1 Ma sa oo i le amataga o le tausaga e tolusefulu ma le ono o le nofoaiga a faamasino i luga o le nuu o Nifae, na i ai i lalo o le tausiga a ^aSepulona ia mea ^epaia lea na tuuina atu ia Helamana e Alema.

2 Ma o ia o se tagata amiotonu, ma sa savali ma le tonu o ia i luma o le Atua; ma sa ia tausi e fai mea lelei e le aunoa, e tausi poloaiga a le Alii lona Atua; ma sa faapea foi lona uso.

3 Ma sa oo ina maliu foi Moronae. Ma sa faapea ona i’u o le tausaga e tolusefulu ma le ono o le nofoaiga a faamasino.

4 Ma sa oo i le tausaga e tolusefulu ma le fitu o le nofoaiga a faamasino, sa i ai se vaega toatele o tagata, sa oo le aofai i le lima afe ma le fa selau o tane, faatasi ma a latou avā ma a latou fanau, sa o ese mai le laueleele o Sara’emila agai atu i le laueleele lea sa i ^amatu.

5 Ma sa oo ina o Hakota, o ia o se tagata sogasogā tele, o lea na alu atu ai o ia ma fau mo ia se vaa tele lava, i tuaoi o le laueleele o Nuumau, i tafatafa o le laueleele o Tuufua, ma tuuvaa atu i le sami i sisifo, i tafatafa ane o le laueleele ^avaitiiti lea sa tau atu i le laueleele i matu.

6 Ma faauta, sa i ai le toatele o sa Nifaē sa ulu atu i totonu o lena vaa ma folau atu ai ma sauniuniga e tele, ma le toatele foi o fafine ma tamaiti; ma sa latou ala agai atu i matu. Ma sa faapea ona faaiu ai le tausaga e tolusefulu ma le fitu.

7 Ma i le tausaga e tolusefulu ma le valu, na fau ai e lenei tagata ni isi vaa. Ma sa toe foi mai le vaa muamua, ma sa sili atu le toatele o tagata na ulufale atu i ai i totonu; ma sa latou ave foi sauniuniga e tele, ma toe folau agai atu i le laueleele i matu.

8 Ma sa oo ina le toe faalogoina se tala e uiga ia te i latou. Ma ua matou manatu ua malelemo i latou i le loloto o le sami. Ma sa oo ina sa i ai foi se isi vaa e tasi sa folau atu; ma o le mea ua alu i ai, ua matou le iloa.

9 Ma sa oo ina sa toatele tagata o e na o atu i le laueleele i ^amatu i le tausaga lenei. Ma sa faapea ona i’u o le tausaga e tolusefulu ma le valu.

10 Ma sa oo i le tausaga e tolusefulu ma le iva o le nofoaiga a faamasino, na maliu ai foi Sepulona, ma sa alu Korianetona agai atu i le laueleele i matu i se vaa, e momoli atu meaai i tagata o e na muamua atu i lena laueleele.

11 O lea sa tatau ai ia Sepulona ona faaee atu ia mea paia, a’o le’i maliu o ia, i luga o le atalii o ^aHelamana, o lē na igoa ia Helamana, sa faaigoa i le igoa o lona tamā.

12 O lenei faauta, o ia ^atogitogiga uma sa i ai i le tausiga a Helamana sa tusia ma auina atu i totonu o le fanauga a tagata i le laueleele atoa, vagana ai vaega ia sa poloaiina e Alema e ^ele tatau ona auina atu.

13 Ae ui i lea, o nei mea sa poloaiina ia tausia i le paia, ma ^atuulima faasolo ifo mai le tasi tupulaga i le isi tupulaga; o lea, o le tausaga lenei, na faaee atu ai ia mea i luga o Helamana, ae lei maliu Sepulona.

14 Ma sa oo o le tausaga foi lenei sa i ai ni isi tagata faatuiese o e na o atu i sa Lamanā; ma sa toe faaosoina ai foi i latou i le ita e faasaga ia sa Nifaē.

15 Ma o le tausaga foi lenei e tasi na latou o ifo ai ma se autau toatele lava e tau faasaga mai i le nuu o ^aMoronaea, pe e faasagatau i le autau a Moronaea, lea na latou toilalo ai ma toe tutulia i tua i o latou lava laueleele, ma mafatia ai i se toesega tele.

16 Ma sa faapea ona i’u o le tausaga e tolusefulu ma le iva o le nofoaiga a faamasino i luga o le nuu o Nifae.

17 Ma ua faapea ona i’u o le tala a Alema, ma Helamana lona atalii, ma Sepulona foi, o lē o lona atalii.