1 Ma sa oo ina toe tusi atu o ia i le kovana o le laueleele, o Paorana lea, ma o upu nei sa ia tusia, e faapea: Faauta, ou te faasino tonu la’u tusi ia Paorana, i le aai o Sara’emila, o ia o le ^afaamasino sili ma le kovana i luga o le laueleele, ma i latou uma foi o e na filifilia e lenei nuu e pulea ma faatautaia mataupu o lenei taua.

2 Auā faauta, ua ia te a’u lava ni mea ou te fai atu ai ia te i latou e ala i le tausalaina; ona faauta, ua outou iloa lava na tofia outou e faapotopoto faatasi tagata, ma faaauupegaina i latou i pelu, ma simetea, ma ituaiga o auupega eseese uma o taua, ma auina atu e faasaga ia sa Lamanā, i soo se vaega o le a latou o mai ai i lo tatou laueleele.

3 Ma o lenei faauta, ou te fai atu ia te oe o a’u lava, ma o’u tagata foi, e faapea foi Helamana ma ona tagata, ua mafatia i mafatiaga tetele lava; ioe, e oo i le fia aai, fia feinu, ma le vaivai, ma ituaiga uma o puapuaga eseese.

4 Ae faauta, a na fai ona pau ia o mea na matou mafatia ai, po ua matou le muimui pe tomumu.

5 Ae faauta, ua tele lava le sauaga ua i ai i totonu o o tatou tagata; ioe, e afe ma afe ua pa’u’ū i le pelu, ae semanu o se isi tulaga pe a na outou tuu mai ia matou autau le malosi ia lava ma le fesoasoani mo i latou. Ioe, ua tele lo outou faatamala mai ia te i matou.

6 Ma o lenei faauta, matou te fia iloa le pogai o lenei faatamala tele; ioe, matou te fia iloa le pogai o lo outou tulaga le mafaufau.

7 E mafai ea ona outou manatu tou te nonofo i luga o o outou nofoalii i se tulaga o le mafaufau noa, ao faasolo atu e o outou fili faataamilo ia te outou le galuega o le oti? Ioe, a o loo latou fasioti le afe ma afe o o outou uso—

8 Ioe, i latou lava ia o e na vaai atu ia te outou mo le puipuiga, ioe, na tuuina outou i se tulaga manu e mafai ona outou fesoasoani atu ai ia te i latou, ioe, manu e mafai ona outou auina atu ai ni autau ia te i latou, e faamalolosi i latou, ma manu ua faasaoina ai le afe ma afe o i latou mai le pa’u’ū i le pelu.

9 Ae faauta, ua le ona pau lea—ua outou taofi a outou mea manaomia mai ia te i latou, sa oo ai lava ina toatele na tau ma faamaumau o latou ola, ona o o latou naunauga sili sa ia te i latou mo le manuia o lenei nuu; ioe, ma sa latou faia lenei mea ao toetoe ina a ^afano i latou i le fia aai, ona o lo outou faatamala tele lava ia te i latou.

10 Ma o lenei, ou uso pele e—ona e tatau ona pele outou; ioe, ma ua tatau ona outou faaosofia outou lava ia outou filigā atili mo le manuia ma le saolotoga o lenei nuu; ae faauta, ua outou tuulafoaiina i latou i le tulaga o le a oo mai ai i luga o o outou ulu le toto o le afe ma afe mo le taui ma sui; ioe, ona ua silafia e le Atua a latou tagi uma, ma o latou mafatiaga uma—

11 Faauta, tou te manatu ea e mafai ona outou nonofo i luga o o outou nofoalii ma manatu, ona o le agalelei tele o le Atua, o le a ia laveaiina ai lava outou, i le le mafai ona outou faia o se mea? Faauta, afai o lo outou manatu lea, ua lē aoga lo outou manatu.

12 Tou te ^amanatu ea e faapea ua fasiotia le toatele o o outou uso ona o lo latou amioleaga? Ou te fai atu ia te outou afai o lo outou manatu lea, ua lē aoga lo outou manatu; ona ou te fai atu ia te outou, e toatele o e ua pa’u’ū i le pelu; ma faauta o le a tausalaina outou i lenei mea;

13 Ona e tuu atu e le Alii e ^aamiotonu ia fasiotia, ina ia mafai ai ona oo mai o lana faamasinotonu ma lana faamasinoga i luga o e amioleaga; o lea e le tatau ai ona outou manatu faapea ua teena e amiotonu ona ua fasiotia i latou; ae faauta, latou te ulufale atu i le malologa o le Alii lo latou Atua.

