Mataupu 23

Alema 1–4

Folasaga

O le Alema 1 o loo faamamafa mai ai le eseesega i le va o le perisitua ma le faitaulaga pepelo. A maea ona suesueina lenei poloka mau, ua tatau i tamaiti ona mafai ona iloa ia uiga o faitaulaga pepelo i taimi o Alema faapea foi ma o tatou taimi. Ma le isi, e tatau i tamaiti ona malamalama e faafeagai tonu lava ia faitaulaga pepelo ma le perisitua a le Atua. I le Alema 2–3, e mafai ona vaaia e tamaiti ia taunuuga le lelei o faitaulaga pepelo a o latou faitauina le tala ia Amiliki lea na saili e faaumatia le faigamalo a sa Nifae ma avea ma tupu. O loo faaalia mai foi i le tala le auala na mafai ai e tali amiotonu a tagata i tofotofoga ona fesoasoani ia i latou ia maua le malosi mai le Atua. O le tali atu a Alema i tofotofoga e mafai ona avea ma se faataitaiga mo i tatou i aso nei. E mafai ona e fesoasoani i tamaiti ia malamalama e mafai ona latou maua le malosi mai le Atu a, e pei o Alema, a o latou tatalo mo se fesoasoani, faatino le faatuatua, ma faia faatinoga e faafetaiaia ai o latou luitau. O loo faamamafa mai i le Alema 4 le mana o le molimau mama aiai.

O Nisi o Aoaoga Faavae ma Mataupu Faavae

E tatau i le Au Paia o Aso e Gata Ai ona aloese mai faitaulaga pepelo (tagai i le Alema 1).
O le a faamalosia i tatou e le Atua a o tatou teenaina le amioleaga (tagai i le Alema 2).
E teena e le molimau paia le faamaualuga (tagai i le Alema 4).

Fautuaga mo le Aoaoga

Alema 1. E Tatau i le Au Paia o Aso e Gata Ai ona Aloese mai Faitaulaga Pepelo

A o lei amataina le vasega, tuu le siata lenei ma fesili i luga o le laupapa:

Faitaulaga Pepelo	Perisitua
Alema 1:2–6	Alema 1:26–27
Alema 1:16	Alema 13:6, 10–12
2 Nifae 26:29	Iakopo 1:18–19
O le a le faitaulaga pepelo?	Na faapefea e ositaulaga a le Atua ona taitai i latou?

Ua tuuina mai i lenei gaoioiga se avanoa mo tamaiti e faatusatusa ai faitaulaga pepelo ma le perisitua. Vaevae le vasega i ni vaega se lua. Tuu atu i le vaega muamua e faitau, vailiili, ma talanoaina ia mau e uiga i faitaulaga pepelo, ma tuu atu i le vaega lona lua e faitau, vailiili, ma talanoaina ia mau e uiga i le perisitua. Faatonu le vaega muamua e saili mo se faauigaga o le upu faitaulaga pepelo ma faailoa mai ona elemene. Faatonu le vaega lona lua e faailoa mai faanaunauga ma uiga o e umia le perisitua i le faamamaluina o le Alii. A maea le taimi na tuu atu i tamaiti e vailiili ai a latou fuaiupu, tuu atu i se tamaitiiti mai vaega taitasi e lipoti mai mea na latou maua.

A maea ona lipoti mai le vaega muamua i faitaulaga pepelo, fai atu fesili nei:

Aisea na lauiloa ai aoaoga a Neoa? (Tagai i le Alema 1:3–4; tagai foi i le Helamana 13:27–28.)
E mafai faapefea ona aafia faiaoga o le talalelei pe afai o lo latou manuia sa faavae i lo latou lauiloa? E mafai faapefea e lenei mea ona aafia ai lo latou aoaoina o aoaoga faavae?

