Mataupu 51

Eteru 6–10

Folasaga

I le Eteru 6–10, o loo tuu mai ai e Moronae se aotelega o le tele o augatupulaga o tagata sa Iareto. Ua faaalia i lenei vaaiga lautele televave ia taunuuga o e amiotonu ma e amioleaga. O mea na matau ma lapataiga a Moronae e mafai ona fesoasoani ia i tatou e aloese ai mai mailei na oo i ai sa Iareto. Na faaauau pea ona valaau atu le Alii ia sa Iareto ia salamo ma o mai ia te Ia, ma o loo faaauau pea ona Ia valaau mai ia i tatou e faia lea lava mea e tasi ina ia mafai ai ona Ia tuu maia ia i tatou le filemu ma le fiafia.

O Nisi o Aoaoga Faavae ma Mataupu Faavae

A o tatou faalagolago i le Alii ma faia Lona finagalo, Na te taitaia o tatou ala (tagai i le Eteru 6:1–12).
E tausalaina e Perofeta le amioleaga ma lapatai mai i mea matautia (tagai i le Eteru 7:23–27; 9:28–31).
E saili pulega faalilo e faaumatia malo ma aveesea le saolotoga (tagai i le Eteru 8; 9:26–27; 10:33).

Fautuaga mo le Aoaoga

Eteru 6:1–12. A o Tatou Faalagolago i le Alii ma Faia Lona Finagalo, Na te Taitaia o Tatou Ala

Valaaulia tamaiti e faitau le leoa le Eteru 6:1–12, saili mo mea e tutusa ai i le va o le malaga a sa Iareto i le nuu folafolaina ma la tatou malaga i le olaga nei e agai atu i le malo selesitila. Fautua atu e faia se lisi o upu ma fuaitau i lenei mau o tusitusiga paia lea e mafai ona faatatau i o tatou olaga. Mo se faataitaiga, e mafai ona latou mafaufau i le auala e agi ai le matagi e agai atu i le nuu folafolaina lea e mafai ona faatusatusa i le faatosinaga a le Atua i o tatou olaga. E mafai foi ona latou mafaufau i mea e tutusa ma maa, o meaai na teuina mo sauniuniga mo le malaga, le loloto o le sami, o vaa, ma sa Iareto lava ia.

Pe a maea le taimi na tuu atu e suesue ai ma mafaufau loloto tamaiti, fai i ai latou e faapotopoto i ni vaega laiti e fefaasoaai ai mea na latou maua. Ona fai atu lea i vaega taitasi e filifili se tasi e faasoa maia manatu o le vaega i le vasega atoa. Valaaulia tamaiti e faasoa mai ni aoaoga faavae faaopoopo po o ni mataupu faavae a o faagasolo le talanoaga. Fautua atu i tamaiti e tusi i lalo mea o loo faasoa mai e vaega taitasi.

O a ni mataupu faavae e mafai ona tatou aoaoina mai le aafiaga o sa Iareto?
O a ni auala e mafai ai ona fesoasoani nei mataupu faavae ia i tatou e maua ai le taitaiga atoa a le Atua i o tatou olaga?

Eteru 6:9. “”Ua Latou Pepese foi i Viiga i le Atua”

Tuu atu i tamaiti se taimi e faitau le leoa ai le Eteru 6:9 ma le 1 Nifae 18:9.

O le a le eseesega i le va o pesega ua faamatalaina mai i nei fuaiupu e lua? (Mo se isi faatusatusaga o nei tala, tagai i le itulau 390 i le tusi lesona a tagata o le vasega.)
O a ni faamanuiaga e oo mai ia i tatou ma isi a o tatou “pepese i viiga i le Atua”?

Eteru 6:12. “Ua Maligi o Latou Loimata … Ona [o le] … Finagalo Alofa Tele [o le Atua]”

Faitau le Eteru 6:12 faatasi ma tamaiti.

O le a le uiga o le upu finagalo alofa ia te oe?

O se vaega o lenei talanoaga, atonu e te manao e valaaulia tamaiti e faitau le faamatalaga e uiga i le “Alofa Mutimutivale” o loo i itulau 16–8 i le Faamaoni i le Faatuatua.

E faapefea ona faaopoopo atu e le upu mutimutivale se uiga i le upu alofa?
O le a le sāo o le upu tele i lo tatou malamalamaga i lenei fuaiupu?
O le a le mea na faia e tagata ina ua latou taunuu i le nuu folafolaina? O a ni auala e mafai ona tatou mulimuli ai i a latou faataitaiga?

Tuu se taimi i tamaiti e mafaufau ai e uiga i “le finagalo alofa tele [o le Atua]” i o latou olaga. Pe a maea le taimi na tuu, valaaulia nisi o i latou e faasoa mai ni faataitaiga.

Eteru 6:17. “Ua Aoaoina foi i Latou e Savavali ma le Faamaulalo i luma o le Atua”

Fai atu i se tamaitiiti e faitau le Eteru 6:17.

Fai atu i tamaiti e faailoa mai ni faatinoga ma uiga na latou vaaia i isi o loo faaalia ai le “savavali ma le faamaulalo i luma o le Atua.” Atonu e te manao e lisi tali a tamaiti i luga o le laupapa.

Aisea e manaomia ai ona tatou “savavali ma le faamaulalo i luma o le Atua” ina ia mafai ai ona “aoaoina … mai luga”?
E mafai faapefea ona tatou faamaulalo atili? E mafai faapefea e lo tatou manatuaina o a tatou sootaga ma le Alii ona fesoasoani tatou te lotomaulalo ai?
O a nisi o luitau tatou te feagai a o tatou tauivi ia lotomaulalo? E mafai faapefea ona faatoilaloina nei luitau?

