Alema 50

Mataupu 50

Ua tuiolo e Moronae laueleele o sa Nifaē—Ua latou fausia ni aai fou e tele—E pauu ifo taua ma faafanoga i luga o sa Nifaē i aso o lo latou amioleaga ma fai mea inosia—Ua faatoilaloina Morianetona ma ana tagata faatuiese e Teanekuma—Ua maliu Nifaea, ma ua nofo lona atalii o Paorana i le nofoa-faamasino. E tusa o le 72–67 T.L.M.

1 Ma o lenei sa oo sa le taofia e Moronae le faia o sauniuniga mo taua, po o le leoleoina o ona tagata e faasaga ia sa Lamanā; ona sa ia faatonu atu ia amata e ana autau i le amataga o le tausaga e lua sefulu o le nofoaiga a faamasino, e tatau ona amata ona latou eli i luga faupuega eleele faataamilo i aai uma, i le laueleele atoa lea sa maua e sa Nifaē.

2 Ma i le tumutumu o ia faupuega eleele sa ia faatonu atu e tatau ona i ai ni laau tetele, ioe, se pa laau tetele e tusa ma le maualuga o se tagata, e faatutu faataamilo i aai.

3 Ma sa ia faatonu atu ia fausia faataamilo i luga o ia pa laau tetele, se pa laau maamaai; ma sa malolosi ma maualuluga.

4 Ma sa ia faatonu ia fausia ni olo e iloa atu ai ia pa laau maamaai, ma sa ia faatonu atu ia fausia ni nofoaga o le saogalemu i luga o ia olo, ina ia le mafai ona latou lavevea i maa ma ufanafana a sa Lamanā.

5 Ma sa latou saunia ina ia mafai ona latou lafo ifo o maa mai le tumutumu o ia olo, e tusa ma o latou loto ma lo latou malolosi, ma fasioti o ia o le e taumafai e faalatalata mai i le pa o le aai.

6 Ma sa faapea ona saunia e Moronae nofoaga malolosi faataamilo i aai taitasi i le laueleele atoa, aua le o mai o o latou fili.

7 Ma sa oo ina faatonu e Moronae ana autau ia latou o atu i le vao i sasae; ioe, ma sa latou o atu ma tutuli ese atu sa Lamanā uma o e sa i ai i le vao i sasae i o latou lava laueleele, ia sa i saute o le laueleele o Saraʼemila.

8 Ma o le laueleele o Nifae sa taoto i se laina sao mai le sami i sasae e oo atu i sisifo.

9 Ma sa oo ina ua uma ona tutuli ese i fafo e Moronae sa Lamanā uma mai le vao i sasae, lea sa i le itu i matu o o latou lava laueleele ua maua, sa ia faatonu atu e tatau i tagata o e sa i le laueleele o Saraʼemila ma le laueleele faataamilo ai, ona o atu i le vao i sasae, sei oo atu i tuaoi i tafatafa o le matafaga, ma fai mo i latou le laueleele.

10 Ma sa ia tuu foi autau i le itu i saute, i tuaoi o o latou laueleele; ma faatonu i latou ia faatutu ni aolo ina ia mafai ona latou puipui a latou autau ma o latou tagata mai lima o o latou fili.

11 Ma sa faapea ona ia tapui o vaega malolosi uma o sa Lamanā i le vao i sasae, ioe, ma le itu foi i sisifo, ma tuiolo le laina i le va o sa Nifaē ma sa Lamanā, i le va o le laueleele o Saraʼemila ma le laueleele o Nifae, mai i le sami i sisifo, e faasolo atu i tafatafa o le mata o le vaitafe o Saitonu—ua maua ai e sa Nifaē le laueleele uma i matu, ioe, le laueleele uma lava lea sa i le itu i matu o le laueleele o Nuumau, e tusa ma lo latou manao.

12 Sa faapea ona saili o Moronae, faatasi ma ana autau, ia sa faatoateleina i aso taitasi ona o le mautinoa o le puipuiga lea sa oo mai i o latou luga i ana galuega, e tapui le malosi ma le pule a sa Lamanā mai o latou laueleele, ina ia leai sa latou pule i luga o o latou laueleele.

13 Ma sa oo ina amata ona faia e sa Nifaē le faavae o se aai, ma sa latou taua le igoa o le aai o Moronae; ma sa tu i tafatafa o le sami i sasae; ma sa i le itu i saute i tafatafa o le laina o laueleele o sa Lamanā.

