1 Ma o lenei sa oo i le amataga o le tausaga e luasefulu ma le lima o le nofoaiga a faamasino i luga o le nuu o Nifae, ina ua uma lea ona latou faatuina o le filemu i le va o le nuu o Liae ma le nuu o Morianetona e uiga i o latou laueleele, ma ina uma ona amata o le tausaga e luasefulu ma le lima i le filemu;

2 Ae ui i lea, sa le’i umi ona latou tausia o se filemu atoatoa i le laueleele, ona sa amata ona i ai o se finauga i totonu o le nuu e uiga i le faamasino sili o Paorana; aua faauta, sa i ai se vaega o le nuu o e sa mananao e tatau ona suia ni matautu faapitoa o le tulafono.

3 Ae faauta, sa le manao Paorana e suia pe tuu atu le tulafono ia suia; o lea, sa ia le faalogo ai ia te i latou o e na momoli mai o latou manao faatasi ma a latou talosaga e uiga i le suia o le tulafono.

4 O lea, o i latou o e sa mananao e sui le tulafono sa feita ia te ia, ma mananao e tatau ona le toe avea o ia ma faamasino sili i luga o le laueleele; o lea na tupu mai ai se finauga tele e uiga i le mataupu, ae sa le’i oo i le faamasaatoto.

5 Ma sa oo ina o i latou o e na mananao e aveese Paorana mai le nofoa-faamasino, sa ta’ua o tagata-o-tupu, ona sa latou mananao e tatau ona sui le tulafono i se ala e aveese ai le malo saoloto ma ia faaee atu se tupu i luga o le laueleele.

6 Ma o i latou o e na mananao e tatau ona tumau pea Paorana ma faamasino sili i luga o le laueleele, sa latou ave i o latou luga le igoa o tagata-saoloto; ma sa faapea le vaeluaga sa i ai i totonu o i latou, ona sa tauto, pe sa osifeagaiga tagata-saoloto, e taofi mau a latou aia ma avanoa o la latou tapuaiga e ala i se malo saoloto.

7 Ma sa oo ina foia lenei mataupu o la latou finauga e le leo o le nuu. Ma sa oo ina oo mai le leo o le nuu, ua latou lagolagoina tagata-saoloto, ma sa tausia pea e Paorana le nofoa-faamasino, o se mea sa tupu mai ai se olioli tele i uso o Paorana ma le toatele foi o tagata o le saolotoga, o e na latou faafilemuina foi tagata-o-tupu, na latou fefefe ai e tetee ae ua faamalosia e tausi le faamoemoe o le saolotoga.

8 O lenei o i latou o e sa mananao i tupu o i latou ia o ^atamalii, ma sa latou saili ia avea i latou ma tupu; ma sa lagolagoina i latou e i latou o e sa latou saili le mana ma le pule i luga o le nuu.

9 Ae faauta, o se taimi ogaoga tele lea mo finauga faapea i totonu o le nuu o Nifae; aua faauta, ua toe faaoso e Amalekia loto o sa Lamanā e faasaga i tagata sa Nifaē, ma sa ia faapotopoto faatasi fitafita mai itu uma o lona laueleele, ma faaauupega i latou, ma sauniuni ma le filigā atoa mo le taua; ona sa ia ^atauto na te inuina le toto o Moronae.

10 Ae faauta, o le a tatou vaai ua vave lana folafolaga lea na ia fai; ae ui i lea, na ia saunia o ia lava ma ana autau e o mai e tau faasaga ia sa Nifaē.

11 O lenei sa le toatele ana autau e pei ona sa latou i ai i taimi ua mavae, ona o le tele o afe na fasiotia i lima o sa Nifaē; ae e ui i le toatele o i latou ua toesea, sa faapotopoto faatasi e Amalekia se autau ofoofogia le toatele, sa oo ina le fefe o ia e alu ifo i le laueleele o Sara’emila.