14 Ma o lenei faauta, ou te fai atu ia te outou, ua ou fefe tele lava o le a oo mai faamasinoga a le Atua i luga o lenei nuu, ona o lo latou faatalale tele, ioe, le faatalale lea o lo tatou malo, ma lo latou faatamala tele e faasaga i o latou uso, ioe, e faasaga ia i latou o e ua fasiotia.

15 Auā a na leai le ^aamioleaga lea na muamua amata mai i lo tatou faauluuluga, po ua mafai ona tatou tetee atu i o tatou fili ma le mafai ai ona latou maua o se mana i luga o i tatou.

16 Ioe, a na leai le ^ataua lea na tupu a’e i totonu o i tatou lava; ioe, a na leai nei ^etagata-o-tupu, o e na pogai mai ai le faamasaa toto tele i totonu o i tatou lava; ioe, i le taimi sa tatou fefinauai ai i totonu o i tatou lava, a na tatou tuufaatasi lo tatou malosi e pei ona tatou faia e oo mai i le taimi nei; ioe, a na leai le mananao i le mana ma le pule sa i ia tagata-o-tupu sa i luga o i tatou; a na latou faamaoni i le faamoemoe o lo tatou saolotoga, ma aufaatasi ma i tatou, ma o atu e faasaga i o tatou fili, nai lo le fetagofi i a latou pelu e faasaga mai ia te i tatou, lea na mafua mai ai le faamasaa toto tele i totonu o i tatou lava; ioe, a na fai tatou te o atu e faasaga ia te i latou i le malosi o le Alii, po ua tatou faataapeapeina o tatou fili, auā po ua faia lava e tusa ma le faataunuuina o lana afioga.

17 Ae faauta, ua o mai nei sa Lamanā i luga o i tatou, ua ave o tatou laueleele, ma o loo latou fasioti o tatou tagata i le pelu, ioe, o tatou fafine ma a tatou fanau, ma ave foi i latou faatagataotaua, ma faia ia i latou ia latou mafatia i ituaiga uma o puapuaga eseese, ma ua mafua mai lenei mea ona o le amioleaga tele o i latou o e o loo saili mo le mana ma le pule, ioe, i latou lava ia o tagata-o-tupu.

18 Ae aisea ea e tatau ai ona ou tautala tele atu e uiga i lenei mataupu? Ona matou te le iloa ae o loo saili foi outou lava mo le pule. Matou te iloa ae atonu o outou foi o ni tagata faalata i lo outou atunuu.

19 Pe ua outou tuulafoai mai ia te i matou ona ua outou i ai i le totonugalemu o lo tatou atunuu ma ua siomia outou i le saogalemu, ua outou le faatonu ai ia auina mai ni meaai ia te i matou, ma ni tagata foi e faamalolosi ai a matou autau?

20 Ua galo ea ia te outou poloaiga a le Alii lo outou Atua? Ioe, ua galo ia te outou le faatagataotauaina o o tatou tamā? Ua galo ea ia te outou taimi e tele na laveaiina ai i tatou mai lima o o tatou fili?

21 Pe tou te manatu o le a laveai pea i tatou e le Alii, a o tatou nonofo i luga o o tatou nofoaalii ma lē faaaogaina mea ua saunia e le Alii mo i tatou?

22 Ioe, tou te nofonofo ea i le paie a o siomia outou i le afe ma afe o i latou, ioe, ma le sefulu o afe, o e o loo nofonofo foi i le paie, ae o loo i ai le afe ma afe o faataamilo i tuaoi o le laueleele o e o loo pa’u’ū i le pelu, ioe, ua faamanualia ma faamaligiina le toto?

23 Tou te manatu ea o le a silasila mai le Atua i o outou luga e peiseai ua outou le sala a o outou nonofo fifilemu ma vaai atu i nei mea? Faauta, ou te fai atu ia te outou, E leai. O lenei ou te manao ia outou manatua na fetalai mai le Atua o le a muamua ona faamamā o ^atotonu o le ipu, ona faamamā ai foi lea o fafo o le ipu.

24 Ma o lenei, vagana ai ua outou salamo i mea ua outou faia, ma amata ona outou tutulai i luga ma galulue, ma auina mai ni meaai ma ni tagata ia te i matou, ma faapea foi ia Helamana, ina ia mafai ona ia tausia vaega na o lo tatou atunuu ia ua ia toe maua mai, ma ia mafai foi ona matou toe maua mai a tatou meatotino o totoe i nei vaega o le laueleele, faauta, o le a tatau ai ona matou le toe finau ma sa Lamanā seia muamua ona matou faamama o totonu o la tatou ipu, ioe, o le faauluuluga tele lava lea o lo tatou malo.