Eteru 7:23–27; 9:28–31. E Tausalaina e Perofeta le Amioleaga ma Lapatai mai i Mea Matautia

Tuu atu i tamaiti se taimi e faitau le leoa ai le Eteru 7:23–27 ma le 9:28–31. Fai atu ia i latou e saili mo mea e tutusa ai faapea foi ma eseesega i tala e lua. Talanoaina fesili nei:

O le a le mea e mafai ona taitai atu ai se tagata e taliaina pe teenaina foi se lapataiga a se perofeta?
O a nisi o lapataiga ua tatou maua mai lo tatou perofeta soifua?
O a nisi o faataitaiga o tagata ua mauaina faamanuiaga ona na latou mulimuli i lapataiga a perofeta? (Uunaia tamaiti e faasoa mai ni faataitaiga mai o latou olaga pe mai foi i olaga o tagata latou te iloaina.)

Eteru 8; 9:26–27; 10:33. E Saili Pulega Faalilo e Faaumatia Malo ma Aveesea le Saolotoga

Fai atu i tamaiti e iloilo taitoatasi pe iloilo o se vasega faamatalaga e uiga i le Helamana 6:18–40 o loo i itulau 286 i le tusi lesona a tagata o le vasega. O nei faamatalaga ua tuu mai ai se faamalamalamaga otooto o pulega faalilolilo.

Faamalamalama atu a o aoteleina e le perofeta o Moronae le talafaasolopito o sa Iareto, na ia lapataiina tagata faitau o onapo nei i le matautia o pulega faalilolilo. Tuu atu i tamaiti e faitau le ulutala mataupu mo le Eteru 8. Ona faaaoga lea o le Eteru 8:20–26, e talanoaina ai nisi o fesili po o fesili uma nei:

Na faapea mai Moronae o pulega faalilolilo na faaumatia ai le malo o sa Iareto ma le malo sa Nifae (tagai i fuaiupu 20–21). Aisea e te manatu ai o pulega faalilolilo e matuai faataumaoia?
E mafai faapefea e tagata taitoatasi po o ni malo ona “fesoasoani” i pulega faalilolilo? (Tagai i le fuaiupu 22.)
Aisea e te manatu ai na tusia e Moronae le matuia o taunuuga o pulega faalilolilo? (Tagai i fuaiupu 23–26.)
E faapefea ona avea pulega faalilolilo ma se taufaasese o feagaiga moni ma le Atua?

Tuu atu i tamaiti e faitau le Eteru 9:26–27 ma le 10:33.

Aisea e te manatu ai na oo lava i vaitaimi o le amiotonu sa aafia pea le malo o sa Iareto i pulega faalilolilo?
O a ni uiga patino e mafai ona tatou atiina ae lea o le a fesoasoani ia i tatou e tetee atu i pulega faalilolilo? (E mafai ona tuu mai e tamaiti tali e pei o le faamaoni patino, alofa mo le Alii, ma le alofa mo poloaiga a le Alii.)

Tuu atu i tamaiti e faitau le Helamana 6:37 ma le 3 Nifae 5:4–6.

O le a le auala sili e aveesea ai pulega faalilolilo mai se nuu?

Eteru 10. E Mafai e Taitai ona Faatosinaina Malo ia Amioleaga pe Amiotonu

Faamalamalama atu i le Eteru 10, na aotele ai e Moronae ni augatupulaga i le na o le 34 fuaiupu. O nisi tupu na amiotonu ma taitai atu tagata i le manuia ma le filemu; o isi na amioleaga ma taitai atu ai tagata i le faanoanoa. E lei faapea na suia faafuasei le malo mai le amiotonu i le amioleaga pe mai le amioleaga i le amiotonu e pei ona suia o latou tupu. Ae foliga mai na suia lemu i latou.

Faaaoga le lesona faitino lenei e faaalia ai lenei manatu. Atonu e te manao e faataitai a o lei faia le vasega.

Faaali atu se ipu malamalama manino ua faaafa i le vai mama.

Fai atu i se tamaitiiti e faitau le Eteru 10:5. Ona faasinasina lea o se mataua o le faalanu meaai i le vai.

Tuu atu i se tamaitiiti e faitau le Eteru 10:9–11. Ona faasinasina lea o se isi mataua o le faalanu meaai i le vai.

Valaaulia se tamaitiiti e faitau le Eteru 10:13. Ona faasinasina lea o se isi mataua o le faalanu meaai.

Faasino atu e pei lava o malo e i ai taitai amioleaga e mafai ona faasolosolo ina amioleaga, e faapena foi i malo e i ai taitai amiotonu e mafai foi ona faasolosolo ina amiotonu atili. Tuu atu i se tamaitiiti e faitau le Eteru 10:16. Ona ave lea o se vailaau pisia i le vai ua faalanuina. Toe fai lenei faagasologa i le fuaiupu 17 ona sosoo ai lea ma fuaiupu 18–19. (I le faaiuga, e tatau ona toe manino le vai.)

O a ni mataupu faavae e mafai ona tatou aoaoina mai lenei lesona faatino? Na faapefea ona faatatau nei mataupu faavae ia sa Iareto? O a ni auala e faatatau ai ia mataupu faavae i malo i aso nei?
O a nisi o faatosinaga i o tatou malo lea e mafai ona faaeleelea ai o tatou olaga? O le a le mea e mafai ona tatou faia e tausia ai o tatou olaga ia mama?

Faaiu atu i le faamamafaina e faapea pe a tatou ola amiotonu, e mafai ona tatou fiafia i soo se tulaga.