Faamoemoe
O le upu faamoemoe i nisi taimi e le malamalama. I la tatou gagana o aso uma, o le upu e masani lava ona faaiteite mai ai le le mautonu. Mo se faataitaiga, e mafai ona tatou faapea o loo tatou faamoemoe mo se suiga o le tau pe o se asiasi mai o se uo. I le gagana a le Talalelei, o le upu faamoemoe o le mautinoa, lē maluelue, ma le olaola. Ua talanoa Perofeta e uiga i le i ai o se “faamoemoe mausali” (Alema 34:41) ma se “faamoemoe ua ola” (1 Peteru 1:3). Na aoao mai le perofeta o Moronae, “O lea, ai se faatuatua i le Atua, e mafai o ia ona faamoemoe ma le faamaoni i se lalolagi e sili ona lelei, ioe, o se tofi i le itu taumatau o le Atua; e mai le faatuatua lea faamoemoe, e fai ai foi ma taula i agaga o tagata faamaoni ma faamausali ai i latou e alualu i luma ma le le aunoa i galuega lelei, e ala mai ai foi le viiga i le Atua” (Eteru 12:4).
Pe a maua e i tatou le faamoemoe, tatou te faatuatuaina folafolaga a le Atua. Ua maua e i tatou se faamautinoaga lē leoa pe afai tatou te faia “galuega o le amiotonu,” tatou te “maua ai [lo tatou] taui, o le filemu lea i lenei lalolagi, ma le olaga faavavau i le lalolagi a sau “ (MFF 59:23). Na aoao mai e Mamona o lea faamoemoe e maua e ala i le Togiola a Iesu Keriso: ”Po o le a lea mea tou te faamoemoe i ai? Faauta, ou te fai atu ia te outou, e ia te outou le faamoemoe ona o le togiola a Keriso, ma le mana o lona toe tu mai, ina ia faatuina i le ola faavavau; o lenei foi ona o lo outou faatuatua ia te ia e tusa ma le mea ua folafolaina“ (Moronae 7:41).
Ao e taumafai e ola i le talalelei, e te tuputupu ae i lou malosi “ina ia tele lava lo outou faamoemoe ona o le mana o le Agaga Paia“ (Roma 15:13). E faateleina lou faamoemoe pe a e tatalo ma saili le faamagaloga a le Atua. I le Tusi a Mamona, o se faifeautalai e igoa i a Arona na faamautinoa atu i se tupu Sa Lamana, ”Afai e te salamo i au agasala, ma faasifo atu i luma o le Atua, ma valaau atu i lona suafa ma le faatuatua, o loo talitonu o le a e maua ai, ona e maua lea le mea ua e manao i ai“ (Alema 22:16). E te maua foi le faamoemoe a o e suesue i tusitusiga paia ma mulimuli i a latou aoaoga. Na aoao mai le Aposetolo o Paulo, ”O mea uma foi na tusia anamua, na tusia ia e aoao mai ai ia te i tatou; ina ia tatou maua le faamoemoe e tupu mai i le onosai, ma le faamafanafana mai o tusi“ (Roma 15:4).
O le mataupu faavae o le faamoemoe e oo atu i le faavavau, ae e mafai foi ona lagolagoina oe e ala i luitau o aso fai soo o le olaga. “Amuia le tagata,” le tala a le Faisalamo, “o i ai le Atua o Iakopo e fai mona fesoasoani; o i ai lona faamoemoe ia Ieova lona Atua” (Salamo 146:5). Faatasi ai ma lea faamoemoe, e mafai ona e maua le olioli i le olaga. E mafai ona e maua le “onosai, ma ia faatoatoa i na puapuaga ma le faamoemoe mausali, e oo i le aso e malolo ai outou ai o outou puapuaga uma lava” (Alema 34:41). E mafai ona e “fetaomi atu i luma ma le faamaoni ia Keriso, ina ua i ai le faamoemoe atoatoa lelei, i le ma le alofa atu i le Atua atoa ma tagata uma. O lea, afai tou te fetaomi atu i luma, o fiafia i le afioga a Keriso, ma tumau lava e oo i le iuga, faauta, o loo faapea ona fetalai mai le Tama: Tou te maua le ola faavavau” (2 Nifae 31:20).