Alema 21

O se tala o le talaiga a Arona, ma Muloki, ma o laua uso, i sa Lamanā.

E aofia ai le mataupu 21 e oo i le 26.

Mataupu 21

Ua aoaoina e Arona sa Amalekā e uiga ia Keriso ma lana togiola—Ua falepuipui Arona ma ona uso i Mitonae—Ina ua mavae le laveaiina o i latou, ua latou aoao atu i sunako ma faaliliu tagata e toatele—Ua tuu atu e Lamonae le saolotoga faalelotu i tagata i le laueleele o Isamaeli. E tusa o le 90–77 T.L.M.

1 O lenei ina ua afaataapeape e Amona ma ona uso i latou lava i tuaoi o le laueleele o sa Lamanā, faauta o Arona, sa alu lana malaga agai i le laueleele lea sa taua e sa Lamanā, o Ierusalema, sa faaigoa i le laueleele na soifua mai ai o latou tamā; ma sa mamao ese atu e fesootai ma tuaoi o Mamona.

2 O lenei sa faatu e sa Lamanā ma sa Amalekā ma tagata o aAmulona se aai tele, lea sa taua o Ierusalema.

3 O lenei o sa Lamanā lava latou, sa lava lo latou maaa, ae sa sili atu ai le maaa o sa Amalekā ma sa Amulonā; o lea na latou faaoso ai sa Lamanā ia faamaaa o latou loto, ina ia latou solo malolosi i le amioleaga ma a latou mea inosia.

4 Ma sa oo ina alu atu Arona i le aai o Ierusalema, ma amata talai muamua atu ia Amalekā. Ma sa amata ona ia talai atu ia te i latou i o latou sunako, ona sa latou fausia sunako e tusa ma le afaatulagaga a Neʼoa; ona o le toatele o sa Amalekā ma sa Amulonā o e sa mulimuli atu i le faatulagaga a Neʼoa.

5 O lea, aʼo ulu atu Arona i se tasi o o latou sunako e talai atu i tagata, ma aʼo tautala atu o ia ia te i latou, faauta sa tulai mai se sa Amaleka ma amata ona finau mai ia te ia, fai mai: O le a lena mea ua e molimau mai ai? Na e vaai i se aagelu? Aisea ua le afifio mai ai ni agelu ia te i matou? Faauta ua lē lelei ea nei tagata e pei o ou tagata?

6 Ua e fai mai foi, o le a matou fano vagana ai ua matou salamo. E faapefea ona e iloa o mafaufauga ma faamoemoega o o matou loto? E faapefea ona e iloa ua i ai se pogai matou te salamo ai? E faapefea ona e iloa e le o i matou o ni tagata amiotonu? Faauta, ua matou fausia falesa, ma ua matou faapotopoto faatasi i matou lava e tapuai atu i le Atua. Matou te talitonu o le a faaolaina e le Atua tagata uma.

7 O lenei sa fai atu Arona ia te ia: E te talitonu ea o le a afio mai le Alo o le Atua e togiola tagata mai a latou agasala?

8 Ma sa fai mai lea tagata ia te ia: Matou te le talitonu ua e iloaina se mea faapena. Matou te le talitonu i nei uputuu valea. Matou te le talitonu ua e iloaina e uiga i amea o le a oo mai, pe matou te talitonu foi na iloa e ou tamā ma o matou tamā foi e uiga i mea na latou tautatala mai ai, e uiga i mea o le a oo mai.

9 O lenei sa amata ona fofola atu e Arona ia te i latou tusitusiga paia e uiga i le afio mai o Keriso, ma e uiga foi i le toetutu mai o e ua oti, ma e faapea e ale mafai ona i ai se togiola mo tagata vagana ua ala mai i le maliu ma mafatia o Keriso, ma le etogiola a lona toto.