A maea ona lipoti mai le vaega lona lua i le perisitua, fai atu fesili nei:

E tusa ai ma le Alema 1:26, na faapefea ona faatatau ia ositaulaga ia i latou na latou aoaoina? Aisea e taua ai lenei uiga mo faiaoga?
O a nisi o mea e tutusa i le va o ositaulaga amiotonu i le Alema 1:25–27 ma taitai o le Ekalesia ma faifeautalai i aso nei?

Ina ia fesoasoani i tamaiti ia iloa faitaulaga pepelo i o tatou aso ma taunuuga o le faatagaina o faitaulaga pepelo ia olaola, fai fesili nei:

E tusa ai ma le Alema 1:12, o le a le taunuuga pe a faatagaina le olaola o faitaulaga pepelo?

E le gata i faitaulaga pepelo i le lalolagi, e mafai ona faaofiofi mai elemene o faitaulaga pepelo i totonu o le Ekalesia. Atonu e te manao e tuu atu i tamaiti e faitau ia saunoaga a Elder Dallin H. Oaks ma Elder David A. Bednar o loo i itulau 178 i le tusi lesona a tagata o le vasega. O nei saunoaga o loo aoao mai ai le taua o le aloese mai faitaulaga pepelo i o tatou valaauga faale-Ekalesia. O loo maua foi le saunoaga a Elder Oaks i le companion DVD A.

E mafai faapefea ona tatou aloese mai faitaulaga pepelo i o tatou valaauga e aoao atu ma taitai?

Alema 2. O Le a Faamalolosia i Tatou e le Atua a o Tatou Teenaina le Amioleaga

Fai i tamaiti e tomanatu i se taimi na latou teenaina ai le amioleaga, pe faaletagata lava ia pe faalauaitele. Ona valaaulia lea o i latou e mafaufau i fesili nei. Atonu e te manao e fai atu ia i latou e tali le leoa na fesili, ia i latou lava, nai lo le taliina i se talanoaga.

O le a le mea na uunaia oe e tu atu mo le mea moni ma le amiotonu?
Na faapefea ona e mauaina le malosi e faia ai lena mea?

Faamalamalama atu o loo tuuina mai i le Alema 2 se tala o le perofeta o Alema ma isi alii ma tamaitai amiotonu na teenaina le amioleaga, e oo lava i le tulaga ua naunau ai e tuu atu o latou ola. Valaaulia tamaiti e saili mo faanaunauga o nei alii ma tamaitai, faapea ma le auala na latou maua ai le malosi i taimi o faigata e tele.

Fai i tamaiti e faitau le leoa le Alema 2:1–7.

O ai Amiliki, ma o a foi mea e lua na ia manao i ai? (Tagai i le Alema 2:2, 4. Na ia manao e avea ma tupu, ma na ia manao e faaumatia le Ekalesia.)
Na faapefea ona faatoilaloina e sa Nifae taumafaiga a Amiliki e fia avea ma tupu?

Faasoa atu le saunoaga lenei mai le Perofeta o Iosefa Samita e faatatau i le tiute o le Au Paia o Aso e Gata Ai e avea ma se faatosinaga mo le lelei i o latou alaalafaga:

“O lo tatou tiute o le taulai lea o a tatou faatosinaga uma ina ia taliaina mea mama ma lelei, ma lē taliaina ai mea lē mama” (i le History of the Church, 5:286).

O a ni auala e mafai ai ona tatou “taliaina mea mama ma lelei”?

Aotele le anotusi o le Alema 2:8–14 i le faamalamalamaina atu e faapea na faapotopoto e Amiliki e na mulimuli ia te ia, faatalitonuina i latou e fai o ia ma o latou tupu, ma o atu ai e tau ma sa Nifae i se taumafaiga e faataunuu ona manaoga patino.

E toafia tagata na fasiotia ona o se taunuuga o le manao o Amiliki e fai ma tupu? (Tagai i le Alema 2:19.) E faapefea ona fesootai lenei tala ma le lapataiga a le Tupu o Mosaea i le Mosaea 29:17, 21?

Tuu atu i tamaiti e tagai vave i le Alema 2:15–18, 28–31 e saili ai upu ia ua faamalosia po o le sa faamalosia.

