Faaeeina Atu o Lima
O le faaeeina atu o lima o le faatulagaga lea na faaalia mai e le Alii mo le faataunuuina o le tele o sauniga o le perisitua, e i ai faamauga, faauuga, o le faamanuiaina o tagata o le ekalesia e galulue i tofiga, faamanuiaina o ma’i, ma le tuuina atu i isi o faamanuiaga o le perisitua (tagai MFF 42:44; Mataupu Faavae o le Faatuatua 1:4–5). O i latou o loo i ai le pule o le perisitua e faaee atu o latou lima i luga o le ulu o le tagata o loo tuuina atu i ai le sauniga. O le faia o lena mea, ua latou auauna ai o ni meafaigaluega e faamanuia atu ai le Alii i Lana fanau (tagai MFF 36:2).
O lenei faatulagaga o loo faaaogaina pea e le aunoa e i latou o loo umia le perisitua. Sa faauuina e Atamu alii amiotonu na tupuga mai ia te ia e ala i le faaee atu o lima (tagai MFF 107:40–50). Ina ua tuuina atu e Iakopo faamanuiaga i luga o Efaraima ma Manase, sa faaee atu ona lima i luga o o la’ua ulu (tagai Kenese 48:14–19). O Alema na ia “tofia faitaulaga ma toeaina i le faaee atu o ona lima, e tusa ma le tofiga paia mai le Atua” (Alema 6:1). Sa tuuina atu e Aposetolo o Peteru ma Ioane le meaalofa a le Agaga Paia e ala i le faaee atu o lima (tagai Galuega 8:14–17). I lenei tisipenisione, sa faaee atu e Ioane le Papatiso ia le Perisitua Arona i luga o Iosefa Samita ma Oliva Kaotui e ala i le faaee atu o lima (tagai Iosefa Samita—Talafaasolopito 2:68–69).