Malumalu
O malumalu o maota moni ia o le Alii. O ni nofoaga paia ia e tapuai ai lea e mafai ona asiasi mai ai le Alii. E na o le aiga e mafai ona faatusatusa atu lona paia i le malumalu.
I le talafaasolopito, sa poloaiina e le Alii Ona tagata ina ia fausia malumalu. Ua gauai atu le Ekalesia i aso nei i le valaau a le Alii e fausia malumalu i le lalolagi atoa, ina ia avanoa ai faamanuiaga o le malumalu i le toatele o fanau a lo tatou Tama Faalelagi.
Sauniga mo e o Ola
O le faamoemoega autu lava o malumalu o le mauaina ai lea o sauniga manaomia mo lo tatou faaeaga i le malo selesitila. O sauniga o le malumalu e tau atu i faamanuiaga silisili lea e maua e ala i le Togiola a Iesu Keriso. O mea uma lava o loo tatou faia i totonu o le Ekalesia—o a tatou sauniga ma gaoioiga, o a tatou taumafaiga faafaifeautalai, o lesona o loo aoao atu ma viiga o loo tatou peseina—e tatau ona faasino atu ai i tatou i le Faaola ma galuega o loo tatou faia i totonu o malumalu paia.
O se tasi o sauniga tatou te maua i totonu o le malumalu o le faaeega paia. O le upu faaeega paia o lona uiga o le “meaalofa,” ma o le faaeega paia i le malumalu o se meaalofa moni lava mai le Atua. O le sauniga e aofia ai le faasologa o faatonuga ma e aofia ai ma feagaiga tatou te osia ina ia ola amiotonu ma ola ai e tusa ma mea e manaomia i le talalelei. E fesoasoani le faaeega paia e tatou te tepa taulai atu ai i le Faaola, Lana vaega i le fuafuaga a lo tatou Tama Faalelagi, ma la tatou tautinoga e mulimuli ia te Ia.
O le isi sauniga tatou te maua i le malumalu o le faaipoipoga selesitila, lea e faamauina ai tane ma ava mo le faavavau. O se faamauga e faia i totonu o le malumalu e faaauau lava e oo i le faavavau pe afai e faamaoni le tane ma le ava i feagaiga na la osia.
O fanau e fananau mai i matua ua faamauina i totonu o le malumalu ua fananau mai i totonu o le feagaiga. O nei fanau e otometi lava ona avea ma vaega o se aiga e faavavau. O fanau e le fananau mai i totonu o le feagaiga e mafai foi ona avea ma vaega o se aiga e faavavau i le taimi lava e faamauina ai i o latou matua moni po o matua fai. O le sauniga o le faamauina o fanau i matua e faia i totonu o le malumalu.
Pe afai ua e mauaina sauniga o le malumalu, ia manatua e le aunoa feagaiga ua e faia. Ia foi atu e le aunoa i le malumalu. Afai o oe o se tama po o se tina, aoao lau fanau i le taua o le malumalu. Fesoasoani atu ia i latou ina ia latou saunia ina ia agavaa e ulu atu i le malumalu.
Afai e te le i mauaina sauniga o le malumalu, ia amata nei loa ona e sauniuni. Pe a talafeagai ai ma maua se avanoa, ia ulufale atu i le malumalu e auai i le faatinoina o papatisoga ma faamauga mo e ua maliliu.
Sauniga mo e ua Maliliu
O tagata ua maliliu e aunoa ma nei sauniga manaomia o le talalelei, e mafai ona latou mauaina na sauniga e ala i galuega e faia i totonu o malumalu. E mafai ona e faia lenei galuega e avea ai ma sui o ou tuaa ma isi ua maliliu. I le avea ai ma sui mo i latou, e mafai ona papatisoina ma faamauina oe, mauaina faaeega paia, ma auai i le faamauga o le tane i le ava ma fanau i matua.
E tatau ona e matua auai i le sailia o talafaamaumau o ou tuaa ua maliliu ina ia mafai ona faia galuega o le malumalu mo i latou.
Mo nisi faamatalaga e uiga i galuega faalemalumalu mo e maliliu ma galuega o talafaasolopito o aiga, tagai “Galuega o Talafaasolopito o Aiga ma Gafa,” itulau 77–80.
Agavaa e Ulu atu i le Malumalu
Ina ia ulu atu i le malumalu, e tatau ona e agavaa. E te faamaonia lou agavaa i faatalanoaga e lua—o le tasi e faia e se tasi o le au epikopo po o le peresitene o lau paranesi ma le isi e faia e se tasi o le au peresitene o lau siteki po o le peresitene o le misiona. O le a tausia e ou taitai perisitua nei faatalanoaga i se auala patino ma le le faalauaiteleina. I nei faatalanoaga taitasi, o le a fesiligia ai oe e taitai perisitua e uiga i ou tulaga patino ma lou agavaa. O le a fesiligia foi oe i lau molimau i le Tama Faalelagi ma le Togiola a Iesu Keriso, ma o le a fesiligia oe pe e te lagolagoina le au taitai aoao ma taitai o le Ekalesia i le lotoifale. O le a fesiligia oe e faamautinoa mai o loo e ola mama ma o loo e tausia le Upu o le Poto, totogiina atoa le sefuluai, ma ola ai i aoaoga a le Ekalesia, ma e te lē o auai pe lagolagoina ni vaega faatuiese i le ekalesia.
