Faamasinoga Tonu
O le faamasinoga tonu o le tulafono e le suia ma e aumaia ai le faaiuga mo amioga. Ona o le tulafono o le faamasinoga tonu, e te maua ai faamanuiaga pe a e usitai i poloaiga a le Atua (tagai MFF 130:21–22). O le tulafono foi o le faamasinoga tonu e faamalosia ai foi le totogiina atu o se faasalaga i agasala uma e te faia. E manaomia ai le le faatagaina o se mea le mama e nonofo faatasi ma le Atua (tagai 1 Nifae 10:21).
Ina ua faataunuuina e le Faaola le Togiola, sa Ia tauaveina i Ona luga a tatou agasala. Sa mafai ai e Ia ona “faaatoatoa ai iuga o le tulafono” (2 Nifae 2:7) aua na Ia tuuina atu o Ia lava i le faasalaga na manaomia e le tulafono mo a tatou agasala. I le faia o lena mea, Na Ia “faamalie ai poloaiga a le faamasinoga” ma faaoo atu ai le alofa tunoa i a i latou uma o e salamo ma mulimuli ia te Ia (tagai Mosaea 15:9; Alema 34:14–16). Talu ai ona ua Ia totogiina le tau mo au agasala, o lea e te lē pagatia ai i lena faasalaga pe afai e te salamo (tagai MFF 19:15–20).