14 Ma sa amata foi ona latou faia o se faavae mo se aai i le va o le aai o Moronae ma le aai o Arona, ua sosoo faatasi ai tuaoi o Arona ma Moronae. Ma sa latou taua le igoa o le aai, po o le laueleele, o Nifaea.

15 Ma sa latou amata foi i lena lava tausaga ona fausia aai e tele i le itu i matu, o se tasi sa latou fausia i se ala ese lava sa latou faaigoaina o Liae, lea sa i le itu i matu i tafatafa o tuaoi o le matafaga.

16 Ma sa faapea ona iu o o le tausaga e lua sefulu.

17 Ma o tulaga ia o le manuia sa i ai le nuu o Nifae i le amataga o le tausaga e lua sefulu ma le tasi o le nofoaiga a faamasino i le nuu o Nifae.

18 Ma sa latou manuia tele lava, ma sa latou mauoa tele; ioe, ma sa latou uluola ma solo malolosi i le laueleele.

19 Ma ua faapea ona tatou vaai ai i le alofa mutimutivale tele ma le tonu o aloaiga uma a le Alii, i le faataunuuina o ana fetalaiga uma i le fanauga a tagata; ioe, e mafai ona tatou vaai, i le taimi nei lava, i le faamaonia o ana afioga ia na ia fetalai ai ia Liae, fai mai:

20 Amuia lava oe ma lau fanau; ma o le a faamanuiaina i latou; o le tulaga e oo i ai la latou tausiga o au poloaiga o le a latou manuia i le laueleele. Ae ia manatua, o le tulaga e oo i ai la latou lē tausia o au poloaiga o le a avavae ese i latou mai luma o le Alii.

21 Ma ua tatou vaai ua faamaonia ia folafolaga i le nuu o Nifae; ona o a latou misa ma a latou finauga, ioe, a latou fasiotiga tagata, ma a latou vetega, lo latou ifo i tupua, a latou faitaaga, ma lo latou fai mea inosia, sa i ai i totonu o i latou lava, na aumai ai i luga o i latou a latou taua ma o latou faafanoga.

22 Ma o i latou o e sa faamaoni i le tausiga o poloaiga a le Alii sa laveaiina i taimi uma, ao le afe ma afe o o latou uso amioleaga sa tuu atu i le pologa, pe fano i le pelu, pe faaitiitia i le le talitonu, ma aufaatasi ma sa Lamanā.

23 Ae faauta sa leai se ataimi sili ona fiafia i totonu o le nuu o Nifae, talu mai aso o Nifae, nai lo aso o Moronae, ioe, e oo mai lava i le taimi nei, i le tausaga lea e lua sefulu ma le tasi o le nofoaiga a faamasino.

24 Ma sa oo ina iu foi i le filemu le tausaga e lua sefulu ma le lua o le nofoaiga a faamasino; ioe, ma le tausaga foi e lua sefulu ma le tolu.

25 Ma sa oo i le amataga o le tausaga e lua sefulu ma le fa o le nofoaiga a faamasino, semanu foi e i ai le filemu i totonu o le nuu o Nifae, pe a na leai se afinauga na tupu mai i totonu o i latou e uiga i le laueleele o Liae ma le laueleele o Morianetona, lea sa sosoo ma tuaoi o Liae; ia sa i ai uma i tuaoi i tafatafa o le matafaga o le sami.

26 Aua faauta, o tagata o e sa mau i le laueleele o Morianetona, sa fai mai e o latou se vaega o le laueleele o Liae; o lea na amata ai se finauga vevela i lo latou va, sa oo ina sii ai e le nuu o Morianetona auupega o taua e faasaga i o latou uso, ma sa latou mauai e fasioti i latou i le pelu.

27 Ae faauta, sa sosola tagata sa nonofo i le laueleele o Liae i le togalauapi a Moronae, ma aioi atu ia te ia mo se fesoasoani; aua faauta sa latou le sese.

28 Ma sa oo ina ua iloa e le nuu o Morianetona, o e sa taitaia e se tagata sa igoa ia Morianetona, ua sosola atu le nuu o Liae i le togalauapi a Moronae, sa latou matatau tele lava nei o mai le autau a Moronae i luga o i latou ma faaumatia i latou.