E tusa ai ma le Alema 2:28, aisea na faamalosia ai e le Alii sa Nifae?
Aisea e te manatu ai e aumai e le Tama Faalelagi i nisi taimi le malosi ia i tatou e teena ai le amioleaga nai lo le aveesea o ona faatosinaga mai o tatou olaga?

Valaaulia se tamaitiiti e faitau leotele le Alema 2:29–31. Fai i tamaiti e faailoa mai auala e mafai ai ona tatou faaaogaina faatinoga a Alema i nei fuaiupu e fai ma se faataitaiga e mulimuli ai pe a tatou tauivi ma le amioleaga.

Molimau atu o le a faamalosia e le Alii i tatou e tetee atu i le fili a o tatou tutu mo le upumoni ma le amiotonu.

Alema 3. O Nisi Taimi e Tuueseeseina ai e Tagata i Latou Lava mai E Amiotonu i le Suia o o Latou Foliga Vaaia i Fafo

Faamalamalama atu i se taumafaiga ina ia faailoa faatasi ma sa Lamana, na suia e sa Amilikī o latou foliga vaaia. Valaaulia se tamaitiiti e faitau le Alema 3:4–5.

O le a le mea na faia e sa Amilikī e suia ai o latou foliga vaaia?
Aisea e te manatu ai na latou mananao ina ia ese le “faailogaina mai sa Nifae”?
O a nisi o mea ua faia e tagata i nei aso i o latou foliga vaaia i fafo e tuueseese ai i latou lava mai e amiotonu?

Afai e te manao e ta’ua le taina o pe’a o se vaega o lenei talanoaga (pe afai foi e ta’ua e tamaiti), faaali atu se ata o se malumalu. Afai e mafai, faaali atu le malumalu lena e sili ona tu latalata i tamaiti.

O le a sou lagona pe afai e te vaaia ni tusitusiga ua vali i le tino o le maota o le Alii?

E tatau i tamaiti ona malamalama o o latou tino e paia i le Alii, e pei o malumalu o loo tatou fausiaina. Na saunoa mai Peresitene Gordon B. Hinckley (1910–2008), le Peresitene lona 15 o le Ekalesia, “O se pe’a o se tusitusiga lea i luga o le malumalu o le tino” (i le Lipoti o le Konafesi, Oke. 2000, 70; po o le Liahona, Ian. 2001, 67). Faasoa atu le fautuaga lenei o loo i le Mo Le Malosi o le Autalavou e fesoasoani ai i tamaiti ia aloese mai le mulimuli atu i sitaili faalelalolagi e faatatau i le faailogaina o o latou tino:

“O lou tino o le foafoaga paia a le Atua. Ia faaaloalo i ai o se meaalofa mai le Atua, ma aua lava nei faaleagaina i soo se itu. E ala i ou laei ma ou foliga vaaia, e mafai ai ona e faaali atu i le Alii e te iloa le taua tele o lou tino. E mafai ona e faaali atu o oe o se soo o Iesu Keriso” (Mo Le Malosi o le Autalavou: Faataunuuina o Lo Tatou Tiute i le Atua [tamaitusi, 2001], 14).

Atonu foi e te manao e fai i tamaiti e faitau le saunoaga a Peresitene Gordon B. Hinckley o loo i itulau 181 i le tusi lesona a tagata o le vasega. O loo maua foi lea saunoaga i le companion DVD B.

Fai atu fesili nei. Valaaulia tamaiti e mafaufau i a latou tali i fesili e aunoa ma le taliina leotele.

O a savali o loo e tuuina atu e ala i auala e te laei ai ma faailogaina ai lou tino?
E faapefea ona avea le ala e te laei ai ma se faailoga o mea e te foliga i ai i totonu?
Faatasi ai ma le migao, o a isi vaega o laei ma foliga vaaia e mafai ona faaalia ai o oe o se soo o Iesu Keriso? (Atonu e te manao e faataga tamaiti e faasoa mai a latou tali i lenei fesili. Atonu foi e te manao e valaaulia tamaiti e faitau le saunoaga a Elder M. Russell Ballard o loo i le itulau 181 i le tusi lesona a tagata o le vasega. O loo maua foi lenei saunoaga i le companion DVD C.)