10 Ma sa oo ina ua amata ona ia faamatala atu nei mea ia te i latou, sa latou feita mai ia te ia, ma amata ona tauemu mai ia te ia; ma latou le fia faalogo mai i upu na ia tautala atu ai.

11 O lea, ina ua ia vaai atu ua latou le fia faalogo mai i ana upu, sa alu ese atu o ia i fafo o o latou sunako, ma alu atu i se nuu sa taua o Ani-Aneti, ma o iina na ia maua i ai Muloki o talai atu le afioga ia te i latou; ma Ama foi ma ona uso. Ma sa latou finau ma le toatele e uiga i le afioga.

12 Ma sa oo ina latou vaai atu ua faamaaa e tagata o latou loto, o lea na latou o ese ai ma o mai i le laueleele o Mitonae. Ma sa latou talai atu le afioga i le toatele, ma e toaitiiti na talitonu i upu sa latou aoao atu.

13 E ui i lea, sa ave Arona ma ni isi o ona uso ma ua lafo i le falepuipui, ma o e na totoe o i latou, na sosola i fafo mai le laueleele o Mitonae, i itulagi faataamilo ai.

14 Ma o i latou o e na lafo i le falepuipui, sa amafatia i mea e tele, ma sa laveaiina i latou i lima o Lamonae ma Amona, ma sa fafagaina i latou ma faalavalavaina.

15 Ma sa latou toe o atu e talai atu le afioga, ma sa faapea ona laveaiina o i latou i le taimi muamua i fafo mai le falepuipui; ma sa faapea ona latou mafatia.

16 Ma sa latou o atu i soo se mea sa taitaiina i ai i latou e le aAgaga o le Alii, ma talai atu le afioga a le Atua i sunako taitasi o sa Amalekā, po o i faapotopotoga taitasi o sa Lamanā sa mafai ona faatagaina ai i latou.

17 Ma sa oo ina amata ona faamanuiaina i latou e le Alii, sa oo ina latou aumai tagata e toatele i le malamalama o le upumoni; ioe, sa latou afaatalitonuina tagata e toatele e uiga ia latou agasala, ma e uiga i uputuu a o latou tamā, ia sa le saʼo.

18 Ma sa oo ina toe foi mai Amona ma Lamonae mai le laueleele o Mitonae i le laueleele o Isamaeli, le laueleele lea o lo latou tofi.

19 Ma sa le tuuina atu Amona e le tupu o Lamonae ia auauna mai ia te ia, pe ia avea ma ana auauna.

20 Ae sa ia faatonu atu ia fausia ni sunako i le laueleele o Isamaeli; ma sa ia faatonu atu ia faapotopoto faatasi e ona tagata, po o tagata o e sa i lalo o lana puleaga, i latou lava.

21 Ma sa olioli o ia ia te i latou, ma sa ia aoao atu ia te i latou mea e tele. Ma sa ia tautino atu foi ia te i latou, o i latou o ni tagata ua i ai i lalo o ia, ma o i latou o ni tagata ua saoloto, e faapea ua latou saoloto mai mea saua a le tupu, lona tamā; ona ua tuu mai e lona tamā ia te ia ia pule o ia i luga o tagata o e sa i le laueleele o Isamaeli, ma le laueleele atoa faataamilo ai.

22 Ma sa ia tautino atu foi ia te i latou, ua mafai ona latou maua le asaolotoga e tapuai ai i le Alii lo latou Atua e tusa ma o latou manao, i soo se mea ua latou i ai, pe afai ua i ai i totonu o le laueleele lea ua i lalo o le pule a le tupu o Lamonae.

23 Ma sa talai atu Amona i tagata o le tupu o Lamonae; ma sa oo ina aoao atu e ia ia te i latou mea uma e faatatau i mea tau i le amiotonu. Ma sa ia apoapoai atu ia te i latou i aso uma, ma le filiga atoa; ma sa latou gauai mai i lana upu, ma sa latou finafinau i le tausiga o poloaiga a le Atua.