1 Ma sa oo i le lona sefulu tasi o tausaga o le nofoaiga a faamasino i luga o le nuu o Nifae, i le aso lona lima o le masina lona lua, sa i ai le filemu tele i le laueleele o Sara’emila, ona sa leai ni taua po o ni finauga mo ni nai tausaga, seia oo mai i le aso lona lima o le masina lona lua i le sefulu tasi o tausaga, lea na faalogoina ai se alaga o le taua i le laueleele atoa.

2 Aua faauta, sa o mai autau a sa Lamanā i luga a’e i le itu o le vao, i tuaoi o le laueleele, seia oo mai i le aai o ^aAmonaea, ma amata ona fasiotia tagata ma faaumatia le aai.

3 Ma o lenei sa oo ina lei mafai e sa Nifaē ona faatu se autau ia lava e tutuli ese ai i latou mai le laueleele, sa latou ^afaaumatiaina tagata o e sa i le aai o Amonaea, ma isi foi sa i tuaoi o Noa, ma ave isi faatagataotaua i le vao.

4 O lenei sa oo ina mananao sa Nifaē ia maua mai i latou o e na aveese atu faatagataotaua i le vao.

5 O lea, o ia o le na tofia e avea ma kapeteni sili i luga o autau a sa Nifaē, (ma o lona igoa o Sorama, ma sa ia te ia ni atalii e toalua, o Liae ma Asa)—o lenei ina ua iloa e Sorama ma ona atalii e toalua, o Alema o le faitaulaga sili o le ekalesia, ma ina ua faalogo ua ia te ia le agaga o valoaga, o lea na latou o atu ai ia te ia ma talosaga atu ia te ia e fia iloa po o fea e finagalo le Alii latou te o atu i ai i le vao e saili ai o latou uso, o e na ave faatagataotaua e sa Lamanā.

6 Ma sa oo ina ^aole atu Alema i le Alii e uiga i le mataupu. Ma sa toe foi mai Alema ma fai atu ia te i latou: Faauta, o le a sopoia e sa Lamanā le vaitafe o Saitonu i le vao i le itu i saute, e mamao ese i luga i tala atu o tuaoi o le laueleele o Maneti. Ma faauta o iina o le a outou fetaiai ai ma i latou, i le itu i sasae o le vaitafe o Saitonu, ma o iina o le a tuu atu ai e le Alii ia te oe ou uso o e ua ave faatagataotaua e sa Lamanā.

7 Ma sa oo ina sopoia e Sorama ma ona atalii le vaitafe o Saitonu, faatasi ma a latou autau, ma savavali ese atu i tala atu o tuaoi o Maneti i le vao i le itu i saute, lea sa i le itu i sasae o le vaitafe o Saitonu.

8 Ma sa latou o atu i autau a sa Lamanā, ma sa faataapeapeina sa Lamanā ma tutulia i le vao; ma sa latou ave o latou uso o e na ave faatagataotaua e sa Lamanā, ma sa leai se tagata e toatasi o i latou o e na ave faatagataotauaina na leiloa. Ma sa aumai i latou e o latou uso e nonofo i o latou lava laueleele.

9 Ma sa faapea ona iu o le lona sefulu tasi o tausaga o faamasino, ua tutuli ese sa Lamanā mai le laueleele, ma ua ^afaaumatia tagata o Amonaea; ioe, sa ^efaaumatia tagata ola uma o sa Amonaeā, ma lo latou aai tele foi, lea sa latou fai mai e le mafai e le Atua ona faaumatia, ona o lona malosi.

10 Ae faauta, e ^atasi le aso ua tuufua ai; ma sa faataugā e ulī ma manu feai o le vao ia tino o tagata oti.

11 Ae ui i lea, ina ua mavae ni aso e tele, sa faaputuina o latou tino oti i luga o le fogaeleele, ma sa tanumia i latou i se fanuatanu papa’u. Ma o lenei sa matuā malosi tele lo latou manogi sa le o atu i ai tagata mo le tele o tausaga e fai mo i latou le laueleele o Amonaea. Ma sa ta’ua o le Tafuna’iga a le au Ne’oā; ona o i latou o ē na fasiotia, o i latou ia o le faatuatuaga a ^aNe’oa; ma ua tumau le tuufua o o latou laueleele.

12 Ma sa le toe o mai sa Lamanā e faasagatau mai ia sa Nifaē seia oo i le lona sefulu fa o tausaga o le nofoaiga a faamasino i nuu o Nifae. Ma sa faapea ona maua ai e le nuu o Nifae le filemu e le aunoa i le laueleele atoa mo le tolu o tausaga.

13 Ma sa o atu Alema ma Amoleka ma tala’i atu le salamo i tagata i o latou ^amalumalu, ma i o latou falesa, ma i o latou ^esunako foi, ia na fausia e tusa ma le ala a tagata Iutaia.

14 Ma o le toatele o e na fia faalogologo ia laua upu, o i latou ia sa la avatu pea lava i ai le afioga a le Atua, e aunoa ma se ^afaailoga tagata.

15 Ma sa faapea ona o atu o Alema ma Amoleka, ma le toatele atu foi o e na filifilia mo le galuega, e tala’i atu ana afioga i le laueleele atoa. Ma o le faatuina o le ekalesia sa faalauteleina i le laueleele atoa, i itulagi uma o faataamilo ai, i totonu o tagata uma o sa Nifaē.

16 Ma sa ^aleai se faailoga tagata i totonu o i latou; sa liligi ifo e le Alii lona Agaga i luga o le laueleele atoa e saunia ai mafaufau o le fanauga a tagata, pe saunia ai o latou ^eloto, e talia ana afioga lea o le a a’oa’oina i totonu o i latou i le taimi o lona afio mai—

17 Ina ia latou lē faamaaa e faasaga i ana afioga, ina ia lē mafai ona latou lē talitonu, ma o atu ai i le faafanoga, ae ia mafai ai ona latou talia ana afioga ma le olioli, ma sulu i totonu ia avea o se ^alālā o le ^evine, ina ia mafai ona latou ulu atu i le ⁱmalologa o le Alii lo latou Atua.

18 O lenei o ^afaitaulaga na o e na o atu i totonu o le nuu sa latou tala’i atu e faasaga i pepelo uma, ma le ^etaufaasee, ma le ⁱlosilosivale, ma finauga, ma le taufaaleaga, ma le taufaifai, ma le gaoi, faomea, vete, fasioti tagata, faia o le mulilua, ma ituaiga uma o faitaaga; ma alalaga atu, e lē tatau ona i ai o nei mea—

19 Ma folafola atu mea ua lata ona oo mai; ioe, folafola atu le ^aafio mai o le Alo o le Atua, o ona mafatiaga ma lona maliu, ma le toetutu mai foi o e ua oti.

20 Ma e toatele tagata sa fesili e uiga i le nofoaga o le a afio mai i ai le Alo o le Atua; ma sa a’oa’oina i latou o le a ^aafio mai o ia ia te i latou pe a ^emavae lona toetu mai; ma o lenei mea sa faalogo mai i ai tagata ma le olioli tele ma le fiafia.

21 Ma o lenei ina ua uma ona faatumauina o le ekalesia i le laueleele atoa—ina ua maua le ^amanumalo i le tiapolo, ma ua tala’i atu le afioga a le Atua i lona mamā i le laueleele uma, ma ua liligi ifo e le Alii ana faamanuiaga i luga o tagata—sa faapea ona ’u o le lona sefulu fa o tausaga o le nofoaiga a faamasino i le nuu o Nifae.