Molimau atu i le paia o le tino. Valaaulia tamaiti e mulimuli i le fautuaga a perofeta o aso e gata ai a o latou faia filifiliga i aso uma e uiga i laei ma foliga vaaia.

Alema 4. E Feteenai le Molimau Paia ma le Faamaualuga

Faatonu tamaiti e faitau le leoa le Alema 4:6–12 ma faailoa mai ia aafiaga o le faamaualuga i tagata o le Ekalesia.

Na faapefea ona iloagofie le faamaualuga i tagata o le Ekalesia? (Atonu e te manao e lisi ia tali a tamaiti i luga o le laupapa.)
O le a se aafiaga o i latou na le auai i le Ekalesia ona o le faamaualuga o tagata o le Ekalesia?
E tusa ai ma faatinoga a nei tagata o le Ekalesia, o a mea na mafaufau isi na latou talitonu i ai?

Tuu atu i tamaiti se minute se tasi pe lua e mafaufau ai ia lava i auala latou te tali atu ai i le fesili lenei:

Afai na vaavaai se tasi ia te oe ae na te le iloa lelei oe, o le a se mea o le a manatu i ai lena tagata e uiga i ou talitonuga?

A lava se taimi e mafaufau ai tamaiti, fai atu i ai le fesili lenei:

O a ni auala e mafai ona faatosinaina ai o tatou olaga e lenei fesili?

A o avea ai ma se perofeta ma se faamasino sili, na atugalu lava Alema e uiga i le faamaualuga o tagata, ma na ia manao e “lepeti” lo latou faamaualuga (Alema 4:19). Fai atu i ni tamaiti se toalima e faitau le Alema 4:15–19, tasi le fuaiupu a le tagata.

O le a le mea o fautua mai i le fuaitau “aoai atu … i le molimau paia” e uiga i le auala na aoao atu ai Alema?

A o avea ai ma faitaulaga sili e vaaia le Ekalesia, na tuu atu e Alema le molimau lea na aofia ai ma upu o lapataiga ma apoapoaiga faapea ai ma tautinoga o le upumoni. I le avea ai ma ni tagata o le Ekalesia, o a tatou upu o “molimau mama aiai” e masani lava ona sili ona aofia ai na o la tatou tautinoga o mea ua tatou iloa e moni. Ina ia faamamafaina le uiga ia i tatou o le tuu atu o molimau paia, atonu e te manao e fai i tamaiti e faitau le saunoaga a Elder M. Russell Ballard ma Peresitene Howard W. Hunter o loo i le itulau 184 i le tusi lesona a tagata o le vasega. O le saunoaga a Elder Ballard o loo maua foi i le companion DVD D.

Aisea e te manatu ai e i ai i le molimau paia le mana e lepeti ai le faamaualuga?
Na faapefea ona faatosinaina lou olaga a o e faalogo atu i tagata o tuu mai molimau paia o le talalelei?

Mafaufau e faasoa atu le saunoaga lenei a Peresitene Spencer W. Kimball (1895–1985), le Peresitene lona 12 o le Ekalesia, e faatatau i le uiga o le tuu atu o molimau paia:

“Aua le aoai atu le tasi i le isi; e le o se molimau lena mea. Aua le tau atu i isi le auala e ola ai. Tau lava o le tau atu o lou lagona o i totonu. O le molimau lena. O le taimi lava e amata ai ona e lauga atu i isi, e muta ai ma lau molimau. Tau lava o le tau mai ia i matou o ou lagona, ma mea ua tau atu ia te oe e lou mafaufau ma le loto ma musele uma o lou tino” (The Teachings of Spencer W. Kimball, ed. Edward L. Kimball [1982], 138).