Auaunaga
O soo moni o Iesu Keriso e ia i latou le manao e auauna atu i e o siomia i latou. Na fetalai mai le Faaola, “O le mea lea e iloa ai e tagata uma lava o ou soo outou, pe afai ua outou fealofani” (Ioane 13:35).
Ina ua papatisoina oe, sa e osifeagaiga e ave i ou luga le suafa o Iesu Keriso. Na faamatala atu e le perofeta o Alema lenei feagaiga i se vaega o tagata fou liliu mai o e na mananao e papatisoina. Na ia matauina o lo latou manao e “o mai i le lafu mamoe a le Atua” e aofia ai lo latou mananao e tuuina atu auaunaga aoga—e “fesui a outou avega e ave ina ia mama ai,” e “faanoanoa faatasi ma e faanoanoa,” ma “faamafanafana i e ua tatau i ai le faamafanafanaga” (Mosaea 18:8–9).
Ao e taumafai malosi e auauna atu i isi, ia e tepa taula’i atu i le Faaola o sou faataitaiga. E ui lava na afio mai o Ia i le lalolagi o se Alo o le Atua, sa auauna atu o Ia lava ma le lotomaualalo ia i latou na siomia o Ia. Na Ia fetalai mai, “A o au nei, o loo ia te outou pei o le auauna lava” (Luka 22:27).
Na faaaogaina e le Faaola se faataoto e aoao mai ai le taua o le auaunaga. I le faataoto, ua Ia toe foi mai i le lalolagi i Lona mamalu ma tuueseeseina ia tagata amiotonu mai e amioleaga. Na Ia fetalai atu i e amiotonu: “O mai ia, o outou ua faamanuiaina e lo’u Tama, ia fai mo outou tofi le malo ua saunia mo outou a o lei faavaeina le lalolagi: Aua na ou fia ai, ona outou avane ai lea ni mea ou te ai ai; na ou fia inu, ona outou avane ai lea ni vai ou te inu ai; sa fai a’u ma tagata ese, ona outou talia lea o a’u; na ou le lavalava, ona outou faaofuina lea o a’u; na ou ma’i, ona outou asiasia mai lea o a’u; na ou i le falepuipui, ona outou o ane ai lea Ia te au” (Mataio 25:34–36).
O e amiotonu, o e na le malamalama i lea savali, na fesili: “Le Alii e, o anafea na matou iloa ai oe ua fia ai, ma matou fagaina oe? po o fia inu, ma matou avane e te inu ai? O anafea foi na matou iloa ai oe o le tagata ese, ma matou talia oe? po o le le lavalava, ma matou faaofuina oe? O anafea foi na matou iloa ai oe ua ma’i, po o i le falepuipui, ma matou o atu ai ia te oe?” (Mataio 25:37–39).
Ona tali atu ai lea o le Alii, “Aua na faia e outou i le tasi o e aupito itiiti o ou uso nei, o au lea na outou faia i ai” (Mataio 25:40).
Ua valaau mai le Faaola ia te oe ina ia e tuuina atu oe lava e te auauna atu i isi. O ou avanoa e faia ai, e leai se tapulaa. Ia saili i aso uma mo auala e faafiafia ai se loto, e tuuina atu ai upu alofa, e faia galuega mo isi e le mafai ona latou faia mo i latou, ma fetufaai atu le talalelei. Ia faalogo atu i musumusuga a le Agaga, o loo musuia oe e te auauna atu. O le a e iloa ai o le ki moni lava i le fiafia o le galue lea ina ia faafiafiaina isi tagata.