Inisitituti
Mataupu 38: Helamana 13–16

Mataupu 38

Helamana 13–16

Folasaga

O le perofeta sa Lamana o Samuelu ua lauiloa mo le puipuiga faavavega na ia maua a o ia talai atu mai luga o le aupa na faataamilo i le aai o Saraemila. Na ia ta’u atu valoaga patino ma faailoga o le soifua mai ma le maliu o le Faaola. E pei foi o Samuelu, na lapatai atu ia sa Nifae ia saunia mo le soifua mai o Iesu Keriso, o loo faapena foi ona fesoasoani mai perofeta o aso e gata ai ia i tatou ia saunia mo le Afio Mai Faalua o le Faaola. E mafai ona e fesoasoani i tamaiti e iloa le auala e tutusa ai savali a perofeta o aso e gata ai ma le savali a Samuelu, ma le auala e tutusa ai i nisi taimi le tali atu o le lalolagi i perofeta o aso e gata ai ma le tali atu o sa Nifae ia Samuelu. Valaaulia tamaiti e mulimuli i le faataitaiga o i latou e talitonu i upu a Samuelu ma olioli i faamanuiaga o le faatuatua, salamo, ma le suia o le loto.

O Nisi o Aoaoga Faavae ma Mataupu Faavae

  • Ua lapataia e perofeta i tatou ia salamo (tagai i le Helamana 13).

  • Ua molimau mai perofeta i le afio mai o Keriso ma aoao mai i tatou i le auala e saunia ai (tagai i le Helamana 14).

  • O le liua moni e faaalia i se olaga atoa o le faamaoni (tagai i le Helamana 15:7–16).

  • Pe a faamaaaina e tagata o latou loto, ua latou faatagaina Satani e “maua … le pule tele” i o latou loto (tagai i le Helamana 16:13–25).

Fautuaga mo le Aoaoga

Helamana 13. Ua Lapataia e Perofeta i Tatou ia Salamo

Fai i tamaiti pe mafai ona latou mafaufau i se taimi na lapataia ai i latou (po o ni tagata latou te iloaina) i ni mea matautia ma mulimuli ane na latou iloa ai le faamautinoaina o lo latou saogalemu ona sa latou faalogo i le lapataiga. (Faataitaiga o ia lapataiga e mafai ona aofia ai le gauai atu i se lapataiga i luga o le pepa o se fagu vailaau faafomai, mulimulitaia o faatonuga i luga o faailoilo o le aualatele, tausisia o se lapataiga na tuuina mai e se matua po o se uo, ma isi.) Faitau le saunoaga lenei a Elder Dallin H. Oaks o le Korama a Aposetolo e Toasefululua:

“O se savali e tuuina mai e se Pulega Aoao i se konafesi aoao—o se savali na saunia i lalo o le uunaiga a le Agaga e faalauteleina ai le galuega a le Alii—e le i tuuina mai ina ia fiafia i ai. Ua tuuina mai ina ia musuia ai, ia aoao ai, ia luitauina ai, pe faatonu ai foi. Ua tuuina mai ina ia faalogoina i le faatosinaga a le Agaga o le Alii, faatasi ai ma le taunuuga faamoemoeina ina ia aoao ai lē faalogo mai lauga ma le Agaga i mea e tatau ona ia faia e tusa ai ma ia savali” (“The Dedication of a Lifetime” [Church Educational System fireside for young adults, May 1, 2005], 1, ldsces.org; uluai faatusilima).

Faitau le Mataupu Faavae ma Feagaiga 1:4–5 faatasi ma tamaiti.

  • O a ni auala e tuu mai ai e le Alii ia lapataiga ua ta’ua i nei fuaiupu?

