Alema 49

Mataupu 49

Ua le mafai e le osofaiga a sa Lamanā ona faatoilalo aai tuiolo o Amonaea ma Noa—Ua upuleaga e Amalekia le Atua ma ua tauto na te inuina le toto o Moronae—Ua faaauau e Helamana ma ona uso ona faamalosi le Ekalesia. E tusa o le 72 T.L.M.

1 Ma o lenei sa oo i le masina e sefulu tasi o le lona sefulu iva o tausaga, i le aso sefulu o le masina, na vaaia ai autau a sa Lamanā ua agai latalata atu i le laueleele o Amonaea.

2 Ma faauta, sa uma ona toe fausia o le aai, ma sa tuu e Moronae se autau i tafatafa o tuaoi o le aai, ma sa latou lafo i luga le eleele faataamilo e puipuia ai i latou mai i ufanafana ma maa a sa Lamanā; aua faauta, sa latou tau i maa ma ufanafana.

3 Faauta, ua ou fai atu sa toe fausia le aai o aAmonaea. Ou te fai atu ia te outou, ioe, sa toe fausia se vaega; ma ona sa faaumatia e sa Lamanā i se taimi muamua ona o le amioletonu o tagata, o lea na latou manatu ai o le a faigofie ona latou toe mauaina mo i latou.

4 Ae faauta, sa matua tele lava lo latou faanoanoa; aua faauta, sa eli e sa Nifaē se faupuega o eleele faataamilo ia i latou, lea sa matua maualuga tele lava sa le mafai e sa Lamanā ona ta a latou maa ma fana a latou ufanafana ia te i latou ina ia lavevea ai, pe na mafai foi ona latou o mai i luga o i latou vagana ai ua ala mai i lo latou nofoaga e ulu mai ai.

5 O lenei sa matua ofo lava kapeteni sili o sa Lamanā i le taimi lea, ona o le popoto o sa Nifaē i le sauniuniga o o latou nofoaga o le saogalemu.

6 O lenei sa manatu taitai o sa Lamanā, ona o le toatele o lo latou aofai, ioe, sa latou manatu e tatau ona latou maua le avanoa latou te o mai ai i luga o i latou e pei ona latou faia muamua; ioe, ma sa latou saunia foi i latou lava faatasi ma talita, ma ufifatafata; ma sa latou saunia foi i latou lava faatasi ma ofu pau, ioe, o ofu mafiafia lava e ufiufi ai lo latou le lavalava.

7 Ma ona sa faapea ona latou saunia, sa latou manatu ai o le a faigofie ona latou faatoilalo ma pulea o latou uso i le amo o le pologa, pe fasioti ma fasi faatauna i latou e tusa ma lo latou loto.

8 Ae faauta, i lo latou ofo tele, sa asaunia i latou mo i latou, i se ala sa lei iloa lava i totonu o le fanau a Liae. O lenei sa latou saunia mo sa Lamanā, e tau e tusa ai ma faatonuga a Moronae.

9 Ma sa oo ina matua ofo tele sa Lamanā, po o sa Amalekiā, i le ala sa latou saunia ai mo taua.

10 O lenei, a na sau i lalo i fafo o le alaueleele o Nifae le tupu o Amalekia, e taimua i lana autau, atonu ua ia faatonu sa Lamanā ia latou osofaia sa Nifaē i le aai o Amonaea; aua faauta, sa le popole o ia mo le toto o ana tagata.

11 Ae faauta, sa lei sau i lalo Amalekia lava ia e tau. Ma faauta, sa fefefe ana kapeteni sili e osofai sa Nifaē i le aai o Amonaea, ona ua sui e Moronae le puleaina o mea i totonu o sa Nifaē, sa oo ina faanoanoa sa Lamanā i o latou nofoaga tuumuli ma sa le mafai ona latou o atu i luga o i latou.

12 O lea na latou tuumuli atu ai i le vao, ma alu la latou togalauapiga ma savavali atu agai i le laueleele o Noa, i le manatu o le nofoaga lena e sosoo le sili ona lelei mo i latou e o atu i ai e osofai ai sa Nifaē.

13 Ona sa latou le iloa ua uma ona tuiolo e Moronae, pe ua uma ona ia fausia o aolo puipui, mo aai taitasi i le laueleele faataamilo atoa; o lea na latou savavali atu ai i le laueleele o Noa ma se mauai maumaututu; ioe, sa o mai i luma o latou kapeteni sili ma faia se tautoga o le a latou faaumatiaina tagata o le aai lena.

14 Ae faauta, i lo latou ofo tele, o le aai o Noa, lea sa avea ma nofoaga vaivai i aso ua mavae, ua avea nei, ona o Moronae, ma aai malosi, ioe, ua sili atu i le malosi o le aai o Amonaea.

15 Ma o lenei, faauta, o le poto lea sa ia Moronae; ona sa manatu o ia o le a latou matatau i le aai o Amonaea; ma ona o le aai o Noa sa avea ma vaega aupito sili ona vaivai o le laueleele i aso ua mavae, o lea o le a latou savavali atu ai iina e tau ai; ma sa faapea lava ona oo e tusa ma ona manao.

