Fono Aoai Faale-Ekalesia
O Epikopo ma peresitene o paranesi ma siteki, misiona, ma peresitene o itu ua i ai se matafaioi e fesoasoani i tagata e faatoilalo ai soligatulafono e ala i le salamo. O soligatulafono sili ona ogaoga, e pei o le solia o tulafono a le malo, o le faasaunoa i taitoalua, faasaunoa i tamaiti, mulilua, faitaaga, toso teine, ma le mata’ifale po o le toe ui i fanau, e masani ona manaomia ai aoaiga aloa’ia faale-Ekalesia. O aoaiga aloa’ia faale-Ekalesia e aofia ai le taofia o avanoa o se tagata auai o le Ekalesia, po o le tapē o le igoa mai faamaumauga a le Ekalesia.
O le faagasologa o le aoaiga aloa’ia e amata pe a tuvao e se taitai perisitua pulefaamalumalu se fono aoa’i. O faamoemoega o fono aoa’i o le laveaiina o agaga o e ua solitulafono, puipuia o ē ua ta’umamaina, malupuipuia o le mama atoatoa, amiotonu, ma le igoa ta’ulelei o le Ekalesia.
O aoa’iga faale-Ekalesia o se faagasologa musuia lea e faataunuuina mo se vaitaimi. O lenei faagasologa ma le Togiola a Iesu Keriso, e mafai ai ona maua e se tagata o le ekalesia le faamagaloga o agasala, toe maua le filemu i le mafaufau, ma maua le malosi e aloese mai ai i le solitulafono i le lumanai. O le faaiuga o le fono aoa’i e lē o faamoemoe e muta ai le faagasologa. Ua faatulagaina e fesoasoani ai i fanau a le Tama Faalelagi e faaauau pea a latou taumafaiga e toe foi mai ai i le atoatoa ma faamanuiaga uma o le Ekalesia. O taunuuga moomia o le faia lea e le tagata o suiga ia e manaomia e salamo ai ma le atoatoa.