O se tasi o ala autu e lapatai ai e le Alii Lona nuu e auala mai lea i upu a perofeta. O Samuelu le sa Lamana o se perofeta na auina mai e le Alii e lapatai atu ia sa Nifae o le a faaumatia i latou pe afai latou te le salamo. Fai atu i le afa o le vasega e faitau le Helamana 13:1–6, saili mo (1) le auala na maua ai e Samuelu le lapataiga mai le Alii ma le (2) o mea na manaomia ona faia e tagata e faalogo ai i le lapataiga. Tuu atu i isi tamaiti e faitau le Helamana 13:7–11, saili mo (1) mea o le a le maua e tagata ma puapuagatia ai pe afai latou te le salamo ma le (2) o le a le mea e tupu pe afai latou te faalogo i le lapataiga. Pe a uma le taimi na tuu atu i tamaiti e faitau ai, valaaulia i latou e vaevae taitoalua e talanoaina mea na latou maua. Ona tuu atu lea ia i latou le avanoa e faasoa mai ai o latou manatu i le vasega atoa. A o faasoa mai e tamaiti mea na latou matauina, atonu e te manao e tusi ni aotelega otooto i luga o le laupapa.

Faasalalau ni ‘ili’ili i luga o le fola, ma fai se ala manino ma le vaapiapi e mafai ona savali ai se tasi e aunoa ma le laa i luga o na maa. Valaaulia ni tamaiti se toalua e o mai i luma, ma fusi o la mata. Fai atu ia i la’ua e fefoifoia’i ina ia o la fenumia’i ai. Ona fai atu lea ia i laua e aveese o la seevae. Fai atu i se tasi o i laua pe na te faatuatuaina le isi tamaitiiti lea e fusi mata e taitai o ia i le ala.

Fai atu i se tamaitiiti e faitau le Helamana 13:29. Ona valaaulia lea o tamaiti na fusi mata e aveese ie na fusi ai o la mata ma foi atu i o la nofoa.

  • O le a le mea o faatusa i ai ‘ili’ili i o tatou olaga?

  • O a nisi o ituaiga o “taitai … tauaso” o loo tuu atu i ai le faatuatuaga o tagata?

  • O anafea na taitai ai oe ma le saogalemu e se taitai?

Fai atu i le afa o le vasega e suesue ma le leleoa le Helamana 13:17–23. Valaaulia i latou e saili mo tulaga lamatia o le tamaoaiga ma faatonuga ia e tatau ona tatou mulimuli ai e aloese ai mai na tulaga lamatia. Valaaulia i latou e talanoaina le auala e mafai ai e le sailiga ma le faaaogaina ma le le tatau o le oa ona faatosinaina se tagata.

Fai atu i isi tamaiti e suesue ma le le leoa le Helamana 13:24–29, faatasi ai ma le 2 Nifae 9:28 . Valaaulia i latou e suesue ia mafuaaga na faaaogaina i aso o Samuelu ina ua latou teenaina perofeta.

Tuu atu i tamaiti le avanoa e faasoa mai ai o latou manatu i le vasega atoa.

O se vaega o lenei talanoaga, atonu e te manao ai e fesoasoani i tamaiti e faaaoga upu a Samuelu i le Helamana 13:24–29. Afai e te faia lea mea, faamatala e ui lava e le o tausalaina i tatou i le tuliesea o perofeta po o le fasiotia o i latou, e mafai lava ona faatatau nisi o nei vaaiga o lapataiga a Samuelu ia i tatou lava.

  • O a nisi o mea patino ua fautuaina ai i tatou e le Peresitene o le Ekalesia o i ai nei e fai? O a nisi o mea patino ua ia lapataiina ai i tatou e tatau ona tatou aloese mai ai?

Fai i tamaiti e mafaufau loloto ma le le leoa i a latou tali patino i fesili nei:

  • O le a sau mea o fai e tali atu ai i le fautuaga ma lapataiga a le perofeta soifua? O faapefea ona faamanuiaina oe a o e mulimuli ai i ana fautuaga? O le a se mea e mafai ona e faia e alualu ai i luma?

Helamana 13:38. O Le Faatuai ona Salamo e Taitai atu ai i le Le Fiafia

Tusi le mau lenei i luga o le laupapa: “Ua mavae ona po o le seleselegasaito, ua uma le tausaga vevela, a e le faaolaina i tatou” (Ieremia 8:20).

  • O le a le uiga o lenei faamatalaga?

Fai atu i se tamaitiiti e faitau le Helamana 13:38.

  • O a mea o aoao mai e nei fuaiupu e uiga i le salamo?

