lava ia, ma mafaufau po o le a se mea latou te tau atu e faailoa atu ai le Tusi a Mamona i se tasi. Atonu latou te mananao e faailogaina nei fuaitau i a latou tusitusiga paia. A ua lava se taimi mo tamaiti e fai ai lenei mea ona fai atu lea i ai e faasoa mai o latou manatu ma a latou paga.

Fai i se tamaitiiti se toatasi pe toalua foi e faasoa mai o la lagona e uiga i se taimi na la tuuina atu ai le Tusi a Mamona i se tasi. Pe fai atu foi ia i laua e tau mai se taimi na tuu atu ai e se tasi se kopi o le Tusi a Mamona ia i laua.

Tatou te Latalata Atili i le Alii a o Tatou Suesue ma le Agaga Tatalo le Tusi a Mamona

Tuu sao atu le gauai a tamaiti i le parakalafa lona ono i le faatomuaga o le Tusi a Mamona. Tuu se taimi i tamaiti e mafaufau ai i tala, autu, ma aoaoga o loo i le Tusi a Mamona ia na fesoasoani ia i latou e “latalata atu ai i le Atua.” E mafai ona tusi e tamaiti o latou manatu pe afai e mananao ai.

O a ni tala, autu, po o ni aoaoga na outou mafaufau i ai? O a auala na fesoasoani ai nei tala, autu, po o aoaoga e te latalata atili ai i le Atua?

Atonu e te manao e filifili ni nai tala, autu, po o ni aoaoga na ta’ua e tamaiti ma taiala ai ni talanoaga e faatatau i ai. Mo se faataitaiga, e mafai ona e fesili atu:

O a ni mea e mafai ona tatou aoaoina mai i faataitaiga a tagata i lenei tala?
O fea se isi mea e te vaaia ai lea autu i le Tusi a Mamona? Aisea e te manatu ai e ta’ua soo lenei autu i le tusi?
E mafai faapefea e lenei aoaoga ona fesoasoani ia i tatou e ola i se soifuaga faaKeriso?

Valaaulia tamaiti e ta’u mai pe faapefea e lo latou suesueina o le Tusi a Mamona ona fesoasoani ia i latou e latalata atili ai i le Alii.

Faasoa atu lau molimau o le mana o le Tusi a Mamona. Faamalosiau atu i tamaiti ina ia faalauteleina a latou molimau e ala i le suesue ma le agaga tatalo i le gasologa o lenei mataupu.