Feagaiga
O se feagaiga o se maliliega paia i le va o le Atua ma se tagata po o se vaega o tagata. E faia e le Atua ni tuutuuga patino, ma Ia folafola mai e faamanuia i tatou pe afai tatou te usiusitai i na tuutuuga. Pe a tatou filifili e le tausia ia feagaiga, e le mafai ona tatou maua faamanuiaga, ma o nisi taimi tatou te puapuagatia ai i se faasalaga e tusa ai o se taunuuga o lo tatou lē usiusitai.
O sauniga faaola uma o le Perisitua e o faatasi ma ni feagaiga. Mo se faataitaiga, e te osia se feagaiga pe a papatiso, ma e te faafouina lena feagaiga i taimi taitasi uma e te taumafa ai i le faamanatuga (tagai Mosaea 18:8–10; MFF 20:37, 77, 79). Afai ua e mauaina le Perisitua Mekisateko, ua e ulu atu i le tautoga ma le feagaiga o le Perisitua (tagai MFF 84:33–44). O faaeega paia ma sauniga o le faamauga e aofia ai foi feagaiga paia.
Ia manatua pea ma faamamalu feagaiga ua osia ma le Alii. Ona le manaomia lea ona poloaiina oe i mea uma e te faia (tagai MFF 58:26–28). O le a musuia oe e le Agaga Paia, ma o le a avea uiga faaKeriso ma vaega o lou natura. E pei ona folafola mai e le Alii, o le a e “maua lea faaaliga ma lea faaaliga, o lea poto ma lea poto ina ia e iloa mea lilo atoa ma mataupu tau le filemu—e aumaia le olioli, e aumaia foi le ola faavavau“ (MFF 42:61). E tatau ona avea ma ou faamoemoega silisili le olioli i le faapaiaga e sau mai le taitaiga faalelagi; a o lou popolega silisili o le lē mauaina lea o ia faamanuiaga.