1 Ma o lenei sa oo ina ua vave lava ona maua e Amalekia o le malo, na amata ai e ia ona musuia loto o sa Lamanā e faasaga i tagata o Nifae; ioe, sa ia tofia tagata e tautatala atu i sa Lamanā mai i o latou olo, e faasaga ia sa Nifaē.

2 Ma sa faapea ona ia musuia o latou loto e faasaga ia sa Nifaē, sa oo ina ia saili foi i le taufaasiusiuga o le lona sefulu ma le iva o tausaga o le nofoaiga a faamasino, ina ua ia faataunuuina lea o ana fuafuaga e oo mai i le taimi lea, ioe, ina ua avea o ia ma tupu o sa Lamanā, na ia taumafai foi e nofotupu i luga o le laueleele atoa, ioe, ma tagata uma lava sa i ai i le laueleele, o sa Nifaē atoa foi ma sa Lamanā.

3 O lea sa ia faataunuuina ai lana fuafuaga, ona sa ia faamaaa loto o sa Lamanā ma faatauaso o latou mafaufau, ma faaoso le ita ia te i latou, sa oo ina ia faapotopoto se autau e toatele e o atu e tau faasaga ia sa Nifaē.

4 Ona sa naunau o ia, ona o le toatele o le aofai o ona tagata, e faatoilalo sa Nifaē ma aumai i latou i le pologa.

5 Ma sa faapea ona ia tofia o ^akapeteni sili o lo sa Soramā, ona sa sili atu ona latou iloa le malosi o sa Nifaē, ma o latou nofoaga malu puipuia, ma vaega sili ona vaivai o o latou aai; o lea na ia tofia ai i latou e avea ma kapeteni sili i ana autau.

6 Ma sa oo ina latou ave la latou tolauapiga, ma agai atu i le laueleele o Sara’emila i le vao.

7 O lenei sa oo ina faapea a o maua e Amalekia le pule e ala i le pepelo ma le taufaasese, o Moronae, i le isi itu, sa ^asauniunia mafaufau o tagata ia faamaoni i le Alii lo latou Atua.

8 Ioe, sa ia faamalosia autau a sa Nifaē, ma faatutū ni olo laiti, po o ni nofoaga malu puipuia; ma ati i luga faupuega eleele faataamilo e puipui ai i totonu ana autau, ma ati foi pa maa e si’o faataamilo ai i latou, e faataamilo i o latou aai ma tuaoi o o latou laueleele; ioe, e faataamilo i le laueleele atoa.

9 Ma i o latou ’olotu’i sa sili ona vaivai sa ia tuu ai le toatele o tane; ma sa faapea ona ia tu’iolo ma faamalosia le laueleele lea sa maua e sa Nifaē.

10 Ma sa faapea ona ia sauniuni e ^alagolago lo latou saolotoga, o latou laueleele, a latou avā, ma a latou fanau, ma lo latou filemu, ma ina ia mafai ona latou ola mo le Alii lo latou Atua, ma ina ia mafai ona latou faatumauina o le mea ua ta’ua e o latou fili o le faamoemoe o le Au Kerisiano.

11 Ma o Moronae o se tagata malosi ma ta’uta’ua tele; o ia o se tagata ua atoatoa le ^amalamalama; ioe, o se tagata sa le fiafia i le faamasaa toto; o se tagata sa olioli lona agaga i le filifiliga saoloto ma le saolotoga o lona atunuu, ma ona uso mai i le pologa ma le faapologaina;

12 Ioe, o se tagata sa tumu lona loto i le faafetai i lona Atua, mo avanoa ma faamanuiaga e tele na ia faaee mai i luga o lona nuu; o se tagata sa galue malosi lava mo le ^amanuia ma le saogalemu o ona tagata.

13 Ioe, ma o ia o se tagata sa mausali i le faatuatua ia Keriso, ma sa ^atauto o ia i se tautoga e puipui i ona tagata, ana aia, ma lona atunuu, ma lana tapuaiga, e oo lava i le faamaligiina ai o lona toto.

