Inisitituti
Mataupu 5: 1 Nifae 16–18

Mataupu 5

1 Nifae 16–18

Folasaga

Na fesoasoani le Alii i le aiga o Liae i la latou malaga atoa i le vao ma le vasa. A o suesueina e tamaiti lenei tala o le malaga, o le a latou maua ai faataitaiga o le faatuatua tele ma le fouvalega matautia. O le a latou iloa ai na faamalosia e le Atua ē amiotonu ma faamaluluina loto o e amioleaga. E mafai ona e fesoasoani atu i tamaiti ia malamalama o luitau ma faamanuiaga i o latou olaga e tutusa lava ma luitau ma faamanuiaga na oo i ai le aiga o Liae. E mafai ona e faamalosiau atu ia i latou ia mulimuli i uunaiga a le Agaga Paia, i tusitusiga paia, matua amiotonu, ma taitai perisitua.

O Nisi o Aoaoga Faavae ma Mataupu Faavae

Fautuaga mo le Aoaoga

1 Nifae 16; 18:12–15, 21–22. E Taitai e le Alii Ana Auauna Faamaoni

Ata
tapasa

Uu i luga se tapasa (pe faaali atu sona ata)

Fai i se tamaitiiti e faamalamalama otooto mai le mea e fai e se tapasa. Tuu i se tamaitiiti e faitau le 1 Nifae 16:10 ma le Alema 37:38.

  • O a auala e tutusa ai le Liahona ma le tapasa lea e faaaoga e tagata i le asō? O a auala e ese mai ai le Liahona mai tapasa faaonapo nei?

Valaaulia tamaiti e faitau le 1 Nifae 16:10, 16, 28–29 ma faailoa mai le tele o aoga o le Liahona e mafai ona latou iloa. Fautuaina i latou e faailoga mea na latou maua i a latou tusitusiga paia. Pe a latou suesueina ia fuaiupu, fai i ai e faasoa mai mea ua latou maua. Lisi otooto o latou manatu i luga o le laupapa. Atonu e aofia i o latou manatu mea nei:

1 Nifae 16:10

“O le tasi foi [vae] na faasino mai le ala matou te o ai.”

1 Nifae 16:16

“O le polo … ua taitaiina ai i matou i itu o le vao ua sili ona lafulemu.”

1 Nifae 16:28

“O vae … ua galue e tusa ma le faatuatua, ma le filiga, ma le usiusitai na matou avatu i ai.”

1 Nifae 16:29

Na faaalia mai i le polo se “tusi fou, ua faigofie ona faitauina, ma ua aumai ai le malamalama ia te i matou e uiga i ala o le Atua.”

1 Nifae 16:29

O le tusi fou “na tusia ma faaliliuina i lea aso ma lea aso, e tusa ma le faatuatua ma le filiga na matou avatu i ai.”

1 Nifae 16:30–31

Na tuuina atu ia i latou e le polo ia taitaiga ina ia latou mafai ai ona maua meaai.

  • O a nisi o taiala i o tatou olaga e pei o le Liahona?

O tali i lenei fesili e mafai ona aofia ai le Agaga Paia (tagai i le faamatalaga a Elder David A. Bednar i itulau 34–35 i le tusi lesona a tagata o le vasega), o tusitusiga paia (tagai i le Alema 37:38–47), aoaoga a perofeta soifua, ma faamanuiaga faapeteriaka. Atonu e te manao e ta’ua o le mekasini a le Ekalesia e faaigoaina o le Ensign i le faaperetania ua faaigoaina tatau o le Liahona i le tele o gagana. I nisi o auala e pei ai lava o le Liahona a Liae—o ona anotusi ua fesoasoani tatou te iloa ai le finagalo o le Atua mo i tatou i lenei taimi patino.

A o ta’ua e tamaiti ia taiala e pei o le Liahona, fai fesili e pei o fesili nei:

  • O a auala e pei ai nei taiala o le Liahona?

  • O a auala e faasino ai e nei taiala le ala e tatau ona tatou o ai?

  • O a ni mea e mafua ai ona tatou le maua savali taua mai nei taiala?

  • Na taitai atu e le Liahona ia tagata “i itu o le vao ua sili ona lafulemu.” E faapefea ona faatatau lenei mea i o tatou olaga?

  • Mafaufau i le fuaiupu mulimuli i le 1 Nifae 16:29. E faapefea ona avea nei taiala ma “mea faatauvaa”? O a nisi o “mea tetele” e mafai ona tupu mai ona o nei “mea faatauvaa”?

Valaaulia se tamaitiiti se toatasi pe toalua e faamatala mai se taimi na faamanuiaina ai i laua a o la mulimuli i se tasi o nei taiala.

