Lotogatasi
A o le i faataunuuina e le Faaola le Togiola, sa Ia tatalo mo Ona soo, o e na Ia auina atu i le lalolagi e aoao atu le talalelei. Na Ia tatalo foi mo i latou o e o le a talitonu ia te Ia ona o upu a Ona soo. Sa Ia aioi atu mo le lotogatasi: “Ina ia tasi i latou uma, faapei o oe le Tama o i totonu ia te au, o au foi o i totonu ia te oe, ina ia tasi i latou i totonu ia te i taua; ina ia talitonu le lalolagi ua e auina mai au” (Ioane 17:21).
E ala mai i lenei tatalo ua tatou aoao ai i le ala e tuufaatasia ai e le talalelei i tatou ma le Tama Faalelagi ma Iesu Keriso ma isi. Pe a tatou ola i le talalelei, maua sauniga faaola ma tausia a tatou feagaiga, o le a suia o tatou natura. Ua faamamaina i tatou i le Togiola a le Faaola, ma ua mafai ai ona tatou ola i le lotogatasi, fiafia i le filemu i le olaga ma sauniuni e nonofo faatasi ma le Tama ma Lona Alo e faavavau.
Na fetalai mai le Alii, “Afai e le tasi outou e le a a’u outou ” (MFF 38:27). E mafai ona e sailia ma faaleleia lenei tulaga o le lotogatasi i totonu o lou aiga ma totonu o le Ekalesia. Pe afai ua e faaipoipo, e mafai e oe ma lou toalua ona tasi i faamoemoega ma mea e fai. E mafai ona e faatagaina o oulua uiga tutusa e galulue faatasi ai ma le isi ao oulua feagai ma luitau ma tutupu ae ai i le alofa ma le malamalama. E mafai foi ona lotogatasi ma isi tagata o le aiga ma tagata o le Ekalesia e ala i le galulue faatasi, aoaoina le tasi, ma faamalosiau atu i le tasi. E mafai ona tasi oe ma le Peresitene o le Ekalesia ma isi taitai o le Ekalesia ao e suesueina a latou aoaoga ma mulimuli ia latou fautuaga.
Ao faatupulaia le Ekalesia i le lalolagi atoa, o tagata uma o le Au Paia o Aso e Gata Ai e mafai ona lotogatasi. E mafai ona “fusifusia faatasi o latou loto i le lotogatasi ma le fealofani” (Mosaea 18:21). E tatou te talisapaia le eseesega i aganuu ma le eseesega i tagata taitoatasi, ae e tatou te saili foi le “tasi le faatuatuaga” lea e maua pe a tatou mulimuli i taitai musuia ma manatua o i tatou uma lava o fanau a le Tama e tasi (tagai Efeso 4:3–6, 11–13).