29 O lea, na tuu ai e Morianetona i o latou loto, ia latou sosola atu i le laueleele lea sa i le itu i matu, lea sa ufitia i vaituloto tetele, ma ave mo i latou le laueleele lea sa i le itu i matu.

30 Ma faauta, semanu latou te faataunuuina lenei fuafuaga, (lea semanu e tupu mai ai se faanoanoa) ae faauta, ona o Morianetona o se tagata faalii tele, o lea na ita ai o ia i se tasi o ana auauna fafine, ma ia oo atu ai ia te ia ma fasi tele ia te ia.

31 Ma sa oo ina sola le auauna fafine, ma sau i le togalauapi a Moronae, ma tau mai ia Moronae mea uma e uiga i le mataupu, ma e uiga foi i lo latou faamoemoe e sosola atu i le laueleele i le itu i matu.

32 O lenei faauta, o tagata sa i le laueleele o Nuumau, po o Moronae, sa popole nei o latou faalogo i upu a Morianetona ma aufaatasi ai ma ona tagata, ma faapea ona ia maua ai o vaega na o le laueleele, lea o le a faataatia ai se faavae o iuga tuga i totonu o le nuu o Nifae, ioe, iuga ia e tau i le faatoilaloina o lo latou asaolotoga.

33 O lea na auina atu ai e Moronae se autau, faatasi ma la latou togalauapi, e sisio mai tagata o Morianetona, e taofi la latou solaaga i le laueleele i matu.

34 Ma sa oo ina latou le sisio maia i latou seia oo ina latou oo atu i tuaoi o le laueleele o aTuufua; ma o iina na latou sisio mai ai i latou, i tafatafa o le ala vaapiapi lea sa ui atu i tafatafa o le sami e tau i le laueleele i matu, ioe, i tafatafa o le sami, i le itu i sisifo ma le itu i sasae.

35 Ma sa oo ina fetaiai le autau na auina atu e Moronae, lea na taitai e se tagata o lona igoa o Teanekuma, ma tagata o Morianetona; ma sa matua finauvale tele tagata o Morianetonu, (ona sa uunaia i latou e lona amioleaga ma ana upu faaviivii) sa oo ina tupu se taua i lo latou va, lea na fasioti ai Morianetona e Teanekuma ma faatoilalo lana autau, ma ave i latou faapagota, ma toe foi mai i le togalauapi a Moronae. Ma sa faapea ona iu o le tausaga e lua sefulu ma le fa o le nofoaiga a faamasino i luga o le nuu o Nifae.

36 Ma sa faapea ona toe aumai o le nuu o Morianetona. Ma i luga o lo latou osifeagaiga e tausi le filemu, na toefuatai atu ai i latou i le laueleele o Morianetona, ma sa faia se sootaga i lo latou va ma le nuu o Liae; ma sa toefuatai foi i latou i o latou laueleele.

37 Ma sa oo i le tausaga lava lea na toefuatai mai ai e le nuu o Nifae le filemu ia te i latou, na maliu ai Nifaea, le faamasino sili lona lua, ina ua uma ona ia nofo i le nofoa-faamasino ma le amiosao atoatoa i luma o le Atua.

38 E ui i lea, sa ia teena Alema na te ave e tausi talafaamaumau ma mea sa manatu i ai Alema ma lona tamā ua sili ona paia; o lea na tuu atu ai e Alema ia mea i lona atalii o Helamana.

39 Faauta, sa oo ina tofia le atalii o Nifaea e nofo i le nofoa-faamasino, e sui i lona tamā; ioe, sa tofia o ia e faamasino sili ma kovana i luga o le nuu, faatasi ma se tautoga ma se sauniga paia e faamasino ma le amiotonu, ma tausi le filemu ma le saolotoga o le nuu, ma tuu atu ia te i latou o latou avanoa paia e tapuai ai i le Alii lo latou Atua, ioe, e lagolago ma faatumau le galuega a le Atua i ona aso uma, ma aumai e amioleaga i le faamasinoga e tusa ma a latou solitulafono.

40 O lenei faauta, o lona igoa o Paorana. Ma sa nofo Paorana i le nofoaga o lona tamā, ma sa amata lana nofoaiga i luga o le nuu o Nifae, i le faaiuga o le tausaga e lua sefulu ma le fa.