1 Ma o lenei, lo’u atalii e, Helamana, ou te poloai atu ia te oe ia e ave ^atalafaamaumau ia na ^etuuina mai ia te a’u;

2 Ma ou te poloai atu foi ia te oe, ia e tausia se talafaamaumau o lenei nuu, e pei ona sa ou faia, i luga o papatusi a Nifae, ma tausi i le paia nei mea uma sa ou tausia, e pei lava ona sa ou tausia ai i latou; ona e mo se faamoemoega ^apoto ua tausia ai.

3 Ma o ^apapatusi o apamemea nei, ia ua i ai nei togitogiga, ia ua i ai talafaamaumau o tusitusiga paia i o latou luga, ia ua i ai le gafa o tua’ā o o tatou tua’ā, mai lava i le amataga—

4 Faauta, na valoia e o tatou tamā, e faapea o le a tausia i latou ma tuulima faasolo i lalo mai le tasi tupulaga i le isi, ma tausia ma faasaoina e le aao o le Alii seia oo ina oo atu i atunuu, ma ituaiga, ma gagana ma nuu uma, ina ia latou iloa ^amealilo o i ai.

5 Ma o lenei faauta, afai e tausia i latou o le a tumau pea lo latou pupula; ioe, ma o le a tumau pea lo latou pupula; ioe, ma o le a faapea foi papatusi uma ia ua i ai tusitusiga ua paia.

6 O lenei atonu e te manatu ua ou ^avalea i lenei mea; ae faauta ou te fai atu ia te oe, o mea ^elaiti ma faatauvaa e faataunuu ai mea sili; ma o auala laiti i le tele o taimi, e faamaasiasia ai e popoto.

7 Ma e galue le Alii le Atua i ^aauala e faataunuu ai ona faamoemoega tetele ma faavavau; ma o auala ^elaiti lava e faamaasiasi ai e le Alii e popoto, ma aumai ai le faaolataga o agaga e toatele.

8 Ma o lenei, e oo mai i le taimi nei, o le poto o loo i le Atua ua faasaoina ai nei mea; auā faauta, ua latou ^afaalauteleina le manatua o lenei nuu, ioe, ma faatalitonu le toatele i le sesē o o latou ala, ma aumai i latou i le malamalama o lo latou Atua mo le faaolataga o o latou agaga.

9 Ioe, ou te fai atu ia te oe, ^aa na leai nei mea ua i ai i nei talafaamaumau, ia ua i ai i nei papatusi, po ua le mafai e Amona ma ona uso ona ^efaatalitonu le tele tele o afe o sa Lamanā, i le sesē o uputuu a o latou tamā; ioe, o nei talafaamaumau ma a latou ⁱupu na aumai ai i latou i le salamo; o lona uiga, sa latou aumai i latou i le malamalama o le Alii lo latou Atua, ma ia olioli ia Iesu Keriso lo latou Togiola.

10 Ma o ai na te iloa ae le avea i latou ma auala e aumai ai le tele o afe o i latou, ioe, ma le tele foi o afe o o tatou uso ua maaa, o sa Nifaē, o e o loo faamaaa nei o latou loto i le agasala ma amioletonu, i le malamalama o lo latou Togiola?

11 O lenei o nei mea lilo e lei faailoa atoatoa mai ia te a’u i le taimi nei; o lea o le a ou taofia ai.

12 Ma atonu ua lava pe a na’o na ou fai atu ua faasaoina i latou mo se faamoemoega poto, o se faamoemoega ua silafia e le Atua; ona ua ^afautua mai o ia ma le poto i luga o ana galuega uma, ma ua sa’o ona ala, ma o lona ala o se taamilosaga faavavau e ^etasi.

13 E, ia e manatua, ia e manatua, lo’u atalii e, Helamana, le ^apatino o poloaiga a le Atua. Ma ua fetalai mai o ia: ^eAfai e te tausia a’u poloaiga o le a e ⁱmanuia i le laueleele—ae afai e te le tausia ana poloaiga o le a vavae ese oe mai ona luma.