16 Ma faauta, sa tofia e Moronae o Liae e avea ma kapeteni sili i luga o tane o lena aai; ma o Liae alava lea o le na tau ma sa Lamanā i le vanu i le itu i sasae o le vaitafe o Saitonu.

17 Ma o lenei faauta sa oo ina ua iloa e sa Lamanā o Liae ua pulea le aai sa latou toe faanoanoa, ona sa latou fefefe tele ia Liae; e ui i lea sa faia e o latou kapeteni sili se tautoga e osofai le aai; o lea na latou avae ai a latou autau.

18 O lenei faauta, sa le mafai e sa Lamanā ona o atu i totonu o o latou olo o le saogalemu i se isi lava ala vagana ai i le mea e ulu mai ai, ona o le maualuga o le faupuega sa ati i luga, ma le loloto o le utu sa eli faataamilo ai, vagana ai i le mea e ulu mai ai.

19 Ma sa faapea ona saunia o sa Nifaē e faaumatia i latou uma o e e taumafai e feaei ae i luga e ulu mai totonu i le olo i soo se isi lava auala, i le ta atu i luga o maa ma le fana atu o ufanafana ia i latou.

20 Sa faapea ona latou saunia, ioe, o se vaega o o latou tane malolosi, latou te ta i lalo ia latou pelu ma a latou maata, i latou uma o e e taumafai e o mai i totonu o lo latou nofoaga o le saogalemu e ala mai i le mea e ulu mai ai; ma sa faapea ona latou saunia e puipui i latou lava e faasaga ia sa Lamanā.

21 Ma sa oo ina avae e kapeteni a sa Lamanā a latou autau i luma o le mea e ulu mai ai, ma amata ona tau ma sa Nifaē, ina ia o mai i totonu o lo latou nofoaga o le saogalemu; ae faauta, sa tulia i latou i tua mai lea taimi i lea taimi, sa oo ina fasiotia i latou i se fasiga tele.

22 O lenei ina ua latou iloa ua le mafai ona latou maua se mana i luga o sa Nifaē i le mea e ui mai ai, sa amata ona latou eli i lalo o latou faupuega eleele ina ia mafai ona latou maua o se ala mo a latou autau, ina ia mafai ona latou maua se avanoa tutusa e tau ai; ae faauta, i ia taumafaiga, sa tafi ese ai i latou i maa ma ufanafana na sasau ma fana atu ia te i latou; ma nai lo le faatumuina o o latou utu i le solofa i lalo o faupuega eleele, sa faatumuina se vaega o ia utu i o latou tagata oti ma tagata manunua.

23 Sa faapea ona maua e sa Nifaē le mana atoatoa i luga o o latou fili; ma sa faapea ona taumafai o sa Lamanā e faaumatia sa Nifaē seia oo ina fasiotia uma ai o latou kapeteni sili; ioe, ma e sili atu i le afe sa Lamanā sa fasiotia; ae, i le isi itu, sa leai se tagata e toatasi o sa Nifaē na fasiotia.

24 Sa i ai le pe a ma le lima sefulu o e na manunua, o e na aliali i ufanafana a sa Lamanā i le mea e ui mai ai, peitai sa puipuia i latou ia latou talita, ma a latou ufifatafata, ma o latou puloutau, sa oo o le tele o o latou manunua sa i o latou vae, ma o le tele o ia manua sa leaga tele.

25 Ma sa oo ina ua vaai sa Lamanā ua fasiotia uma o latou kapeteni sili, sa latou sosola i le vao. Ma sa oo ina latou toe foi atu i le laueleele o Nifae, e tau i lo latou tupu, o Amalekia, o le o se sa Nifaē i lona fanau mai, e uiga i lo latou toesea tele.

26 Ma sa oo ina ita tele o ia i ana tagata, ona ua le taulau lona manao mo sa Nifaē; sa le mafai e ia ona pulea i latou i le amo o le pologa.

27 Ioe, sa ita tele o ia, ma sa ia aupuvale i le Atua, ma Moronae foi, ma tauto i se etautoga o le a ia inuina lona toto; ma o le pogai o lenei mea ona sa tausi e Moronae poloaiga a le Atua i le saunia mo le saogalemu o ona tagata.

28 Ma sa oo i le tasi itu, sa afaafetai atu le nuu o Nifae i le Alii lo latou Atua, ona o lona mana le mafaatusalia i le laveaiina o i latou mai lima o o latou fili.

29 Ma sa faapea ona iu o le lona sefulu iva o tausaga o le nofoaiga a faamasino i le nuu o Nifae.

30 Ioe, ma sa i ai le filemu faaauau pea i totonu o i latou, ma le manuia tele lava i le ekalesia ona o lo latou uai atu ma le filiga sa latou tuuina atu i le afioga a le Atua, lea sa talai atu ia te i latou e Helamana, ma Sepulona, ma Korianetona, ma Amona ma ona uso, ioe, ma i latou uma o e na faauuina i le afaatulagaga paia a le Atua, ua papatisoina i le salamo, ma auina atu e talai i totonu o le nuu.