Mataupu 33

Alema 43–51

Folasaga

E i ai taimi e tatau ai ona tau tagata amiotonu e puipuia a latou aia tatau mai le Atua. I se taimi taua i le talafaasolopito o le Tusi a Mamona, na faatuina ai e le Alii ia Taitai Au Moronae ma isi alii sili e taitai o latou tagata i le puipuiga o lo latou saolotoga. Na saunoa Peresitene Ezra Taft Benson (1899–1994), le Peresitene lona 13 o le Ekalesia e faapea, “Tatou te iloa mai le Tusi a Mamona le auala e ola ai soo o Keriso i taimi o taua” (i le Lipoti o le Konafesi, Oke. 1986, 5; po o le Liahona, Ian. 1987, 8).

Na uunaia sa Nifae e o latou taitai ma aoao ai i le ala tonu e faasagatau atu ai e tetee i osofaiga ia o le a faaumatia ai la latou tapuaiga, saolotoga, ma aiga (tagai i le Alema 46:12). A o faatusatusa e tamaiti faamoemoega ma metotia a taitai lotomaualalo ma le amiotonu e pei o Taitai Au Moronae i faamoemoega ma metotia a tagata amioleaga o loo saili i le pule e pei o Amaleki, e mafai ona latou aoao e talisapaia faamoemoega amiotonu a o latou taitai o le Ekalesia. E mafai foi ona latou aoao ina ia “mausali i le faatuatua ia Keriso” (Alema 48:13) i taimi uma, e oo lava pe a latou feagai ma taua po o isi tofotofoga.

O Nisi o Aoaoga Faavae ma Mataupu Faavae

O le suesueina o tala o taua i le Tusi a Mamona e mafai ona fesoasoani ia i tatou e saunia ai mo taua o o tatou aso (tagai i le Alema 43–51).
O Finauga ma Fouvalega o malosiaga faataumaoi ia (tagai i le Alema 43:4–8; 46:1–10; 50:21–35; 51:1–27).
O la tatou amiotonu e puipuia i tatou mai le mana o Satani (tagai i le Alema 48).
O le faatuatua i le Atua e aumai ai le fiafia, e oo lava i le lotolotoi o fesouaiga (tagai i le Alema 49:25–30; 50:1–23).

Fautuaga mo le Aoaoga

Alema 43–51. O le Suesueina o Tala o Taua i le Tusi a Mamona e Mafai ona Fesoasoani ia i Tatou e Saunia ai mo Taua o o Tatou Aso

O nei mataupu ua faatumulia i mataupu faavae ia e mafai ona fesoasoani i le Au Paia o Aso e Gata Ai e ola ai o ni soo o Iesu Keriso i taimi o taua. O nisi o mataupu faavae mai nei tala o taua faaletino e mafai ona faatatau i taua faaleagaga e tetee atu ai i le amioleaga.

O le manatu aoaoina muamua o lenei vaega ua mamanuina e fesoasoani ai i tamaiti e faailoa ai mataupu faavae e taialaina ai i latou i a latou taua i aso taitasi e tetee atu i malosiaga o le tiapolo. O le manatu lona lua ua mamanuina e fesoasoani i tamaiti e faailoa ai mataupu faavae e taialaina ai i latou pe a latou feagai ma taua.

Tuu atu i tamaiti e faitau le 2 Nifae 9:10, 12; Alema 42:9; Mataio 10:28.

O a ituaiga o oti e lua o loo ta’ua i nei fuaiupu?
Aisea e sili atu ai le ogaoga o le faatamaiaina o le agaga nai lo le oti faaletino?

Faamalamalama atu a o tatou suesueina le faamatalaga o taua faaletino i le Tusi a Mamona, e mafai ona aoaoina ni lesona faaleagaga. Faasoa atu se faataitaiga o le auala e faailoa ai ni upumoni faaleagaga o loo aoao mai i se faamatalaga faaletino. Mo se faataitaiga, e mafai ona e fai atu i se tamaitiiti e faitau le Alema 43:19–20 ma le 50:1. Ona mafai lea ona e fai atu i le vasega e saili mo se mataupu faavae faaleagaga i le faamalataga a Taitai Au o Moronae a o saunia lana autau mo le taua. E mafai ona e fai atua fesili nei:

O a ni auala na saunia ai e Taitai Au Moronae lona nuu e puipui i latou lava?
O le a le mea e mafai ona tatou faia i aso uma e saunia ai mo taua faaleagaga?

Tuu atu se avanoa i le vasega e sailiili ai mo upumoni faaleagaga e faaaogaina ai le lisi o mau o loo i lalo ifo. Vaevae tamaiti i ni vaega laiti. Faatonu vaega taitasi e vaevae tutusa le lisi ia i latou. E tatau ona suesue e tamaiti taitasi ia mau ua atofa atu ia te ia, saili ai mo mataupu faavae ia e mafai ona faatatau i o tatou aso. Talosagaina tamaiti taitasi e fefaasoaai ma tagata o le vaega se malamalamaaga faatusitusiga paia se tasi. A maea ona fefaasoaai tamaiti i a latou vaega, talosagaina nisi e ofo mai e faasoa mai i le vasega atoa ni malamalamaaga o a latou vaega.