12 Ioe, sa alu ifo Amalekia lava ia, i le taimua ia sa Lamanā. Ma o le tausaga e lua sefulu ma le lima o le nofoaiga a faamasino na alu ifo ai; ma o le taimi lava lea na amata ai ona latou foia o mataupu o a latou finauga e uiga i le faamasino sili, o Paorana.

13 Ma sa oo ina ua faalogo tagata sa taua o tagata-o tupu ua o ifo sa Lamanā e tau faasaga mai ia te i latou, sa latou fiafia i o latou loto; ma sa latou mumusu e siitia ae auupega o taua, ona sa latou feita tele i le faamasino sili, ma ^atagata saoloto foi, sa latou le fia siitia ae ai auupega o taua e puipui ai lo latou atunuu.

14 Ma sa oo ina ua vaai atu Moronae i lenei mea, ma vaai atu foi ua o mai sa Lamanā i tuaoi o le laueleele, sa matuā ita tele o ia ona o le finauvale o ia tagata o e sa ia galue ma le filigā tele e faasaoina; ioe, sa ita tele lava o ia; sa tumu lona agaga i le ita ia te i latou.

15 Ma sa oo ina auina atu e ia se talosaga, faatasi ma le leo o le nuu, i le kovana o le laueleele, e manao e tatau ona ia faitau, ma tuu mai ia te ia (o Moronae) le pule e faamalosi ai tagata fouvale na, e puipui ai lo latou atunuu pe fasiotia i latou.

16 O lona popole muamua lava o le faamutaina lea o ia finauga ma fouvalega faapea i totonu o le nuu; aua faauta, o le mea lea sa avea ma pogai o o latou faafanoga uma. Ma sa oo ina tuuina mai lena pule e tusa ma le leo o le nuu.

17 Ma sa oo ina faatonu e Moronae e tatau ona o atu lana autau e faasagatau atu i ia tagata-o- tupu, ia toso i lalo lo latou faamaualuluga ma lo latou fiatamalii ma faalaugatasia i latou ma le eleele, po o lo latou siitia ae o auupega o taua ma lagolago le faamoemoe o le saolotoga.

18 Ma sa oo ina savavali atu autau e faasaga ia te i latou; ma sa latou tuutuu ifo lo latou faamaualuluga ma lo latou fiatamalii, sa oo ina a’o latou sii ae a latou auupega o taua e faasaga mai i tagata a Moronae, sa faamaualaloina i latou ma faalaugatasia ma le eleele.

19 Ma sa oo ina fa afe i latou o ia ^atagata fouvale o e na faatoilaloina i le pelu; ma o i latou o o latou taitai o e sa le’i fasiotia i le taua, sa ave ma lafo i le falepuipui, ona sa leai se taimi mo o latou faamasinoga i le vaitaimi lea.

20 Ma o le vaega na totoe o ia tagata fouvale, nai lo le taia i lalo i le eleele i le pelu, sa latou malolo mai i le tagavai o le saolotoga, ma faamalolosia e sisi le ^atagavai o le saolotoga i luga o o latou olo, ma i o latou aai, ma siitia a’e auupega o taua i le puipuiga o lo latou atunuu.

21 Ma sa faapea ona faaumaina e Moronae ia tagata-o-tupu, sa oo ina le toe i ai se isi sa taua i le igoa o tagata-o-tupu; ma sa faapea ona ia faaumaina o le finauvale ma le faamaualuluga o ia tagata o e sa fai mai ua ia i latou le toto tamalii; ae sa ave ifo i latou ina ia faalotomaualalaloina i latou lava e pei o o latou uso, ma tau ma le totoa mo lo latou saolotoga mai le pologa.

22 Faauta, sa oo ina faapea a o lepetia e ^aMoronae o taua ma finauga i totonu o ona lava tagata, ma pulea i latou i le filemu ma tumalamalama, ma faia tulafono e saunia ai mo taua e faasaga ia sa Lamanā, faauta, ua o mai sa Lamanā i le laueleele o Moronae, lea sa i tuaoi i tafatafa o le matafaga.