14 Ma o lenei ia e manatua, lo’u atalii e, ua ^atuuina mai nei mea e le Atua ia te oe, o ni mea ua ^epaia, ia sa ia tausia i le paia, ma o ni mea foi o le a ia tausia ma faasaoina mo se faamoemoega ⁱpoto ua ia te ia, ina ia mafai ona ia faailoa atu lona mana i tupulaga o lumanai.

15 Ma o lenei faauta, ou te ta’u atu ia te oe e ala i le agaga o valoaga, afai e te solia poloaiga a le Atua, faauta, o nei mea ua paia o le a aveese mai ia te oe e le mana o le Atua, ma o le a tuu atu oe ia Satani, ina ia mafai ona ia lūlūina oe e pei o le aputi o saito i le agi a le matagi.

16 Ae afai e te tausia poloaiga a le Atua, ma e faia i nei mea ua paia e tusa ma mea e poloaiina ai oe e le Atua, (ona e ao ona e aioi atu i le Alii mo mea uma i soo se mea e ao ona e faia ia i latou) faauta, e leai se mana o le lalolagi po o seoli e mafai ona ^aaveesea i latou mai ia te oe, ona ua mamana le Atua e faataunuu ana afioga uma.

17 Auā o le a ia faataunuuina ana folafolaga uma ia o le a ia faia ia te oe, auā ua ia faataunuuina ana folafolaga ia na ia faia i o tatou tamā.

18 Auā sa folafola mai o ia ia te i latou o le a ia ^afaasaoina nei mea mo se faamoemoega poto o ia te ia, ina ia mafai ona ia faaali atu lona mana i tupulaga o lumanai.

19 Ma o lenei faauta, ua ia faataunuuina se tasi faamoemoega, o le toefuataiga lava lea o le ^atele o afe o sa Lamanā i le malamalama o le upumoni; ma ua ia faaali mai lona mana e ala mai ia i latou, ma o le a ia faaali atu foi lona mana e ala atu ia i latou i tupulaga o ^elumanai, o lea o le a faasaoina ai i latou.

20 O lea ou te poloai atu ai ia te oe, lo’u atalii e, Helamana, ia e filigā e faataunuu a’u upu uma, ma ia e filigā i le tausiga o poloaiga a le Atua e pei ona tusia ai i latou.

21 Ma o lenei, o le a ou tautala atu ia te oe e uiga i papatusi na e ^alua sefulufa, ina ia e tausia, ina ia mafai ona faailoa atu i lenei nuu o mealilo ma galuega o le pouliuli, ma a latou galuega ^elilo, po o galuega lilo a i latou o e ua faaumatiaina; ioe, ina ia mafai ona faailoa atu i lenei nuu le tele o lo latou fasioti tagata, ma le faomea, ma a latou vete, ma a latou amioleaga uma ma mea inosia; ioe, ma ia e faasaoina nei ⁱfaamatalaupu.

22 Auā faauta, sa silasila le Alii ua amata ona galulue ona tagata i le pouliuli, ioe, ua latou faia faalilolilo le fasioti tagata ma mea inosia; o lea na fetalai mai ai le Alii, afai latou te le salamo o le a faaumatia ese i latou mai luga o le fogaeleele.

23 Ma sa fetalai mai le Alii: O le a ou saunia mo la’u auauna o Kaselema, se ^amaa, lea o le a susulu atu mai le pouliuli i le malamalama, ina ia mafai ona ou faailoa atu i o’u tagata, o e e auauna mai ia te a’u, ina ia mafai ona ou faailoa atu ia te i latou galuega a o latou uso, ioe, a latou galuega lilo, a latou galuega o le pouliuli, ma a latou amioleaga ma mea inosia.

24 Ma o lenei, lo’u atalii e, o nei faamatalaupu na saunia ina ia mafai ona faataunuuina ai o le afioga a le Atua, na ia fetalai mai ai, e faapea:

25 O le a ou ^aaumai i fafo mai le pouliuli i le malamalama a latou galuega lilo uma ma a latou mea inosia; ma vagana ai ua latou salamo o le a ou ^efaaumatia ese i latou mai luga o le fogaeleele; ma o le a ou aumai i le malamalama a latou mealilo uma ma mea inosia, i atunuu uma o le a fai mo i latou lenei laueleele pe a mavae atu le taimi nei.