Valaaulia tamaiti e faitau le leoa le 1 Nifae 16:15–32 ma matau ia eseesega i le va o Nifae, Lamana ma Lemuelu, ma Liae. E mafai ona e fautua atu e tusi a latou tali. A maea ona latou faitau, taitai se talanoaga puupuu e faatatau i mea sa latou faitauina. Mafaufau e fai atu nisi o fesili nei po o fesili uma:

  • Na faapefea ona tali atu Lamana ma Lemuelu ina ua gau le aufana a Nifae? Na faapefea ona tali atu Liae? Na faapefea ona tali atu Nifae?

  • Aisea e te manatu ai na eseese ai tali a nei alii mai le tasi i le isi?

  • O a ni ou manatu e pei ona e iloa na oo lava ia Liae na muimui? O le a se mea na faafiafiaina ai oe i le auala na talanoa atu ai Nifae i lona tama ina ua maea ona toe fau se aufana fou?

  • O a auala na faatosinaina ai e le tali a Nifae i lenei tofotofoga lona aiga? Na faapefea ona faatosinaina oe ina ua e vaaia le tali atu ma le faamaoni i isi i tofotofoga? E faapefea ona e faatosinaina i au tali atu i tofotofoga i latou o vagaia oe?

Faasoa atu le faamatalaga lea a Elder Richard G. Scott o le Korama a Aposetolo e Toasefululua i itulau 35–36 i le tusi lesona a tagata o le vasega.

Faamalamalama atu e oo mai nisi o tofotofoga ona o se taunuuga o le le usiusitai. Peitai, o le tala i le gau o le aufana a Nifae ua faaalia ai o le tele lava o tofotofoga o ni vaega lava o le olaga faaletino.

  • O a ni aafiaga na e oo i ai e mafai ona tali foliga i le aafiaga o le gau o le aufana a Nifae?

  • E faapefea ona faamanuiaina i tatou pe a tatou tali atu i tofotofoga e pei ona faia e Nifae?

Fai i tamaiti e mafaufau i auala eseese na latou tali atu ai i tofotofoga. Ona valaaulia lea o i latou e mafaufau loloto i fesili nei e aunoa ma le tali mai:

  • I au tali atu i tofotofoga, sa e faapei ea o Lamana ma Lemuelu? pei o Liae? pei o Nifae? Afai sa eseese au faatinoga i tulaga eseese, aisea? O le a se mea e mafai ona e faia e faaleleia ai lou tali atu i tofotofoga ?

1 Nifae 17; 18:8–25. E Faamanuia ma Faamalosia e le Alii i Latou o E Tausia Ana poloaiga

Faamalamalama atu e faaopoopo atu i le taialaina o le aiga o Liae i le Liahona, na fesoasoani atu foi le Alii ia i latou i isi auala. Tusi mau nei i luga o le laupapa:

Vaevae le vasega i ni vaega se tolu. Tuu atu i vaega taitasi e faitau se tasi o mau nei, tagai mo auala ia na faaali atu ai e le Alii Lona “alofa mutimutivale” (tagai i le 1 Nifae 1:20. Ona valaaulia lea o i latou e faasoa mai mea na latou mauaina. Atonu e te manao e tusi i le laupapa ia mea na matau e tamaiti.

I se taumafaiga e faatalitonu ona uso o loo finagalo le Atua e malaga atu le aiga i le nuu o le folafolaga, na faatusatusa ai e Nifae o latou tulaga i le fanauga a Isaraelu lea na tuua Aikupito ae malaga atu i le nuu folafolaina. Valaaulia tamaiti e sue vave i le 1 Nifae 17:23–44 ma faailoa mai ia auala e tali tutusa ai Isaraelu ma le aiga o Liae.

  • E faapefea ona e manatu sa ono manuia le aiga o Liae mai le manatuaina o aafiaga o le fanauga a Isaraelu?

  • O a auala e te manuia ai mai le aoaoina e uiga i malaga a le aiga o Liae ma Isaraelu anamua?

Ina ia fesoasoani i tamaiti e iloa o le a puipuia ma faamalosia e le Alii e amiotonu, valaaulia se tamaitiiti se toatasi e faitau leotele le 1 Nifae 17:48, 52–55. Fai atu i isi e faalogo mo auala na fesoasoani ai le Alii ia Nifae.

  • O le a le mea na mulimuli ane ai faamaluluina loto o Lamana ma Lemuelu?

Tuu atu i se tamaitiiti e faitau le 1 Nifae 18:16, 21.

  • O a auala e mafai ona e mulimuli ai i faataitaiga a Nifae e maua ai faamanuiaga folafolaina a le Alii?

Faamalamalama atu e masani lava ona i ai i tusitusiga paia ia faamatalaga o le afai-ona. Ua ta’u mai e le Alii ia i tatou e faapea afai o le a tatou faia se mea patino, ona Ia faamanuia lea o i tatou i se auala patino.

