Mataupu 21

Mosaea 18–24

Folasaga

Ina ua liua Alema i le lauga a Apinati, na amata ona ia aoao atu tagata o e na naunau e faalogo ia te ia. Na latou sosola atu ma tagata fou na mulimuli atu ia te ia i se nofoaga na ta’ua o Mamona, lea na latou maua ai le sauniga o le papatisoga ma faatasia ai i lo latou faatuatua. Na latou nonofo ma le filemu i se nuu na latou faaigoaina ia Helama, ae na ave faatagataotauaina i latou e Amulona, o le na avea muamua ma ositaulaga a le Tupu o Noa lea na soofaatasi ma le au sa Lamana. A o lei tupu lena mea, o tagata na totoe i le nuu o Liae-Nifae, ia ua taitaia nei e le atalii amiotonu o le Tupu o Noa o Limae, na faapologaina foi e sa Lamana. Na iloa uma e vaega nei e lua e “leai se na mafai ona laveai ia te i latou, ua na o le Alii lo latou Atua” (Mosaea 23:23). A o e talanoaina ma au tamaiti nei tala, e mafai ona outou maua se agaga faafetai sili atu mo le mana o le Alii e laveai ai i tatou mai soo se nofo pologa tatou te oo i ai. E mafai ona e faamalosiau atu i tamaiti ia osia ma tausia feagaiga, ia lotomaualalo, salamo, tatalo, ma faalagolago i le Alii.

O Nisi o Aoaoga Faavae ma Mataupu Faavae

Tatou te maua le Agaga o le Alii ma le folafolaga o le ola e faavavau e ala i a tatou feagaiga o le papatisoga (tagai i le Mosaea 18:1–16).
Savavali ma le amiosao e aofia ai le usitai i le Atua ma le auauna atu i isi (tagai i le Mosaea 18:17–30).
E alofa mutimutivale le Atua ma e mafai ona laveai i tatou mai le nofo pologa (tagai i le Mosaea 19–24).
E tofotofoina e le Atua lo tatou onosai ma le faatuatua (tagai i le Mosaea 23–24).

Fautuaga mo le Aoaoga

Mosaea 18:1–16. Tatou te Maua le Agaga o le Alii ma le Folafolaga o le Ola e Faavavau e ala i a Tatou Feagaiga o le Papatisoga

Amata i le Fai i tamaiti e mafaufau i se uo ua filifili ina ia papatiso ma faamauina. Ua ia fesili mai pe o le a se mea na te faia e saunia ai faaleagaga.

O le a se fautuaga o le a e tuuina atu?

Valaaulia tamaiti ina ia faitau le leoa le Mosaea 18:1–7, saili mo mea na faamaonia ai na saunia tagata mo le papatisoga.

O a ni faamaoniga na e maua?

Valaaulia se tamaitiiti e faitau le Mataupu Faavae ma Feagaiga 20:37. Ae na te lei faitauina, fai i tamaiti e faalogo mo uiga faaopoopo ma faatinoga ia e faamautu ai se saunia faaletagata lava ia e osia ma tausia feagaigai o le papatisoga.

E mafai faapefea e uiga ma faatinoga ua tatou talanoaina ona fesoasoani ia i tatou e osia ma tausia feagaiga uma o le talalelei?

Faitau le Mosaea 18:8–10. Ae e te lei faitauina, fai i tamaiti e mulimuli i le faitauga ma saili mo elemene o feagaiga o le papatisoga.

O le a la tatou vaega o feagaiga o le papatisoga o mai i nei fuaiupu?
O le a le mea ua folafolaina mai e le Alii pe a tatou tausia a tatou feagaiga o le papatisoga?

Valaaulia tamaiti e vaevae taitoalua ma faitau faatasi le Mosaea 18:11–16. Fai i ai e faailoga ma talanoaina le manao o le nuu o Alema a o lei papatisoina i latou. Fai foi i ai e saili mo lagona o tagata ina ua maea ona papatisoina i latou atoa ai ma faamanuiaga na latou maua.

O le a le manao o Alema a o ia saunia e faia le galuega a le Alii? (Tagai i le Mosaea 18:12.)
Aisea tatou te manaomia ai le Agaga ina ia mafai ai ona auauna atu ma le “paia o le loto”?
Ina ua maea ona papatisoina Alema ma lona nuu, na “tumu [i latou] i le Agaga” (Mosaea 18:14) ma “faatumuina i latou i le alofa tunoa o le Atua” (Mosaea 18:16).