26 Ma o lenei, lo’u atalii e, ua tatou vaai sa latou le salamo; o lea na faaumatia ai i latou, ma ua faapea ona faataunuu ai o le afioga a le Atua; ioe, o a latou mea inosia faalilolilo ua aumai i fafo mai le pouliuli ma ua faailoa mai ia te i tatou.

27 Ma o lenei, lo’u atalii e, ou te poloai atu ia te oe, ia e taofi a latou tautoga uma, ma a latou feagaiga, ma a latou maliega i a latou mea inosia faalilolilo; ioe, ma o a latou ^afaailoga uma ma a latou mea e ofo ai ia e taofia mai lenei nuu, ina ia latou le iloaina i latou, ne’i o latou pa’u’ū atu foi i le pouliuli ma faaumatia ai.

28 Auā faauta, e i ai se ^afetuu ua i luga o lenei laueleele atoa, o le a oo mai le faafanoga i luga o i latou uma o e faia galuega o le pouliuli, e tusa ma le mana o le Atua, pe a oo ina latou matua atoatoa; o lea ou te manao ia le faaumatiaina lenei nuu.

29 O lea ia e tausia ai nei fuafuaga faalilolilo o a latou ^atautoga ma a latou feagaiga mai lenei nuu, ma ia na’o a latou amioleaga ma lo latou fasioti tagata ma a latou mea inosia, ia e faailoa atu ia te i latou; ma ia e a’oa’o atu i latou ia ^einoino i nei amioleaga ma mea inosia ma le fasioti tagata; ma ia e a’oa’o atu foi ia te i latou, ua faaumatiaina nei tagata ona o a latou amioleaga ma mea inosia ma lo latou fasioti tagata.

30 Auā faauta, sa latou fasiotia perofeta uma a le Alii o e na o mai ia i latou e ta’u atu ia te i latou e uiga ia latou amioletonu; ma o toto o e na latou fasiotia sa tagi a’e i le Alii lo latou Atua mo le taui ma sui i luga o i latou o e na fasiotia i latou; ma sa faapea ona oo mai ai o faamasinoga a le Atua i luga o ia tagata o e fai galuega o le pouliuli ma faapotopotoga faalilolilo.

31 Ioe, ma ia fetuuina lava e faavavau faavavau lava le laueleele ia te i latou o e faia galuega o le pouliuli ma faapotopotoga faalilolilo, e o’o lava i le faaumatiaina, vagana ai ua latou salamo ae le’i oo ina latou matua atoatoa.

32 Ma o lenei, lo’u atalii e, ia e manatua upu ua ou tautala atu ai ia te oe; aua nei e faatuatuaina fuafuaga faalilolilo i lenei nuu, a ia e aoao atu ia te i latou se ^ainoino e faavavau e faasaga i le agasala ma le amioletonu.

33 ^aTala’i atu ia te i latou le salamo, ma le faatuatua i le Alii o Iesu Keriso; a’oa’o atu ia te i latou ia latou faalotomaualalalo i latou lava ma ia ^eagamalu ma ia maualalalo i le loto; a’oa’o atu ia te i latou ia tetee atu i ⁱfaaosoosoga uma a le tiapolo, e ala i lo latou faatuatua i le Alii o Iesu Keriso.

34 A’oa’o atu ia te i latou ia aua nei faavaivai i le faia o galuega lelei, ae ia agamalu ma ia maualalalo i le loto; auā o e faapea o le a latou maua le ^amalologa mo o latou agaga.

35 E, ia e manatua, lo’u atalii e, ma a’oa’o le ^apoto i lou talavou; ioe, a’oa’o i lou talavou e tausi i poloaiga a le Atua.

36 Ioe, ma ^atagi atu i le Atua mo mea uma e lagolago ai oe; ioe, tuu atu i le Alii au mea uma e fai, ma soo se mea e te alu i ai ia tuu atu i le Alii; ioe, ia tuu atu ou manatu uma i le Alii; ioe, ia tuu atu faanaunauga o lou loto i le Alii e faavavau.

