Tauagafau/Tausaafia
O le tausaafia o se uiga o le lotomaualalo ma le faaaloalo e ala i laei, teuga, gagana, ma amioga. Afai e te tauagafau, e te le manao e tosina mai ni manatu e lē talafeagai. Nai lo o lena, e te saili e “vivii atu i le Atua i o outou tino ma o outou agaga” (1 Korinito 6:20; Tagai foi i le fuaiupu 19).
Afai e te le o mautinoa pe o talafeagai ou laei ma au teuga, ia fesili ifo ia te oe lava, “Pe ou te faalogoina ea ni lagona lelei i o’u foliga pe afai ma te faatasi ai ma le Alii?” E mafai ona e fesiligia oe i lea lava foi fesili e uiga i lau gagana ma lau amio: “Pe o le a ou tautala i nei upu pe auai i nei gaioiga pe ana faapea o loo faatasi ai le Alii?” O au tali faamaoni i nei fesili e mafai ai ona taitaiina oe e faia suiga taua i lou olaga. O faamatalaga o loo mulimuli mai o le a fesoasoani ia te oe i au taumafaiga ina ia e tauagafau pe tausaafia foi.
Laei ma Teuga
Ua apoapoai mai e le aunoa ia perofeta ia i tatou, ina ia faaaogaina laei talafeagai. O lenei fautuaga o loo faavae i luga o le upumoni o le tino o le tagata o le foafoaga paia lea a le Atua. Ia e faaaloalo i lou tino o se meaalofa mai le Atua. O ou laei ma ou foliga vaaia, e mafai ai ona e faaali atu i le Alii e te iloaina le taua o lou tino.
O ou laei e faailoa atu ai po o ai oe. E auina atu ai ni savali e uiga ia te oe, ma e uunaia ai au amioga ma amioga foi a isi. A fai faalelei au teuga ma talafeagai ou lavalava, e mafai ona e valaaulia le Agaga e mafuta mai ma avea ai foi ma ni faatosinaga lelei mo i latou o loo siomia oe.
I le totonugalemu o le poloaiga ina ia tauagafau ma tausaafia, o loo i ai se malamalamaaga i le mana paia o le foafoaga, o le mana lea e aumaia ai fanau i le lalolagi. O lenei mana e na o le va lava o le tane ma le ava e faaaogaina ai. O laei e vavala mai ai itutino ma faatosina ai lagona feusuai, e aofia ai ofuvae ma laulavalava ua matua pupuu tele, o ofu fufusi, ma ofu e le ufiufia ai le puimanava, e faaosofia ai manaoga ma amioga e solia ai le tulafono o le legavia a le Alii.
E le gata i le aloese mai laei e vavala mai ai itutino, ae e tatau foi ona e aloese mai le soona faapapanu o au teuga, laei, ma foliga vaaia. Ia tumama e le aunoa i laei, teuga, ma amioga, ma aua nei fa’inaelo pe manatu faatalalē i ai. Aua le faalaleagaina lou tino i le taina ai o pe’a po le faapupuina e tatui ai meateutino. Afai o oe o se tamaitai ma ua e manao e tui ou taliga, ia fai na o se tasi se pea tautaliga laiti.
Ia faatumauina tulaga maualuluga o uiga tauagafau po o le tausaafia i soo se mea lava. Aua le tuuina i lalo ou tulaga faatonuina ina ia faatosina mai ai isi i lou tino pe maua mai ai foi se faatagana mai isi. O soo moni lava o Iesu Keriso e faatumauina tulaga faatonuina a le Alii e tusa lava po o a suiga fou ua i ai o teuga po o uunaiga mai isi tagata.
Gagana ma Amio
E pei lava o ou laei ma teuga, o lau gagana ma lau amio e faailoa atu ai le ituaiga tagata e i ai oe. O au upu ma gaoioiga e mafai ona faia se aafiaga silisili mo oe ma isi. Ia faailoa atu oe lava i gagana mama, lelei, ma faagaeetia ma gaoioiga e aumaia ai le fiafia i e o loo siomia oe. O au taumafaiga ia tauagafau ma tausaafia i upu ma galuega, e faateleina ai le taitaiga ma le faamafanafanaga mai le Agaga Paia.
Ia aloese mai gagana le mama ma faiga masani o loo faaaogaina ai ma le le faaaloalo e le lalolagi le suafa o le Alii. Ia tetee atu i soo se faaosoosoga e auai i ni amioga matuia po o le lē talafeagai. O le natura lē faaaloalo o na gagana ma amioga, e faataumaoia ai lou mauaina o musumusuga filemu a le Agaga Paia.