Salamo
O le salamo o se tasi lea o uluai mataupu faavae o le talalelei (tagai Mataupu Faavae o le Faatuatua 1:4). E manaomia mo lou fiafia i lenei olaga seia oo atu lava i le faavavau. O le salamo e sili atu nai lo na o le faailoa atu o mea sese ua fai. O se suiga o le mafaufau ma le loto lea e aumaia ai ia te oe se vaaiga fou e uiga i le Atua, e uiga ia te oe, ma le lalolagi. E aofia ai le liliuese mai le agasala ma liliu atu i le Atua mo le faamagaloga. E uunaia e le alofa mo le Atua ma le manao moni e usitai i Ana poloaiga.
O Le Manaomia o le Salamo
Ua folafola mai e le Alii e faapea “e le mafai ona fai le malo o le lagi ma tofi o se mea eleelea” (Alema 11:37). O au agasala e faapalapalaina ai oe—e te le agavaa ai e foi atu ma mau faatasi ma lou Tama Faalelagi. E aumaia ai foi le tiga i lou agaga i lenei olaga.
O le togiola a Iesu Keriso, ua saunia ai e le Tama Faalelagi le ala lenei e tasi mo oe e faamagaloina ai au agasala (tagai “Faamagaloga,” itulau 42–45). Na puapuagatia Iesu Keriso i le sala mo au agasala ina ia mafai ai ona faamagaloina oe pe afai e te salamo faamaoni. A e salamo ma faalagolago atu i Lona alofa tunoa e laveai ai, o le a faamamaina oe mai le agasala. Na ia fetalai mai:
“Ou te poloai atu ai ia te oe ia salamo—salamo, ne’i ou taia oe i la’u upu, i le tiga tele o lo’u loto ma lo’u ita, ma e faigata tele ou puapuaga—o le tiga e te le i iloa, ma o le uiga ese o le tiga e te le i iloa, ioe, o le faigata ona onosai e te le i iloa.
“Aua faauta, o au le Atua na puapuagatia i nei mea mo tagata uma, ina ia latou le puapuagatia i nei mea mo tagata uma, ina ia latou le puapuagatia pe afai latou te salamo;
“A e peitai, afai latou te le salamo, e ao ina latou tiga e pei o au;
“O le tiga lea na faagateteina ai au lava, o le Atua, le silisili ese i mea uma, ona o le tiga, ma na maligi ai le toto mai pu laiti uma lava o le tino, ma na tiga le tino atoa ma le agaga—ma sa ou loto ou te le inu i le ipu oona, ae teena—
“A e ui i lea, ia i le Tama le viiga, ma na ou inu ma faaumaina ai au sauniuniga i le fanau a tagata” (MFF 19:15–19).
O Le Matautia o le Faatuai ona Salamo
Aua e te taumafai e taumamāina lau agasala ma faatuatuai ona e salamo. Na lapatai mai Amoleka: “E tatau i tagata ona sauniuni i lenei olaga e fetaiai ma le Atua; ioe, faauta, o le aso o lenei olaga, o le aso lea e tatau ona fai ai e tagata a latou galuega… . o le mea lea ou te aioi atu ai ia te outou, aua tou te faatuai le aso o lo outou salamo e oo i le iuga; aua pe a mavae atu le aso nei o le ola ua tuuina mai e saunia ai i le ola faavavau, faauta, afai tatou te le faaaoga o tatou aso manu o i lenei olaga, ona oo mai ai lea le po o le pogisa, e le mafai ona fai ai se galuega e tasi” (Alema 34:32–33).
Elemene o le Salamo
O le salamo o se faagasologa tiga, peitai e oo atu ai i le faamagaloga ma le filemu. Na fetalai mai le Alii e ala mai i le perofeta o Isaia, “e ui lava ina pei o ofu mumu a outou agasala, e sisina ia e pei o le kiona; e ui lava ina mumu ia e pei o le ie ulaula, e avea e pei o fulufulu mamoe” (Isaia 1:18). Ua folafola mai e le Alii i le augatupulaga lenei, “O le ua salamo i ana agasala, e faamagaloina o ia, ma o au, le Alii, ou te le toe manatua lava” (MFF 58:42). O le salamo e aofia ai elemene nei:
Faatuatua i le Tama Faalelagi ma Iesu Keriso. O le malosi o le agasala e matautia. Ina ia saoloto mai ai, e tatau ona e liliu atu i lou Tama Faalelagi ma tatalo i le faatuatua. E ono taumafai malosi Satani e faaseseina oe e faapea e te le o agavaa e tatalo—e le o fiafia foi le Tama Faalelagi ia te oe ma o le a le faafofoga mai o Ia i au tatalo. O se pepelo lena mea. E saunia pea e le aunoa lou Tama i le Lagi e fesoasoani ia te oe pe afai o le a e alu atu ia te Ia ma le loto salamo. O loo ia te Ia le mana e faamalolo ai ia te oe ma fesoasoani ai ina ia e faatoilaloina le agasala.