Afai o le a lelei ona e tali atu i fesili i nei faatalanoaga ma afai ua faamalieina oe ma ou taitai perisitua ua e agavaa e ulu atu i le malumalu, o le a e mauaina se pepa faataga o le malumalu. O le a oulua sainia ma ou taitai perisitua le pepa faataga, lea o le a faatagaina ai oe e te ulu atu i le malumalu mo le isi lua tausaga, pe afai lava o le a tumau ai lou agavaa.
O faatalanoaga mo se pepa faataga o le malumalu e tuuina atu ai ia te oe se avanoa silisili e suesueina ai lou agavaa ma le gasologa o lou olaga. Pe afai e i ai se mea e le o sa’o o lou olaga, ia vave talanoa atu i lou epikopo po o lou peresitene o le paranesi a o le’i oo i lou faatalanoaga mo se pepa faataga. O le a mafai ona ia fesoasoani ia te oe e te saunia ina ia agavaa mo se pepa faataga.
Laei o le Malumalu
Pe a e alu atu i le malumalu, e tatau ona e laeiina ou laei sili ona lelei, e pei ona e faia pe a e auai atu i le lotu. Pe a e i ai i totonu o le malumalu, e sui ou laei i laei papae o le malumalu. O lenei suiga o laei e faia i totonu o potu e sui ai laei, lea e te faaogaina ai se loka ma se potu faapitoa e sui ai. Ia faatumauina ma le faaeteete uiga tausaafia i totonu o le malumalu.
Ao tuu ou laei i totonu o loka, e mafai foi ona e tuuina ese ou faalavelave uma faalelalolagi. O lou laeiina o laei papae, e mafai ona e lagonaina ai le lagona e tasi ma se faalogona o le tutusa lelei ma isi tagata i totonu o le malumalu, aua o tagata uma o loo i ou autafa ua tutusa uma o latou laei.
Laeiina o Ofusa
O le taimi lava e maua ai ou faaeega paia, ua e mauaina ai faamanuiaga o le laeiina o ofusa i lou olaga atoa. Ua manaomia ai ona e laeiina e tusa ai ma faatonuga e tuuina mai i le faaeega paia. Ia manatua o faamanuiaga e o faatasi ma lenei avanoa paia e faalagolago i lou agavaa ma lou faamaoni i le tausiga o feagaiga o le malumalu.
O le ofusa e faamanatu mai ai pea ia feagaiga ua e faia i totonu o le malumalu. E ao ona e tausia ma le faaaloalo i taimi uma. E le tatau ona e faaalia atu ia i latou e lē malamalama i lona taua, ma e le tatau foi ona e fetuuna’ia ina ia mafai ai ona faaaoga isi ituaiga o laei. Pe a e laeiina ma le tatau, o le a aumaia ai le puipuiga e tetee atu ai i faaosoosoga ma le leaga. O le laeiina o ofusa o le faailoga vaaia lea i fafo o se tautinoga i totonu e mulimuli atu i le Faaola.
Faamanuiaga e maua mai le ulufale i le Malumalu
E le gata o se nofoaga e faataunuuina ai sauniga o le perisitua paia, ae o le malumalu o se nofoaga foi o le filemu ma faaaliga. Pe a o faapopoleina oe pe o mamafa foi i lou mafaufau ni filifiliga, e mafai ona e alu atu ma ou popolega i le malumalu. O iina e mafai ai ona e maua taitaiga faaleagaga.
O nisi taimi atonu e te lagona ai ua le mafai ona e manatunatu lelei ona ua lofituina lou mafaufau i faafitauli ma le tele o mea ua alu i ai lou mafaufau. I totonu o le malumalu, e mafai ona aveeseina ai aafiaga o nei lagona, ma aveeseina ai le le malamalama ma le le mautonu, ma mafai ai ona e malamalama i mea e te lei malamalama ai muamua. E mafai ai ona e maua auala fou e faafetauia ai luitau o loo oulua faafeagai.
O le a faamanuiaina oe e le Alii ao e auai atu i galuega o sauniga paia i totonu o le malumalu. Ma o faamanuiaga e tuuina mai e Ia ia te oe o le a le gata ai i totonu o le malumalu. O le a Ia faamanuiaina oe i vaega uma lava o lou olaga. O au galuega i totonu o le malumalu o le a faamalosia ma faamamaina ai oe faaleagaga.