25 Ma e vagana ai ua outou talia mai e tusa ma la’u tusi, ma o mai ma faaali mai ia te a’u se ^aagaga moni o le saolotoga, ma taumafai e faamalosi ma puipui a tatou autau, ma tuu atu ia te i latou meaai mo lo latou tausiga, faauta, o le a ou tuu se vaega o a’u tagata saoloto e taofi le vaega lenei o lo tatou laueleele, ma o le a ou tuu le malosi ma faamanuiaga a le Atua i luga o i latou, ina ia leai se isi mana e mafai ona galue faasaga mai ia te i latou—

26 Ma o lea ona o lo latou faatuatua tele, ma lo latou onosai i o latou faigata—

27 Ma o le a ou alu atu ia te outou, ma afai o i ai soo se tasi i totonu o outou ua i ai se manao mo le saolotoga, ioe, afai o i ai lava sina aloi o le saolotoga o totoe, faauta o le a ou faaosoina fouvalega i totonu o outou, seia oo lava ina soloia ese uma e ua i ai manao e ave faalesolitulafono le mana ma le pule.

28 Ioe, faauta, ou te le fefe i lo outou malosi po o la outou pule, ae o lo’u ^aAtua o lē ua ou mata’u i ai; ma o ana poloaiga ua ou tago ai i la’u pelu e puipui le faamoemoe o lo’u atunuu, ma o lo outou amioletonu ua tatou mafatia ai i le tele o mea ua toesea.

29 Faauta ua oo i le taimi, ioe, ua oo mai nei le taimi, vagana ai ua outou faagaoioia outou lava i le puipuiga o lo outou atunuu ma a outou fanau iti, ua tautau ifo le ^apelu o le faamasinoga i o outou luga; ioe, ma o le a pa’ū ifo i o outou luga ma asiasi mai ia te outou e oo lava i lo outou faaumatiaga atoa.

30 Faauta, ou te faatalitali mo le fesoasoani mai ia te outou; ma vagana ai ua outou fesoasoani mai mo lo matou mapusaga, faauta, ou te alu atu ia te outou, i le laueleele lava o Sara’emila, ma taia outou i le pelu, seia oo ina outou le toe maua se mana e taofi ai le alualu i luma o lenei nuu i le faamoemoe o lo tatou saolotoga.

31 Auā faauta, o le a le tuua e le Alii ia outou ola ma faasolo faamalosia la outou amioletonu e faaumatia ai ona tagata amiotonu.

32 Faauta, e mafai ea ona outou manatu o le a faaolaina outou e le Alii ma afio mai i faamasinoga e faasaga ia sa Lamanā, ae o uputuu a o latou tamā na pogai mai ai lo latou ita, ioe, ma ua faateleina e i latou o e na pa’u’ū ese mai ia te i tatou, ae o lo outou amioletonu ua mafua mai ai lo outou naunau i le mamalu ma mea lē aoga o le lalolagi?

33 Ua outou iloa ua outou solia tulafono a le Atua, ma ua outou iloa ua outou solia ia tulafono i lalo o o outou vae. Faauta, ua fetalai mai le Alii ia te a’u: Afai e le salamo i latou o e na outou tofia e avea ma o outou kovana ia latou agasala ma a latou amioletonu, ia outou o atu e tau ma i latou.

34 Ma o lenei faauta, o a’u, o Moronae, ua faamalosia a’u, e tusa ma le feagaiga lea na ou osia e tausi poloaiga a lo’u Atua; o lea ou te manao ai ia outou usitai i le afioga a le Atua, ma auina vave mai ia te a’u ni isi o a outou meaai ma ni isi o o outou tagata, ma faapea foi ia Helamana.

35 Ma faauta, afai tou te le faia lenei mea, o le a ou alu atu vave ia te outou; auā faauta, o le a le tuua e le Atua ia matou fano i le fia aai; o lea o le a ia tuu mai ai ia te i matou ni isi o a outou meaai, e tusa pe tatau ai ona faia o lenei mea e ala i le pelu. O lenei ia vaai ua outou faataunuuina uma le afioga a le Atua.

36 Faauta, o a’u o Moronae, o lo outou kapeteni silisili. Ou te le ^asaili mo le pule, ae ia to ifo i lalo. Ou te le saili mo le mamalu o le lalolagi, ae mo le mamalu o lo’u Atua, ma le saolotoga ma le manuia o lo’u atunuu. Ma ua faapea ona ou faai’u o la’u tusi.