Alema 28

Mataupu 28

Ua faatoilaloina sa Lamanā i se taua matautia tele—Ua fasiotia le tai sefulu o afe—Ua tuu e amioleaga i se tulaga o le malaia e le gata; e maua e e amiotonu se fiafia e le gata. E tusa o le 77–76 T.L.M.

1 Ma o lenei sa oo ina ua mavae ona faamautuina o le nuu o Amona i le laueleele o aSeasona, ma faatuina foi se aulotu i le laueleele o Seasona, ma faatutuina autau a sa Nifaē faataamilo i le laueleele o Seasona, ioe, i tuaoi uma faataamilo i le laueleele o Saraʼemila; faauta sa mulimuli mai autau a sa Lamanā i o latou uso i le vao.

2 Ma sa faapea ona faia ai o se taua matautia tele; ioe, o se taua matautia tele faapea e lei vaaia muamua i totonu o tagata uma i le laueleele mai i le taimi na tuua ai Ierusalema e Liae; ioe, ma sa tai sefulu o afe o sa Lamanā na fasiotia ma faasalalau solo.

3 Ioe, ma sa i ai foi se fasiga tele i totonu o le nuu o Nifae; e ui i lea, sa atutulia ma faasalalauina sa Lamanā, ma toe foi mai tagata o Nifae i lo latou laueleele.

4 Ma o lenei o se taimi lea sa i ai se faanoanoa ma se auega tele sa faalogoina i le laueleele atoa, i totonu o tagata uma o Nifae—

5 Ioe, o le tagi a fafine na oti a latou tane i le faanoanoa mo a latou tane, ma tamā foi i le faanoanoa mo o latou atalii, ma le afafine mo le tuagane, ioe, o le tuagane mo le tamā; ma sa faapea ona faalogoina o le tagi o le faanoanoa i totonu o i latou uma, i le faanoanoa mo tagata o o latou aiga o e ua fasiotia.

6 Ma o lenei e moni o se aso sa faanoanoa tele lea; ioe, o se taimi o le mafaufau loloto, ma o se taimi o le aanapogi tele ma le tatalo.

7 Ma sa faapea ona iu o le lona sefulu lima o tausaga o le nofoaiga a faamasino i luga o le nuu o Nifae;

8 Ma o le tala lenei e uiga ia Amona ma ona uso, a latou malaga i le laueleele o Nifae, o latou mafatiaga i le laueleele, o latou faanoanoaga, ma o latou puapuaga, ma lo latou aolioli le mafuatia, ma le taliaina ma le saogalemu o le au uso i le laueleele o Seasona. Ma o lenei ia talosia ia faamanuiaina o latou agaga e le Alii, le Togiola o tagata uma, e faavavau.

9 Ma o le tala lenei o taua ma finauga i totonu o sa Nifaē, ma taua foi i le va o sa Nifaē ma sa Lamanā; ma ua iu le lona sefulu lima o tausaga o le nofoaiga a faamasino.

10 Ma mai i le tausaga muamua i le tausaga e sefulu lima, na aumai ai le faafanoga o le tele o afe o ola; ioe, na oo mai ai se vaaiga matautia o le faamasaatoto.

11 Ma o tino o le tele o afe o tagata ua faataooto maualalalo i le eleele, ao tino o isi afe e tele ua apalanai i faupuega i luga o le eleele; ioe, ma e tele afe o tagata ua efaanoanoa i le toesea o tagata o o latou aiga ua fasiotia, ona sa ia te i latou se pogai sa matatau ai, e tusa ma folafolaga a le Alii, ua tuuina i latou i se tulaga o le malaia e le gata.

12 Ao o le tele o afe o isi tagata sa faanoanoa moni i le toesea o tagata o o latou aiga, peitai sa latou olioli ma fiafia i le faamoemoe, ma e oo lava i lo latou mautinoa, e tusa ma afolafolaga a le Alii, e faatutu mai i latou e mau i le itu taumatau o le Atua, i se tulaga o le fiafia e le gata.

13 Ma ua faapea ona tatou vaai ai i le a tutusa tele o tagata ona o le agasala ma le solitulafono, ma le mana o le tiapolo, lea e ala mai i efuafuaga faitogafiti ia ua ia faia e mailei ai loto o tagata.

14 Ma ua faapea ona tatou vaai ai i le valaau malosi atu i tagata ia filiga e galulue i atovine o le Alii; ma ua faapea ona tatou vaai ai i le pogai tele o le faanoanoa, ma o le olioli foi—o le faanoanoa ona o le oti ma faafanoga i totonu o tagata, ma o le olioli ona o le emalamalama o Keriso i le ola.