Fai i tamaiti e faitau le leoa le 1 Nifae 18:8–20.

  • O a auala na puapuagatia ai Nifae ona o le le usiusitai o isi?

  • Na faapefea ona puapuagatia mulimuli ane tagata uma i le vaega ona o le fouvale?

  • O a mea e mafai ona tatou aoaoina mai nei faataitaiga?

Molimau atu o le le usiusitai e oo mai ai puapuaga, e ui lava e le vave oo mai puapuaga pe e iloagofie foi e pei ona oo i ai le aiga o Liae. Pe a talafeagai ai, valaaulia tamaiti e faasoa mai o latou manatu i lenei mataupu. Faasoa atu lau molimau e uiga i le faamanuiaina o i tatou e le Alii a o tatou usiusitai i Ana poloaiga.

1 Nifae 17:7–11, 44–47; 18:1–4. E Tatau Ona Tatou Saunia i Tatou Lava e Mulimuli i Uunaiga a le Agaga

Afai e i ai sau telefoni feaveai, ia faaali atu. Fai i tamaiti pe sa latou taumafai e faaaoga se telefoni feaveai i nofoaga e leaga ai fesootaiga. O ia nofoaga i nisi o taimi e ta’ua o nofoaga mate. Fai i tamaiti e faitau le leoa le 1 Nifae 17:45 ma mafaufau e uiga i mea e mafua ai ona maua “nofoaga mate” faaleagaga mo Lamana ma Lemuelu.

  • O le a sou manatu i le uiga o le “le toe lagona”?

  • O a filifiliga na faia e Lamana ma Lemuelu na taitai atu ai i laua e oo atu i le “le toe lagona”?

O se vaega o lenei talanoaga, atonu e te manao e faaaoga le saunoaga a Peresitene James E. Faust A, Peresitene Boyd K. Packer B, ma Elder Joseph B. Wirthlin C i le companion DVD. Po o lou tuu atu foi i tamaiti e faitau na faamalataga i le itulau 39 i le tusi lesona a tagata o le vasega. Na faamalamalama mai e Peresitene Packer e faapea tatou te lagonaina ia uunaiga a le Agaga Paia e sili atu nai lo le tatou faalogoina. Na lapatai mai Peresitene Faust ma Elder Wirthlin i uiga ma amioga ia e taitai atu ai i tatou i aafiaga o “nofoaga mate” faaleagaga.

  • E tusa ai ma Peresitene Faust ma Elder Wirthlin, o a nisi o uiga ma faatinoga e mafai ona faavaivaia ai lo tatou tomai e iloa ai le Agaga?

Valaaulia tamaiti e faitau le 1 Nifae 17:7–11, tagai mo mea na faia e Nifae e faaleleia ai lona tomai e fesootai atu ai ma le Tama Faalelagi.

  • O le a le mea na faia e Nifae na fesoasoani ai ia te ia e fesootai ai ma le Atua? (O tali e mafai ona aofia ai lona usitai vave i le siufofoga o le Alii, na ia tatalo na o ia, ma sa ia galue malosi e tali atu i tali o ana tatalo.)

Valaaulia tamaiti e sailiili le 1 Nifae 18:1–4 ma faatusatusa ia sauniuniga a Nifae e fausia le vaa i a latou lava sauniuniga e fetaia’i ma luitau ma tofotofoga.

  • Na faaalia e le Alii ia Nifae le auala e fausia ai le vaa “mai lea aso i lea aso.” Aisea e te manatu ai sa aoga mo Nifae ona aoao si mea itiiti i lea aso nai lo le mauaina o mea uma i le taimi e tasi?

  • Aisea na taua ai mo Nifae ona mulimuli i faatonuga a le Alii a o lei aoaoina o ia e le Alii i nisi mea?

Valaaulia se tamaitiiti e faitau leotele le 2 Nifae 28:30. Fai i tamaiti pe faapefea ona faatatau ia mataupu faavae o i lenei fuaiupu i le tala o le olaga o Nifae lea ua tatou suesueina nei. Faamamafa atu e seasea tuu mai ia i tatou e le Alii faamatalaga uma i le taimi e tasi. A o tatou agai i luma i le faatuatua, Na te tatala mai ia i tatou sia mea itiiti ma sia mea itiiti o upumoni.

  • O a auala na faailoa ai le faalagolago o Nifae i le Alii?

  • O le a se mea tatou te faia e mulimuli ai i le faataitaiga a Nifae e fausia se olaga, e pei o le vaa o Nifae, e “matua lelei lava” i fofoga o le Alii?

Faasoa atu lau molimau e uiga i le taitaiga e mafai ona tatou maua mai le Agaga Paia. Faamalosiau atu i tamaiti e mulimuli i faataitaiga a Nifae a o latou fesootai ma le Tama Faalelagi.