Alofa moni
O le alofa moni o le “alofa mama o Keriso,” po o le “alofa faavavau” (Moronae 7:47; 8:17). Na aoao mai le perofeta o Mamona: “E onosai le alofa, e agamalu, e le losilosi, e le faafefeteina, e le saili e ia ana lava mea, e le faaitaitagofie, e le mafaufau i le leaga, e le fiafia i le amioleaga, a e fiafia i le faamaoni, e faatoatoa i mea uma, e talitonu i mea uma e faamoemoe i mea uma e onosai i mea uma” (Moronae 7:45; tagai foi 1 Korinito 13:4–7).
O Iesu Keriso o le faataitaiga sili lea o le alofa. I Lana misiona i le olaga nei, sa masani ona Ia “femaliuai ma agalelei,” i le aoaoina o le talalelei ma faaali atu le alofa mutimutivale mo e matitiva, mamai, ma lotovaivai (tagai Mataio 4:23; Mareko 6:6; Galuega 10:38). O Lana faaaliga maualuga o le alofa, o Lana Togiola le iu lea. Na Ia fetalai, “E le sili lava le alofa o se tasi i lenei alofa, ia tuuina atu e se tasi lona ola e sui ai ana uo“ (Ioane 15:13). O le faaaliga silisili lea o le onosai, agalelei, ma le le manatu faapito ua tatou iloa. Faatasi ai ma se malamalamaaga i le alofa le uma o le Faaola, e mafai ona e faaalia le faatuatua ma le salamo i au agasala, ma le mautinoa o le a Ia faamagaloina oe ma faamalosia oe i au taumafaiga e ola i le talalelei.
E finagalo le Faaola e te mauaina Lona alofa, ma e finagalo foi o Ia ina ia e faasoa atu i isi. Sa Ia faaali i Ona soo: “O le poloaiga fou ou te tuu atu ai ia te outou, ia outou fealofani faapei ona ou alofa atu ia te outou. O le mea lea e iloa ai e tagata uma lava o ou soo outou pe afai ua outou fealofani” (Ioane 13:34–35). I a outou fegalegaleaiga ma tagata o le aiga ma isi, ia e tepa taula’i atu i le Faaola o lou faataitaiga. Taumafai e alofa e faapei ona Ia alofa, faatasi ai ma le agaga e tumu i le alofa faifai pea, onosai, ma le alofa mutimutivale.
A o faaauau ona e mauaina le alofa atoatoa o le Faaola ma a o e faaalia uiga faaKeriso mo isi, o le a e iloa ai o le a faateleina lou alofa. O le a e lagonaina le olioli o le i ai i le galuega a le Alii. O le a avea le Agaga Paia ma au soa tumau, e taitaiina oe i au auaunaga ma au fesootaiga ma isi. O le a e saunia e fetaiai ma le Alii i le Faamasinoga, pe a Ia tauia oe e tusa ma lou maelega i Lana galuega. Sa aoao mai Mamona:
“Afai e leai se alofa ia te outou, e lē aoga lava outou, aua e lē uma le alofa. O le mea lea ia outou uumau ai le alofa, ua silisili i mea uma, auā e faaleaogaina mea uma —
“A o le alofa moni, o le alofa mama lea o Keriso, e tumau ia e faavavau; o i latou uma foi ua maua ua i ai lea alofa i le aso gataaga, e lelei ia te i latou.
“O le mea lea ou uso pele e, ia outou tatalo atu ai i le Tama ma le malosi uma o le loto, ina ia faatumuina outou i lenei alofa ua foaiina mai ia te i latou uma o e ua fai ma soo faamaoni o lona Alo o Iesu Keriso, ina ia avea outou ma atalii o le Atua, ina ia foliga i tatou ia te ia pe a faaalia mai o ia, auā tatou te iloa atu ia te ia e pei lava ona i ai nei o ia, ina ia ia te i tatou lenei faamoemoe, ina ia faamamaina i tatou, e pei ona mama o ia” (Moronae 7:46–48).