O le salamo o se aga o le faatuatua ia Iesu Keriso—o se faailoga aloaia o le mana o Lana Togiola. Manatua e na o Lana lava faatulagaga e mafai ona faamagaloina ai oe. A outou malamalama ma le agaga faafetai i Lana Togiola ma Lona mana e faamamaina ai outou mai le agasala, ua mafai ona “faaaoga lo outou faatuatua e oo i le salamo” (Alema 34:17).
Faanoanoa mo le Agasala. Ina ia mafai ona faamagaloina, e tatau ona muamua ona e iloa i lou loto ua e agasala. Afai o e taumafai malosi e ola i le talalelei, o lena iloa o le a taitaiina atu i le “tiga e tusa i le Atua,” lea e “tupu ai le salamo e oo i le ola” (2 Korinito 7:10). O le tiga e tusa i le Atua e le oo mai ona o le taunuuga faalenatura o le agasala pe ona o le fefe i se faasalaga, ae e oo mai mai lou iloa, ua e faatiga i lou Tama Faalelagi ma lou Faaola. Pe a e lagonaina le tiga e tusa i le Atua, ua ia te oe le manao faamaoni mo le suiga ma le naunautaiga e te oo atu i tulaga uma e manaomia mo le faamagaloga.
Ta’uta’u Atu. “O le ua ufiufi lona solitulafono, e le manuia o ia; a o le ua faaali ma lafoaiina, e alofagia o ia” (Faataoto 28:13). E taua mo le faamagaloga, se naunautaiga e faailoa atu mea uma na e faia i lou Tama Faalelagi. Tootuli atu i Ona luma i le tatalo ma le faamaulalo, ta’uta’u atu au agasala. Ta’uta’u atu lou maasiasi ma lou ta’usalaina, ona e aioi atu ai lea mo se fesoasoani.
O solitulafono matuia, e pei o le solia o le tulafono o le legavia, e ono faaletonu lou avea ma se tagata o le Ekalesia. O le mea lea, e manaomia ai ona e ta’uta’u atu nei agasala i le Alii faapea foi ma Ona sui i totonu o le Ekalesia. E faia lenei mea i lalo o le fesoasoani a lou epikopo po o le peresitene o le paranesi, po o lou peresitene o le siteki po o le misiona foi, o e ua galulue o ni tagatavaai ma faamasino i totonu o le Ekalesia. E ui e na o le Alii e faamagaloina agasala, ae o nei taitai perisitua latou te faia se galuega e matuai taua lava i le faagasologa o le salamo. O le a latou le faalaua’iteleina le ta’uta’uina atu o au agasala, ma o le a fesoasoani atu ia te oe i le faagasologa o lou salamo. Ia e matuai faamaoni ia i latou. Afai e te ta’uta’u atu na o se vaega o mea sese laiti, o le a lē mafai lava ona e foia se solitulafono matuia e te le’i faailoa atu. O le vave ona e amataina o lenei faagasologa, o le vave foi lena ona e maua le filemu ma le olioli lea e maua mai i le vavega o le faamagalo atu.
Lafoaia o le Agasala. E ui lava o le ta’uta’u atu o se vaega taua o le salamo, ae e le lava lena. Na fetalai mai le Alii, “Tou te iloa faapea se ua salamo i ana agasala—faauta, na te tautau atu ma lafoa’ia” (MFF 58:43).
Ia faia se tautinoga mausali ma tumau o lou le toe faia o le solitulafono. Afai o le a e ola ai i lea tautinoga, o le a e le toe lagonaina lava le tiga o le agasala.
Ia vave ona e sola ese mai soo se tulaga matuia lava. Afai o lea tulaga e mafua ai ona e agasala pe o le a mafua ai foi ona faia le agasala, alu ese. E le mafai ona faaauau ai pea ona e faalatalata i le faaosoosoga ma faamoemoe o le a mafai ona e teena le agasala.
Toe Faaleleia. E tatau lava ona e toe faaleleia i le mamao e mafai ai mea uma na faaleagaina i au amioga, pe o se meatotino a se tagata pe o se igoa tauleleia o se tagata. O le naunautai e toe faaleleia e faaali atu ai i le Alii o le a e faia mea uma e te mafaia e te salamo ai.
Ola Amiotonu. E le lava le na o le taumafai e tetee atu i le leaga pe faagaogaoina foi lou olaga mai agasala. E tatau ona faatumuina lou olaga i le amiotonu ma auai i gaoioiga e aumaia ai le mana faaleagaga. Ia matuai tuuina atu oe lava i tusitusiga paia. Ia tatalo i aso uma ina ia tuuina mai e le Alii ia te oe le malosi e sili atu. Ia i ai foi ni taimi e te anapogi ai mo faamanuiaga faapitoa.
O le usiusitai atoatoa e aumaia ai le mana atoatoa o le talalelei i lou olaga, e aofia ai le malosi faateleina e faatoilalo ai ou vaivaiga. O lenei usiusitai e aofia ai gaoioiga atonu e te le i manatu i ai muamua o ni elemene o le salamo, e pei o le auai i sauniga, totogiina o le sefuluai, tuuina atu o auaunaga, ma le faamagalo atu i isi. Ua folafola mai e le Alii, “O le salamo ma faia poloaiga a le Alii o le a faamagaloina” (MFF 1:32).