  • O le a le mau tauloto faasino o loo lapatai ai i tatou ina ia aua nei faatuai le aso o lo tatou salamo? (Afai e le manatuaina e tamaiti le Alema 34:32–34 , faasino atu latou i ai.)

Faasoa atu le fautuaga lenei mai ia Peresitene Gordon B. Hinckley (1910–2008), le Peresitene lona 15 o le Ekalesia, lea na ia saunoa maoti ai ia i latou o loo tauivi ma vaisu o ponokarafi. O fuaitau taua e fesootai ma nei fuaiupu o loo faatusilima.

“Soo se tasi lava o loo piimau i lenei uiga leaga, ia tootuli i ona tulivae na o ia i lona afeafe ma aioi atu i le Alii mo le fesoasoani ina ia faasaolotoina o ia mai lenei mea leaga. A leai, o le a faaauau pea lenei pisipisia mataga i le olaga atoa ma e oo atu lava i le faavavau.Na aoao mai Iakopo, le uso o Nifae, ‘E oo foi pe a uma ona mavae atu tagata uma ai lenei muai oti i le ola, e ui ina le toe oti i latou, … o e amiotonu e amiotonu pea i latou, o e eleelea e eleelea pea i latou’ (2 Nifae 9:15–16).

“Na vaaia e Peresitene Iosefa F. Samita i lana faaaliga le asiasiga a le Faaola i agaga o e na maliliu, e faapea ‘e lei maliu atu o ia i e amioleaga, e lei faalogo foi i lona siufofoga i latou o e amioletonu ma e ua le salamo, o i latou ia na faaleagaina e i latou i latou lava a o i ai i la le tino’ (MFF 138:20)” (i le Lipoti o le Konafesi, Oke. 2004, 66; po o le Liahona, Nov. 2004, 62; faaopoopo le faatusilima).

  • O le a le mea na aoao mai e Peresitene Hinckley, Iakopo, ma Peresitene Iosefa F. Samita e faatatau i tagata e le salamo i a latou agasala?

Faasoa atu le saunoaga lenei a Peresitene Henry B. Eyring o le Au Peresitene Sili. A o lei e faitaua, fai i tamaiti e faalogo mo ni mafuaaga se lua e le tatau ai ona faatuai ona tatou salamo:

“O i latou ua i ai nei i agasala matuia o le a oo atu se manatu i o latou mafaufau e faapea: ‘Ia, afai e faigata ona salamo, e sili ai loa pe a fai le agasala. I se taimi mulimuli ane, pe a ou manaomia le faamagaloga, o le a na ona faatasi ai ona ou salamo.’

“E faavalevalea tele lena mea. Sei o’u tau atu ia te outou le mafuaaga. Muamua, o tagata e tolopoina le salamo atonu o le a utiuti sona taimi. Ma le lona lua, o le a latou faanoanoa atili ai lava i le faateleina o le agasala, e le o le fiafia o loo latou faamoemoe i ai ae ua le maua. Ia manatua le lapataiga mai ia Samuelu le sa Lamana [tagai i le Helamana 13:38]” (To Draw Closer to God: A Collection of Discourses [1997], 65).

Tuu atu i tamaiti se taimi e mafaufau loloto ai i fesili nei:

  • O a tulaga lamatia o le faatuai ona salamo?

  • O a ni faamanuiaga e mafai ona tatou iloa pe a tatou usiusitai ma pe a tatou salamo vave pe a tatou agasala?

Helamana 14. Ua Molimau mai Perofeta i le Afio Mai o Keriso ma Aoao mai i Tatou i le Auala e Saunia ai

O vaega o le Helamana 14 o loo faatatau i valoaga a Samuelu e uiga i le maliu o Keriso o loo aofia ai i le manatu aoaoina i le mataupu e 40 o lenei tusi lesona. Atonu e te manao e faitau le manatu faaleaoaoga ma iloa ai pe e te manao e faaaoga i i.