23 Ma sa oo ina sa le lava le malosi o sa Nifaē i le aai o Moronae; o lea na tutuli ai i latou e Amalekia, ma fasiotia le toatele. Ma sa oo ina maua e Amalekia le aai, ioe, e faapea ma o latou olo uma lava.

24 Ma o i latou o e na sosola mai le aai o Moronae, sa o mai i le aai o Nifaea; ma o tagata foi o le aai o Liae sa latou faapotopoto faatasi i latou lava, ma fai tapenapenaga ma sa saunia e tali sa Lamanā i le taua.

25 Peitai sa oo ina le tuu atu e Amalekia sa Lamanā e o atu e faasaga i le aai o Nifaea i le taua, ae sa ia taofia i latou i tafatafa o le matafaga, ma tuu tagata i aai taitasi e puleaina ma puipuia.

26 Ma sa faapea ona alu atu o ia, ma maua le tele o aai, o le aai o Nifaea, ma le aai o Liae, ma le aai o Morianetona, ma le aai o Ominea, ma le aai o Kita, ma le aai o Moleka, ia sa i ai uma i tuaoi i sasae i tafatafa o le matafaga.

27 Ma sa faapea ona maua e sa Lamanā, i le faitogafiti o Amalekia, le tele naua o aai, e ala ia latou au e le masino, o aai uma ia sa tu’iolo malolosi e tusa ma le ala o ^atu’iologa a Moronae; o aai uma ia na maua ai e sa Lamanā ni olo malolosi.

28 Ma sa oo ina latou savavali atu i tuaoi o le laueleele o Nuumau, ma tutuli sa Nifaē i o latou luma ma fasiotia le toatele.

29 Peitai sa oo ina faafetaiai i latou e Teanekuma, o le na ^afasiotia Morianetona ma taofia mai ona tagata i lana solaaga.

30 Ma sa oo foi ina ia taofia Amalekia, ao savavali atu o ia faatasi ma lana autau toatele ina ia mafai ona fai ma ia le laueleele o Nuumau, ma le laueleele foi i matu.

31 Ae faauta sa ia feiloai ma le faanoanoa i le faafetaui mai o ia e Teanekuma ma ona tagata, ona o i latou o ni fitafita tau silisili; ona o tagata taitoatasi o Teanekuma sa sili atu lo latou malosi ma lo latou tomai i taua i lo sa Lamanā, sa oo ina latou maua ai se tulaga sili a’e i lo sa Lamanā.

32 Ma sa oo ina latou osofaia i latou, sa oo ina latou fasia i latou seia oo lava ina pogisa. Ma sa oo ina faatutū e Teanekuma ma ona tagata o latou faleie i tuaoi o le laueleele o Nuumau; ae faatutū e Amalekia ona faleie i tuaoi i le faga i tafatafa o le matafaga, ma sa faapea le ala sa tutulia ai i latou.

33 Ma sa oo ina ua oo mai le po, sa tolotolo lemu atu Teanekuma ma lana auauna ma ua o atu i le po, ma agai atu i le togalauapi a Amalekia; ma faauta, ua manumalo le moe ia te i latou ona o lo latou vaivai tele, lea na mafua mai i galuega ma le vevela o le aso.

34 Ma sa oo ina tolotolo faalilolilo atu Teanekuma i totonu o le faleie o le tupu, ma tutui se tao i lona fatu; ma sa ia faaoo vave lava le oti i le tupu sa le fafagua e ia ana auauna.

35 Ma sa ia toe foi faalilolilo mai i lona lava togalauapi, ma faauta, sa momoe ona tagata, ma sa ia fafagu i latou ma ta’u atu ia te i latou mea uma na ia faia.

36 Ma sa ia faatonu atu e tatau ona nonofo sauniuni lana autau, nei feala mai sa Lamanā ma osofaia i latou.

37 Ma sa faapea ona i’u o le lona luasefulu ma le lima o tausaga o le nofoaiga a faamasino i luga o le nuu o Nifae; ma sa faapea ona i’u o aso o Amalekia.