Alema 43:9; 48:10	Alema 46:11–13, 20
Alema 43:23–26	Alema 48:7–9
Alema 43:48–50	Alema 49:3–5
Alema 44:1–5	Alema 49:30
Alema 45:20–22	Alema 50:1–7

Tusi fesili ma mau nei i luga o le laupapa:

O a ni mea e tauamiotonuina ai taua? (Tagai i le Alema 43:9, 45–47; 48:14.)

O le a le uiga tatau i le faamasaaina o le toto (Tagai i le Alema 48:23–24; 61:10–11.)

Fai i tamaiti e faitau le leoa fuaiupu pe a uma ona fai atu fesili. Ona valaaulia lea o i latou e faasoa mai a latou tali i fesili.

E mafai ona e faamatala atu ua ta’u mai e perofeta o aso e gata ai e faapea o nisi taimi ua i ai i tagata amiotonu se tiute e puipuia o latou aiga ma isi. I se konafesi aoao, na sii mai ai e Peresitene Gordon B. Hinckley (1910–2008), le Peresitene lona 15 o le Ekalesia le Alema 43:45–47 ma le 46:12–13 ona tautino mai lea:

“Ua manino mai ai i nei tulaga, ma isi tusitusiga, o le mea moni e i ai taimi ma tulaga e alagatatau ai i atunuu, ona i ai se matafaioi e tau ai mo le aiga, mo le saolotoga, ma faasagatau atu ai i pulega saua, o taufaamatau ma le pologa” (i le Lipoti o le Konafesi, Ape. 2003, 83–84; po o le Liahona, Me 2003, 80).

Na faamanino mai e Peresitene Hinckley e faapea e i ai taimi e tatau ai ona tatou tau. Peitai, ina ia fesoasoani i tamaiti ia malamalama a o lei o atu tagata i taua, e tatau ona latou sailia uma isi taumafaiga e taumafai e aloese mai ai, faasoa atu le saunoaga a le Au Peresitene Sili o loo i itulau 261–62 i le tusi lesona a le vasega.

Alema 43:4–8; 46:1–10; 50:21–35; 51:1–27. Finauga ma Fouvalega o Malosiaga Faataumaoia ia

Faamalamalama atu o loo i ai i tusitusiga paia le tele o lapataiga e uiga i finauga.

Aisea e te manatu ai tatou te manaomia lapataiga faifai pea e uiga i finauga?

Faamalamalama atu e le gata i lapataiga e uiga i finauga, o nei mataupu i le Tusi a Mamona ua ta’u mai ai foi le matautia o le fouvale. O mataupu i fouvalega o loo faamatalaina i nei mataupu o ni faataitaiga o le liliuese—tagata ua fouvale i le upumoni ma le Ekalesia.

O le a le faiā a le faatuiese ma finauga?

Ina ia faaalia le malosiaga faataumaoi o finauga, vaevae le vasega i ni vaega se fa ma fai atu i vaega taitasi e faitau se tasi o mau nei: (1) Alema 43:4–8; (2) Alema 46:1–10; (3) Alema 50:21–35; (4) Alema 51:5, 9, 12, 19, 22–23, 26–27. Fai atu ia i latou e saili mo faapogai o finauga i mau taitasi ma taunuuga o lena finauga. A maea ni nai minute, fai i se tamaitiiti mai vaega taitasi e aotele mai malamalamaaga a le vaega. Atonu e te manao e tusi tali a tamaiti i luga o le laupapa. E mafai ona tali foliga faapea le lisi:

Mau	Faapogai o Finauga	Taunuuga o finauga
Alema 43:4–8	Seraemina, sa Soramā, ma sa Amalekī	Taua faifai pea i le va o sa Lamana ma sa Nifae Lagona faateleina o le inoino ma le ita i tagata sa Lamana ma i latou na latou aufaatasi
Alema 46:1–10	Amaleki ma e na mulimuli ia te ia	Faatuiese o le tele o tagata mai ia sa Nifae ma le Ekalesia O le tulai mai o Amaleki i le pule, na taitaia ai le tele o tagata e faagalo le Alii ma fai amioga leaga
Alema 50:21–35	Morianetona ma lona nuu	O le sauaina e Morianetona o se auauna O se taua na toatele ē na fasiotia ai
Alema 51:5, 9, 12, 19, 22–23, 26–27	O tagata-tupu ma Amaleki	O le maliliu o tagata faatuiese e 4,000 ma se aofaiga e le o iloa o fitafita sa Nifae; o isi tagata faatuiese na lafoina i le falepuipui Mauaina e Amaleki o se aai o sa Nifae

Tuu atu i se tamaitiiti e faitau le 3 Nifae 11:29 i le vasega.

O a ni auala e faavaivaia ai e finauga ia aiga, nuu, ma malo?
O le a se mea ua e maua e fesoasoani ai i tagata e faatoilalo ia finauga ma le faatuiese?