Tuu atu i tamaiti e sue le siata o loo i le itulau 298 i le tusi lesona a tagata o le vasega. Vaevae tamaiti taitoalua po o ni nai vaega laiti e fuafua i le aofai o le vasega. Tuu atu ia i latou e faitau mau ua lisiina i le siata lea e faamatala ai le soifua mai ma le maliu o le Faaola faapea ai ma mea na aoao mai e Samuelu e uiga i le saunia mo le afio mai o Keriso. Atonu e mananao tamaiti e faatusatusa fuaiupu i le Helamana 14 ma fuaiupu tutusa i le Helamana 16 ma le 3 Nifae 1, 2, 8, ma le 23. A maea ona latou iloiloina le siata, atonu e te manao e fai atu ia i latou e talanoaina fesili nei:

  • E tusa ai ma le Helamana 14:12–13, o le a le mea na ta’u atu e Samuelu i tagata e fai e saunia ai mo le soifua mai, po o le afio mai muamua o Iesu Keriso?

  • O a mea ua aoao mai e taitai o le Ekalesia ia i tatou e uiga i le saunia mo le Afio Mai Faalua o Iesu Keriso?

Helamana 14:15–19. Ua Togiolaina i Tatou e Iesu Keriso mai le Oti Faaletino ma le Faaleagaga

Fesili atu i tamaiti:

  • O a ituaiga e lua o oti tatou te oo uma i ai? (Oti faaletino ma le oti faaleagaga.)

  • Pe faaolaina e le Togiola a Iesu Keriso tagata uma mai le oti faaletino lea na aumai e Atamu i le lalolagi? “ (Ioe. Tagai i le 1 Korinito 15:20–22 .)

Tuu atu i tamaiti e faitau le leoa le Helamana 14:15–19 ma sue mai ni mau faasino a Samuelu i oti faaleagaga e lua. Fesoasoani i tamaiti ia iloa o le oti faaleagaga muamua na faailoa mai e Samuelu o le vavaeeseina lea o i tatou mai le Atua e ala i le tuua o Lona afioga. Na ta’ua e Samuelu lenei oti faaleagaga “o le uluai oti” (Helamana 14:16). E pei o le oti faaletino, o lenei oti faaleagaga e oo mai i tagata uma o se taunuuga o le Pa’ū (tagai i le Helamana 14:16). Ina ua tatou o mai i lenei lalolagi, ua tatou tuua le afioaga o le Atua. O lenei oti faaleagaga ua faatoilaloina atoa lava e le Togiola a Iesu Keriso—o le a toe aumai tagata uma i le afioaga o le Atua ina ia faamasinoina (tagai i le Helamana 14:17; tagai foi i le 2 Nifae 2:9–10; 9:15, 22, 38; Alema 11:43–44).

I le oti faaleagaga lona lua, “e toe vavaeeseina [ai tagata] ai mea uma tau le amiotonu” (Helamana 14:18). E oo mai le oti faaleagaga ona o se taunuuga o a tatou lava agasala. E faatoilaloina atoa lava e le Togiola a Iesu Keriso lenei oti—afai tatou te salamo i a tatou agasala ma maua sauniga o le faaolataga, o le a faatagaina i tatou e tumau i le afioaga o le Atua pe a uma ona faamasinoina i tatou.

Helamana 15:7–16. O Le Liua Moni e Faaalia i se Olaga Atoa o le Faamaoni

Valaaulia tamaiti e suesue le leoa le Helamana 15:7–9, ma faailoa mai elemene i le faagasologa o le liua. Pe a uma le lua pe tolu minute na tuu atu ia i latou e faitau ai ma mafaufau loloto, valaaulia i latou e faasoa mai mea na latou maua. Tusi manatu o tagata o le vasega i luga o le laupapa. Afai e manaomia, fai atu i ai e talanoaina fesili nei:

  • E tusa ai ma le fuaiupu 7, o fea e taitai atu i ai suesuega faamaoni ma le talitonuga i tusitusiga paia?

  • O le a le umi ma le faamaoni o le suiga i nei tagata sa Lamana? (Tagai i le fuaiupu 9.)

Fai i tamaiti e mafaufau le leoa i nei fesili:

  • O le a se mea e mafai ona e faia o le a fesoasoani ai ia te oe ia iloa se “liliu [o le] loto”?

  • Mafaufau i le fuaiupu 9 atonu e mafai ona faatatau i lou olaga. Pe i ai ni au “auupega o le taua” e manaomia ona e tanumiaina?

