Uelefea
O tagata uma lava taitoatasi o le Ekalesia o loo i ai ni matafaioi autu se lua tau le uelefea: ia avea ma se tagata e faalagolago ia te ia lava ma tausia e matitiva ma e le tagolima.
O loo i ai i matua le tiutetauave paia o le tausiaina o le uelefea faaletino ma le faaleagaga o a latou fanau. Pe a matutua le fanau, o le a ia i latou lava le matafaioi mo lo latou lelei. E tatau i matua ona aoaoina i latou i mataupu faavae o le uelefea, e fesoasoani ai ia i latou e ola faalagolago ia i latou lava ma tausia o latou lava aiga i le lumanai. E mafai foi e matua ona tuuina atu avanoa e fesoasoani ai e tausia e matitiva ma e le tagolima.
Pe afai o oe o se tagata matua o le Ekalesia, o nei fautuaga uma e mulimuli mai e faatatau tonu lava ia te oe. Pe afai o oe o se alii po o se tamaitai talavou, o le tele foi o nei fautuaga e faatatau foi ia te oe, e tusa lava foi pe o e matua faalagolago atu lava i ou matua.
Avea ma se Tagata Ola Faalagolago ia te oe lava
O le matafaioi patino lava mo lou manuia lautele, i lagona, faaleagaga, faaletino, ma le tamaoaiga e muamua lava pau atu ia te oe, lona lua i luga o lou aiga, ma lona tolu ai luga o le Ekalesia. I lalo o musumusuga a le Alii ma ala mai i au lava galuega, e tatau ona e saunia mea uma lava e manaomia mo le manuia faaleagaga ma faaletino o oe ma lou aiga.
O le a sili atu ona lelei ona e tausia oe lava ma lou aiga pe afai ua e ola faalagolago oe lava ia te oe. Ua e saunia e feagai ma taimi o faafitauli e aunoa ma lou faalagolago atu i isi.
E mafai ona e ola faalagolago ia te oe lava e ala lea i lou (1) faaaogaina tatau o avanoa e aoga ai; (2) faaaogaina o mataupu faavae lelei o meataumafa ma le soifua maloloina; (3) saunia ma le mauaina o galuega talafeagai; (4) teuina o se sapalai o meaai ma lavalava i le mea e faatagaina e le tulafono; (5) puleaina lelei o au punaoa, e aofia ai le totogiina o le sefuluai ma taulaga ma aloese mai le aitalafu; ma (6) atinaeina le malosi i le faaleagaga, lagona, ma mea e masani ai.
Ina ia mafai ona ola faalagolago ia te oe lava, e tatau ona e naunau e galue. Ua poloai mai le Alii ia tatou galulue (tagai Kenese 3:19; MFF 42:42). O galuega faamamaluina o se sosia faavae lea o le fiafia, taua o le tagata lava ia, ma le faamanuiaina.
Pe afai lava ua le mafai mo se taimi le tumau ona e ausia ou manaoga e ala i au lava taumafaiga po o le lagolago mai foi o lou aiga, e mafai e le Ekalesia ona fesoasoani ia te oe. I lea tulaga, e masani ona saunia e le Ekalesia ia punaoa e tausia ai le ola e fesoasoani ia te oe ma lou aiga ina ia mafai ai ona e toe ola faalagolago ia te oe lava.
Tausiga o e Matitiva ma e le Tagolima
E poloaiina pea e le aunoa e le Alii Ona tagata ina ia tausia e matitiva ma e le tagolima. Na Ia fetalai mai, “Ia manatua foi i mea uma, e matitiva, ma e le tagolima, o e mama’i ma e puapuagatia, aua o le na te le faia ia mea, e lē o so’u soo o ia” (MFF 52:40).
E tele auala e mafai ai ona e tausia e matitiva ma e le tagolima. O se tasi auala taua e ala lea i le anapogi ma totogi taulaga anapogi, lea e faaaoga e le epikopo po o le peresitene o le paranesi e fesoasoani atu ai i tagata o le uarota po o le paranesi o loo pagatia i le matitiva, o ma’i, po o isi foi tulaga faigata. E mafai foi ona e tuuina atu ou taimi ma fetufaai atu au taleni. E mafai ona e auauna atu i e ua leai ni mea e nonofo ai, o i latou e le atoatoa le malosi i o latou tino po o mafaufau, tina ua oti a latou tane, ma isi i ou tuaoi ma totonu o lou nuu.
E le gata i le tuuina atu o fesoasoani i le lotoifale ma tagata taitoatasi o e le tagolima, ae ua aapa atu foi le Ekalesia i tagata i le lalolagi atoa, e tusa lava pe o le a le tapuaiga e auai, o e ua aafia i taunuuga o faalavelave faalenatura, oge, o faama’i, ma isi faigata. Ua saunia e le Ekalesia punaoa e tausia ai ma fesoasoani ai i aiga ma tagata taitoatasi ina ia toe faaleleia ma galulue agai atu i le toe ola faalagolago o le tagata ia te ia lava. O foai i le Tupe Faaagaga mo Aoga a le Ekalesia ua tuuina atu ai fesoasoani mo tagata lima vaivai o le Au Paia o Aso e Gata Ai, e faalauteleina ai a latou aoaoga. Ua ofoina atu foi e tagata tautua faamisiona o le Ekalesia o latou taimi ma punaoa e faaleleia ai le faitautusi ma le tusitusi, siitia ai tulaga tau le soifua maloloina, ma tuuina atu ai foi aoaoga.