O se faataitaiga o le faatuiese o loo maua i le Alema 47. Fai atu i se tamaitiiti e faitau le ulutala mataupu mo le Alema 47 ma le isi tamaitiiti e faitau le Alema 47:36.

O le a le mea na faailo mai e le ulutala mataupu e uiga i le mea na naunau Amaleki e fai e maua ai le pule?
Aisea e te manatu ai o ē liliu ese mai le upumoni e masani lava ona avea ma ē “sili ona faamaaaina” nai lo i latou e lei iloaina lava le upumoni? (Tagai foi i le Alema 24:30.)

Faasoa atu le saunoaga a Elder Neal A. Maxwell o loo i le itulau 266 i le tusi lesona a tagata o le vasega.

O a ni malamalamaaga na faasoa mai e Elder Maxwell e uiga i le matautia o le faatuiese?

Alema 48. O La Tatou Amiotonu e Puipuia i Tatou mai le Mana o Satani

Fai i tamaiti e ta’u mai ni nai toa magumagu.

O a ni uiga lototoa ma agavaa e i ai i nei tagata? (A o e taialaina lenei talanoaga, manatua o le faamoemoega o lenei manatu aoaoina o le faamamafaina lea o uiga o Taitai Au Moronae ma uiga lelei o sē mulimuli ia Iesu Keriso. E tatau ona vave taulai atu ia Taitai Au Moronae.)

Faamalamalama atu na tofia Moronae a o talavou o ia e avea ma taitai o autau uma a sa Nifae e puipuia lona nuu e faasagatau atu i se fili malosi tele (tagai i le Alema 43:16–17). Tusi le faamatalaga lenei i luga o le laupapa:

A na pei tagata uma o Moronae …

Valaaulia tamaiti e sailiili le Alema 48:11–13, 17–18 ma faailoa mai uiga na agavaa ai Taitai Au Moronae e avea ma toa magumagu. Lisi a latou tali i luga o le laupapa.

Fai atu i se tamaitiiti e faitau le Alema 48:14–16.

Na faapefea ona uunaia uiga o Moronae i lona faatuatua ia Keriso? Na faapefea e lona faatuatua ona uunaia ana taumafaiga e puipuia lona nuu?
Na faapea mai Mamona pe ana tusa ma Taitai Au Moronae tagata uma, “pe ua leai lava se pule a le tiapolo i o [latou] loto” (Alema 48:17). Aisea e moni ai lenei mea?
E tusa ai ma le Alema 48:19–20, na faapefea ona faatusatusa Helamana ma ona uso ia Moronae?

Faamautinoa atu i tamaiti e mafai foi ona latou ola i se auala faapea, lea o le a puipuia ai i latou mai faatosinaga a Satani ma o le a mafai ai ona fesoasoani i ē latou te alolofa i ai ia maua lea lava puipuiga e tasi.

Faaaoga le siata o loo i le itulau 265 i le tusi lesona a tagata o le vasega e taiala ai se talanoaga. O lenei siata e faatusatusa ai Moronae ma Amaleki. A o faitauina e tamaiti mau o loo lisiina i le siata, valaaulia i latou e faailoa mai mataupu faavae e mafai ona latou faaaogaina i o latou olaga. Talanoaina pe faapefea ona puipuia i tatou mai le mana o Satani pe a tatou ola ai i nei mataupu faavae.

Alema 49:25–30; 50:1–23. O Le Faatuatua i le Atua e Aumai ai le Fiafia e Oo i le Lotolotoi o Fesouaiga

Tuu atu i se tamaitiiti e faitau le Alema 50:21–23. Valaaulia tamaiti e mafaufau i taimi e sili ona fiafia ai i o latou olaga.

O le a le mea e maua ai le fiafia?
Aisea e te manatu ai na mafai ona maua e sa Nifae lena fiafia e ui lava ina sa latou feagai ma taufaamatau o taua? (A o talanoaina e tamaiti lenei fesili, atonu e te manao e fautua atu ia latou sailiili i le Alema 49:25–30; 50:1–23.)
O a nisi o faataitaiga faaletusitusiga paia o tagata o loo olioli e oo lava i le lotolotoi o faigata tetele? (Tagai i le 2 Korinito 7:1–7; Mosaea 24:10–15; MFF 127:2.)
O a nisi o folafolaga na tuu atu e le Alii i e faamaoni lea e mafai ai ona maua le fiafia e tusa lava pe oo mai tofotofoga? (A o talanoaina e tamaiti lenei fesili, atonu e te manao e fautua atu ia latou faitauina le Ioane 16:33; Roma 8:18; Eperu 12:11; MFF 58:3–4; 121:33; 122:1–2, 7–9.)

Tuu atu i tagata o le vasega le avanoa e faasoa mai ai o latou lagona po o aafiaga e uiga i le auala e mafai ona tatou fiafia ai e oo lava i taimi o tofotofoga. Atonu e te manao e faamaea atu i le faasoa atu o lau molimau.