Molimau atu i folafolaga ma faamanuiaga tatou te maua a o tatou faamamaluina a tatou feagaiga o le papatisoga ma mulimuli i le taitaiga a le Agaga Paia.

Mosaea 18:17–30. Savali ma le Amiosao e Aofia ai le Usitai i le Atua ma le Auauna atu i Isi

Tusi i luga o le laupapa le Na latou savavali ma le amiosao i luma o le Atua.

O le a le uiga o lenei faamatalaga ia te oe?

Tuu atu i tamaiti e sailiili taitoalua pe taitoatasi le Mosaea 18:17–30, saili mo fautuaga a Alema lea na taitai atu ai tagata e “savavali ma le amiosao i luma o le Atua.” Fautua atu ia tusia e tamaiti mataupu faavae latou te maua. Pe a maea le taimi na tuuina atu, valaaulia i latou e faasoa mai mea na latou maua. A o faasoa mai e tamaiti a latou tali, e mafai ona e fesili atu pe o a faamanuiaga e mafai ona latou faailoaina—mai le poloka mau pe mai o latou aafiaga—ia e oo mai ona o le usiusitai i lena fautuaga patino.

Uunaia tamaiti e mulimuli i le fautuaga a Alema ma ia “savavali ma le amiosao” i aso taitasi e ala i le usiusitai i le Atua ma le auauna atu i isi.

Mosaea 19–24. E Alofa Mutimutivale le Atua ma e Mafai ona Laveai i Tatou mai le Nofo Pologa

O le tusi lesona a tagata o le vasega o loo aofia ai se siata o loo faatusatusa ai le aafiaga o le nuu o Limae ma le aafiaga o le nuu o Alema (tagai i itulau 165–66). Atonu e te manao e valaaulia tamaiti e faasino i lenei siata a o latou talanoaina le Mosaea 19–24.

Tuu atu i tamaiti e iloilo le faafanua ua faaulutalaina “Faigamalaga Taua a sa Nifae i le Tusi a Mosaea” o loo i le itulau 151 i le tusi lesona a tagata o le vasega. Faaaoga le faafanua e saili ai aai ma tagata o loo ta’ua i le Mosaea 19–24. Ia mautinoa ua malamalama tamaiti sa i ai Limae ma e na mulimuli ia te ia i le nuu o Liae-Nifae ma o Alema ma e na mulimuli ia te ia sa i ai i le nuu o Helama.

Faamalamalama atu o le a talanoaina e tamaiti le tala a Mamona i le auala na laveaiina ai e le Alii le nuu o Limae ma le nuu o Alema mai le nofo pologa i sa Lamana. Valaaulia tamaiti e sue i le Mosaea 21:5, ma fai atu i se tamaitiiti e faitau mai. Faamamafa atu le faamatalaga a Mamona e faapea “ua leai se ala ua mafai ai [e sa Nifae] ona laveai ia te i latou ai … lima [o sa Lamana].”

Tusi le Mosaea 21:13–19; 24:9–16 i luga o le laupapa. Fai i tamaiti e faitau le leoa nei fuaiupu e maua ai faatinoga maoti na faia e nei vaega e lua e maua ai le alofa mutimutivale ma le laveaiga a le Atua. E tusa ai ma nei faatinoga, valaaulia tamaiti e fai se lisi o mataupu faavae e mafai ona taialaina ai i latou i o latou lava tulaga faigata. Valaaulia tamaiti e tusi ia mataupu faavae latou te mauaina. (Manatua: Na faamanino mai e Peresitene Boyd K. Packer o le Korama a Aposetolo e Toasefululua o se mataupu faavae “o se upumoni tumau, o se poloaiga, o se tulafono e mafai ona e tausia e taiala ai oe i le faiga o filifiliga” [i le Lipoti o le Konafesi, Ape. 1996, 22; po o le Liahona, Me 1996, 17]. Atonu e te manao e faaaoga lenei faauigaga e fesoasoani ai i tamaiti ia malamalama i le ituaiga o mataupu faavae lea e te manao latou te lisiina.)

O le siata lenei o loo faaalia ai se ala se tasi e taialaina ai lenei gaoioiga. E mafai ona e tuuina i luga o le laupapa ma fautua atu ia faaaoga e tamaiti e fai ma faataitaiga e fatu ai a latou lava siata i luga o pepa. Lisi le faatinoga muamua ma le mataupu faavae (mo le Mosaea 21:13–14) e faaali atu ai i tamaiti le auala e faauma ai le siata. Ona uunaia lea o tamaiti e saili le tele o faatinoga e mafai ona latou maua ma tusi se mataupu faavae mo faatinoga taitasi.

