Fiafia
I le molimauina o “faamoemoega e faavavau” o le Atua, na aoao mai ai le perofeta o Liae, “Ua ola tagata ina ia latou maua le olioli“ (2 Nifae 2:15, 25).
E finagalo le Tama Faalelagi ina ia tatou maua le fiafia moni tumau. O lo tatou fiafia o le ata o faamanuiaga uma ua Ia tuuina mai ia te i tatou—aoaoga o le talalelei, poloaiga, sauniga o le Perisitua, sootaga faaleaiga, Perofeta, malumalu, matagofie o le foafoaga, ma e oo lava i avanoa e tofotofoina ai e le fili. O Lana fuafuaga mo lo tatou faaolataga ua ta’ua “o le ala sili o le fiafia“ (Alema 42:8). Na Ia auina mai Lona Alo Pele e faia le Togiola ina ia mafai ona tatou maua le fiafia i lenei olaga ma maua se atoatoaga o le olioli i le faavavau.
E toatele tagata ua latou taumafai e saili le fiafia ma le faamalieina i gaoioiga e le tusa ai ma poloaiga a le Atua. O le le amanaiaina o le fuafuaga a le Atua mo i latou, ua latou teena ai le punavai o le fiafia moni. Ua latou gauai atu i le tiapolo, o lē “saili ina ia malaia tagata uma e pei o ia lava“ (2 Nifae 2:27). E le pine ae latou iloa le moni o le lapataiga a Alema i lona atalii o Korianetona: “O le amioleaga e lē o le fiafia lea” (Alema 41:10).
O isi ua na ona saili lava e maua le fiafia i le olaga. O le avea o lenei mea ma a latou sini autu, ua latou faatagaina ai faafiafiaga lē tumau e faasalaveia i latou mai le fiafia tumau. Ua latou taofia mai ia i latou lava le olioli tumau o le tuputupu ae faaleagaga, auauna atu, ma le galue malosi.
A o e saili ia e fiafia, ia manatua ua na o le pau lava le ala i le fiafia moni o le ola i le talalelei. O le a e maua le fiafia faavavau filemu a o e taumafai e tausi poloaiga, tatalo mo le malosi, salamo i au agasala, auai i gaoioiga lelei, ma tuuina atu auaunaga aoga. O le a e iloa ai e maua le fiafia i totonu o tuaoi ua uma ona faatulagaina e se Tama alofa i le Lagi.
E mafai ona sosolo lou fiafia. Ao matauina oe e isi, latou te ono mananao e fia iloa le faapogai o lou olioli. E mafai foi e isi ona lagona le fiafia lea e oo mai e ala i le ola ai i le talalelei a Iesu Keriso.