14 O lenei sa a’oa’oina sa Nifaē e puipui i latou lava e faasaga i o latou fili, e oo lava i le faamasaaina o le toto pe afai e tatau ai; ioe, ma sa a’oa’oina foi i latou e ^aaua lava ne’i faia se faatupu vevesi ioe, ma aua lava ne’i siitia le pelu vagana ai e tetee faasaga atu ai i se fili, vagana ai ua mo le faasaoina o o latou ola.

15 Ma o lo latou faatuatuaga lenei, e faapea o lo latou faia faapea o le a faamanuia ai i latou e le Atua i le laueleele, pe faapea, afai latou te faamaoni i le tausiga o poloaiga a le Atua o le a ia faamanuiaina i latou i le laueleele; ioe, lapatai i latou ia sosola ese, pe ia saunia mo le taua, e tusa ma lo latou puipuiga;

16 O lenei foi, o le a faailoa mai e le Atua ia te i latou le mea latou te o i ai e puipui ai i latou e faasaga i o latou fili, ma o lo latou faia faapea, o le a laveai ai i latou e le Alii; ma o le faatuatuaga lenei o Moronae, ma sa olioli i ai lona loto i lea mea; ^ae lē i le faamasaaina o le toto ae i le faia o mea lelei, i le faasaoina o ona tagata, ioe, i le tausia o poloaiga a le Atua, ioe, ma le tetee atu i le amioletonu.

17 Ioe, e moni, e moni, ou te fai atu ia te outou, a na pei tagata uma sa i ai, ma o lo o i ai, ma o le a i ai pea, e faapei o Moronae, faauta, po ua luluina lava mana o seoli e faavavau; ioe, po ua leai lava se mana o le ^atiapolo i luga o loto o le fanauga a tagata.

18 Faauta, o ia o se tagata sa pei o Amona, le atalii o Mosaea, ioe, ma isi foi atalii o Mosaea, ioe, ma Alema foi ma ona atalii, ona o i latou uma o ni tagata o le Atua.

19 O lenei faauta, sa le itiiti foi le auaunaga a Helamana ma ona uso i le nuu nai lo Moronae; ona sa latou tala’i atu le afioga a le Atua, ma sa latou papatiso i le salamo tagata uma o soo se tasi sa fia faalogo ia latou upu.

20 Ma sa faapea ona latou o atu, ma sa ^afaalotomaualaloina e tagata i latou lava ona o a latou upu, sa oo ina ^ealofagia tele ai i latou e le Alii, ma sa faapea ona tuusaoloto ai i latou mai taua ma finauga i totonu o i latou lava, ioe, mo le va lava o le fa tausaga.

21 Peitai, e pei ona ou fai atu, o le taufaaiuiuga o le lona sefulu ma le iva o tausaga, ioe, e ui lava i lo latou filemu i totonu o i latou lava, sa faamalosia toa’i i latou e tau ma o latou uso, o sa Lamanā.

22 Ioe, ma i se aotelega, sa le taofia lava a latou taua ma sa Lamanā mo le va o le tele o tausaga, e ui i lo latou mumusu tele.

23 O lenei, sa latou ^afaanoanoa e siitia a’e auupega e faasaga ia sa Lamanā, ona sa latou le fiafia i le faamasaaina o le toto; ioe, ma sa le ona pau lea—sa latou faanoanoa i le avea ma auala e auina atu ai i fafo le toatele o o latou uso mai lenei lalolagi i se lalolagi faavavau, ua le’i sauni e fetaiai ma lo latou Atua.

24 Ae ui i lea, sa le mafai ona latou tuu atu o latou ola, ina ia fasiotia a latou ^aavā ma a latou fanau e le saua faapaupau o i latou o e sa avea muamua ma o latou uso, ioe, ma ua ^efaatu’iese mai i la latou ekalesia, ma ua latou tuua i latou ma ua o atu e faaumatia i latou i le auai faatasi ma sa Lamanā.

25 Ioe, sa le mafai ona latou talitalia ia fiafia o latou uso i luga o le toto o sa Nifaē, pe a i ai lava ni isi o e e tausia poloaiga a le Atua, ona o le folafolaga a le Alii e faapea, afai latou te tausia ana poloaiga o le a latou manuia i le laueleele.