Mosaea 21:13–19; 24:9–16
Faatinoga a sa Nifae	Mataupu Faavae
Na latou faamaulalo i latou lava ma tagi malosi i le Atua (tagai i le Mosaea 21:13–14).	E tali mai le Atua ia i latou o e ole atu ma le faamaulalo ia te Ia.
Na latou onosai (tagai i le Mosaea 24:16).
O isi faatinoga na faailoa mai e tamaiti

Pe a maea le taimi na tuuina atu i tamaiti e suesue ai ma mafaufau, valaaulia i latou e faasoa mai faatinoga ma mataupu faavae ua latou lisiina. Tuuina atu se avanoa ia i latou e faamatala mai ai ni taimi na latou faaaogaina ai nei mataupu faavae ma faamanuiaina ai i latou e le Alii. Faaiu atu i lau molimau e uiga i auala e le mafai ai ona tatou laveaiina i tatou lava mai le nofo pologa faaleagaga ma le auala tatou te manaomia ai le alofa mutimutivale le mafuatia ma le alofa togiola o le Alii.

Mosaea 23–24. E Tofotofoina e le Atua Lo Tatou Onosai ma le Faatuatua

Faamanatu atu i tamaiti na i ai se taimi na faapologaina ai e le Tupu o Noa ia le nuu o Alema ma le nuu o Limae. Tuu atu i tamaiti e faitau le lapataiga a Apinati i le Mosaea 11:23–25. Ina ua le faalogo tagata i lea lapataiga, na toe foi atu Apinati. Tuu atu i tamaiti e faitau ana upu i le Mosaea 12:1, 5. Mulimuli ane na salamo le nuu o Alema, ae na latou puapuagatia lava i taunuuga o lo latou le taliaina muamua o le salamo.

Faitau le Mosaea 23:21–24 ma le 24:10–16 o se vasega, pe faataga ni tamaiti e faitau le leoa nei mau. Pe a maea ona faitauina e tamaiti nei fuaiupu, valaaulia i latou e faasoa mai a latou tali i fesili nei. Talosaga atu ina ia latou tusia ni fuaitau mai mau atofaina ma ia latou ta’u mai foi ni malamalamaaga i a latou lava upu.

O a nisi o avega o tauaveina e tagata i aso nei? Aisea e te manatu ai e faigofie atu ona tauaveina a tatou avega pe a tatou gauai atu ma le fiafia i le finagalo o le Alii?
O a auala e “asiasi atu ai [le Alii i Lona] nuu i o latou puapuaga”? (Mosaea 24:14).

Valaaulia tamaiti e tomanatu i se taimi na asiasi atu ai le Alii ia i latou i o latou puapuaga. Pe a talafeagai ai, fesili atu pe i ai se tasi e fia faasoa mai sona aafiaga.

Faitau le saunoaga lenei a Elder Jeffrey R. Holland o le Korama a Aposetolo e Toasefululua:

“E mafai ona i ai ma e tele foi faigata i le olaga. Ae ui i lea, o le tagata e sau ia Keriso, o le na te iloa Lona siufofoga, ma tauivi ina ia faia e pei ona Ia faia, e mauaina se malosi e pei ona fai mai le viiga, ‘e sili atu nai lo [ia] lava.’ [“Faaola e Ia Ou Alofa,” Viiga, nu. 150.] …

“Uso e ma tuafafine, po o le a lava lou faanoanoaga, faamolemole aua e te fiu ma faamolemole aua e te tuu atu i le fefe. …

“Afai o loo tuua na o oe, faamolemole ia iloa e mafai ona e maua le faamafanafanaga. Afai ua e lotovaivai, faamolemole ia iloa e mafai ona e maua le faamoemoe. Afai o loo e mativa faaleagaga, faamolemole ia iloa e mafai ona faamalosia oe. Afai o e lagona lou nutimomoia, faamolemole ia iloa e mafai ona toe faaleleia oe” (i le Lipoti o le Konafesi, Ape. 2006, 71–72; po o le Liahona, Me 2006, 71).

E mafai faapefea ona faailoa lou onosai i taimi o faigata?
Na e iloa i se taimi le aao faamalosi o le Atua i lou olaga?

Uunaia tamaiti e faalagolago i le mana, faamafanafanaga, ma le natura o le faamalologa o lo tatou Tama i le Lagi ma Iesu Keriso.