37 ^aFilifili faatasi ma le Alii i au mea uma e fai, ma o le a ia taitai oe mo le lelei; ioe, pe a e taoto i le po, taoto i le Alii, ina ia mafai ona leoleo mai o ia i ou luga a’o e moe; ma a e ala mai i le taeao, ia tumu lou loto i le ^efaafetai i le Atua; ma afai e te faia nei mea, o le a sii a’e oe i luga i le aso gataaga.

38 Ma o lenei, lo’u atalii e, ua ia te a’u lava ni upu ou te fai atu ai e uiga i le mea lea ua ta’ua e o tatou tamā o se polo, po o se faasinoala—pe sa ta’ua e o tatou tamā o le ^aLiahona, o lona uiga, pe a faaliliuina, o se tapasā; ma o le Alii na sauniaina.

39 Ma faauta, e le mafai e se tagata ona faia se mea e faapea le uiga ese o le gaosiga. Ma faauta, sa saunia e faaali mai ai i o tatou tamā le ala e tatau ona latou malaga ai i le vao.

40 Ma sa galue mo i latou e tusa ma lo latou ^afaatuatua i le Atua; o lea, afai sa ia te i latou le faatuatua e talitonu ai e mafai e le Atua ona faia ia tusi mai e ona vae le ala e tatau ona latou ui ai, faauta, sa faia lava; o lea sa ia te i latou lenei vavega, ma le tele foi o isi vavega na faia i le mana o le Atua, i lea aso ma lea aso.

41 Ae ui i lea, ona o ia vavega sa faia i ala ^afaatauvaa sa faaalia atu ai ia te i latou galuega ofoofogia. Ae ina ua oo ina latou faapaie, ma galo ona faatino ma le filigā lo latou faatuatua, sa o’o ina taofia ai galuega ofoofogia, ma sa latou le alualu i luma i la latou malaga;

42 O lea, na latou nonofo ai i le vao, pe na le malaga ai i se ala sa’o, ma puapuagatia ai i le fia aai ma le fia feinu, ona o a latou soligatulafono.

43 Ma o lenei, lo’u atalii e, ou te manao ia e malamalama, ua le aunoa nei mea ma so latou ātaāta; ona e pei ona sa faapaie o o tatou tamā e ua’i atu i lenei tapasā (o lenei o nei mea ua faaletino) sa latou le manuia; ua faapea lava foi i mea faaleagaga.

44 Auā faauta, e tusa le faigofie o le ua’i atu i le ^aafioga a Keriso, lea o le a faasino mai ai ia te oe se ala sa’o e tau atu i le olioli faavavau, e pei o le faigofie i o tatou tamā ona ua’i atu i lenei tapasā, lea sa faasino mai ai ia te i latou se ala sa’o e tau atu i le laueleele na folafolaina.

45 Ma o lenei ou te fai atu, ua leai ea se faatusa i lenei mea? Ona e pei ona mautinoa le aumai e lenei faasinoala o o tatou tamā, i le mulimuli i ona ala, i le laueleele na folafolaina, o le a faapea foi ona ave o i tatou e afioga a Keriso, pe afai tatou te mulimuli i lo latou ala, i tala atu o lenei vanu o le faanoanoa, i se laueleele o le folafolaga ua silisili atu ona lelei.

46 E, lo’u atalii e, ia aua nei o tatou ^afaapaie ona o le faigofie o le ^eala; ona sa faapea ona i ai i o tatou tamā; ona sa faapea ona saunia mo i latou, ina ia mafai ona latou ⁱola pe afai latou te tepa atu i ai; ua faapea foi ona i ai ia i tatou. Ua uma ona saunia o le ala, ma afai tatou te tepa atu e mafai ona tatou ola e faavavau.

47 Ma o lenei, lo’u atalii e, vaai ia e tausia nei mea paia, ioe, vaai ia e tepa atu i le Atua ma e ola ai. Alu atu i lenei nuu ma ta’u atu le upu, ma ia e faamamalu. Lo’u atalii e, tofa.