  • E mafai faapefea ona e faateleina lou faatuatua i le tulaga e te “fefe [ai e] agasala”?

Valaaulia se tagata o le vasega e faitau le Helamana 15:10–16.

  • O le a le mea na folafola atu e le Alii e uiga i e o le a tupuga mai i nei sa Lamana ua liua?

  • Aisea na folafola atu ai e le Alii i tagata sa Lamana o le a le faaumatiaina lo latou nuu? (Tagai i le Helamana 15:14–17.)

Helamana 16:13–25. Pe a Faamaaaina e Tagata o Latou Loto, ua Latou Faatagaina Satani e “Maua … le Pule Tele” i o Latou Loto

Fai i tamaiti uma ina ia tapuni a latou tusitusiga paia. Ona fai atu lea i se tamaitiiti se tasi e tatala ana tusitusiga paia ma faitau le Helamana 16:13–14 a o faalogologo isi tamaiti. Fai atu i le vasega pe o le a so latou manatu i le mea na tupu i le fuaiupu e sosoo ai.

  • O le a sou manatu i le auala o le a tali atu ai tagata i aso nei i le savali a se perofeta pe afai latou te vaaia ni agelu ma ni faailoga tetele?

Fai atu i le tamaitiiti o loo tatala ana tusitusiga paia e faitau le upu muamua o le fuaiupu 15. Fai i tamaiti pe o le a le upu latou te manatu o le a mulimuli mai i le upu E ui lava i lea. Pe a uma ona latou tali mai, faitau le fuaiupu 15 faatasi ma i latou.

  • E faapefea ona e faamatalaina se tagata e i ai se loto maaa?

  • E tusa ai ma fuaiupu 22–23, o a ni uunaiga na i ai i tagata sa Nifae loto maaa?

  • O le a se mea ua e mauaina e fesoasoani ai ia aua nei maua e Satani le pule tele i lou loto?

Faitau le 3 Nifae 9:20 faatasi ma tamaiti.

  • O a ni auala e ese ai se tagata e i ai se “loto momomo” mai se tagata e i ai se loto maaa?

  • O a ni faamanuiaga e oo mai ia i latou e i ai se loto momomo ma le agaga salamo?

  • O a ni auala e fesoasoani ai ia i tatou le mauaina o le uunaiga a le Agaga Paia e tetee atu ai i faatosinaga a Satani?

Valaaulia tamaiti e faasoa mai o latou manatu i le auala e atiae ai se lotomaualalo ma se manao e maua ai le uunaiga a le Agaga i aso uma.

Helamana 16:16–21. O Le Tetee atu ma le Faamaualuga e Mulimuli i le Perofeta

Valaaulia tamaiti e faitau le Helamana 16:16–21, saili mo ’alofaga na fai e e amioletonu mo le le talitonu i valoaga a Samuelu. Pe a uma ni nai minute e suesue ai e tamaiti ia fuaiupu, valaaulia i latou e faasoa mai mea ua latou maua. Tusi a latou tali i luga o le laupapa.

  • O a ni faamatalaga o nei finauga o loo faaauau ai pea ona teenaina perofeta i o tatou aso?

  • E mafai faapefea ona tatou iloa ua amata ona tatou teenaina upu a perofeta i o tatou olaga patino?

Fai atu i se tamaitiiti e faitau le Mataupu Faavae ma Feagaiga 21:4–5.

  • O le a se mea e mafai ona tatou faia e talia ai upu a perofeta “i le onosai uma ma le faatuatua”?

Faitau le saunoaga lenei a Elder Russell M. Nelson o le Korama a Aposetolo a Toasefululua:

“O lo’u lava iloa e tusa ai ma mea ua oo ia te au o le taimi lava e te le tuua ai faailoga fesili i saunoaga a le perofeta, ae tuu i ai i le faailoga o le upu ofo, ma faia, o le a sasaa mai faamanuiaga” (i le tusiga a Lane Johnson, “Russell M. Nelson: O Se Suesuega e Uiga i le Usiusitai,” Liahona, Ape. 1983, 26; uluai faatusilima).

  • O le a le uiga o le tuu o le faailoga o le upu ofo, ae le o le faailoga fesili, i fautuaga a perofeta?